KO TE TOKO FIA ʼE NATOU UI ʼE FAKALOGO TE MAʼULI FIAFIA KI TE LAHI ʼO HE PAʼAGA MO HE ʼU KOLOA? Ko te lauʼi miliona hahaʼi ʼe natou manatu feia. ʼE natou fai hola fakalaka ke lahi he paʼaga. Kae ʼe feala koa ke tou maʼu he maʼuli fiafia ʼe tologa ʼaki pe te paʼaga mo te ʼu koloa? Kotea ʼae ʼe tou sisio tonu ki ai?

ʼE ui ʼi te sulunale (Journal of Happiness Studies) ʼo ʼuhiga mo te maʼuli fiafia, ʼe mole ko te lahi ʼo te paʼaga ʼae ʼe tuputupu ai te maʼuli fiafia. Koteʼuhi ka kua tou maʼu pe te ʼu meʼa ʼae ʼe ʼaoga ki totatou maʼuli pea ʼe ko te maʼuhiga pe ʼaia. ʼE mole ko te maʼu ʼo he foʼi falā ʼae ʼe kovi. Kae ʼe ui ʼi te nusipepa (Monitor on Psychology) ʼe ko “te kumi fakavale ʼo te paʼaga ʼae ʼe iku ki te malaʼia.” Pea ʼe tatau te ʼu palalau ʼaia mo te tokoni Fakatohi-tapu ʼae neʼe tohi kua teitei taʼu lua afe ki muʼa atu. Pea ʼe ui fenei ai: “Ko te manako ki te paʼaga ʼe ko te aka ʼaia ʼo te ʼu faʼahiga meʼa kovi fuli pe, pea ko ʼihi, ʼi tanatou taupau te manako ʼaia, neʼe . . . natou fakamamahiʼi lahi natou.” (1 Timoteo 6:9, 10) Kotea te ʼu mamahi ʼaia?

TE TUʼANIA MO TE MOLE MAMOE ʼUHI KO TE PUIPUI ʼO TE ʼU KOLOA. ʼE ui fenei ia Ekelesiasi 5:11: “E fimalie te moe a te tagata faa gaue, pe e siisii pee lahi tana meakai; kae ko te lahi o te u koloa o te tagata mau koloa e mole ina tuku ia ke moe.”

TE LOTOMAMAHI MOKA ʼE MOLE HOKO TE FIAFIA ʼAE NEʼE TOU FAKAʼAMU KI AI. ʼE tupu te lotomamahi ʼaia ko te mole lava taʼofi ʼo te manumanū fau ki te falā. ʼE ui fenei ia Ekelesiasi 5:9: “Ko ae e manako ki te paaga e mole makona i te paaga, pea ko ae e ofa ki te u koloa e mole ina mau he temi ke fiafia ai i ona koloa.” Pea tahi, ʼe feala ke sakilifisioʼi e ia ʼae ʼe fia maʼu koloa, te ʼu meʼa maʼuhiga tafito ʼae ʼe feala ke fiafia ai. Ohage la ko he temi ki tona kiʼi famili, ki ʼona kaumeʼa peʼe ki te ʼu meʼa fakalaumalie.

TE ʼU FIHIFIHIA MO TE LOTO ITA MOKA LUSI TE PAʼAGA. ʼE ui fenei ia Taaga Lea 23:4, 5: “Aua naa ke mamahi ulu ke ke mau koloa, aua naa ke falala ki tou atamai o ou. Pe e ke fia tuli i ou mata te mea ae ka puli? Koteuhi e fai e te maukoloa ni pakakau pea e hage ia ko he akuila, e lele.”

TE MAʼULI FAKAFEʼAUGA. ʼE ui fenei ia 1 Timoteo 6:7, 8: “Neʼe mole tou ʼaumai he meʼa ki te malamanei, pea ʼe mole feala ke tou ʼave he meʼa. Koia, kapau ʼe tou maʼu he meʼa kai pea mo ni mutuʼi meʼa, ʼe tou feʼauga anai ʼi te ʼu meʼa ʼaia.” Ko he tahi ʼe maʼuli fakafeʼauga ʼe mole meo anai pea ko tona faʼahiga maʼuli ʼaia ʼe puipui ai mai te manumanū. Pea ʼi tana mole fia kumi he ʼu koloa ke lahi age, ʼe mole hoha ai anai.

TE LOTOFOAKI. ʼE ui ia Gaue 20:35: “ ʼE lahi age te fiafia moka kita foaki, ʼi takita tali.” Ko he tahi ʼe lotofoaki ʼe fiafia koteʼuhi ʼe ina toe fakafiafiaʼi mo ʼihi ʼaki tana foaki tona malohi mo tona temi, tatau aipe pe ʼe veliveli. Pea ʼe ina maʼu anai te ʼu fua lelei ʼae ʼe mole feala ke totogi ʼaki te paʼaga. Ohage la ko te ʼofa, te fakaʼapaʼapa pea mo he ʼu kaumeʼa lelei ʼe natou toe lotofoaki foki mo natou.—Luka 6:38.

TE FAKAMUʼAMUʼA ʼO TE HAHAʼI ʼI TE ʼU KOLOA. ʼE ui ia Taʼaga Lea 15:17, MN: “ ʼE lelei age he pa lauʼakau ʼe maʼu ai te ʼofa, ʼi he pipi gako kaʼe ʼe maʼu ai te loto fehiʼa.” Kotea te manatu tafito? Ko te felogoi mo ʼihi ʼi te ʼofa ʼe maʼuhiga age ʼi te ʼu koloa. Pea ko te ʼofa, ʼae ka tou vakaʼi anai, ʼe ko he kalitate ʼe ʼaoga ʼaupito ki te maʼuli fiafia.

Ko Sabina ʼe maʼuli ʼi Amelika Saute. Neʼe ina ako te ʼu pelesepeto Fakatohi-tapu. Neʼe liʼaki Sabina e tona ʼohoana kae neʼe ina faigaʼi tuʼumaʼu pe ke ina maʼu mo ʼana taʼahine ʼae ʼe lua te ʼu meʼa ʼae ʼe ʼaoga ki tonatou maʼuli. Neʼe ko ʼana gaue ʼe lua pea ʼi te ʼaho fuli neʼe ʼala kei hola 4. Logo la ko hana polokalama ʼe kinakina, kae neʼe toʼo e Sabina te tonu ʼae ke ina ako te Tohi-Tapu. Neʼe kotea ʼona fua?

Neʼe mole tuputupu tana kiʼi foʼi falā ke lahi feafeaʼi. Kae kua fetogi lahi tona maʼuli. Ohage la, kua ina logoʼi te fiafia ʼae ʼi te ʼu meʼa fakalaumalie. (Mateo 5:3) Neʼe maʼu leva e Sabina ʼona kaumeʼa lelei ʼi te kau Fakamoʼoni ʼa Sehova. Pea neʼe ina maʼuliʼi te fiafia ʼo te lotofoaki, ʼaki tana vaevae mo ʼihi te ʼu meʼa ʼae neʼe ina ako.

ʼE ui fenei ʼi te Tohi-Tapu: “ ʼE ha te poto ʼi ʼana gaue.” (Mateo 11:19; nota) Koia, moka tou maʼuʼuli fakafeʼauga mo lotofoaki pea mo fakamuʼamuʼa te hahaʼi ʼi te ʼu koloa ʼe ha ai totatou aga fakapotopoto.