Kailoa ia. Kaʼe, kapau ʼe matou tokagaʼi ʼe mole alu tahi te ʼu akonaki ʼae ʼe matou tui ki ai mo te Tohi-Tapu, ʼe matou fetogi te ʼu akonaki ʼaia.

Neʼe matou vakavakaʼi te Tohi-Tapu ʼi muʼa ʼo tamatou fakaliliu ia te Les Saintes Écritures. Traduction du monde nouveau, ʼi te taʼu 1950. Neʼe matou fakaʼaogaʼi te ʼu fakaliliu ʼae neʼe kua maʼu pea neʼe matou fakatafito ki ai te ʼu akonaki ʼae neʼe matou tui ki ai. Tou vakaʼi ni akonaki ʼe tui ki ai te kau Fakamoʼoni ʼa Sehova talu mai fualoa. Kotou vakaʼi e kotou totonu pe alu tahi mo te ʼu manatu ʼae ʼe akoʼi mai ʼi te Tohi-Tapu.

1. Te Akonaki ʼae ʼe matou tui ki ai: Ko te ʼAtua ʼe mole ko he Tahitolu Tapu. Neʼe ui fenei ʼi Te Tule Leʼo ʼo Sione ʼaho 15 ʼo Tesepeli 1905 (Fakafalani): “ʼE matou tui . . . kia Sehova, mo Sesu pea mo te laumalie maʼoniʼoni.  . . pea ʼe matou liaki te akonaki (ʼe mole alu tahi mo te Tohi-Tapu) ʼae ʼe ui ko te ʼu ʼAtua ʼe toko tolu ʼo fakatahiʼi age ko te ʼAtua pe ʼe tahi peʼe ko te ʼAtua pe ʼe tahi ʼe faʼufaʼu e te ʼu ʼipotasi ʼe tolu.”

   ʼE ui fenei ʼi te Tohi-Tapu: “Ko te ʼAliki totatou ʼAtua ʼe ko te ʼAliki pe ʼaia ʼe tahi.” (Teutalonome 6:4, Sacy) “ʼE ko te ʼAtua pe ʼe tahi, te Tamai, ʼae ʼe haʼu mai ai te ʼu meʼa fuli pea ko tatou maʼa ia, pea ko te ʼAliki pe ʼe tahi, ia Sesu Kilisito, ʼae ʼaki ia ia neʼe fakatupu ai meʼa fuli pea ʼaki ia ia neʼe tou tutupu ai.” (1 Kolonito 8:6, Crampon, 1905) Neʼe ui totonu pe e Sesu: “ʼE lahi age te Tamai ia au.”​—Soane 14:28, Segond.

2. Te Akonaki ʼae ʼe matou tui ki ai: ʼE mole ʼi ai he ʼifeli kakaha ʼae ʼe fakamamahiʼi ai tatou ʼo heʼe gata. Tou toe lau ia Loma 6:23 ʼi te Tohi-Tapu Roi Jacques, ʼi Te Tule Leʼo ʼo Sione ʼo Sunio 1882 (ʼe maʼu pe ʼi te Fakapilitania) ʼae ko tona kupu tafitō “Ko te totogi ʼo te agahala, ʼe ko te mate.” ʼE tou lau fenei: “ʼE mahino gafua te manatu ʼaia. ʼE mata faikehe te ui ʼae ʼe te hahaʼi ʼe natou tali te Tohi-Tapu ohage ko te Folafola ʼa Te ʼAtua kaʼe ʼe hoko atu pe tanatou fakafeagai ki te manatu ʼaia pea ʼe natou tui ʼe akoʼi mai ʼi te Tohi-Tapu ko te totogi ʼo te agahala, ʼe ko te fakamamahiʼi ʼo tatou ʼo heʼe gata.”

   ʼE ui fenei ʼi te Tohi-Tapu: “Ko te laumalie ʼae ʼe agahala, ko ia ʼae ʼe mate anai.” (Esekiele 18:4, 20, Segond) Ko te tuʼa ʼae ʼe foaki kia natou ʼae ʼe fakafeagai ki te ʼAtua, ʼe mole ko te fakamamahiʼi ʼo heʼe gata kaʼe ko te “fakaʼauha ʼo heʼe gata.”​—2 Tesalonika 1:9, Arnaud.

3. Te Akonaki ʼae ʼe matou tui ki ai: Ko te Puleʼaga ʼo te ʼAtua ʼe ko te puleʼaga moʼoni. ʼI Te Tule Leʼo ʼo Sione ʼo Tesepeli 1881 (ʼe maʼu pe ʼi te Fakapilitania) ʼe ui fenei ai ʼo ʼuhiga mo te Puleʼaga ʼo te ʼAtua: “ʼE mahino ia, ko te Puleʼaga ʼaia kua fakatuʼu ʼe ina maumauʼi anai te ʼu puleʼaga fuli ʼo te kele.”

   ʼE ui fenei ʼi te Tohi-Tapu: “ʼI te temi ʼo te ʼu hau ʼaia, ko te ʼAtua ʼo te ʼatu lagi ʼe ina fakatuʼu anai he puleʼaga ʼe mole pulihi anai ʼi he temi, pea ʼe mole tuku anai ki he tahi hahaʼi; ʼe ina laliki anai mo maumauʼi anai te ʼu puleʼaga fuli ʼaia pea ko ia totonu ʼe tuʼu anai ʼo heʼe gata.”​—Taniela 2:44, Segond.

Kailoa. ʼE lahi te ʼu Tohi-Tapu ʼe matou fakaʼaogaʼi tuʼumaʼu moka matou fakamafola te logo lelei. ʼE matou foaki kia natou ʼae ʼe fai hanatou ako Tohi-Tapu ia te Tohi-Tapu Traduction du monde nouveau kaʼe mole totogi. Pea ʼe matou toe fiafia ʼi te ako fakatahi mo natou ʼae ʼe natou fia fakaʼaogaʼi ʼihi age Tohi-Tapu.