ʼE Maʼuli Moʼoni Koa Te Tevolo?
Te Tali ʼi Te Tohi-Tapu
Ko te Tevolo ʼe ko he tahi ʼe maʼuli moʼoni. Ko te “pule ʼo te malamanei.” Ko te laumalie ne’e liliu ʼo agakovi pea ne’e fakafeagai ki te ʼAtua. (Soane 14:30; Efeso 6:11, 12) ʼE mole ko he higoa pe ʼe tahi ʼe tuku mai e te Tohi-Tapu ʼo ʼuhiga mo te Tevolo, koia ʼae ʼe feala ai ke tou mahino ki tona ʼuhiga totonu. Tou to’o he faʼifaʼitaki:
Ko te fakaʼuhiga ʼo te kupu Satana ko “Fakafeagai.”—Sopo 1:6.
Ko te fakaʼuhiga ʼo te kupu Tevolo ko “Fasitu’u.”—Apokalipesi 12:9.
ʼI te Tohi-Tapu, ko te kupu “Gata” ʼe fakaʼaogaʼi ki he tahi ʼe “Kaka.”—2 Kolonito 11:3.
Fakahala.—Mateo 4:3.
Gutu Loi.—Soane 8:44.
ʼE mole ko te aka ia ʼo te kovi
Ma’a ʼihi, ko Satana te Tevolo ʼe ko te aka ʼo te kovi ʼae ʼe ma’u ia tatou fuli. Kae ʼe fakamatala ʼi te Tohi-Tapu te faipalalau ʼa te ’Atua pea mo Satana. Ko te ʼAtua ʼe haohaoa, ne’e mole feala ke felogoi mo he me’a ʼe agakovi ʼe ia ia. (Tetelonome 32:4; Sopo 2:1-6) ʼI te tahi aluʼaga, ne’e fakahalaʼi e Satana ia Sesu. Kae ʼe ui ʼi te Tohi-Tapu ne’e mole ma’u he agahala ia ia. (Mateo 4:8-10; 1 Soane 3:5) Ko te tupu’aga la ʼaia ʼo te fakaha ʼi te Tohi-Tapu, ko te Tevolo ʼe ko he tahi ʼe ma’uli mo’oni kae ʼe mole ko te fakailoga ʼo te kovi.
ʼE hahaʼi ia natou ʼae ʼe mole tui ko te Tevolo ʼe ko he tahi ʼe ma’uli mo’oni. ʼE tonu koa ke tou punama’uli ki ai? Kailoa ia. ʼE ui ʼi te Tohi-Tapu, ko Satana ʼe ina kaka’i te hahaʼi ke lava ʼana fakatu’utu’u. (2 Tesalonika 2:9, 10) Ko tana tahi kaka, ko tana fakapo’uli’i te ʼatamai ʼo te tokolahi ke natou tui, ko ia ʼe mole ko he tahi ʼe ma’uli mo’oni.—2 Kolonito 4:4.
Te manatu ʼa ʼihi ʼo ʼuhiga mo te Tevolo
Te manatu ʼa te tagata: Ko Lusifelo ʼe ko te tahi higoa ʼaia ʼo te Tevolo.
Te manatu ʼae ʼe moʼoni: ʼI ʼihi Tohi-Tapu, ko te kupu “Lusifelo” ʼe ha ʼi te tohi ʼa Esaia 14:12. Ko te kupu Fakahepeleo ʼae ne’e fakaliliu ʼaki te kupu “Lusifelo” ʼe fakaʼuhiga ki te “gigila.” Ka tou lau te ʼu kapite ʼae ʼi mu’a ʼo te tohi ʼa Esaia 14:12 pea mo te ʼu kapite ʼae ʼe hoa ki ai, ʼe tou mahino lelei ai ko te kupu “gigila” ʼe fakaʼaogaʼi ki te ʼu hologa hau ʼo Papiloni ʼae ka fakalainoaʼi anai e te ʼAtua ʼuhi ne’e kua lahi fau tanatou fiatu’u. (Esaia 14:4, 13-20) Ne’e fakahigoa’i feia te hologa hau ʼo Papiloni ʼi te hili pe ʼo te to ʼo Papiloni.
Te manatu ʼa te tagata: ʼE hage te gaue ʼa Satana maʼa te ʼAtua ʼe ko te gaue ʼa te “Avoka ʼo te puleʼaga.”
Te manatu ʼae ʼe moʼoni: Ko te Tevolo ʼe ko te fili ʼo te ʼAtua, kae ʼe mole ko hana faifekau. ʼE fakafeagai ia Satana te Tevolo kia natou ʼae ʼe kaugana ki te ʼAtua pea ʼe ina tukugakovi’i natou ʼaki he ʼu lo’i.—1 Petelo 5:8; Apokalipesi 12:10.