ʼE kua ke logoʼi koa ʼe mole feala ke ke fai he meʼa ki he tahi ʼe ʼi ai hana mate neʼe ʼofa mamahi ai? ʼI ʼihi temi, ʼe mole kei tou iloʼi pe ʼe kotea ʼae ʼe tonu ke tou fai ʼo tupu ai hatatou nonofo fakalogologo pea mole tou fai ai he meʼa. Kaʼe, ʼe lahi te ʼu faʼahi ʼe feala ke tou fai.

ʼI ʼihi temi, ko te faʼahi ʼae ʼe ʼaoga ki he tahi ʼe lotomamahi, ʼe ko tau nofo ʼi ʼona tafa pea mo fai he ʼu palalau fenei: “ ʼE au kaugā mamahi mo koe.” ʼE lahi te ʼu agaʼi fenua, ka natou faʼufua mo he tahi peʼe hili ʼonatou nima ki tona fuga ʼuma, ʼe ko he faʼahiga fakaha ʼaia ʼo tonatou ʼofa. Kapau ʼe fia palalau ia ia ʼae ʼe lotomamahi, ke ke fakalogo ki ai ʼaki he lotomahino. ʼE feala ke ke toe tokoni ki ai ʼaki hau fai he ʼu gaue neʼe mole feala hana fai. Ohage la, ko te teuteuʼi ʼo he meʼa kai, mo te tokaga ki te ʼu fanau peʼe tokoni ki te ʼu teuteu ʼo ʼuhiga mo te ʼavaifo, mo kapau ʼe lotolelei ki ai. Koia, ʼi ʼihi temi ʼe maʼuhiga age te ʼu gaue ʼaia ʼi te ʼu palalau ʼae ʼe ke fai.

ʼAki te temi, ʼe lagi ke fia palalau anai ʼo ʼuhiga mo ia ʼae kua mate ki ʼona kalitate peʼe ko te ʼu temi fakafiafia neʼe ke fakatahi ai mo ia. Ko te ʼu faipalalau ʼaia, ʼe feala ke tupu ai he fiafia ʼo ia ʼae ʼe lotomamahi. Ohage la, ko Pam neʼe mate tona ʼohoana, ia Ian,  kua hili nei ki ai taʼu ʼe ono. ʼE ina ui fenei: “ ʼI ʼihi temi, ʼe fakamatala mai e te hahaʼi te ʼu gaue lelei neʼe fai e Ian kaʼe neʼe mole au iloʼi. ʼE au logoʼi ai toku fiafia.”

ʼE fakaha ʼi te ʼu sivi neʼe fai, tokolahi te hahaʼi ʼae ʼe putu ʼe natou maʼu he ʼu tokoni ʼi te temi pe ʼae ʼe natou tau ai mo te kafo mamahi ʼaia pea gata ai. Koteʼuhi kua toe liliu ʼonatou kaumeʼa ʼo tahi tokakaga pe ki ʼonatou maʼuli. Koia, faiga ke ke taupau maʼu ʼau felogoʼi mo tou kaumeʼa ʼae ʼe putu. * Tokolahi ia natou ʼae ʼe putu ʼe natou leleiʼia te ʼu tokoni ʼaia moʼo fakafimalieʼi tonatou lotomamahi.

Tou vakaʼi te faʼifaʼitaki ʼo Kaori. Neʼe ko he finemui mai Saponia, neʼe mate tana faʼe pea hili ki ai mahina ʼe 15 neʼe mate tona taʼokete. Neʼe lotomamahi ʼosi. Kaʼe meʼa lelei foki, neʼe tokoni ʼona kaumeʼa ki ai lolotoga he temi loaloaga. Neʼe kau kia natou ʼaia ia Ritsuko ʼae neʼe lahi age ia Kaori pea neʼe ina loto ke liliu ko hona kaumeʼa lelei. ʼE ui fenei e Kaori: “Maʼa ʼaku neʼe mole au leleiʼia ʼana palalau. Neʼe mole au loto ke fetogi e he tahi taku faʼe pea neʼe au manatu ʼe mole feala ki he tahi ke ina fai te faʼahi ʼaia. Kaʼe, ko te faʼahiga tokaga ʼa Mama Ritsuko kia au, neʼe au fakaovi ai kia ia. ʼI te vahaʼa fuli, ʼe ma faifakamafola fakatahi pea ma olo ki te ʼu fono Fakakilisitiano. Neʼe ina fakaafe au ke ma inu ti ʼi tona ʼapi, ʼe haʼu mo taku meʼa kai pea ʼe faitohi tuʼumaʼu mai. Ko te aga ʼa Mama Ritsuko neʼe malave kia au.”

Kua ʼosi nei ki ai taʼu ʼe 12 ʼo te mate ʼa te faʼe ʼa Kaori. Ia ʼaho nei, ko Kaori mo tona ʼohoana ʼe nā kau ki te selevisi temi katoa. ʼE ui fenei e Kaori: “ ʼE kei tokaga mai pe ia Mama Ritsuko. Ka au toe liliu ki toku fenua, ʼe au faʼa alu ʼo fakasiosio ia ia pea ma fakafiafia fakatahi.”

Ko te tahi faʼifaʼitaki ko Poli, ʼe ko te Fakamoʼoni ʼa Sehova ʼi Chypre pea neʼe toe tokoni ʼona kaumeʼa kia ia lolotoga he temi loaloaga. Neʼe ʼohoana mo Sozos ʼae neʼe ko he tagata ʼafeā. Pea ʼi tona ʼuhiga tagata ʼafeā neʼe ina tuku he faʼifaʼitakiʼaga lelei. Neʼe ina fakaafe tuʼumaʼu te ʼu fanau hala tamai mo faʼe pea mo te kau finetaka ke natou kakai fakatahi. (Sakopo 1:27) Meʼa fakaʼofaʼofa foki, neʼe mate leva ia Sozos ʼi tona taʼu 53 ʼuhi ko te kosea. ʼE ui fenei e Poli: “Kua mate leva siʼoku ʼohoana ʼae neʼe au maʼuli fakatahi mo ia lolotoga taʼu ʼe 33.”

Hili te faiʼavaifo, neʼe olo leva ia Poli mo tana kiʼi tama ko Daniel ʼae ʼe taʼu 15 ʼo maʼuʼuli ʼi Canada. ʼE manatuʼi fenei e Poli ʼo ʼuhiga mo tanā kokelekasio foʼou: “Ko te ʼu tehina mo tuagaʼane ʼo taku kokelekasio foʼou, neʼe mole natou iloʼi he meʼa ʼo ʼuhiga mo toku maʼuli pea mo ʼoku faigataʼaia. Kaʼe, neʼe mole he meʼa neʼe ina taʼofi ai tanatou ʼomai kia maua, mo fakalotofimalieʼi maua ʼaki he ʼu palalau agalelei pea mo tokoni mai. Neʼe heʼeki galoʼi e taku kiʼi tama tana tamai. Ko te kau tagata ʼafeā neʼe natou tokakaga kia Daniel. Ko te tahi ia natou neʼe ina ui tuʼumaʼu kia Daniel ke alu mo ia moka ʼe fakaafe peʼe alu ʼo faigaoʼi.” Ia ʼaho nei, ko Poli mo Daniel ʼe nā fiafia.

ʼE mahino ia, ʼe lahi te ʼu faʼahiga fai ʼe feala ai ke tou tokoni pea mo fakalotofimalieʼi ia natou ʼae ʼe putu. ʼE toe fakalotofimalieʼi tatou ʼi te Tohi-Tapu he ʼe fakaha mai ai he ka haʼu taulekaleka.