Ko natou ʼae aga poto ʼe lahi te falala kia natou. Kapau ʼe ke kole ki he tahi ʼe aga poto ke ina fai he gaue, ʼe ina fai lelei anai pea ʼi tona temi totonu.

ʼE feala ki he tamasiʼi ke akoʼi ke aga poto maʼia pe la pe ʼe kei veliveli. ʼE ui fenei ʼi te tohi Parenting Without Borders: “ ʼI tanatou mahina hogofulu ma nima, ʼe fai e te ʼu fanau te ʼu meʼa ʼae ʼe fakatotonu age ʼanatou matuʼā. ʼI tanatou mahina hogofulu ma valu, ʼe natou loto ke natou fai te ʼu meʼa ʼae ʼe fai e ʼanatou matuʼā. ʼI ʼihi agaʼi fenua, ʼi te taʼu nima ki te fitu ʼo te ʼu fanau, ʼe kamata ai te akoʼi e te ʼu matuʼā te ʼu gaue ʼo te loto fale. Logo pe la ʼe kei natou liliki kae ʼe natou lava fakahoko lelei te ʼu gaue ʼaia.”

ʼI ʼihi fenua, tokolahi te kau tupulaga ʼe natou fia maʼuʼuli faʼitaliha. Pea ka hoko leva ni faigataʼaʼia kia natou, ʼe natou toe liliu ai ki ʼanatou matuʼā. ʼE feala ke hoko te ʼu aluʼaga ʼaia, ʼuhi he neʼe mole akoʼi age e ʼanatou matuʼā te fakaʼaogaʼi lelei ʼo ʼonatou foʼi falā, mo te taupau lelei ʼo he ʼapi peʼe ko te fakaalualu ʼo te ʼu meʼa ʼae ʼe ʼaoga ki tonatou maʼuli ʼi te ʼaho fuli.

Koia, ʼe ko he aga ʼofa te akoʼi ki ʼakotou fanau te aga poto ʼi te temi nei, ke natou lava taupau tonatou maʼuli moka natou lalahi ake. ʼE ui fenei ʼi te tohi How to Raise an Adult: “ ʼE mole kotou loto ke fakalogo tuʼumaʼu te maʼuli ʼo ʼakotou fanau kia koutou ʼo kaku ki tona taʼu hogofulu ma valu, pea mo kotou tuku feiaʼi age leva natou.”

Foaki ni gaue ʼo te loto fale ke ina fai.

PELESEPETO FAKATOHI-TAPU: “E mau e te u gaue fuli he totogi.”—Taaga Lea 14:23.

ʼE fia tokoni tuʼumaʼu pe he tamasiʼi ki ʼanatou matuʼā ʼi te ʼu gaue ʼae ʼe natou fai. Koia, kotou foimo fakaʼaogaʼi te faigamalie ʼaia moʼo foaki age ni gaue ʼo te loto fale ke ina fai.

Ko ʼihi matuʼā leva ʼe mole natou loto ki te faʼahi ʼaia. Koteʼuhi, he ʼe kua lahi fau te ʼu meʼa ako ʼae ʼe tonu ke fai e te tamasiʼi.

Kae ko te kau toe ʼae ʼe natou fai ni gaue ʼi tonatou ʼapi, ʼe natou gaue lelei ʼi te fale ako he neʼe akoʼi age ke natou fai ni gaue pea mo fakaʼosi. Pea tahi, koʼeni te talamanatu ʼo te tohi Parenting Without Borders: “Kapau ʼe mole tou fakamaʼuhigaʼi ia te lotolelei ʼo te ʼu fanau ke tokoni mai ʼi tanatou kei liliki, ʼe natou manatu anai ʼe mole maʼuhiga te tokoni ki ni ʼihi. Pea kia natou, ko he maʼua pe ia ʼo te ʼu matuʼā ke natou fai te ʼu gaue maʼa natou.”

 Ka fakahoko tuʼumaʼu e te ʼu fanau te ʼu gaue ʼo te loto fale, ʼe natou ako ai te fetokoniʼaki pea ʼe mole natou manatu pe anai kia natou totonu. ʼE natou mahino ai ʼe natou maʼuhiga ʼi te famili ʼi tanatou fai te ʼu gaue ʼo te loto fale.

Ke mahino lelei ʼakotou fanau ʼe ʼi ai anai he ikuʼaga kovi ʼo hana lakahala.

PELESEPETO FAKATOHI-TAPU: “Fakalogo ki te u tokoni, pea ke tali te u ako, o tupu ke ke poto i te hoko atu o tou mauli.”—Taaga Lea 19:20.

Moka neʼe fai e ʼakotou fanau ni lakahala, ohage la neʼe ina maumauʼi hala he meʼa ʼa he tahi, ʼaua naʼa kotou faiga ke fufu te aluʼaga ʼaia. ʼE ina tali lelei anai te ʼu fua ʼo te meʼa ʼae neʼe ina fai ʼaki hana faifakalelei peʼe ko hana fetogi te meʼa ʼae neʼe ina fasiʼi.

Moka fakaha e te ʼu fanau ʼanatou lakahala mo te ʼu meʼa ʼe mole natou lava fai, ʼe natou ako ai ke

• natou aga fakahagatonu

• mole natou tukugakoviʼi ai ni ʼihi

• mole natou maʼu takuʼaki

• natou faifakalelei mo kapau ʼe ʼaoga