ʼE TALI ANAI E ʼIHI KAILOA. Neʼe fakatatau e te toketa te fakaʼaogaʼi ʼo te takitaki ʼa te Tohi-Tapu ohage ko he tohi ʼo te taʼu 1920 ʼe fakaʼaogaʼi moʼo takitaki ʼaki he kalasi ako fakasienesia. Ko he tahi ʼe lotolotolua ʼe ina fehuʼi atu anai pe ʼe ke fakaʼaogaʼi anai koa he tohi fakamahino ʼo he olotinatea kua ʼafeā ki he olotinatea ʼo te temi ʼaeni. Koia, ʼe manatu ai ʼihi ʼe mole kei ʼaoga te Tohi-Tapu ki totatou temi.

ʼI te kua haʼele ki muʼa ʼo te maʼuli, kotea ke fakaʼaogaʼi ai ia te Tohi-Tapu ia ʼaho nei kae ʼe ko he tohi kua ʼafeā? Koteʼuhi kua lahi te ʼu tokoni kua maʼu ʼi te temi ʼaeni ʼi te Neti ki te takitaki ʼo te maʼuli. Pea ʼe fakafoʼou pe ʼi te temi fuli. Ohage la, ʼi te televisio ʼe fai tuʼumaʼu ai te ʼu faipalalau ʼa te kau poto pea mo te ʼu faifehuʼi ʼo ʼuhiga mo he ʼu faʼahiga maʼuli kehekehe. Pea ʼe toe lahi mo te ʼu tohi ke tokoni ki te takitaki ʼo te maʼuli, ʼe maʼu ai ni lauʼi miliale paʼaga ʼa te ʼu matani gaue.

ʼAki te ʼu fakamahino foʼou ʼaia kua maʼu, he koʼe ʼe tou toe fakaʼaogaʼi te Tohi-Tapu, kae kua osi ki ai teitei taʼu ʼe 2 000 ki tona tohi? ʼE matatonu koa te ui ʼa natou ʼae ʼe lotolotolua ʼe hage te fakaʼaogaʼi ʼo te Tohi-Tapu ki te takitaki ʼo te maʼuli ko he fakaʼaogaʼi ʼo he tohi fakamahino ʼo he olotinatea kua ʼafeā? Kailoa ia, ʼe ko he manatu ʼe hala. ʼE fetogi tuʼumaʼu pe te tekenolosia mo te sienesia, kae ʼe kua fetogi koa te ʼu meʼa ʼae ʼe ʼaoga ki te tagata? ʼE kei fekumi pe e te hahaʼi he ʼuhiga ʼo tonatou maʼuli, mo te fiafia, te fimalie, he ʼu felogoʼi lelei mo ʼonatou famili pea mo he ʼu kaumeʼa lelei.

Logo la ko he tohi kua ʼafeā, kae ʼe talanoa ʼi te Tohi-Tapu ki te ʼu aluʼaga ʼaia. Pea ʼe mole gata ai. ʼE ko he tohi ʼe haʼu mai totatou Tupuʼaga. Pea ʼe takitaki ʼaki tatou ʼi te ʼu aluʼaga fuli ʼo totatou maʼuli. (2 Timoteo 3:16, 17) Pea tahi, ʼe maʼu ai te ʼu tokoni ʼe ʼaoga tuʼumaʼu pe ki te ʼu temi fuli. Koia ʼe ui ʼi te Tohi-Tapu: “Ko te folafola ʼa te ʼAtua ʼe maʼuli.”—Hepeleo 4:12.

ʼE tonu koa te manatu ʼae ko te Tohi-Tapu ʼe ko he tohi ʼe maʼuli pea ʼe maʼu ai he ʼu tokoni ʼe lelei? ʼE kei ʼaoga pe koa ki totatou temi? Ko te fakatuʼutuʼu ʼo Te Tule Leʼo ʼaeni ʼe ko he tokoni atu ke ke maʼu te ʼu tali ʼae ki te ʼu fehuʼi ʼaia. Pea ʼe kamata ʼaki te ʼuluaki alatike ʼaeni pea ʼe hoholo mai ai he tahi ʼu alatike ʼe talanoa ki ai.