Ko Te Lotu ʼAē ʼe Lelei ʼe Ina Akoʼi Te Fakaʼapaʼapa Ki Te Folafola ʼa Te ʼAtua

NEʼE akoʼi e Sesu ia te fakaʼapaʼapa ki te Folafola ʼa te ʼAtua, te Tohi-Tapu. ʼE hā lelei mai ia te faʼahi ʼaia ʼi te tali ʼaē neʼe ina fai ʼi te temi ʼaē neʼe fakahalaʼi ia ia e te Tēvolo. (Mateo 4:4-11) Ohagē lā, koteā ia te tali ʼaē neʼe fai e Sesu ʼi te ʼui age e Satana ke ina fakaliliu ia te ʼu maka ko he pane? Neʼe tekeʼi e Sesu ia tona fakahalaʼi ʼaia, ʼo ina fakaʼaogaʼi te ʼu palalau ʼaē neʼe fai e Moisese ʼaki te takitaki ʼa te ʼAtua, ʼaē ʼe feala ke kotou lau iā Teutalonome 8:3. Pea ʼi te fia foaki age ʼaē e te Tēvolo kiā Sesu ia te pule ʼaē ki te ʼu puleʼaga fuli ʼo te mālamanei mo kapau ʼe tauhi age kiā ia,  koteā te tali ʼa Sesu? Neʼe fakafisi kiai ʼo ina fakahā ia te pelesepeto Fakatohi-tapu ʼaē ʼe feala ke kotou maʼu iā Teutalonome 6:13.

Kotou fakakaukauʼi age muʼa! Logolā ko ia te ʼAlo totonu ʼo te ʼAtua, kae neʼe falala Sesu ki te Tohi-Tapu, ʼo ina fakaʼaogaʼi moʼo fakatafito kiai ia tana faiakonaki. Pea ʼe mahino papau ia, neʼe mole he temi neʼe ina fakamuʼamuʼa ia te ʼu talatisio ʼa te tagata ʼi te Folafola ʼa te ʼAtua. (Soane 7:16-18) Kae tokolahi ia te kau takitaki lotu ʼi te temi ʼo Sesu neʼe mole natou fakaʼapaʼapa ohagē ko ia ki te Folafola ʼa te ʼAtua. Koteā tona tupuʼaga? Neʼe maʼuhiga age kiā nātou ia te ʼu talatisio fakatagata ʼi te Tohi-Tapu. Neʼe ʼui fakahagatonu age e Sesu ki te ʼu tagata lotu ʼaia: “Koia kua kotou fakanoaʼi te folafola ʼa te ʼAtua ʼuhi ko takotou ʼu talatisio. Kau mālualoi! Neʼe tonu ai te lea fakapolofetā ʼa Isaia kiā koutou, ʼi tana ʼui ʼaē: Ko te hahaʼi nei ʼe natou fakamaʼuhiga au ʼaki ʼonatou laugutu, kae mamaʼo ʼaupitō tonatou loto ia te au. ʼE ko he maumau noa pē ʼo tanatou haga fai mai kiā te au he tauhi, heʼe natou akonakiʼi te ʼu akonaki ʼe ko he ʼu fakatotonu fakatagata pē.”—Mateo 15:6-9, Bible Segond Revisée.

ʼE lahi te ʼu lotu ʼi te mālamanei, te ʼu lotu ʼe Kilisitiano peʼe kailoa, ʼe natou lau ʼe natou fakaʼapaʼapa ki te Tohi-Tapu. Kae ko lotu ʼe fia ʼe kotou ʼiloʼi ʼe natou fakafisi ki he ʼu talatisio mokā fakafeagai ki te ʼu akonaki ʼaē ʼe tou maʼu ʼi te Folafola ʼa te ʼAtua? Tou vakaʼi ia faʼahi pē e lua.

KUPU TĀFITO: Te ʼu higoa fakatuʼulaga fakalotu.

KOTEĀ ʼAĒ ʼE AKOʼI MAI ʼI TE TOHI-TAPU: Neʼe tauteaʼi e Sesu ia te kau takitaki lotu ʼo tona temi he neʼe natou leleiʼia ia te ʼu higoa fakatuʼulaga pea mo natou fiahā. Neʼe ina ʼui ko te ʼu tagata ʼaia neʼe natou manako ki “te ʼuluaki nofoʼaga ʼi te ʼu kātoaga, te ʼu ʼuluaki hekaʼaga ʼi te ʼu sinakoka, te ʼu fetapa ʼi te ʼu lāpalasi, pea mo fakahigoaʼi ia nātou ko Lapi e te hahaʼi.” Pea neʼe ʼui leva e Sesu ki tana kau tisipulo: “ ʼAua naʼa fakahigoaʼi koutou ko Lapi, heʼe ko tokotou Pule pē e tahi pea ʼe kotou tautēhina fuli. Pea ʼaua naʼa kotou fakahigoa he tahi ʼi te kele ko Tamai; heʼe ko takotou Tamai pē e tahi, ia ia ʼaē ʼe ʼi selō.”—Mateo 23:1-10, Bible Crampon.

FEHUʼI: Ko te kau takitaki ʼo te lotu ʼaia ʼe natou leleiʼia koa te fakahigoaʼi ʼo nātou ʼaki he ʼu higoa fakatuʼulaga fakaʼapaʼapaʼia pea mo natou kumi ke natou hā ʼi te hahaʼi, peʼe natou fakalogo ki te fakatotonu ʼa Sesu ke mole natou fai te ʼu faʼahi ʼaia?

KUPU TĀFITO: Te fakaʼaogaʼi ʼo te ʼu pāki moʼo tauhi ki te ʼAtua.

KOTEĀ ʼAĒ ʼE AKOʼI MAI ʼI TE TOHI-TAPU: “ ʼAua naʼa ke faʼu maʼa koe he pāki togi, peʼe ko he fakatātā ʼo he meʼa ʼe ʼi te lagi ʼi ʼoluga, peʼe ʼi te kele ʼi lalo, peʼe ʼi te ʼu vai ʼi te lalo kele. ʼE mole ke tulolo anai iā muʼa ʼo te ʼu ʼatua ʼaia pea mo ke tauhi kiā nātou.”—Ekesote 20:4, 5, Bible de Jérusalem.

Neʼe faitohi fēnei te ʼapositolo ko Soane ki te kau Kilisitiano: “Kotou fakamamaʼo mai te ʼu tamapua.”—1 Soane 5:21, Bible Segond Révisée.

FEHUʼI: ʼE fakalogo koa ia te lotu ʼaia ki te fakatotonu ʼaē ʼe tuʼu lelei ʼi te Tohi-Tapu ke mole fakaʼaogaʼi ia he ʼu pāki peʼe ko he ʼu fakatātā moʼo tauhi ki te ʼAtua?

 ʼE Kotou Lava Maʼu Ia Te Ala ʼAē ʼe Totonu

Logolā ia te ʼu tuʼuga lotu ʼaē ʼe maʼu iā ʼaho nei, kae ʼe feala ke kotou maʼu ia te lotu ʼaē ʼe ina taki ki te maʼuli. ʼE lahi ia te ʼu fakaʼiloga ʼo te “lotu ʼaē ʼe maʼa pea mo heʼe mele iā muʼa ʼo totatou ʼAtua.” (Sake 1:27, Bible Crampon) Ko te ʼu vaega Tohi-Tapu ʼaē neʼe vakaʼi ʼi te ʼu ʼalatike ʼaenī, ʼe hagē ko he ʼu fakaʼiloga ʼi te ala moʼo tokoni atu ke kotou maʼu ia te lotu ʼaia.

He koʼē ʼe mole kotou fehuʼi ki te kau Fakamoʼoni ʼa Sehova ke natou fakamahino atu ia tanatou ʼu tali ki te ʼu fehuʼi ʼaē ʼe lagaʼi ʼi te ʼu ʼalatike ʼaenī? ʼI takotou fakakaukauʼi tanatou ʼu tali, kotou mulimuli ki te faʼifaʼitaki lelei ʼo nātou ʼaē neʼe māʼuʼuli ʼi te ʼuluaki sēkulō ʼi te kolo ʼo Pelea. ʼI tanatou ʼosi fakalogo ki te fai fakamafola ʼa te ʼapositolo ko Paulo, neʼe “natou vakavakaʼi lelei te ʼu Tohi peʼe totonu te ʼu meʼa fuli ʼaia.” (Gāue 17:11, Bible de Jérusalem) Kapau, ohagē ko te kau Pelea, ʼe kotou fakaʼapaʼapa ki te Folafola ʼa te ʼAtua pea mo kotou faʼafai ʼo ako ia te Tohi-Tapu, ʼe kotou maʼu ai anai ia te ala ʼaē ki te maʼuli. ʼE ʼā koutou leva te filifili peʼe kotou haʼele anai ʼi te ala ʼaia.

[Fakamatala ʼo te pasina 8]

Ko te lotu fea ʼaē ʼe ina fakalotomālohiʼi te hahaʼi ke natou ako ia te Tohi-Tapu ke feala ai hanatou ʼiloʼi peʼe moʼoni ia te ʼu manatu ʼaē ʼe natou ako?