Ko Ai Koa ʼAē ʼe Natou Fakamafola Te Logo Lelei?

“ . . . ʼe fakamafola anai ʼi te kele kātoa.”—MATEO 24:14.

KO TE logo lelei ʼe lolotoga fakamafola e te kau Fakamoʼoni ʼa Sehova ʼi te mālamanei kātoa. ʼE natou fakahoko te gāue ʼaia ʼi te ʼu faʼahi kehekehe ʼo te minisitelio. Koʼenī tona faʼahiga fai ʼe natou fakahoko ʼaki ai te gāue, ʼaki . . .

Te Palalau. Ohagē ko Sesu mo tana kau tisipulo, ko te kau Fakamoʼoni ʼa Sehova ʼe natou ʼolo ʼo palalau mo te hahaʼi ʼo ʼuhiga mo te logo lelei. (Luka 8:1; 10:1) ʼE mole natou fakatalitali ke ʼolo age te hahaʼi kiā nātou. Ko te fai palalau ʼaē mo te hahaʼi ʼo ʼuhiga mo te Puleʼaga ʼo te ʼAtua ʼe ko he faʼahi ʼe fakahoko e te kau Fakamoʼoni ʼa Sehova fuli ʼaē kua lau kua natou toko fitu miliona tupu. ʼE natou fai fakamafola ʼi te ʼu ʼapi, ʼi te ʼu ala, ʼi te telefoni pea mo ʼihi ʼatu ʼaluʼaga. ʼI te taʼu kua hili ko te kau Fakamoʼoni ʼa Sehova neʼe natou fakalaka iā hola e tahi miliale mo tona vaelua ʼi te minisitelio.

ʼE mole natou akoʼi pē ʼihi ʼo ʼuhiga mo te Puleʼaga ʼo te ʼAtua kae ʼe natou toe akoʼi age foki kiā nātou mo te “ ʼu meʼa fuli pē ʼaē neʼe . . . fakatotonu e [Sesu].” (Mateo 28:20) ʼE natou fai tuʼumaʼu te ʼu ako Fakatohi-tapu e toko valu miliona tupu ʼe mole natou fakatotogi.

ʼE lolotoga fai fakamafola nei ia te kau Fakamoʼoni ʼa Sehova ʼi te mālamanei kātoa iā fenua e 236. ʼE natou fai fakamafola ki te faʼahiga hahaʼi kehekehe. ʼE natou fai fakamafola ʼi te vao, pea mo te loto kolo, ʼi te ʼu vao matuʼa ʼi Amazone mo te ʼu vao matuʼa ʼo Sipelia, mo te ʼu toafa ʼi Afelika pea mo te ʼu Moʼuga ʼi Himalaya. ʼE mole totogi ia nātou ki te gāue ʼaia, kae ʼe natou fakaʼaogaʼi tonatou ʼu koloa ki te gāue ʼaia, pea ʼe natou fakaʼaogaʼi tonatou temi, pea ʼe uga nātou e tonatou ʼofa ʼaē kiā Sehova pea mo tonatou ʼu kāiga. ʼE natou toe fakahā foki ia te logo lelei ʼaki . . .

Te ʼu Tohi. Ko te nusipepa ʼaenī, ʼaē ko tona kupu tāfito Ko Te Tule Leʼo ʼe Ina Kalagaʼi Te Puleʼaga iā ʼaho nei kua tā iā lea kehekehe e 185 pea kua teitei pē ko nusipepa e 42 miliona tupu kua tā. Ko te tahi nusipepa ʼe hoa mo ia ʼaenī ʼaē ko te Réveillez-vous! ʼaē ʼe ina fakamafola foki ia te Puleʼaga kua teitei 40 miliona nusipepa ʼaia kua tā iā lea kehekehe e 83.

Ko te ʼu tohi mo te ʼu kaupepa lalahi, mo te ʼu kiʼi pepa lotu, mo te ʼu pā fakatagi ko te CD peʼe ko te MP3 pea mo te ʼu DVD ʼaē ʼe natou fakamahino te ʼu akonaki ʼo te Tohi-Tapu kua maʼu iā lea e 540. ʼE tā e te kau Fakamoʼoni ʼa Sehova pea mo natou tufa te 20 miliale tupu ia te ʼu tohi peʼe ko te ʼu pā fakatagi peʼe ko he tohi pē lolotoga te ʼu taʼu e hogofulu ʼaenī kua hili, ko te tānaki ʼaia kua tuʼa tolu tona laka ʼi te kaugamālie ʼo te hahaʼi ʼi te mālamanei!

ʼE toe tā e te kau Fakamoʼoni ʼa Sehova pea mo natou fai te gāue ʼaē ko te tā mo te fakaliliu ʼo te Tohi-Tapu ʼi te ʼu lea kehekehe. Ko te Tohi-Tapu Les Saintes Écritures — Taduction du monde nouveau : kua fakaliliu, mo tā pea mo tufa e te kau Fakamoʼoni iā ʼaho nei peʼe maʼu kātoa peʼe fakakoga iā lea e 96. Kua fakalaka te ʼu tohi e 166 miliona kua natou tufa. Ko te kau Fakamoʼoni ʼe natou toe vaevae ia te logo lelei ʼo te Puleʼaga . . .

Lolotoga Te ʼu Fono Fakakilisitiano. Ko te ʼu fono ʼi te vāhaʼa fuli ʼaē ʼe fai ʼi te ʼu Fale ʼo Te Puleʼaga ʼe mole ko he ʼu gāue fakalotu pē kae ko te  fakatuʼutuʼu ʼo te ʼu fono ʼe ko te ako ʼo te Tohi-Tapu. ʼE fai te ʼu akonaki ʼe fakatafito ki te Tohi-Tapu, pea ʼe tokoni mai ia te Tule Leʼo ki te ako ʼo te Tohi-Tapu pea mo te tahi ʼu tohi Fakatohi-tapu. ʼI te ʼu fono, ʼe toe akoako foki e te kau Fakamoʼoni ke natou faiva ʼi te fakamafola ʼo te logo lelei.

Ko te kau Fakamoʼoni ʼe natou ako te nusipepa pea mo te tohi pē e tahi ʼi te ʼu kōkelekāsio e 107 000 tupu ʼi te kele kātoa, pea ʼe tokoni te faʼahi ʼaia ki tanatou logo tahi. Ko te ʼu fono ʼaia ʼe feala ki te hahaʼi ke natou ʼomai ʼo fakalogo. ʼE mole fai he tae falā. ʼE moʼoni ia, ʼe fua noa ia te ʼu faʼahi ʼaia mo kanapau neʼe mole maʼuliʼi e te kau Fakamoʼoni ʼa Sehova te ʼu meʼa ʼaē ʼe natou ʼolo ʼo fakamafola. Koia ʼe natou faiga ke natou fakahā ia te logo lelei . . .

ʼAki Tanatou Tuku He Faʼifaʼitaki. ʼE natou faiga ke natou tuku he faʼifaʼitaki Fakakilisitiano ʼi tanatou aga, ʼi tonatou gaohi leleiʼi ʼihi ohagē pē ko tanatou loto ʼaē ke gaohi leleiʼi fēia ia nātou. (Mateo 7:12) Logolā ʼe natou agahala pea ʼi ʼihi temi ʼe natou higa, ʼe natou faiga fakamālotoloto ke natou fai he ʼu gāue ʼofa maʼa te hahaʼi fuli ʼo mole gata pē ʼi tanatou fakahā te logo lelei kae ʼe natou toe tokoni ʼi ʼihi atu ʼaluʼaga mokā ʼe natou fealagia.

ʼE mole faiga e te kau Fakamoʼoni ʼa Sehova ke natou fetogi ia te mālamanei ʼaki tanatou fai fakamafola. Kae, mokā fakahoko te gāue ʼaia ʼo aʼu ki te fakafuafua e Sehova kua feʼauga, pea ʼe hoko mai ai leva te fakaʼosi ʼaē neʼe fakakikite e Sesu. Koteā anai tona fakaʼuhiga ki te kele pea mo te hahaʼi ʼaē ʼe nonofo ai?

[Paki ʼo te pasina 7]

ʼE lolotoga fakamafola nei te logo lelei e te kau Fakamoʼoni ʼa Sehova ʼi te mālamanei kātoa