“Kotou Māʼuʼuli ʼi Te Tokalelei Mo Te Tagata Fuapē”

“Kapau ko he meʼa ʼe feala, tāfito lā mo kapau ko he meʼa ʼe fakalogo kiā koutou, kotou māʼuʼuli ʼi te tokalelei mo te tagata fuapē.”—LOMA 12:18.

1, 2. (a) Koteā te fakatokaga neʼe fai e Sesu ki tana ʼu tisipulo? (b) ʼE tou lava maʼu ʼifea he tokoni ʼo ʼuhiga mo tatatou faʼahiga tali ki te ʼu fakafeagai?

 NEʼE fakatokaga e Sesu ki tana ʼu tisipulo, ʼe fakafeagai anai te ʼu puleʼaga ʼo te mālamanei kiā nātou, pea ʼi te pō ʼi muʼa ʼo tona mate, neʼe ina fakamahino ia tona tupuʼaga. Neʼe ina ʼui fēnei ki tana ʼu ʼapositolo: “Kanapau lā neʼe kotou kau ʼi te mālamanei, kanaʼaua lā ʼe ʼofa te mālamanei ki te meʼa ʼaē ʼaʼana. Kae mai tona ʼuhiga ʼaē ʼe mole kotou kau ʼi te mālamanei, kae neʼe au filifili koutou mai te lotolotoiga ʼo te mālamanei, ko te tupuʼaga lā ʼaia ʼo te fehiʼa ʼa te mālamanei kiā koutou.”—Soa. 15:19.

² ʼAki te ʼu meʼa ʼaē neʼe kua hoko ki te ʼapositolo ko Paulo, neʼe mahino kiā ia ia te moʼoni ʼo te ʼu palalau ʼa Sesu. ʼI tana lua tohi ki tona kaumeʼa tūpulaga ko Timoteo, neʼe ʼui fēnei e Paulo: “Neʼe ke pipiki agatonu ki taku akonaki, ki toku faʼahiga maʼuli, ki taku fakatuʼutuʼu, ki taku tui,  ki taku kātaki fualoa, ki toku ʼofa, ki taku faʼa kātaki, ki toku ʼu fakataga, ki toku ʼu mamahi.” Pea neʼe toe ʼui fēnei e Paulo: “Tahi ʼaē, ko nātou fuli ʼaē ʼe fia pipiki ki te ʼAtua ʼi te lototahi mo Kilisito Sesu ʼe toe fakatagaʼi anai mo nātou.” (2 Tim. 3:10-12) ʼI te kāpite 12 ʼo tana tohi ki te kau Kilisitiano ʼi Loma, neʼe foaki e Paulo kiā nātou ia te tokoni fakapotopoto ʼo ʼuhiga mo tanatou faʼahiga tali ki te fakafeagai. ʼE feala ki tana tokoni ʼaia ke ina takitaki tātou ʼi te temi fakaʼosi ʼaenī.

Ke Tou “Fai Ia Te Meʼa ʼAē ʼe Lelei”

3, 4. ʼE feafeaʼi ia he fakaʼaogaʼi ʼo te manatu ʼaē iā Loma 12:17 (a) ʼi he loto fale ʼe mole natou lotu tahi fuli? (b) ʼi tatatou ʼu felōgoi mo totatou ʼu tatau?

³ Lau ia Loma 12:17. Neʼe fakamahino e Paulo kā fakatagaʼi tātou, ʼe mole tonu ke tou tali fakaʼita age. Ko te mulimuli ki te tokoni ʼaenī, ʼe ʼaoga tāfito ʼi te ʼu loto fale ʼaē ʼe mole natou lotu tahi fuli. ʼI te taumātuʼa, ko ia ʼaē ʼe Kilisitiano ʼe mole faiga anai ke ina liufaki ki tona ʼohoana ia he palalau kovi peʼe ina tali ʼaki he tahi age aga ʼe kovi. ʼE mole maʼu he fua lelei mo kapau ʼe ‘liufaki te kovi ʼaki te kovi.’ ʼE ina fakaʼāsili age ia te fihifihia.

⁴ ʼE fakalotomālohiʼi mai e Paulo ia te aga ʼaē ʼe lelei age ke fai: “Kotou fai ia te meʼa ʼaē ʼe lelei iā muʼa ʼo te hahaʼi fuli.” ʼI te loto fale, ko he fafine ʼe ina fai pē ia tana aga ke lelei ki tona ʼohoana logolā neʼe ina fai age he palalau ʼe kovi ʼo ʼuhiga mo tana lotu, ʼe feala ai ke ina tāʼofi he fihifihia naʼa ʼāsili kovi age. (Taag. 31:12) Ko Carlos, ʼaē ʼi te temi nei kua nofo ʼi te Petele, ʼe ina fakamatala pe neʼe tauʼi feafeaʼi e tana faʼē ia te fakafeagai mālohi ʼo tana tamai, ʼaki hana fakahā aipē tana agalelei pea mo tana tokaga ki te ʼu meʼa ʼo te loto fale. “Neʼe ina tokoniʼi tuʼumaʼu pē mātou fānau ke matou fakaʼapaʼapa ki tamatou tamai. Neʼe ina uga au ke au lī pulu mo taku tamai logolā taku mole leleiʼia ia te gaoʼi ʼaia. Kae ko te gaoʼi ʼaia neʼe fakatupu fiafia ki taku tamai.” Pea ki muli age leva, neʼe ina ako te Tohi-Tapu pea mo papitema. ʼO ʼuhiga mo te fai ʼo ‘he ʼu meʼa lelei iā muʼa ʼo te hahaʼi fuli,’ ʼi te agamāhani ʼe tekeʼi e te kau Fakamoʼoni ʼa Sehova ia te ʼu manatu fakapalatahi, heʼe natou foaki ia he tokoni ʼe ʼaoga ki tonatou ʼu tatau mokā hoko he tuʼutāmaki.

Ke Malū Ifo Ia Te Fakafeagai ʼAki “He ʼu Mamala Kakaha”

5, 6. (a) ʼE fakaʼuhiga feafeaʼi ia te tānaki ʼo “he ʼu mamala kakaha” ki te ʼulu ʼo he fili? (b) Fakamatala he meʼa neʼe hoko ʼe fakahā ʼaki ai ia te lava maʼu ʼo he fua lelei ʼaki te maʼuliʼi ʼo te tokoni ʼaē iā Loma 12:20.

⁵ Lau ia Loma 12:20. ʼI te fakaʼaogaʼi e Paulo ia te ʼu palalau ʼaē ʼi te vaega ʼaia, neʼe lagi ina manatuʼi ia te ʼu palalau ʼaē iā Tāʼaga Lea 25:21, 22: “Kapau ko ia ʼaē ʼe fehiʼa kiā koe ʼe fia kai, foaki age hana moʼi pane ke kai; kapau ʼe fia ʼinu, foaki age hona moʼi vai ke ʼinu. Heʼe ko te ʼu mamala ʼaē ʼe ke tānaki ki tona ʼulu, pea ko Sehova totonu ʼaē kā ina fakapale anai koe.” ʼO ʼuhiga mo tana tokoni ʼaē iā Loma kāpite 12, neʼe mole lava fakaʼuhiga e Paulo ia te fakatā ʼaia ʼo te ʼu mamala, ki he fakatūʼā ʼo he tahi ʼe fakafeagai mai peʼe ke fakalainoaʼi ia ia. Kae ko te Tāʼaga Lea ʼo fēia mo te ʼu palalau ʼa Paulo ʼaē ki te kau Loma, neʼe lagi talanoa ki te faʼahiga fai ʼo te temi muʼa ʼo te haka ʼaē ʼo te kele paʼaga ʼi te afi ke tupu ʼaki  ai he huhuʼa ʼo te ukamea. Neʼe ʼui e te tagata sivi Tohi-Tapu Pilitānia ko Charles Bridges ʼi te 19 sēkulō: “ ʼE takatakai ʼi lalo pea ʼi te fuga ʼo te kele paʼaga ʼaē ʼe faigataʼa tona mahuʼi kehe; ʼo mole gata pē ʼi te hili ʼo te kele paʼaga ʼaia ʼi te fuga ʼo te afi, kae ʼe toe hili ʼi te fuga ʼo te kele ia he ʼu mamala kakaha. ʼE tokosiʼi te ʼu loto ʼe fefeka fau, ke mole malū ifo ʼi te mālohi ʼo te faʼa kātaki, mo te loto fakasākilifisio, pea mo te ʼofa mamahi.”

⁶ Ohagē ko “he ʼu mamala kakaha,” ko te ʼu gāue ʼaē ʼe lelei, ʼe feala ke fetogi ai te aga ʼa te hahaʼi fakafeagai pea mo tuku ai tanatou gaohi koviʼi ʼaē ia te ʼu kaugana ʼa te ʼAtua. ʼAki ni ʼu gāue ʼe lelei, ʼe feala ki te hahaʼi ke natou agalelei ki te hahaʼi ʼa Sehova pea ke natou tali ia te logo lelei ʼo te Tohi-Tapu ʼaē ʼe natou fakamafola. Neʼe tohi fēnei e te ʼapositolo ko Petelo: “Ke iā koutou he aga matamatalelei ʼi te lotolotoiga ʼo te ʼu puleʼaga, ke feala ʼi te temi ʼaē ʼe natou laukovi ai kiā koutou ohagē ko he kau agakovi, ke natou fakakolōliaʼi te ʼAtua ʼi te ʼaho ʼo tana ʼaʼahi, ʼuhi ko tanatou sio mata ki takotou ʼu gāue lelei.”—1 Pet. 2:12.

Ke Tou “Māʼuʼuli ʼi Te Tokalelei Mo Te Tagata Fuapē”

 7. Ko te tokalelei fea ʼaē neʼe tuku e Kilisito ki tana ʼu tisipulo, pea koteā ʼaē ʼe tonu ke uga ai tātou e te tokalelei ʼaia ke tou fai?

⁷ Lau ia Loma 12:18. Lolotoga te pō fakaʼosi ʼaē neʼe nofo ai Sesu mo tana kau ʼapositolo, neʼe ina ʼui fēnei age kiā nātou: “ ʼE au tuku atu kiā koutou te tokalelei, ʼe au foaki atu kiā koutou taku tokalelei.” (Soa. 14:27) Ko te tokalelei ʼaē neʼe tuku e Kilisito ki tana ʼu tisipulo, ʼe ko te lotofīmālie ʼaē ʼe natou maʼu ʼi tanatou logoʼi ai ʼe ʼofainaʼi nātou pea mo tali nātou e Sehova ʼAtua pea mo tona ʼAlo ʼofaina. Ko te lotofīmālie ʼaia, ʼe tonu ke ina uga kita ke tou maʼuli tokalelei mo te hahaʼi. Ko te kau Kilisitiano moʼoni ʼe natou manako ki te tokalelei pea mo kumi te tokalelei.—Mat. 5:9.

 8. ʼE tou lava fakahā feafeaʼi ʼe tou kumi ia te tokalelei ʼi totatou ʼu loto fale pea ʼi te loto kōkelekāsio?

⁸ ʼE tou fakahā ʼe tou kumi ia te tokalelei ʼi totatou fāmili, mokā tou foimo fakatokatoka fakavilivili he ʼu fihifihia, ke ʼaua naʼa tou tuku ke liliu ʼo kovi age ʼosi. (Taag. 15:18; Efe. 4:26) ʼE toe ʼaoga ia te tokoni ʼaia ki te loto kōkelekāsio. Ko te ʼapositolo ko Petelo ʼe ina fakapipiki te kumi ʼo te tokalelei ki te tāʼofi ʼaē ʼo te ʼalelo. (1 Pet. 3:10, 11) ʼO fēia mo Sake, ʼi tana ʼosi foaki ia te tokoni mālohi ʼo ʼuhiga mo te fakaʼaogaʼi lelei ʼaē ʼo te ʼalelo pea mo te ʼaoga ʼaē ke tekeʼi ia te maheka pea mo te fakataupiepie, neʼe ina tohi fēnei: “Ko te poto mai ʼoluga, ʼuluaki ʼe maʼa ia, pea ʼe tokalelei, ʼe fakapotopoto, pea ʼe fia fakalogo, fonu ia ʼi te manavaʼofa pea mo te ʼu fua lelei, ʼo mole fakapalatahi ia, pea ʼe mole mālualoi. Pea tahi ʼaē, ko te fua ʼo te faitotonu ʼe tō ʼi tokalelei kiā nātou ʼaē ʼe natou kumi te tokalelei.”—Sake 3:17, 18.

 9. Koteā ʼaē ʼe tonu ke tou manatuʼi tuʼumaʼu ʼi tatatou faiga ʼaē ke tou “māʼuʼuli ʼi te tokalelei mo te tagata fuapē”?

⁹ ʼI tana palalau ʼaē iā Loma 12:18, ʼe mole fakatuʼakoi pē ia te tokoni ʼa Paulo ke kita kumi te tokalelei ʼi totatou ʼu loto fale pea ʼi te ʼu loto kōkelekāsio. Kae ʼe ina toe ʼui, ʼe tonu ke tou “māʼuʼuli ʼi te tokalelei mo te tagata fuapē.” ʼE  fakaʼuhiga te faʼahi ʼaia kiā nātou ʼaē ko totatou ʼu tatau, totatou ʼu kaugā gāue, totatou ʼu kaugā ako, pea mo nātou ʼaē ʼe tou fai fakamafola ki ai ʼi tatatou minisitelio. Kae neʼe toe ʼui fēnei e te ʼapositolo ʼo ʼuhiga mo tana tokoni ʼaia: “Kapau ko he meʼa ʼe feala, tāfito mo kapau ko he meʼa ʼe fakalogo kiā koutou.” Ko tona fakaʼuhiga, ke tou fai ia meʼa fuli ʼaē ʼe tou lavaʼi ke tou “māʼuʼuli ʼi te tokalelei mo te tagata fuapē” kae mole fakaʼuhiga leva ke tou meʼa noaʼi ia te ʼu pelesepeto faitotonu ʼa te ʼAtua.

Ko Te Lagavaka ʼe ʼa Sehova

10, 11. ʼE fakaʼuhiga feafeaʼi ia te ʼui ʼaē ʼe tou “tuku he faigamālie ki te ʼita,” pea he koʼē ʼe tonu ke fēia?

¹⁰ Lau ia Loma 12:19. Māʼiapē lā mo “nātou ʼaē ʼe mole nonofo mo he ʼu fakatuʼutuʼu lelei” ʼo ʼuhiga mo tatatou fai fakamafola pea mo te logo ʼaē ʼe tou fakahā age kiā nātou,ʼo kau kiai ia nātou ʼaē ʼe natou fehihiʼa ʼosi kiā tātou, ʼe tonu ke tou ‘lolomi ia tātou ʼi te agakovi’ pea mo ‘agamalū.’ (2 Tim. 2:23-25) ʼE tokoniʼi e Paulo ia te kau Kilisitiano ke ʼaua naʼa natou lagavaka kae ke natou “tuku he faigamālie ki te ʼita.” Ko te ʼita ʼo ʼai ʼaē ʼe talanoa kiai Paulo? Neʼe mole feala ke ʼui e Paulo ʼe tonu ke tou ʼiʼita. Kae ʼi tona fakahagatonu, ʼe tonu ke tou tuku ia he faigamālie ki te hauhau ʼa te ʼAtua. ʼI totatou ʼuhiga Kilisitiano, ʼe tou ʼiloʼi ʼe mole ʼa tātou ia te fai ʼaē ʼo te lagavaka. Neʼe tohi fēnei e te tagata fai Pesalemo: “Sītuʼa ki te ʼita pea mo ke liʼaki te makalili; ʼaua naʼa ke vela ʼi te ʼita naʼa ke fai ia he meʼa ʼe kovi.” (Pes. 37:8) Pea neʼe tokoni fēnei mai Salomone: “ ʼAua naʼa ke ʼui: ‘ ʼE au liufaki anai te kovi!’ Falala kiā Sehova, pea ʼe ina haofaki anai koe.”—Taag. 20:22.

¹¹ Kapau ʼe gaohi koviʼi tātou e totatou ʼu fili, ʼe tou agapoto anai ʼo tou tuku kiā Sehova ke ina tauteaʼi nātou mo kapau ko he faʼahi ʼe tonu ke ina fai. ʼI tana fakahā ʼaē tana manatu ki te ʼita ʼo Sehova, neʼe toe ʼui fēnei e Paulo: “Neʼe tohi fēnei: ‘ ʼE ʼaʼaku te lagavaka; ʼe au liufaki anai te totogi, ko te ʼui ʼaia ʼa Sehova.’ ” (Vakaʼi ia Teutalonome 32:35.) Kapau ʼe tou faiga ke tou liufaki te kovi, ʼe tou fakahā ai anai ʼe tou fialahi, heʼe tou fia toʼo ia te tuʼulaga ʼe tuha pē mo Sehova ke ina fakahoko. Tahi ʼaē, ʼe tou fakahā ai anai ia tatatou mole tui ʼaē ki te fakapapau ʼaenī ʼa Sehova: “ ʼE au liufaki anai te totogi.”

12. ʼE haʼu anai ʼāfea ia te hauhau ʼa Sehova, pea ʼe hoko feafeaʼi anai?

¹² ʼI te kamataʼaga ʼo tana tohi ki te kau Loma, neʼe ʼui fēnei e Paulo: “[ʼE] haʼu te hauhau ʼa te ʼAtua mai te lagi ki te hahaʼi aga heʼe lotu pea mo heʼe faitotonu ʼaē ʼe natou taʼomia ia te moʼoni ʼaki te loi.” (Loma 1:18) Ko te hauhau ʼa Sehova ʼe haʼu anai mai te lagi ʼaki tona ʼAlo, ʼi te temi ʼo “te mamahi lahi.” (Fakh. 7:14) ʼE ko te “fakamoʼoni ʼaia ʼo te fakamāu faitotonu ʼa te ʼAtua,” ohagē ko tona fakamahino e Paulo ʼi tana tahi tohi neʼe takitaki e te laumālie: “Koia ʼe ko he aga faitotonu ʼa te ʼAtua ke ina fakahoko ia te mamahi kiā nātou ʼaē ʼe natou fakatupu mamahi kiā koutou, kae kiā koutou ʼaē ʼe tali mamahi, ko te fīmālie mo mātou, ʼi te hā mai ʼo te ʼAliki ko Sesu, mai te lagi, mo tana kau ʼāselo mālohi ʼi he afi ulo, mokā ina fakahoko anai te lagavaka kiā nātou ʼaē ʼe mole natou ʼiloʼi te ʼAtua pea mo nātou ʼaē ʼe mole fakalogo ki te logo lelei ʼo ʼuhiga mo totatou ʼAliki ko Sesu.”—2 Tes. 1:5-8.

Tauʼi Te Kovi ʼAki Te Lelei

13, 14. (a) He koʼē ʼe mole tou punamaʼuli mokā tou felāveʼi mo te fakafeagai? (b) ʼE tou lava tapuakiʼi feafeaʼi ia nātou ʼaē ʼe natou fakatagaʼi tātou?

¹³ Lau ia Loma 12:14, 21. ʼI tatatou falala kātoa ʼaē ʼe fakahoko anai e Sehova ia tana ʼu fakatuʼutuʼu, ʼe feala ke tou tōkakaga tāfito ki te gāue ʼaē neʼe ina foaki mai ke tou fakahoko, ko te fakamafola ʼo te ‘logo lelei ʼo te puleʼaga ʼi te kele kātoa.’ (Mat. 24:14) ʼE mahino kiā tātou ko te gāue Fakakilisitiano ʼaia, ʼe fakatupu ai anai ia te ʼita ʼo totatou ʼu fili, heʼe fakatokaga fēnei mai e Sesu: “ ʼE fehiʼaʼinaʼi anai koutou e te ʼu puleʼaga kātoa ʼuhi ko toku huafa.” (Mat. 24:9) Koia ʼe mole tou punamaʼuli peʼe tou lotovaivai mokā tou felāveʼi mo te fakafeagai. Neʼe tohi fēnei e te ʼapositolo ko Petelo: “ ʼU ʼofaina, ʼaua naʼa kotou feʼekeʼaki ki te afi ʼaē iā koutou pea mo hoko kiā koutou moʼo ʼahiʼahiʼi ʼo koutou, ohagē kiā koutou ko he meʼa faikehe. Kae ke kotou fakafiafia tuʼumaʼu heʼe kotou kau mo koutou ki te ʼu mamahi ʼo Kilisito.”—1 Pet. 4:12, 13.

¹⁴ ʼE mole tonu ke tou ʼiʼita kiā nātou ʼaē ʼe natou fakatagaʼi tātou, kae tou faiga ke tou akoʼi nātou,  ʼi tatatou ʼiloʼi ʼaē ko ʼihi iā nātou ʼe natou agakovi mai kiā tātou heʼe mole natou mahino ki tona tupuʼaga tāfito. (2 Ko. 4:4) Tou faigaʼi ke tou muliʼi ia te tokoni ʼaenī ʼa Paulo: “Kotou haga tapuakiʼi ia nātou ʼaē ʼe natou fakatagaʼi koutou; kotou tapuakiʼi pea ʼaua naʼa kotou faitutuku.” (Loma 12:14) Ko hatatou faʼahiga tapuakiʼi ia totatou ʼu fili, ʼe ko hatatou hūfakiʼi nātou. Neʼe ʼui fēnei e Sesu ʼi tana Akonaki ʼi te Moʼuga: “Kotou haga ʼofa ki ʼokotou fili, kotou fai te meʼa ʼaē ʼe lelei kiā nātou ʼe fehiʼa kiā koutou, ke kotou tapuakiʼi ia nātou ʼe faitutuku kiā koutou, ke kotou hūfaki ia nātou ʼaē ʼe natou tauveleʼi koutou.” (Luka 6:27, 28) Neʼe ʼiloʼi e Paulo ʼuhi ko te ʼu meʼa ʼaē neʼe hoko kiā ia, ʼe feala ki he tahi ʼe agakovi ke liliu ko he tisipulo agatonu ʼa Kilisito pea mo he kaugana faʼafai ʼa Sehova. (Kal. 1:13-16, 23) ʼI tana tahi tohi, neʼe ʼui fēnei e Paulo: “Kā laukoviʼi tātou, tou tapuakiʼi nātou; kā fakatagaʼi tātou, tou kātakiʼi; kā fasituʼu mai kiā tātou, tou fakavaivai.”—1 Ko. 4:12, 13.

15. Koteā te puleʼaki lelei pē e tahi ke tauʼi ai ia te kovi ʼaki te lelei?

¹⁵ Koia, ko he Kilisitiano moʼoni ʼe mulimuli ki te vaega fakaʼosi ʼo Loma kāpite 12: “ ʼAua naʼa ke tuku te kovi ke mālo iā koe, kae ke ke tauʼi aipē ia te kovi ʼaki te lelei.” Ko te matapuna ʼo te agakovi fuli pē ʼe ko Satana te Tēvolo. (Soa. 8:44; 1 Soa. 5:19) ʼI te meʼa ʼaē neʼe hā ki te ʼapositolo ko Soane, neʼe fakahā e Sesu ko tona ʼu tehina fakanofo neʼe natou “mālo iā [Satana] ʼuhi ko te taʼataʼa ʼo te ʼAkeno pea ʼuhi ko te folafola ʼo tanatou fai fagonogono.” (Fakh. 12:11) ʼE hā mai, ko te puleʼaki lelei pē e tahi ke tou mālo iā Satana pea mo tona mālohi agakovi, ʼe ko hatatou fai fagonogono, ʼo tou tala ia te logo lelei ʼo te Puleʼaga.

Ke Fakafiafia ʼi Te ʼAmanaki

16, 17. Koteā ʼaē neʼe tou ako mai iā Loma kāpite 12 ʼo ʼuhiga mo te ʼu fehuʼi ʼaenī (a) ʼe tonu ke tou fakaʼaogaʼi feafeaʼi ia totatou maʼuli? (b) ʼe tonu ke feafeaʼi tatatou aga ʼi te loto kōkelekāsio? (c) ʼe tonu ke tou feafeaʼi kiā nātou ʼaē ʼe fakafeagai ki tatatou tui?

¹⁶ Ko tatatou vakaʼi fakanounou ia te kāpite 12 ʼo te tohi ʼa Paulo ki te kau Kilisitiano ʼo Loma, neʼe ina fakamanatuʼi mai ia te ʼu tuʼuga manatu. Neʼe tou ako ʼi totatou ʼuhiga kaugana ʼa Sehova, ʼe tonu ke tou lotolelei ʼo fai he ʼu sākilifisio. ʼAki te laumālie ʼo te ʼAtua, ʼe tou fai ia he ʼu sākilifisio ʼaki he lotolelei, koteʼuhi ʼaki tatatou fakaʼaogaʼi totatou ʼu fealagia fakakaukau kua tou tui ʼe ko te finegalo ʼaia ʼo te ʼAtua. ʼE tou vela ʼaki te laumālie pea mo tou fakaʼaogaʼi fakamālotoloto ia totatou ʼu fealagia kehekehe. ʼE tou tauhi ʼaki te agavaivai pea mo tou mahino ki totatou ʼu tuʼakoi, pea ʼe tou faiga mālohi ke tou puipui ia tatatou logotahi Fakakilisitiano. ʼE tou muliʼi ia te ala ʼo te tali kāiga pea mo fakahā tatatou lotomahino moʼoni.

¹⁷ ʼE toe foaki mai e te kāpite 12 ʼo te tohi ʼo Loma, ia te ʼu tuʼuga tokoni, ʼo ʼuhiga mo tatatou faʼahiga tali ki te fakafeagai. ʼE mole tonu ke tou liufaki te kovi. ʼE tonu ke tou faiga ʼo tali ki te fakafeagai ʼaki he ʼu gāue ʼe lelei. Pea kapau ko he meʼa ʼe fealagia, kae mole tou maumauʼi ai he ʼu pelesepeto ʼo te Tohi-Tapu, ʼe tonu ke tou māʼuʼuli tokalelei mo te tagata fuapē. ʼE ʼaoga te tokoni ʼaia ki te maʼuli fakafāmili, ʼi te loto kōkelekāsio, mo totatou ʼu tatau, ʼi te gāue, ʼi te faleako, pea ʼi tatatou minisitelio. Tatau aipē mo kapau ʼe fēhihiʼa ʼosi te hahaʼi kiā tātou, kae ʼe lelei ke tou tauʼi ia te kovi ʼaki te lelei, ʼo tou manatuʼi ko te lagavaka ʼe ʼa Sehova.

18. Koteā te ʼu tokoni e tolu ʼaē ʼe foaki mai iā Loma 12:12?

¹⁸ Lau ia Loma 12:12. ʼO mole gata pē ʼi te ʼu tokoni ʼaoga fuli ʼaia, ʼe toe fai mai e Paulo iā tokoni e tolu. Mai tona ʼaluʼaga ʼaē, ʼe hoki tou lava fai ia te ʼu meʼa ʼaia ʼaki pē te tokoni ʼa Sehova, koia ʼe fakatokaga mai e te ʼapositolo ke tou “kātaki tuʼumaʼu ʼi te faikole.” ʼE feala ai anai ke tou muliʼi tana tahi tokoni ke tou “faʼa kātaki ʼi te mamahi.” Pea ʼe tonu ke tou manatuʼi tuʼumaʼu ia te kā haʼu ʼaē neʼe fakapapauʼi mai e Sehova kiā tātou pea mo tou ‘fakafiafia ʼi te ʼamanaki’ ʼo he maʼuli heʼegata ʼi te kele, peʼe ʼi te lagi.

Moʼo Fakamanatu

• ʼE tonu ke tou tali feafeaʼi ki te fakafeagai?

• Ko te ʼu ʼaluʼaga fea ʼaē ʼe tonu ai ke tou kumi te tokalelei, pea feafeaʼi?

• He koʼē ʼe mole tonu ke tou fai e tātou totonu ia te lagavaka?

[ʼU fehuʼi ʼo te ako]

[Paki ʼo te pasina 16]

Ko tatatou tokoni ʼaē ki totatou ʼu tatau ʼe feala ai ke tekeʼi ai te ʼu manatu fakapalatahi

[Paki ʼo te pasina 17]

ʼE kotou faiga koa ke kotou kumi ia te tokalelei ʼi te loto kōkelekāsio?