BURO PISEL: Nim kombe image mo stetu puli ermokjip bar kanal ne tuwal punon. Stetu puli kombe ermokjip pile, pende tukro kes mom. Ba ende pam kes namom kawei wei pam; ala yu bol mokjip penema wei mom. Nim nesi wanem ye ki si embe don. “Stetu e kolnga enjip kana?” Olom embe dom, “Ma, e kombe wei enjip kanan pa stetu pende meim ngonom, ala erka naenjip eri.” “Ala nim, gar tau kenjip tuwalto pam mo don?” Olom embe dom, “Ma, komb na anj si papa erim bar paim. Ala alamb kes tokes moksam ne enjip kaple naerim padom.” Nim bunuman puli kele, ‘nawal wei si enjip aei nepisen?’

Baibel kombe stetu ende erpakjip kes namom panimen bol ding mal. Baibel e, kombe kes buk pa—buk porpor ngonom. Weieri, buk pende kombe bonjip buk meim. Ba stetu pende tukro kes mom mal, kunum kanan wopungo buk pende nomne tambem pende kes mom eri. Sains sape kol sinjip kunum, kombe buk a yu bol mokjip bol woding napum, gend pam. Ala alamb nganj kantawol enam mal yu bol mokjip pake narom, alamb erkes enda pam. Kombe buk e, bonjip kunum pam mal napam, tambem pende balne kesmom ala pende keswei molsikem.

Baibel e buk jelmal wei. Yu bol kenjip meim kongar 3,500 wopunom, ba yuwom dingmal pra pameim. Baibel bol opyem enjip ga, wusngam puli karkar ere Baibel tokes moksam ne enjip.—Pende embe mal, dop ganjip, alamb gernam bar maninjip, ala Baibel—yuka nameim paninjip. Alamb sape kolkol sim, ba Baibel yu bunuman ka ngo kongan ka erpameim. Boks yu kane “Kombe mo Kombe Wei Neori Kenjip?”

Kunum pende ne nim embe nepisel, ‘Baibel yu meim kenem yipe kunum pakeroda mo ma?’ Ki e pundom sinal nepin dal, nem ki embe ngondol: ‘Nal ombun kerma pende yipe alamb bol mine wonom? Nal ombun kesmal wei pende mine wonom?’ Nim opo nganmal, kulu erkes moksim, kunumb nom, mo mambnem dulto naesim pisa pisen. Baibel kolta dom yu meim omukro kane, nem ki embe ngondol, ‘Alamb mambnem embe karkar enjip dal, kulu wose ka punda mo?’

KUMBOL AMIN MEM

“Kumbol amin mem esim alamb kapisam, nalenem, alamb enjep Got ngalem paninam.” (Matyu 5:9, NWT) “Enem enam panda wal porpor ere, alamb porpor bol kumbol amin moram.”—Rom 12:18, NWT.

WANDIL SI, ALLA WAKRONDOL

“Wandil sim alamb kapisam, nalenem, alamb enjep wandil sinam eri.” (Matyu 5:7, NWT) “Alamb ende enem ombun ngonam anjngo kauwo kapile alla aijep wakronam. Ala mem pande, ende bol embe enjip dal wakronamen eri. Johova a enem alla wakronda kawei pisem, embe pile enem mambnem dingmal enam.—Kolosi 3:13, NWT.

NGANJ KANEM KANEM PAM ALAMB, KUMBOL DING MEIM

“Ye ding eri wusngam a, mal yemyem sepunom bar [Got] alamb porpor moram ne ersem.” (Aposel 17:26, NWT) “Got alamb porpor bol mambnem dingmal enem. Ala ye dulom jeljel meim ba, olom bol kisal golo mambnem dulto esim alamb, olom enjep bol kapisem.”—Aposel 10:34, 35, NWT.

MAL TAWOL KA ENDEL

“Johova Got ersem ye si kulu Iden mokum. Ele molo kongan ere kulu kantawol enda ne erim.” (Stat 2:15) Got “mal tokes moksim alamb topor ninda.”—Revelesen 11:18, NWT.

WAL BUMBON NA PASDIA MEM TUIRONDOL

“Enem dungol au ninde wal bumbon gosim mem tuironam. Nalenem, alamb ende wal puli senda ba, wal e olom kolmem nangonda.” (Luk 12:15, NWT) “Embe pile enem kuru meim alamb, pasdia yu, mambnem jengimb paim yu na wal bumbon gosim yu enem bol tuwal min nawonda.”—Efesus 5:3, NWT.

MAMBNEM DULTO NA KONGAN ER OMBOL ENDEL

“Kin wal porpor esmen bar, kin mambnem dulto enamen kapismen.” (Hibru 13:18, NWT) “Kunumb nonom ye kunumb ala nanonda, kapaim olom kongan ombol er enda.”—Efesus 4:28, NWT.

PAKE SINDA PAIM ALAMB PAKE RONDOL

“Kumbol ombun simeim alamb kumboljep erka ere, dongal napaim alamb pakero, ala alamb porpor bol wimuk kamkam nanim mambnem endel.” (1 Tesalonaika 5:14, NWT) “Kenem ngal beksam na amb kangil kantawol kawei ere ombun aijep pakero kaunamen.”—Jems 1:27, NWT.

Mambnem ka embe mal, Baibel erkelde nomolpa esmen bar karkar enamen nedom. Alamb porpor yu meim karkar enjip dal, ombun duwom puli yipe mine wonom e, wonda mo? Baibel kolta ninda yu meim yipe kenem kunum pake kermaro ye kunum ngonom! Yipe kunum, Baibel yu meim kenem nalmal pakeronda?

Sape kerma pam ye ende embe nim: “Mambnem dulto enem ye tane penema kerem, olom bunuman kapaim.” (Matyu 11:19, NWT) Yu e, nim kumbol ding seim mo? Nim wal ende eri woka pumdal, e tane penem a kerem nim bunuman ka karkar enen. Embe pile nim embe nepisel: ‘Baibel yu pakeronda pamdal, na nalmal pakerondo ombun duwom kaunal?’ Wal ende mine wom mal kandpe.

Delpin, b kongan puli erim bar kapil mom. Ba wamnam ombun kerma pende olom bol mine wom. Amblem barel mom gom. Andam bol bolsinjil mem keliprom. Ala ku ombun paim eri. Olom embe nim: “Na bu puli kend nalerim—ambilna na andana namonjil, ala gar nasem eri. Na pinj, na amb ma mal pam—alamb na nakanpol naronjip, dongal napam, ala mi bulto min wonda wal kanpol narond eri.”

Delpin pilkane erim yu e, yu weieri pam: “Kin kongar 70 mongse meimen, ala kin dongal pamdal kongar 80 moramen kaple enem. Ba kongar ele tuwalto kol meimen kunum nganj ngimbil na ombun puli kaumon; Kongar e kamkam wei wopundo kin pra pornimen.”—Buk Song 90:10, NWT.

Baibel a yu mom, Delpin pake kermarom. Ala alamb puli ombun kaujip ba, Baibel enjep nalmal pakerom mal, yu pengem talende bulto paim kanamen. Baibel, stetu pane yero yubolto sikenjin mal embe pinjip. Kombe bonjip buk alamb pake naronom, e Baibel bol dingmal ma. Nim pisen, Baibel waljel ende si enjip mo? Baibel Got bunuman meim,—alamb bunuman ma nepisen mo?—1 Tesalonaika 2:13.

Nim pra pilkane enen, alamb kanan nameimen, ala ombun puli kaumon eri. Ombun mine wo nim tomene kera ne enem kunum nejebar pu, pake si, kumbol amin molo, bunuman ka ngonda yu sinal ne enen?

Wusngam talende Baibel kenem pakerondo, ombun wonda kaunamen mal kanamen. Baibel nim taninde

1. ombun wonda tuirondol.

2. ombun wonda erkun endel.

3. erkun endel kaple naenda ombun kaundol.

Yu pengem pende bulto kanamen bar wusngam talende e omukro kanamen.