Ko Te Maʼuli Masiva ʼe Ko He Fakaʼiloga Koa ʼAia ʼo Te Mole ʼOfa ʼa Te ʼAtua Kiā Tātou?

NEʼE ʼui e te ʼAtua ki te kau Iselaele ʼo te temi muʼa: “ ʼE mole tonu anai ki he tahi ke liliu ʼo masiva ʼi tou ʼapi.” Neʼe tonu ke fēia, heʼe ʼi te Lao ʼaē neʼe ina foaki age kiā nātou, neʼe ʼi ai te ʼu fakatotonu ʼo ʼuhiga mo te tokaga ʼaē ki te hahaʼi māsisiva, ʼo toe fēia mo te holoʼi ʼo te ʼu maʼua. (Teutalonome 15:1-4, 7-10) Koia, neʼe mole tonu ke maʼu ʼi te kau Iselaele ia he tahi ʼe masiva, he neʼe fakapapau e Sehova ʼe ina tapuakinaʼi nātou. Kae neʼe hoki maʼu ia te tapuakina ʼaia mo kapau ʼe natou fakalogo ki te Lao, ʼaē ko he faʼahi neʼe mole fai e te kau Iselaele.

ʼE mole fakaʼuhiga leva neʼe mole ʼofa ia te ʼAtua kiā nātou ʼaē neʼe mole maʼu meʼa, peʼe ko nātou ʼaē neʼe maʼu koloa neʼe tapuakinaʼi nātou e te ʼAtua. Tokolahi ia te ʼu kaugana ʼa te ʼAtua neʼe natou māsisiva. Ko te polofetā ko Amosi neʼe ko te tagata tauhi manu pea neʼe gāue fakatemi. (Amosi 1:1; 7:14) ʼI te temi ʼo te polofetā ko Elia, neʼe hoko ia te hoge ʼi Iselaele, pea neʼe fakalogo pē ia te maʼuli ʼo Elia ki te tali kāiga ʼa te fafine vītua masiva, ʼaē neʼe fakafonu fakamilakulo lolotoga te hoge tana kihiʼi toega falena pea mo tana moʼi lolo. Ko Elia peʼe ko te fafine vītua, neʼe mole he tahi iā nāua neʼe liliu ʼo maʼu koloa; neʼe foaki age pē e Sehova ia te ʼu meʼa ʼaē neʼe ʼaoga tāfito kiā nāua.—1 Hau 17:8-16.

Neʼe lagi liliu te hahaʼi ʼo māsisiva ʼuhi ko he ʼu ʼaluʼaga fakafokifā neʼe hoko kiā nātou. ʼE feala ki he tahi neʼe fakaʼī pea mo mahaki ke gāue fakatemi peʼe ke mole kei gāue ʼosi. Pea ʼe feala ki he fānau ke hala tamai mo faʼē, peʼe ke vītua ʼihi, ʼuhi ko te mate. Tatau aipē mo te ʼu ʼaluʼaga ʼaia, ʼe mole ko he fakaʼiloga ʼo te mole ʼofa ʼa te ʼAtua kiā tātou. Ko te hisitolia ʼo Naomi pea mo Lute ʼe ko he faʼifaʼitaki fakalotomālohi ʼo te tokaga ʼofa ʼa Sehova kiā nātou ʼaē ʼe māsisiva. Logolā ia te kua māʼuʼuli māsisiva ʼa Naomi pea mo Lute ʼi te kua mamate ʼo tonā ʼu ʼohoana, kae ko Sehova ʼAtua neʼe ina tapuakina nāua pea mo tokaga kiā nāua ʼi te faʼahi fakasino.—Lute 1:1-6; 2:2-12; 4:13-17.

ʼE hā mai, ko te maʼuli masiva ʼe mole ko he fakamoʼoni ʼaia ʼo te mole ʼofa ʼa te ʼAtua kiā tātou. Ko nātou ʼaē ʼe agatonu kiā Sehova ʼAtua, ʼe feala ke natou falala ki te ʼu palalau ʼaenī ʼa te Hau ko Tavite: “Neʼe au tūpulaga, pea kua au matuʼa foki, kae neʼe mole au sio ki te tagata agatonu kua liʼaki kātoa, pea neʼe mole au sio ki tona hākoga ʼe kumi pane.”—Pesalemo 37:25.

[Paki ʼo te pasina 8]

Logolā te kua māʼuʼuli māsisiva ʼa Naomi pea mo Lute, kae neʼe tapuakinaʼi nāua pea mo tokaga ʼofa ia te ʼAtua kiā nāua