ʼE Fakamaʼuhigaʼi Pea Mo Fakaʼapaʼapaʼi e Te ʼAtua Ia Te Hahaʼi Fafine

ʼI TE maʼuli ʼa Sesu ʼi te kele, neʼe ina fakahā lelei te ʼuluagaaga ʼo tana Tamai ʼi selō pea mo tana aga. Neʼe ina ʼui fēnei: “E mole pe au fai he mea ia au totonu, kae e au palalau o mulimuli ki te mea nee ako mai kia au e te Tamai. . . . E au fai tuumau te mea e lelei kia ia.” (Soane 8:28, 29; Kolose 1:15) Koia, ʼaki tatatou tokagaʼi te vāhaʼa ʼa Sesu mo te hahaʼi fafine pea mo tana faʼahiga manatu ʼo ʼuhiga mo nātou, ʼe feala ai hatatou sio pea mo mahino ki te manatu pea mo te ʼu meʼa ʼaē ʼe loto e te ʼAtua ke fai kiā nātou.

ʼI te fakatafito ʼa ʼihi kau popoto ki te ʼu fakamatala ʼo te ʼu Evaselio, neʼe natou fakamoʼoni ko te manatu ʼa Sesu ʼo ʼuhiga mo te hahaʼi fafine neʼe ko he manatu foʼou ia. ʼO feafeaʼi? Pea ko te faʼahi ʼaē ʼe maʼuhiga age, ʼe kei feala koa ʼaki ʼana akonaki ke maʼu ai e te hahaʼi fafine he ʼāteaina lahi iā ʼaho nei?

Neʼe Feafeaʼi Te Aga ʼa Sesu Ki Te Hahaʼi Fafine?

◼ Neʼe mole ʼui e Sesu ko te fafine ʼe ko he meʼa pē ia moʼo fai he ʼu felāveʼi fakasino. Maʼa ʼihi kau takitaki lotu Sutea, ko te felōgoi ʼaē ʼa te hahaʼi tagata mo nātou fafine neʼe feala pē ia ke iku ki he ʼu holi kovi. Neʼe ʼui ko te hahaʼi fafine ʼe ko he hele ia, pea koia ʼaē neʼe mole fakagafua ai ke natou palalau ki te hahaʼi tagata ʼi muʼa ʼo te kaugamālie pe neʼe tonu ke natou pūlou mokā natou hū ki tuʼa. Kae ko Sesu, neʼe ina fai he tokoni ki te hahaʼi tagata ke natou lolomi ʼonatou holi ʼo te kakano pea ke natou fakamaʼuhigaʼi te hahaʼi fafine kae mole natou tuku keheʼi.—Mateo 5:28.

Neʼe toe ʼui fēnei e Sesu: “Ko he tahipe e ina fakamavae tona ohoana, pea ohoana ia mo he tahiʼage [fafine], e tono ki tona ohoana.” (Ko mātou ʼaē neʼe matou fetogi tona faʼahiga tohi; Maleko 10:11, 12, Tauhi Foou) Neʼe mole mulimuli ia ki te akonaki maʼuhiga Fakasutea ʼaē neʼe fakagafua ki te hahaʼi tagata ke natou māvete mo ʼonatou ʼohoana “i he takuaga pe.” (Mateo 19:3, 9, Tauhi Foou) Ko te manatu ʼaē ʼe feala ki he tagata ke tono ki tona ʼohoana, neʼe mole ʼiloʼi ia e te kau Sutea. Neʼe akoʼi e te kau tagata faiako Sutea neʼe mole feala ki te tagata ʼohoana ke tono, kae neʼe ko te fafine ia ʼaē neʼe feala ke hala ki tuʼa! Ohagē ko tona ʼui ʼi te tohi ʼe ina fakamahino te Tohi-Tapu, ko “Sesu, ʼi tana fakahā ʼaē ʼe tatau te tagata ʼohoana mo te fafine ʼo ʼuhiga mo te aga ʼe tonu ke fai, neʼe ina hikihiki ai te tuʼulaga pea mo te maʼuhiga ʼo te hahaʼi fafine.”

Te fua ʼo tana akonaki iā ʼaho nei: ʼI te kōkelekāsio Fakakilisitiano ʼa te kau Fakamoʼoni ʼa Sehova, ʼe fakatahi faʼifaʼitaliha ai te hahaʼi fafine mo te hahaʼi tagata ʼi te ʼu fono. Kae ʼe mole natou tuʼania naʼa sioʼi nātou e te hahaʼi tagata ʼaki ni holi kovi peʼe natou fai age he ʼu aga ʼe heʼe tāu, heʼe ko te kau tagata Kilisitiano ʼe natou tōkakaga ki “te u fafine matutua o hage ko ni fae, te u fafine mui o hage ko ni tuagaane, i te maa katoa.” (Ko mātou ʼaē neʼe matou fetogi tona faʼahiga tohi.)—1 Timoteo 5:2.

◼ Neʼe toʼo e Sesu he temi moʼo akoʼi te hahaʼi fafine. Neʼe maʼu e te kau tagata faiako Sutea te manatu ʼaē neʼe mole tonu ke mahino te hahaʼi fafine ki he meʼa, kae ko Sesu ia neʼe ina akoʼi nātou pea mo fakalotomālohiʼi nātou ke natou fakahā ʼanatou manatu. ʼI te loto ʼaē ʼa Sesu ke maʼu e Malia te fiafia mai tona akoʼi, neʼe ina fakahā ai ʼe mole ko te tuʼulaga pē ʼaē ʼo he fafine ko te fale kuka. (Luka 10:38-42) Neʼe toe fua lelei foki tana akonaki kiā Maleta, te tehina ʼo Malia, ohagē ko tana fakahā ʼi ʼana tali poto ʼaē neʼe ina fai kiā Sesu hili te mate ʼo Lasalo.—Soane 11:21-27.

 Neʼe maʼuhiga kiā Sesu te ʼu manatu ʼa te hahaʼi fafine. ʼI te temi ʼaia, tokolahi te hahaʼi fafine Sutea neʼe natou tui ʼe natou fiafia moʼoni mo kapau neʼe natou maʼu hanatou tama neʼe natou fiameʼameʼa ai, mo kanapau lā neʼe ko he polofetā. ʼI te temi ʼaē neʼe kalaga fēnei ai te fafine: “Manuia te fatu ae nee ina fua ia koe!” neʼe fakaʼaogaʼi ai e Sesu te faigamālie ʼaia moʼo fakahā ki ai te meʼa ʼe maʼuhiga age. (Luka 11:27, 28) ʼAki te fakahā ʼaē e Sesu ʼe maʼuhiga age te fakalogo ki te ʼAtua, neʼe ina fakahā ai he faʼahi ʼe maʼuhiga age ʼi te tuʼulaga ʼaē neʼe fakamaʼua māhani ki te hahaʼi fafine.—Soane 8:32.

Te fua ʼo tana akonaki iā ʼaho nei: Ko te kau faiako ʼi te kōkelekāsio Fakakilisitiano, ʼe natou leleiʼia te ʼu tali ʼaē ʼe fai e te hahaʼi fafine ʼi te ʼu fono. ʼE natou fakaʼapaʼapa ki te hahaʼi fafine kua fotufotuʼa ʼaē ʼe “natou tuku ni tokoni lelei,” ʼaki tanatou tuku he faʼifaʼitaki lelei ʼi tanatou aga mokā natou tō tokotahi pea mokā natou fakatahi mo niʼihi. (Tito 2:3) ʼE natou toe tuku foki te falala ki te hahaʼi fafine ke natou tala te logo lelei ʼo te Puleʼaga ʼo te ʼAtua.—Pesalemo 68:12; vakaʼi te fakamatala ʼaē ʼe ʼātakai  “Neʼe Tapuʼi Koa e Te ʼApositolo Ko Paulo Ke Palalau Te Hahaʼi Fafine?”

◼ Neʼe tokaga ia Sesu ki te hahaʼi fafine. ʼI te temi muʼa, neʼe maʼuhiga age te tamaliki tagata ʼi te tamaliki fafine. ʼE fakahā ʼi te tohi lotu (Talmud) te manatu ʼaia, ʼo ʼui fēnei ai: “Fiafia ia ia ʼaē ʼe tagata tana fānau, pea malaʼia ia ia ʼaē ʼe fafine tana fānau.” Ko ʼihi mātuʼa ʼe natou ʼui ko te toe fafine ʼe ko he kavega lahi ia, heʼe tonu anai ke natou kumi hona ʼohoana pea ke natou foaki ki te tagata ʼaia he paʼaga peʼe ko he ʼu koloa. Pea ʼe mole feala anai ke natou falala ki ai mokā mātutuʼa.

Neʼe fakahā e Sesu ʼe toe maʼuhiga te maʼuli ʼa he kiʼi taʼahine ohagē pē ko ʼaē ʼa he kiʼi tama. Koteʼuhi neʼe ina fakatuʼuake te ʼofafine ʼo Sailusi, ohagē pē ko te tama ʼa te fafine vītua ʼi te kolo ʼo Naini. (Maleko 5:35, 41, 42; Luka 7:11-15) ʼI te ʼosi fakamālōlō ʼaē e Sesu he fafine neʼe fakamamahiʼi e te “laumalie kovi . . . nee ina fakamahaki ia ia talu maia tau e hogofulu ma valu,” neʼe ina fakahigoaʼi ia ia ko “he taahine a Apalahamo,” neʼe ko he kupusiga palalau ia neʼe mole tuʼu ʼi te ʼu tohi Fakasutea. (Luka 13:10-16) ʼAki te fakaʼaogaʼi e Sesu te kupusiga palalau fakaʼapaʼapa mo agalelei ʼaia, neʼe ina fakamoʼoni ai neʼe hagē pē te fafine ʼaia ko te hahaʼi fuli pea neʼe lahi tana tui.—Luka 19:9; Kalate 3:7.

Te fua ʼo tana akonaki iā ʼaho nei: ʼE fakahā ʼi te tākuga lea Asia ʼe mole ʼaoga anai ki tokotou fāmili te pusiaki ʼo he taʼahine, heʼe ʼui fēnei: “Ko te pusiaki ʼo he taʼahine ʼe hagē pē ia ko te fakavai te ʼōloto ʼo te vāhaʼa fale.” ʼE mole tonu ke mulimuli te ʼu tamai Kilisitiano ʼofa ki te taʼi manatu ʼaia, kae ʼe tonu ke natou tōkakaga lelei ki ʼanatou fānau, tagata pea mo fafine. ʼE tonu ke tōkakaga te ʼu mātuʼa Kilisitiano ke maʼu fuli e ʼanatou fānau, he ako ʼe lelei pea mo he ʼu faitoʼo mokā natou māhahaki.

◼ Neʼe falala ia Sesu ki te hahaʼi fafine. ʼI te ʼu telepinale Sutea, neʼe tatau pē te fakamoʼoni ʼa he fafine mo ʼaē ʼa he tagata kaugana. Kua hili kiai ni taʼu e lua afe, ko te tagata fai hisitolia ko Josèphe, neʼe ina fakatokaga fēnei: “ ʼAua naʼa kotou tali te ʼu fakamoʼoni ʼa te hahaʼi fafine, heʼe mole natou fakamālotoloto pea mo tuha mo te falala.”

Neʼe mole fēia ia Sesu, he neʼe ina fili te hahaʼi fafine ke natou ʼolo ʼo fakahā ia tona fakatuʼuake.  (Mateo 28:1, 8-10) Logolā neʼe sio mata te ʼu fafine agatonu ʼaia ki te matehi pea mo te ʼavaifo ʼaē ʼo tonatou ʼAliki, kae neʼe faigataʼa ki te kau ʼapositolo hanatou tui ki tanatou fakamatala. (Luka 24:10, 11; Mateo 27:55, 56, 61) Kae ʼaki te ʼuluaki ʼasi ʼa Kilisito ʼaē neʼe kua fakatuʼuake ki he ʼu fafine, kiā ia, neʼe natou tuha mo te foaki ʼo he fakamoʼoni ohagē pē ko ʼana tisipulo ʼaē.—Gaue 1:8, 14.

Te fua ʼo tana akonaki iā ʼaho nei: Ko te ʼu tagata ʼaē ʼe ʼi ai ʼonatou maʼua ʼi te ʼu kōkelekāsio ʼa te kau Fakamoʼoni ʼa Sehova, ʼe natou fakaʼapaʼapa ki te hahaʼi fafine ʼo natou tokagaʼi mokā natou palalau. Pea ko te ʼu tagata ʼohoana Kilisitiano, ʼe natou “fakaapaapa” ki ʼonatou ʼohoana ʼaki tanatou fagono lelei ʼaē kiā nātou.—1 Petelo 3:7; Senesi 21:12.

ʼE Lagolago Te ʼu Pelesepeto Fakatohi-tapu Ki Te Maʼuli Fiafia ʼa Te Hahaʼi Fafine

Mokā faʼifaʼitakiʼi e te hahaʼi tagata ia Kilisito, ʼe maʼu ai e te hahaʼi fafine te fakaʼapaʼapa mo te ʼāteaina ʼaē neʼe loto kiai e te ʼAtua maʼa nātou ʼi te kamata. (Senesi 1:27, 28) ʼE mole hagē te ʼu tagata ʼohoana Kilisitiano ko nātou ʼaē ʼe nekenekea ʼo meʼa noaʼi ʼonatou ʼohoana, kae ʼe natou tuku ke takitaki nātou e te ʼu pelesepeto Fakatohi-tapu ʼaē ʼe lagolago ki te maʼuli fiafia ʼo ʼonatou hoa.—Efeso 5:28, 29.

ʼI te kamata ako ʼaē e Yelena ia te Tohi-Tapu, neʼe ina ʼūtakiʼi fakalogologo pē ia tona gaohi koviʼi e tona ʼohoana. Neʼe lahilahi ake tona ʼohoana ʼi he koga meʼa neʼe hoko ai te agamālohi, ʼaē neʼe ko he agamāhani ia te kaihaʼa ʼo te ʼu fafine ʼaē neʼe teuteu ʼohoanaʼi pea mo tonatou gaohi koviʼi. Neʼe ʼui fēnei e Yelena: “Neʼe au maʼu te mālohi ʼaki te ʼu meʼa ʼaē neʼe au ako ʼi te Tohi-Tapu. Neʼe au mahino ai neʼe ʼi ai te tahi ʼe ʼofa lahi mai, mo fakamaʼuhigaʼi au pea mo tokaga mai. Neʼe au toe mahino ai foki kapau neʼe ako e toku ʼohoana ia te Tohi-Tapu pea neʼe feala ai ke fetogi tana aga kiā au.” Ko tana fakaʼamu ʼaia neʼe hoko moʼoni ʼi te temi leva ʼaē neʼe tali ai e tona ʼohoana ke ina ako te Tohi-Tapu pea mo papitema ʼo liliu ko he Fakamoʼoni ʼa Sehova. Neʼe ʼui fēnei e Yelena: “Neʼe liliu ia toku ʼohoana ko he faʼifaʼitaki ʼo ʼuhiga mo te loto lolomi. Neʼe mā ako ke mā fefakamolemoleʼaki ʼaki he lotolelei.” Koʼenī leva tana manatu fakaʼosi: “Neʼe tokoni moʼoni mai te ʼu pelesepeto Fakatohi-tapu ke au logoʼi ʼe ʼi ai toku ʼuhiga pea mo puipui au ʼi toku maʼuli fakataumātuʼa.—Kolose 3:13, 18, 19.

Neʼe mole ko Yelena pē ʼaē neʼe hoko ki ai te ʼu ʼaluʼaga ʼaia. Ko te toko lauʼi miliona fafine Kilisitiano ʼe natou maʼuli fiafia heʼe natou faiga mo ʼonatou ʼohoana ke natou maʼuliʼi te ʼu pelesepeto Fakatohi-tapu ʼi tonatou maʼuli fakataumātuʼa. ʼE natou maʼu te fakaʼapaʼapa, mo te maʼuli fīmālie pea mo te ʼāteaina ʼi te kautahi ʼa te ʼu tehina mo tuagaʼane Kilisitiano.—Soane 13:34, 35.

Ko te ʼu tagata mo fafine Kilisitiano ʼe natou fakamoʼoni ʼe natou agahala mo heʼe haohaoa, pea ʼe natou kau ai ki te fakatupu ʼa te ʼAtua ʼaē neʼe “tuku . . . ki te vaiga.” Kae ʼaki tanatou fakaovi ʼaē ki tonatou ʼAtua mo Tamai ʼofa ko Sehova, ʼe natou maʼu ai te ʼamanaki ʼaē “e fakaateainai anai [nātou] ia mai te popula o te pala,” pea mo “te ateaina o te u foha a te Atua i te kololia.” ʼI ʼamanaki taulekaleka leva ʼaē kā maʼu e te hahaʼi tagata mo nātou fafine ʼaē ʼe fakamaʼuhigaʼi e te ʼAtua!—Loma 8:20, 21.

[Talanoa ʼo te pāsina 9]

 Neʼe Tapuʼi Koa e Te ʼApositolo Ko Paulo Ke Palalau Te Hahaʼi Fafine?

Neʼe tohi fēnei e te ʼapositolo ko Paulo: “Ke fakalologo te u fafine i te u fakatahi.” (Ko mātou ʼaē neʼe matou fetogi tona faʼahiga tohi; 1 Kolinito 14:34) Koteā tona fakaʼuhiga? Neʼe ina ʼui koa neʼe mole natou faʼa popoto? Kailoa ia, he neʼe tautau talanoa pē lā ki te faiako lelei ʼa te hahaʼi fafine. (2 Timoteo 1:5; Tito 2:3-5) ʼI tana tohi ki te kau Kolinito, neʼe tokoni ai e Paulo ki te hahaʼi fafine ʼo toe fēia pē mo nātou ʼaē neʼe poto ʼi te ʼu lea kehekehe pea mo fai fakakikite, ke natou “fakalologo” mokā lolotoga palalau he tahi age tehina. (1 Kolinito 14:26-30, 33) Neʼe lagi fiafia ʼihi fafine Kilisitiano ʼuhi ko tanatou tui foʼou koia ʼaē neʼe natou tāʼofi ai ia ia ʼaē neʼe palalau moʼona fakafehufehuʼi, he neʼe ko te agamāhani ia ʼi te potu ʼaia ʼo te mālamanei. Moʼo tekeʼi te taʼi maveuveu ʼaia, neʼe fakalotomālohiʼi ai e Paulo ia nātou ke natou fai “fehui ki onatou ohoana i onatou api.”—1 Kolinito 14:35.

[Paki ʼo te pāsina 10]

Neʼe fakamaʼuhigaʼi e Sesu ia Malia Maketala ʼo ina foaki age te fealagia ʼaē ke ina tala tona fakatuʼuake ki te kau ʼapositolo