ʼE mole he me’a ʼe u ki te ’Atua pea ʼe mole he potu ʼe mole feala ke kaku ki ai. (Taaga Lea 15:3; Hepeleo 4:13) ʼE mole akoʼi ʼi te Tohi-Tapu ko te ’Atua ʼe ʼafio ʼi te potu fuli pe pea ma’uli ia me’a fuli pe ʼo te fakatupu. ʼE ina fakamahino ia ko te ’Atua ʼe ko he tahi pea ʼe ’i ai tona nofo’aga ʼo ia totonu ʼe ʼafio ai.

•   Te natula ʼo te ʼAtua: Ko te ʼAtua ʼe laumalie. (Soane 4:24) Ne’e he’eki ʼi ai he tagata kua sio ki ai. (Soane 1:18) ʼI te ʼu fakata ʼae ʼe tu’u ai te ʼAtua ʼi te Tohi-Tapu, ko te ako ʼe tou ma’u mai ai ʼe ’i ai tona nofo’aga totonu kae mole ko he tahi ʼe ma’uli ʼi te potu fuli pe.—Esaia 6:1, 2; Fakaha 4:2, 3, 8.

•   Te nofoʼaga ʼo te ʼAtua: ʼE nofo te ’Atua ʼi he potu fakalaumalie ʼe kehekehe ia mo tana fakatupu ʼae ʼe sio ki ai te mata ʼo te tagata. ʼI te potu fakalaumalie ʼaia, ʼe ’i ai tona nofo’aga totonu, ʼe ʼafio te ʼAtua ʼi te lagi. (1 Hau 8:30) ʼE talanoa ʼi te Tohi-Tapu ki he ʼu ʼaselo ne’e ‘tutuʼu ia muʼa ʼo Sehova,’ a ʼe ha mai ai, ko te ʼAtua ʼe ʼafio ʼi tona koga mea totonu.—Sopo 1:6.

Kapau ko te ʼAtua ʼe mole ʼi te ʼu potu fuli pe, ʼe feala koa ke tokaga mai kia kita totonu?

 ʼEi. Ko te ’Atua ʼe tokaga kia tatou takitokotahi. Tatau aipe pe ’e ʼafio ʼi he potu fakalaumalie, ʼe tokogaʼi e te ’Atua ia natou ʼae fia tauhi ʼaki he loto katoa kia ia. (1 Hau 8:39; 2 Koloniko 16:9) Tou vakaʼi pe ’e tokoga feafea’i te ’Atua ki tana kau atolasio mo’oni:

•   Moka kotou faikole: ʼE fagono Sehova ki ʼakotou faikole ʼi te lakaga pe ʼae ʼe kotou fakahoko ai.—2 Koloniko 18:31.

•   Moka ʼe kotou lotomamahi: “ʼE ovi ia Sehova ia natou ʼae ʼe lotomamahi. ʼE ina haofaki ia natou ʼae ʼe lotovaivai.”—Pesalemo 34:18, NWT.

•   Moka ʼe ʼaoga he takitaki kia koutou: ʼE ‘fakaliliu anai koe e Sehova ke ke fakasiosio poto pea ʼe ina ako’i anai koe’ ʼaki tana Folafola, te Tohi-Tapu.—Pesalemo 32:8.

Ko te manatu ʼa ʼihi ʼo ʼuhiga mo te ʼAtua ʼe ʼafio ʼi te potu fuli pe

 Manatu ʼa te tokolahi: ʼE fakamo’oni e te ʼu palalau ʼa Pesalemo 139:8 ʼe ko teʼ Atua ʼe ’i te potu fuli pe. ʼE ui fenei te vaega: “Kapau e au hake ki te atu lagi, e ke nofo i ai; Kapau e au moe i te nofoaga o te kau mate, koena koe i ai.”

 Te moʼoni: ʼE mole talanoa ia Pesalemo 139:8 ki te nofo’aga ʼae ʼe ʼafio ai te ’Atua. ʼE ina fakamahino ʼaki he fa’ahiga palalau fakatuketuke ʼe mole ʼi ai he potu ʼo te ʼatulaulau ʼe mama’o ki te ’Atua ke tokoni mai.