Ko Eteni​—Neʼe Ko Te Nofoʼaga Koa ʼAia ʼo Te Mālamanei ʼi Te Kamata?

KOTOU fakakaukauʼi age muʼa ʼe kotou maʼuli ʼi he ʼōloto. ʼE mole he ʼu meʼa ʼe fakatupu tuʼania, ʼe mole kotou logo ki he logoaʼa ʼo he kolo mai tuʼa. Ko he toe ʼōloto, pea ʼe maʼu ai te tokalelei. Ko te meʼa ʼaē ʼe lelei age, ʼe mole hakotou ʼu tuʼania, ʼe haohaoa tokotou sino mai te mahaki, mo te ʼu mahaki ʼe tupu mai he ʼu meʼa ʼe mole kei ʼaoga kiā koutou peʼe ko he faʼahi ʼo tokotou sino ʼe mamahi. ʼE feala ki totatou ʼu logoʼaga sino fuli ke natou logoʼi te ʼu meʼa ʼaē ʼi ʼotatou tafa.

ʼE sio tokotou ʼu mata ki te matalelei ʼo te ʼu lanu kehekehe ʼo te ʼu fisiʼi teu, mo te tāsilo lelei ʼo te u tafegā vai, mo te fetofetogi ʼo te ʼu lanu fuluʼihega kehekehe ʼo te ʼu lau ʼakau pea mo te luna ʼi te laʼā mo te malumalu. ʼE kotou logo leleiʼia te agiagi atu ʼo te matagi ki tokotou kili pea mo kotou mamanu ki te ʼu meʼa magoni ʼaē ʼe ʼave e te matagi. ʼE kotou logo ki te gaūgaūe ʼo te ʼu lau ʼakau, mo te gugulu ʼo te ʼu tōʼaga vaitafe, mo te ʼu tagi ʼo te faga manulele pea mo te logoaʼa ʼo te ʼu manu liliki. Kā kotou fakakaukauʼi te maʼuli ʼaia, ʼe mole kotou loto koa ke kotou nonofo ʼi he koga meʼa fēia?

Ko te hahaʼi ʼi te mālamanei ʼe natou tui neʼe kamata te maʼuli ʼo te mālamanei kātoa ʼi he koga meʼa fēia. Talu mai ni ʼu sēkulō, neʼe akoʼi age ki te hahaʼi ʼo te Lotu Fakasutea, mo te Keletiate, pea mo te kau Mahometa ʼo ʼuhiga mo te ʼōloto ʼo Eteni, ʼaē neʼe tuku kiai e te ʼAtua ia Atama mo Eva ke nā māʼuʼuli ai. Ohagē ko tona fakamatala ʼi te Tohi-Tapu, neʼe nā māʼuʼuli ʼi te tokalelei pea mo te fiafia. Neʼe nā felōgoi ʼi te tokalelei, neʼe nā tokalelei mo te faga manu pea mo te ʼAtua, ʼaē ʼaki he loto manavaʼofa neʼe ina foaki age kiā nāua te ʼamanaki ke nā māʼuʼuli ʼo heʼegata ʼi te koga meʼa fīmālie ʼaia.—Senesi 2:15-24.

ʼE toe maʼu e te kau Inituisi he tahi age ʼu manatu ʼo ʼuhiga mo te palatiso ʼi te ʼu temi ʼāfea. Ko te kau Putisi ʼe natou tui ko te ʼu takitaki fakalaumālie lalahi, peʼe ko te ʼu Bouddhas neʼe tutupu ʼi he temi ʼe makehe, ʼi te temi neʼe hagē te kele ko he palatiso. Pea ʼe lahi te ʼu lotu ʼi Afelika ʼe natou ako te ʼu hisitolia ʼe fakaofoofo tonatou tatau mo te hisitolia ʼo Atama mo Eva.

ʼI tona fakahagatonu, ko te manatu ʼaē neʼe ʼi ai te palatiso ʼi te kamataʼaga, ʼe feala ke tou maʼu ʼi te ʼu lotu pea mo te ʼu talatisio ʼi te  mālamanei kātoa. Neʼe ʼui fēnei ʼe te tagata faitohi: “ ʼE lahi te ʼu sivilisāsio neʼe natou tui neʼe ʼi ai te palatiso ʼi te kamataʼaga ʼo te hisitolia ʼaē neʼe maʼu ai te maʼuli haohaoa, mo te ʼāteaina, mo te tokalelei, mo te fiafia, pea mo te mahu ʼo meʼa fuli pē, neʼe puli ai te aga mālohi mo te fihi pea mo te ʼu fihifihia. . . . ʼAki te akonaki ʼaia neʼe tupu ai te fakaʼamu ʼa te hahaʼi ki te palatiso ʼaē neʼe puli kae neʼe mole natou galoʼi pea mo natou holi mālohi ʼaē ke natou toe maʼu ia te palatiso ʼaia.”

ʼE feala koa ki te ʼu hisitolia mo te ʼu talatisio fuli ʼaia ke fakatafito ki he manatu pē e tahi? ʼE feala koa ki te ʼu manatu ʼaia ʼi te mālamanei ke natou mulimuli ki te manatu ʼaē neʼe ʼi ai te palatiso ʼi te kamataʼaga? Neʼe i ai moʼoni koa te ʼōloto ʼo Eteni ʼi te temi muʼa pea neʼe māʼuʼuli moʼoni ai koa ia Atama mo Eva?

Ko te hahaʼi lotolotolua ʼe natou manukiʼi te manatu ʼaia. ʼI temi ʼaenī ʼo te poto fakataga, tokolahi ʼe natou ʼui ko te ʼu fakamatala ʼaia ʼe ko he ʼu fāgana pē ia. ʼE kotou punamaʼuli anai, heʼe ko ʼihi hahaʼi lotolotolua ʼe natou tui ki te ʼAtua. ʼE lahi te ʼu takitaki lotu ʼe natou fakalotoʼi te hahaʼi ke mole natou tui ki te ʼōloto ʼo Eteni. ʼE natou ʼui neʼe mole ʼi ai he nofoʼaga fēia. ʼE natou ʼui ko te fakamatala ʼaia ʼe ko he lea fakatātā peʼe ko he fāgana pē ia.

ʼE moʼoni ʼe kotou maʼu ʼi te Tohi-Tapu te ʼu lea fakatātā. Neʼe fai ʼe Sesu totonu te ʼu lea fakatātā ʼiloa. Kae ko te fakamatala ʼaē ʼi te Tohi-Tapu, ʼo ʼuhiga mo te ʼōloto ʼo Eteni ʼe mole ko he fāgana, kae ko he hisitolia neʼe hoko moʼoni ia. Koia, kapau ko te ʼu fakamatala ʼaia neʼe mole hoko moʼoni, ʼe lava feafeaʼi leva hakotou falala ki te tahi ʼu fakamatala ʼi te Tohi-Tapu? Tou vakaʼi pea mo fakasiosio pe koʼē ʼe lotolotolua ʼihi ʼo ʼuhiga mo te ʼōloto ʼo Eteni pea ʼe ʼi ai koa he fakatafito ki tanatou ʼu manatu? ʼE tou vakaʼi anai pe koteā te ʼaoga ʼo te fakamatala ʼaia kiā tātou takitokotahi.