Mokā Mate He Tahi ʼe Kotou ʼOʼofa Mamahi Ai

ʼI te Feliatolu afiafi ʼo te ʼaho 17 ʼo Sūlio 2007, ʼi te teitei hola fitu, neʼe heheke ai ia te vakalele neʼe fetuku ai te hahaʼi fai folau ʼi te malaʼe vakalele lahi ʼo Pelesile, ʼi te kolo ʼo São Paulo. Neʼe fakalaka ia te vakalele ʼi te ala matuʼa pea ina fakaʼī ia te toe fale koloa. Ko te toko 200 hahaʼi ʼaē neʼe mamate ʼi te tuʼutāmaki ʼaia.

KO TE tuʼutāmaki fakamataku ʼo te vakalele fai folau ʼi Pelesile, ʼe mole galo anai ia nātou ʼaē neʼe mamate. Ko Claudete neʼe kau kiā nātou ʼaē neʼe tau mo te lotomamahi ʼaia. ʼI tana lolotoga televisio neʼe ina maʼu ai te logo ʼo ʼuhiga mo te tuʼutāmaki ʼa te vakalele. Ko tana tama ko Renato neʼe kau ki te kau folau ʼaia. Neʼe ko tona taʼu 26 pē. Neʼe fakatuʼutuʼu ke ʼohoana ʼi ʼOketopeli. Koia, neʼe faigaʼi ai e Claudete ke pāui ki tana telefoni feʼāveʼaki, kae neʼe mole tali mai. Neʼe toka ifo ai pē ki lalo ʼo tagi pea neʼe faigataʼa ia tona fakanaʼanaʼa.

Ko Antje, neʼe mate ia te tama ʼaē neʼe tonu ke nā ʼohoana ʼi te fai fakaʼī ʼi tana motokā ʼi Sānualio 1986. ʼI tana maʼu ia te logo, neʼe lotohoha ʼaupitō. “ ʼUluaki neʼe mole au fia tui. Neʼe hagē pē kiā au ko he moemisi pea ʼe au ʼofo anai ʼo fakatokagaʼi ʼe mole ko he meʼa neʼe hoko moʼoni. Neʼe au mataku pea neʼe hagē neʼe au lotomamahi ʼaupitō ohagē neʼe ʼi ai he tahi neʼe ina hokaʼi ia toku manavā.” Neʼe mahaki ʼulu ia Antje ʼi te ʼu taʼu e tolu ʼaē neʼe hoa mai ki te tuʼutāmaki ʼaia. Logopē lā kua hili kiai taʼu e 20 talu mai te tuʼutāmaki ʼaia, kae ʼe kei mataku mokā ina manatuʼi ia te meʼa ʼaē neʼe hoko.

ʼE mole maʼu he ʼu palalau moʼo fakamahino ʼaki ia te ʼu meʼa kovi ʼaē ʼe kita logoʼi ohagē ko te hoha, te mole he ʼamanaki, te mole kei maʼu ʼo he fakakaukau ʼe lelei, pea mo te lotomamahi ʼaē ʼe feala ke tupu mai te faʼahiga tuʼutāmaki ʼaia. Kae, tatau aipē peʼe tou fakaʼatalitali ki te mate ʼo he tahi ʼe tou ʼofa mamahi ai, heʼe ʼi ai hona mahaki kua fualoa, pea ʼe feala ke tupu ai he lotomamahi lahi ʼaupitō. ʼE mole he tahi kua teuteu lelei ki te mate ʼo he tahi ʼe ʼofa mamahi ai. Ko te faʼē ʼa Nanci neʼe mate ʼi te taʼu 2002 ʼi te hili ʼo tona mahaki kua fualoa. Kae ʼi te ʼaho ʼaē neʼe mate ai tana faʼē, neʼe heka ifo ai ia Nanci ki lalo ʼi te lōpitali ʼi tana punamaʼuli ʼaupitō. Ko te maʼuli neʼe hagē neʼe mole kei hona ʼuhiga ki ai. Logopē lā kua hili taʼu e nima, kae ʼe kei tagi pē ia mokā ina manatuʼi tana faʼē.

“Tokolahi ʼe mole feala hanatou galoʼi ia he tahi kua mate, ko te meʼa pē ʼe natou fai, ko tanatou galoʼi ia ia ʼaē kua mate.” Ko te ʼui ʼaia e te tōketā ko Holly G. Prigerson. Kapau kua mate he tahi ʼe kotou ʼoʼofa mamahi ai, kae neʼe mate fakapunamaʼuli peʼe kailoa, pea ʼe lagi kotou feʼuiʼaki: ‘ ʼE ko he meʼa lelei koa taku lotomamahi? ʼE feala koa ke au tauʼi te mamahi ʼi te hili ʼo te mate ʼo he tahi ʼe au ʼofa mamahi ai? ʼE feala koa haku toe sio kiā ia ʼi he ʼaho?’ ʼI te ʼalatike ʼaē kā hoa mai, ʼe tali anai ki te ʼu fehuʼi ʼaia pea mo ʼihi atu ʼu fehuʼi ʼe feala ke kotou fai.

[Haʼuʼaga ʼo te paki pasina 3]

EVERTON DE FREITAS/AFP/Getty Images