Ko Te ʼu Temi Maʼuhiga ʼe Tou Māʼuʼuli Ai

NEʼE fakakikite ʼi te Tohi-Tapu ʼe hoko anai ʼi te mālamanei ia “te ʼu temi maʼuhiga ʼaupitō mo faigataʼa.” ʼE ʼui ʼe ko “te ʼu ʼaho fakamuli” ʼaia. (2 Timoteo 3:1-5; 2 Petelo 3:3-7) Neʼe talanoa ia Sesu Kilisito ʼo ʼuhiga mo te temi ʼaia ʼi tana tali ki te fehuʼi ʼaē neʼe fai age e tana kau tisipulo, ʼo ʼuhiga mo “te fakaʼosi ʼo te tuʼu ʼo te ʼu faʼahiga meʼa ʼaenī.” (Mateo 24:3) ʼE tou lolotoga māʼuʼuli koa ʼi te ʼu ʼaho fakamuli? Kotou fakatatau ia te meʼa ʼaē neʼe fakakikite  ʼi te Tohi-Tapu pea mo te ʼu tānaki fakamuli ʼaenī neʼe fai ʼaē ʼe tuʼu ʼi lalo, pea mo kotou fai leva hakotou tali ki te fehuʼi ʼaia.

Te meʼa ʼaē neʼe fakakikite ʼi te Tohi-Tapu: te ʼu tau ʼi te mālamanei kātoa—Luka 21:10; Fakahā 6:4.

Te ʼui ʼi te ʼu tānaki fakamuli ʼaenī neʼe fai: “Ko te lahi ʼo te ʼu mātea ʼi te 20 sēkulō neʼe laka tuʼa tolu age ʼi te ʼu mātea ʼaē neʼe hoko ʼi te ʼu sēkulō fuli ki muʼa atu, talu mai te tupu ʼo Kilisito.”—Worldwatch Institute.

Te meʼa ʼaē neʼe fakakikite ʼi te Tohi-Tapu: te ʼu hoge pea mo te ʼu mahaki—Luka 21:11; Fakahā 6:5-8.

Te ʼui ʼi te ʼu tānaki fakamuli ʼaenī neʼe fai: ʼI te taʼu 2004 neʼe fakafuafua ko te toko 863 miliona hahaʼi ʼi te kele neʼe mole kakai ʼo mākokona. Kapau ʼe tou fakatatau mo te taʼu 2003, pea ko te toko 7 miliona hahaʼi neʼe hilifaki.—United Nations Food and Agriculture Organization.

Ko hahaʼi ʼe teitei tahi miliale ʼe natou māʼuʼuli ʼi he ʼu nofoʼaga fakaʼofaʼofa; ko te toko 2 miliale 600 miliona ʼe mole honatou ʼu tuiō moʼo fakaʼalu ai te ʼu vai ʼuli; ko te 1 miliale 100 miliona hahaʼi ʼe ʼuli te vai ʼaē ʼe natou fakaʼaogaʼi.—Worldwatch Institute.

Ko te mahaki ʼaē ko te malaria kua pikisia ai te toko 500 miliona hahaʼi; ko te toko 40 miliona ʼe natou maʼu ia te mahaki ko te SITA; ʼi te taʼu 2005, neʼe mamate te toko 1 miliona 600 afe hahaʼi ʼi te mahaki ʼaē ko te fatafata vaivai.—World Health Organization.

Te meʼa ʼaē neʼe fakakikite ʼi te Tohi-Tapu: te maumauʼi ʼo te kele—Fakahā 11:18.

Te ʼui ʼi te ʼu tānaki fakamuli ʼaenī neʼe fai: “ ʼAki te ʼu gāue ʼa te tagata, kua vave hoko mai ki te kele kātoa ia he toe maumau lahi ʼo te ʼu manu pea mo te ʼu fuʼu ʼakau.” “Ko te teitei vaega lua ki te tolu ʼo te ʼu gāue ʼaē ʼe fai e te nātulā moʼo fakafealagia ia te maʼuli ʼo te mālamanei kua fakahaʼuhaʼu ʼo maumau ʼi te kele kātoa.”—Millennium Ecosystem Assessment.

“ ʼI te kua lahi fau te ʼu kasa ʼe tupu ai te vela ʼo te Kele ʼuhi ko te gāue ʼa te tagata, kua fetogi ʼaupitō ia te momoko pea mo te vela ʼo te Kele, pea ʼe feala ke ʼi ai hona ʼu fua kovi ʼaupitō ki te kele.”—NASA, Goddard Institute for Space Studies.

Te meʼa ʼaē neʼe fakakikite ʼi te Tohi-Tapu: ko te logo lelei ʼo te Puleʼaga ʼo te ʼAtua kua fakamafola ʼi te kele kātoa—Mateo 24:14; Fakahā 14:6, 7.

Te ʼui ʼi te ʼu tānaki fakamuli ʼaenī neʼe fai: ʼI te taʼu 2007, ko te toko 6 957 854 kau Fakamoʼoni ʼa Sehova, ʼaē ko te tuputupu foʼou ʼaia, neʼe natou fakaʼaogaʼi hola e 1 miliale 400 miliona tupu  moʼo fakamafola ia te logo lelei ʼo te Puleʼaga ʼo te ʼAtua iā fenua e 236.—Annuaire des Témoins de Jéhovah 2008.

Ohagē ko tona tuʼu ʼi ʼoluga, neʼe fakakikite ʼi te Tohi-Tapu, logolā te ʼu logo fakamataku fuli, kae ʼe ʼi ai anai te tupuʼaga ke tou maʼu he ʼu manatu ʼe lelei. Neʼe talanoa Sesu ʼo ʼuhiga mo te “logo lelei” ʼo te Puleʼaga ʼo te ʼAtua. Koteā ia te Puleʼaga ʼo te ʼAtua? He koʼē ʼe feala ai ke ʼamanaki te mālamanei ki he kā haʼu ʼe lelei age? Pea ʼi takotou mahino ki te Puleʼaga ʼo te ʼAtua koteā ʼaē kā kotou fai anai?

[Paki ʼo te pasina 5]

Neʼe fakakikite ʼi te Tohi-Tapu ia te ʼu ʼaluʼaga ʼo te kele ʼaē ʼe tou sio kiai iā ʼaho nei