Ia Mateo 28:19, 20, ʼe fakaha ai e Sesu te ʼu manatu ʼe feala ai ki he tahi ke liliu ko he Fakamoʼoni ʼa Sehova. ʼE fakamahino ʼi te ʼu vaega ʼaia pe kotea ʼe tonu ke fai e he tahi ke liliu ko he tisipulo ʼa Kilisito, ko tona fakaʼuhiga ke palalau ʼo ʼuhiga mo Sehova pea mo fakamafola tona huafa.

1 Manatu: Ke kotou iloʼi pe kotea ʼae ʼe akoʼi mai ʼi te Tohi-Tapu. Neʼe fakatotonu e Sesu ki ʼana tisipulo ke ‘natou fai ni tisipulo.  . . mo akoʼi natou.’ (Mateo 28:19, 20) Ko te kupu ʼae neʼe fakaliliu ʼaki te kupu “tisipulo” ko tona fakaʼuhiga “ko he tahi ʼe ako.” ʼI te Tohi-Tapu ʼo feia mo te ʼu akonaki ʼa Sesu, ʼe fakamahino mai ai pe ʼe feafeaʼi hatatou maʼu ia he maʼuli fiafia. (2 Timoteo 3:16, 17) ʼE matou fiafia ʼi te tokoni atu kia koutou ke kotou iloʼi pe kotea ʼae ʼe akoʼi mai ʼi te Tohi-Tapu kapau ʼe kotou loto ke fai hakotou ako Tohi-Tapu pea ʼe mole totogi.​—Mateo 10:7, 8; 1 Tesalonika 2:13.

2 Manatu: Ke kotou maʼuliʼi te ʼu faʼahi ʼae ʼe kotou ako. Neʼe ui e Sesu ko natou ʼae ʼe ako ʼe tonu ke natou toe “taupau . . . te u mea fuli nee [ina] fakatotonu.” (Mateo 28:20) Ko tona fakaʼuhiga ʼe tonu ke ina ʼekenaki koutou ke kotou fai ni fetogi maʼuhiga ʼi ʼakotou aga mo ʼakotou manatu kaʼe mole ko he akoʼi feia pe ʼo te Tohi-Tapu. (Gaue 10:42; Efeso 4:22-29; Hepeleo 10:24, 25) Ko natou ʼae ʼe natou maʼuliʼi te ʼu fakatotonu ʼa Sesu, ʼe natou fakatuʼutuʼu leva ki ʼamuli ke natou muliʼi ia ia pea mo foaki tonatou maʼuli kia Sehova.​—Mateo 16:24.

3 Manatu. Kotou papitema. (Mateo 28:19) ʼI te Tohi-Tapu, ʼe fakatatau te papitema ki he tanu. (Vakaʼi ia Loma 6:2-4.) ʼE ina fakata te tanu ʼo tokita maʼuli ʼafeā pea ko te kamataʼaga ʼaia ʼo he maʼuli foʼou. Pea ko takotou papitema ʼe ko te fakaha ia muʼa ʼo te kaugā malie neʼe kotou mulimuli ki te ʼu ʼuluaki manatu ʼae neʼe talanoa ki ai Sesu. Pea neʼe kotou kole ki te ʼAtua he leʼo ʼo loto ʼe maʼa.​—Hepeleo 9:14; 1 Petelo 3:21.

Fakaha ki te kau tagata ʼafeā ʼo te kokelekasio. ʼE natou faipalalau anai mo koutou ke natou iloʼi pe kua kotou mahino pe kotea tona fakaʼuhiga, pea ʼe kotou maʼuliʼi te ʼu faʼahi ʼae ʼe kotou ako pea neʼe kotou foaki tokotou maʼuli ki te ʼAtua mo he lotolelei.​—Gaue 20:28; 1 Petelo 5:1-3.

ʼEi. ʼE matou fakalogo ki te fakatotonu ʼae ʼi te Tohi-Tapu ke akoʼi ki ʼamatou fanau “te akonaki pea mo te ’u fakatokaga ʼa Sehova.” (Efeso 6:4, MN) Kaʼe ʼi tanatou lahilahi ake,ʼe tonu ki ʼamatou fanau ke natou toʼo e natou totonu te tonu ʼae ke natou ako, mo tali pea mo maʼuliʼi te ʼu faʼahi ʼae ʼe akoʼi mai ʼi te Tohi-Tapu ʼi muʼa ʼo tanatou papitema. (Loma 12:2) Kaʼe, ʼa tatou takitokotahi te filifili ʼo te tauhi ʼae ka tou fai anai.​—Loma 14:12; Kalate 6:5.