Tou Tauʼi ʼAki Te Lotomālohi Ia Te ʼu Faigataʼaʼia ʼo Te Temi Nei

“Ko te Atua ko he hufaga mo he falalaaga kia tatou, ko he tokoni ae e mole toe puli i te temi o te mamahi.”—PES. 46:2.

ʼE FEALA KOA HAKOTOU TALI?

Koteā ʼaē ʼe tonu ke tou fai ke ʼaua naʼa tou lotovaivai ʼuhi ko te ʼu mamahi ʼo te maʼuli?

Koteā te ʼu tupuʼaga ʼo tatatou lotomālohi?

Koteā te ʼu puleʼaki neʼe foaki mai e Sehova ke tou kātakiʼi te ʼu fihifihia?

1, 2. Koteā te ʼu malaʼia ʼaē neʼe hoko ki te tokolahi? Koteā ʼaē ʼe tou fakaʼamu fuli kiai?

 ʼETOU māʼuʼuli nei ʼi te ʼu temi faigataʼa. ʼE mole kei māu te ʼu tuʼutāmaki ʼe tō ki te kele. ʼE tau te hahaʼi mo te ʼu mamahi kovi ʼuhi ko te ʼu mafuike, mo te hake ʼo te ʼu foʼi peau fakamataku, mo te ʼu manunū lahi, mo te ʼu lōmaki, mo te ʼu moʼuga afi, mo te ʼu ʼāhiohio, pea mo te ʼu ʼafā. Pea, ko te ʼu fihifihia fakafāmili pea mo te ʼu fihifihia takitokotahi ʼe toe fakatupu lotomamahi pea mo loto tuʼania. Ohagē pē ko tona ʼui ʼi te Tohi-Tapu, ko te ʼu malaʼia ʼe feala ke hoko fakapunamaʼuli kiā tātou fuli ʼi he temi pē.—Ekl. 9:12.

² Logolā te ʼu ʼaluʼaga faigataʼa ʼaia, kae ʼe hoko atu pē te tauhi fiafia ʼa te hahaʼi ʼa te ʼAtua. Pea ko tātou takitokotahi ʼe tou fia nofo teuteu ke tou kātakiʼi te ʼu faigataʼaʼia kehekehe ʼe feala ke hoko mai ʼuhi ko tatatou fakaovi atu ki te fakaʼosi ʼo te tuʼu ʼaenī. ʼE feafeaʼi te hoko atu tatatou tauhi fiafia ki te ʼAtua lolotoga te ʼu temi faigataʼa? Koteā ʼaē ʼe tokoni mai anai kiā tātou ke tou maʼu te lotomālohi ʼaē ʼe ʼaoga?

TOU AKO MAI IĀ NĀTOU ʼAĒ NEʼE LOTOMĀLOHI

3. Ohagē ko tona ʼui iā Loma 15:4, koteā ʼaē kā ina fakalotomālohiʼi anai tātou ʼi te ʼu temi faigataʼa?

³ Logolā ʼe kaugamālie age te hahaʼi ʼaē ʼe hoko kiā nātou ia te ʼu fihifihia ʼaia ʼi te temi nei, kae ʼe mole mata foʼou kiā tātou ia te ʼu ʼaluʼaga ʼaia. Tou vakaʼi pe koteā te ako ʼe tou maʼu mai te ʼu kaugana ʼa te ʼAtua ʼo te temi muʼa ʼaē neʼe natou lotomālohi ʼi te ʼu temi faigataʼa.—Loma 15:4.

4. Ko te ʼu ʼaluʼaga fea neʼe kātakiʼi e Tavite? Koteā ʼaē neʼe tokoni kiā ia?

⁴ Tou fakakaukauʼi ʼihi ʼaluʼaga neʼe kātakiʼi e Tavite. Neʼe fia matehi e te Hau ko Saulo ia ia. Neʼe tauʼi ia ia e ʼona fili pea mo natou faʼao ʼona ʼohoana. Ko ʼihi ʼi tana kautau pea mo tona fāmili, pea mo ʼona kaumeʼa neʼe natou kākāʼi ia ia. Pea ʼi te ʼu temi ʼaia, neʼe lotomamahi ai. (1 Sam. 18:8, 9;  30:1-5; 2 Sam. 17:1-3; 24:15, 17; Pes. 38:5-9) ʼE fakahā mai ʼi te Tohi-Tapu te lahi ʼo te lotomamahi ʼo Tavite ʼuhi ko te ʼu fihifihia ʼaia. Kae ko te ʼu malaʼia ʼaia, neʼe mole ina fakavaivaiʼi tana tui ʼaē kiā Sehova. Koia neʼe ina ʼui ai fēnei: “Ko te tokoni o toku mauli ko [Sehova]: Kotea e au tuania anai ki ai?”—Pes. 27:1; lau ia Pesalemo 27:5, 10.

5. Koteā ʼaē neʼe tokoni kiā Apalahamo mo Sala ke nā taupau tonā fiafia, logolā te kinakina ʼo tonā maʼuli?

⁵ Neʼe lahi te temi ʼaē neʼe māʼuʼuli ai ia Apalahamo mo Sala ʼi te ʼu fale lā. Neʼe nā nonofo matāpule ʼi te ʼu koga meʼa neʼe mole nā ʼiloʼi pē lā. Neʼe mole faigafua tonā maʼuli. Ohagē lā, neʼe nā mamahi ʼuhi ko te hoge pea mo te ʼu tuʼutāmaki neʼe feala ke hoko ʼuhi ko te ʼu fenua ʼi ʼonā tafaʼaki. Kae neʼe nā lotomālohi pea mo kātakiʼi te ʼu ʼaluʼaga fuli ʼaia. (Sen. 12:10; 14:14-16) Koteā ʼaē neʼe tokoni kiā nāua ke nā maʼu te kātaki? ʼE ʼui fēnei ʼi te Tohi-Tapu ko Apalahamo “nee talitali ia ki te kolo ae e ina mau ni fakatafito malohi, te kolo ae nee laga pea nee fau e te Atua totonu.” (Hep. 11:8-10) Neʼe mole tuku e Apalahamo mo Sala ke tupu iā nāua te lotomamahi ʼuhi ko te kinakina ʼo te maʼuli, kae neʼe nā manatuʼi tuʼumaʼu te ʼu fakapapau ʼaē neʼe fai age e te ʼAtua kiā nāua.

6. ʼE tou lava faʼifaʼitakiʼi feafeaʼi ia Sopo?

⁶ Ko Sopo ia, neʼe ko he tagata neʼe mamahi ʼaupitō. Kotou fakakaukauʼi age muʼa ʼana manatu ʼi te temi ʼaē neʼe maʼuli mamahi ai. (Sopo 3:3, 11) Pea tahi, neʼe mole mahino kātoa ki te tupuʼaga ʼo te hoko ʼo te ʼu meʼa ʼaia kiā ia. Kae logolā te ʼu ʼaluʼaga ʼaia, neʼe mole lītuʼa ia kiā Sehova ʼi he temi. Neʼe ina taupau tana agatonu mo tana tui ki te ʼAtua. (Lau ia Sopo 2:3.) ʼE ko he faʼifaʼitaki lelei maʼa tātou!

7. Koteā te ʼu ʼaluʼaga ʼaē neʼe tau mo Paulo ʼi tana tauhi ki te ʼAtua? Koteā ʼaē neʼe tokoni kiā ia ke ina maʼu te lotomālohi ke hoko atu tana tauhi?

⁷ Tou toe fakakaukauʼi mo te faʼifaʼitaki ʼa te ʼapositolo ko Paulo. Neʼe ina tohi neʼe tuʼutāmakiʼia tona maʼuli ʼi te kolo, ʼi te toafa, pea mo te tai. Neʼe palalau ki “te fia kai, mo te fia inu” pea mo “te momoko, pea mo te masiva.” Neʼe toe talanoa ia Paulo ki te ʼu temi ʼaē neʼe heka ai ʼi te ʼu vaka pea neʼe mou, pea mo tana tafea ʼi te moana ʼi te pō mo te ʼaho kātoa. (2 Ko. 11:23-27) Māʼiapē lā mo te ʼu temi ʼaē neʼe tuʼutāmaki ai tona maʼuli, neʼe ina taupau he faʼahiga manatu ʼe lelei. ʼI te tahi temi ʼaē neʼe meihiʼi pē ke matehi ai, neʼe ina ʼui fēnei: “Koteuhi ke aua tama falala kia maua totonu, kae ki te Atua ae e ina toe fakatuuake te kau mate. Ko ia ae nee ina haofaki maua mai he toe mate fakamataku feia, pea e ma falala kia ia e ina toe haofaki anai maua.” (2 Ko. 1:8-10) ʼE mole ko te hahaʼi fuli ʼaē neʼe tau mo te ʼu ʼaluʼaga fakatupu tuʼutāmaki ohagē ko Paulo. Kae, tokolahi iā tātou ʼe tou logoʼi te meʼa ʼaē neʼe logoʼi e Paulo ʼi te ʼu temi ʼaia. Koia, ko tana lotomālohi ʼe feala ke ina fakalotofīmālieʼi tātou.

ʼAUA NAʼA TOU LOTOVAIVAI ʼUHI KO TE ʼU FIHIFIHIA

8. ʼE feala ke malave feafeaʼi te ʼu fihifihia ʼo te temi nei kiā tātou? Kotou tuku mai he faʼifaʼitaki.

⁸ ʼI te lahi fau ʼo te ʼu tuʼutāmaki pea mo te ʼu ʼaluʼaga fakatupu mamahi ʼaē ʼe hoko ʼi te mālamanei, tokolahi ʼe natou ʼui kua mamafa fau peʼe kua lahi fau. Māʼia mo ʼihi kaugana ʼa te ʼAtua, ʼe natou maʼu te taʼi manatu ʼaia. Neʼe fiafia ia Lani * ʼi tana pioniē mo tona ʼohoana ʼi Ositalalia, pea neʼe fakahā age leva kua ina maʼu te kōsea. Neʼe ko he logo fakatupu mamahi. Neʼe ina ʼui ko te ʼu faitoʼo ʼaē neʼe fai kiā ia, neʼe ʼāsili ai tona logo kovi, pea neʼe lotovaivai ai. Pea neʼe toe tonu foki ke tokaga ki tona ʼohoana ʼaē neʼe tafa tona hui tuʼa tofu. Kapau neʼe hoko kiā tātou te ʼaluʼaga ʼaia, koteā ʼaē kā tou fai anai?

9, 10. (1) Koteā ʼaē ʼe mole tonu ke tou tuku ke maumauʼi e Satana? (2) Koteā ʼaē kā tokoni mai anai ke tou kātakiʼi ia “te u mamahi” ʼaē ʼe talanoa kiai iā Gaue 14:22?

⁹ ʼI te ʼu temi ʼaē ʼe hoko ai kiā tātou he ʼu malaʼia, ʼe tonu ke tou manatuʼi ko Satana ʼe ina fakaʼaogaʼi te ʼu ʼaluʼaga ʼaia moʼo maumauʼi ʼo tatatou tui pea ke puli ai totatou fiafia. Kae, ʼe tonu ke tou tekeʼi te ʼaluʼaga ʼaia. ʼE ʼui iā Taaga Lea 24:10, kapau ʼe tou lotovaivai ʼi te temi mamahi,  pea ʼe mole tou maʼu anai te mālohi moʼo kātakiʼi ʼotatou fihifihia. Kapau ʼe tou metitāsioʼi te ʼu faʼifaʼitaki ʼi te Tohi-Tapu, ohagē ko nātou ʼaē neʼe tou talanoa kiai ʼi muʼa atu, ʼe feala ke tou maʼu ai te lotomālohi ʼaē ʼe ʼaoga ʼi te ʼu temi fihifihia.

¹⁰ ʼE toe lelei ke tou manatuʼi ʼe mole feala ke tou pulihi ia te ʼu fihifihia fuli. Kae ʼe feala ke tou nofo teuteu kiai. (2 Tim. 3:12) ʼE ʼui fēnei mai iā Gaue 14:22: “E lahi te u mamahi e tonu ke tou fakalaka ai ki te puleaga o te Atua.” Ke ʼaua naʼa kotou lotovaivai ʼuhi ko te ʼu mamahi ʼaia, kotou fakaʼaogaʼi ia te ʼu faigamālie ʼaia ke kotou fakahā takotou falala ʼaē ki te fealagia ʼa te ʼAtua ke tokoni mai kiā koutou.

11. Koteā ʼaē ʼe tonu ke tou fai ke ʼaua naʼa tou lotovaivai ʼuhi ko te ʼu faigataʼaʼia ʼo te maʼuli?

¹¹ ʼE ʼaoga ke tou haga taupau he ʼu manatu ʼe lelei ʼi totatou maʼuli. ʼE ʼui ʼi te Folafola ʼa te ʼAtua “ko he loto fiafia e ina fakafiafiai te u mata, kae ka mamahi te loto, e mamahi te u mata.” (Taag. 15:13) Kapau ʼe tou manatu tuʼumaʼu ki te ʼu meʼa ʼaē ʼe mole feala ke tou fetogi ʼi totatou maʼuli pea ʼe fakatupu lotovaivai. ʼE tou fakafetaʼi kiā Sehova ʼi tana foaki mai he tokoni moʼoni. Māʼiapē lā mo te ʼu temi ʼaē ʼe tou faigataʼa ai, ʼe tou maʼu anai ni fakalotomālohi mai tana Folafola, mai ʼotatou tehina mo tuagaʼane, pea mo te mālohi ʼaē ʼe tou maʼu mai tona laumālie māʼoniʼoni. Ko te ʼu faʼahi ʼaia ʼaē ʼe tonu ke tou taupau maʼu ʼi totatou loto pea ʼe tou fiafia lahi anai ai. ʼAua takotou manatu ki te ʼu faigataʼaʼia ʼo te maʼuli kae kotou kātakiʼi te ʼu fihifihia takitahi pea mo manatu tāfito ki te ʼu lelei ʼaē ʼe kotou maʼu nei.—Taag. 17:22.

12, 13. (1) Koteā ʼaē neʼe tokoni ki te ʼu kaugana ʼa te ʼAtua ke natou kātakiʼi ia te ʼu mamahi ʼuhi ko te ʼu tuʼutāmaki neʼe hoko? Kotou tuku mai he faʼifaʼitaki. (2) Kā hoko he ʼu tuʼutāmaki, koteā ʼaē ʼe maʼuhiga tāfito anai kiā tātou?

¹² ʼI te ʼu taʼu pē ʼaenī, neʼe hoko te ʼu tuʼutāmaki fakamataku ki ʼihi fenua. ʼE feala ke tou tāʼofi he ako mai te faʼa kātaki ʼo ʼotatou tehina lolotoga te ʼu ʼaluʼaga ʼaia, logolā neʼe faigataʼa kiā nātou. ʼI Fepualio 2010, neʼe hoko te mafuike mālohi pea mo te hake ʼo te foʼi peau fakamataku ʼi te fenua ko Chili, ʼo maumau ai te ʼu ʼapi mo te ʼu koloa ʼo ʼotatou tehina. Ko ʼihi iā nātou, neʼe mole kei maʼu hanatou gāue. Kae logolā te ʼu ʼaluʼaga ʼaia, neʼe hoko atu pē e te ʼu tehina tanatou kau ki te ʼu fono pea mo te fai fakamafola. Neʼe ʼui fēnei e Samuele, ʼaē neʼe maumau kātoa tona ʼapi: “Māʼiapē lā mo te ʼu ʼaluʼaga faigataʼa ʼaia, ko toku ʼohoana mo au neʼe mole mā tuku te ʼu fono pea mo te fai fakamafola. ʼE au ʼiloʼi papau neʼe tokoni mai te ʼu agamāhani ʼaia ke ʼaua naʼa mā lotovaivai.” Ko nāua pea mo ʼihi atu tehina mo tuagaʼane neʼe mole natou tuku te ʼu ʼaluʼaga faigataʼa ʼaia ke ina fakalotovaivaiʼi nātou kae neʼe ina fakafealagia ke natou hoko atu tanatou tauhi kiā Sehova ʼaki he loto faʼafai.

¹³ ʼI Sepetepeli 2009, neʼe tō te toe ʼua lahi ʼo tupu ai te hake ʼo te vai ʼi te kolo ko Manille, ʼi Filipine. Neʼe ʼui fēnei e te tagata maʼu meʼa neʼe lahi te puli ʼo ʼana koloa ʼi te tuʼutāmaki ʼaia, neʼe “fihifihia pea mo mamahi ia te hahaʼi fuli, mai te kau maʼu koloa ki te kau māsisiva.” ʼE tou manatuʼi ai te tokoni fakapotopoto ʼaenī ʼa Sesu: “Kotou tanaki ni koloa i selo, koteuhi ko te kogamea aena e mole maumau ai te ugogo mo te ukaukamea, pea e mole puuhi ai mo kaihaa ai te tagata kaihaa.” (Mat. 6:20) Ko te paʼaga pea mo te ʼu koloa ʼe feala ke puli vave, pea ʼe fakatupu lotomamahi kiā nātou ʼaē neʼe natou tuku tanatou falala kiai. ʼE fakapotopoto age hatatou fakamuʼamuʼa ia Sehova ʼi totatou maʼuli heʼe feala anai ke tou taupau ʼatatou felōgoi mo ia ʼi te ʼu ʼaluʼaga fuli pē.—Lau ia Hepeleo 13:5, 6.

TE ʼU TUPUʼAGA ʼO TATATOU LOTOMĀLOHI

14. Koteā te ʼu tupuʼaga ʼo tatatou lotomālohi?

¹⁴ Neʼe ʼui e Sesu ki tana kau tisipulo ʼe natou tau anai mo ni faigataʼa lolotoga te temi ʼo tona ʼafio kae neʼe ina ʼui fēnei age: “Aua naa kotou mataku.” (Luka 21:9) ʼE tou lotomālohi heʼe tou ʼiloʼi ʼe tokoni mai ia te Hau ko Sesu Kilisito pea mo te Tupuʼaga ʼo te ʼatulaulau ko Sehova. Neʼe fakalotomālohiʼi e Paulo ia Timoteo ʼi tana ʼui ʼaē: “Nee mole foaki mai e te Atua kia tatou te  Laumalie o te mataku; kae o te malohi, mo te ofa, pea mo te poto.”—2 Tim. 1:7.

15. Koteā ʼaē neʼe ʼui e ihi kaugana ʼa te ʼAtua ʼo ʼuhiga mo tanatou loto falala ʼaē kiā te ia? ʼE feafeaʼi hatatou maʼu te taʼi lotomālohi ʼaia?

¹⁵ ʼE tou maʼu ʼi te Tohi-Tapu te ʼu palalau neʼe fai e ʼihi kaugana ʼa te ʼAtua ʼo ʼuhiga mo tanatou loto falala ʼaē kiā te ia. Ohagē lā, neʼe ʼui fēnei e Tavite: “Ko [Sehova] ko toku malohi mo toku paletau. Nee falala toku loto kia ia, pea nee ina fakamauli au; koia e fiafia lahi osi toku loto.” (Pes. 28:7) Neʼe ʼui e Paulo: “I te u mea fuli aia, e lahi age tatatou malo aki ia ae e ofa kia tatou.” (Loma 8:37) ʼI te temi ʼaē neʼe ʼiloʼi ai e Sesu kua vave hoko mai tona puke mo tona matehi, neʼe ina fai te ʼu palalau ʼe ʼiloga ai te mālohi ʼo tana tui ki te ʼAtua. Neʼe ina ʼui fēnei ki tana kau ʼapositolo: “E mole au toko tahi, koteuhi e nofo te Tamai mo au.” (Soa. 16:32) Koteā ʼaē ʼe ʼiloga ʼi te ʼu palalau ʼaenī neʼe fai e te ʼu kaugana ʼa te ʼAtua? Tanatou loto falala kātoa ʼaē kiā Sehova. Kapau ʼe tou faiga ke tou maʼu te taʼi loto falala ʼaia, ʼe mahino ia ʼe tou maʼu anai te lotomālohi ʼaē ʼe ʼaoga ʼi te ʼu temi faigataʼa.—Lau ia Pesalemo 46:2-4.

TE ʼU LELEI ʼAĒ ʼE TOU MAʼU MAI TE TOKONI ʼA TE ʼATUA

16. He koʼē ʼe maʼuhiga ke tou ako te Folafola ʼa te ʼAtua?

¹⁶ Ko te lotomālohi ʼaē ʼe ʼaoga, ʼe mole haʼu ia mai iā tātou totonu kae ʼe haʼu mai tatatou loto falala ʼaē ki te ʼAtua. ʼE feala ke tou lotomālohi mo kapau ʼe tou ako tuʼumaʼu tana Folafola, ia te Tohi-Tapu. Kā tou fai te faʼahi ʼaia, pea ʼe tou mahino ai leva ki te ʼuhiga ʼo te ʼAtua pea mo tuputupu ai tatatou loto falala ʼaē kiā te ia. ʼE fakamahino fēnei e te tuagaʼane ʼe ina maʼu te mahaki ʼaē ko te lotomamahi tuʼumaʼu, kā ina lau liuliuga he ʼu vaega Tohi-Tapu fakalotofīmālie pea ʼe ina maʼu ai tona fīmālie. ʼE tou fakahoko koa ia te fakatuʼutuʼu ʼaē neʼe tuku mai e te tagata kaugana agatonu mo poto ʼo ʼuhiga mo te ako fakafāmili ʼi te vāhaʼa fuli? ʼE tokoni mai anai tatatou ako ia te Tohi-Tapu ke tou maʼu te manatu ʼa te tagata fai pesalemo ʼaē neʼe ina ʼui fēnei: “E au ofa osi ki tau lao! E au metitasio ki ai i te aho katoa.”—Pes. 119:97.

17. (1) Koteā te tahi puleʼaki neʼe foaki e Sehova moʼo tokoni mai ke tou lotomālohi? (2) Kotou tuku mai he fakamatala ʼo he maʼuli neʼe kotou maʼu ʼi ʼatatou tohi Fakatohi-tapu neʼe ʼaoga kiā koutou.

¹⁷ Te tahi puleʼaki ʼa Sehova moʼo tokoni mai ke tou maʼu ia te lotomālohi ʼe ko te ʼu tohi Fakatohi-tapu, ʼaē ʼe fakamahino ai tana Folafola pea ʼe tokoni mai ke lahi age tatatou loto falala ʼaē kiā te ia. Ohagē lā, neʼe ʼaoga ʼosi ki te tokolahi ia te ʼu fakamatala ʼo te maʼuli ʼo ni tehina mo tuagaʼane ʼaē neʼe tā ʼi ʼatatou nusipepa. Neʼe lotomālohi te tuagaʼane ʼi Asia, ʼe ina maʼu te mahaki ʼo te lotomamahi ʼaē ʼe higoa ko te trouble bipolaire du comportement, ʼi tana lau te fakamatala ʼo ʼuhiga mo te maʼuli ʼo te tehina. Ko te tehina ʼaia neʼe tuku tana gāue misionea he neʼe ina maʼu te mahaki ohagē ko ia. Logolā te ʼaluʼaga ʼaia, kae neʼe hoko atu pē tana tauhi agatonu ʼaē kiā Sehova. Neʼe faitohi te tuagaʼane ʼo ʼuhiga mo  te fakamatala ʼaia, ʼo ina ʼui: “Neʼe tokoni mai te fakamatala ʼaia ke au mahino ki toku mahaki pea ke au taupau te ʼamanaki.”

18. He koʼē ʼe tonu ke tou faikole tuʼumaʼu?

¹⁸ ʼE toe tokoni mai ia Sehova kiā tātou ʼaki te faikole. ʼE feala ke tokoni mai te faikole ʼi te ʼu ʼaluʼaga fuli pē. Neʼe talanoa te ʼapositolo ko Paulo ki te maʼuhiga ʼo te faikole ʼi tana ʼui ʼaē: “Aua naa koutou tuania o uhiga mo he mea e tahi, kae koutou fakaha ki te Atua te u mea ae e aoga kia koutou aki ni kole, mo ni kolekole, pea mo ni fakafetai, pea ko te tokalelei o te Atua, ae e fakalaka age i te u atamai fuli, e ina taupau anai okotou loto mo akotou manatu ia Sesu-Kilisito.” (Filp. 4:6, 7) ʼE tou faikole tuʼumaʼu koa ke tou maʼu te kātaki ʼi te ʼu temi faigataʼa? Neʼe ʼui fēnei e Alex, te tehina ʼi Pilitānia ʼe tau mo te mahaki ʼaē ko te lotomamahi talu mai fualoa: “Neʼe maʼuhiga ʼaupitō ki toku maʼuli, ia te lahi ʼo taku palalau mo Sehova ʼi te faikole pea mo taku fakalogo ʼaē kiā te ia ʼaki taku lau tana Folafola.”

19. He koʼē ʼe maʼuhiga ke tou kau ki te ʼu fono Fakakilisitiano?

¹⁹ ʼE toe tokoni mai ia Sehova kiā tātou ʼaki te ʼu fono. Neʼe ʼui e te tagata fai pesalemo neʼe holi tona loto ke nofo ʼi te fale lotu ʼo Sehova. (Pes. 84:3) ʼE tou maʼu koa ia te taʼi manatu ʼaia? Ko Lani, ʼaē neʼe tou talanoa ki ai ʼi muʼa atu, ʼe ina fakamahino te maʼuhiga ʼaupitō ʼaē kiā ia tana kau ʼaē ki te ʼu fono fuli pea mo tana fakatahi ʼaē mo te ʼu tehina mo te ʼu tuagaʼane. ʼE ina ʼui fēnei: “ ʼE au ʼiloʼi ʼe tonu ke au nofo ʼi ai mo kapau ʼe au loto ke tokoni mai ia Sehova.”

20. ʼE tokoni feafeaʼi mai ia tatatou maʼumaʼua ʼi te gāue fai fakamafola?

²⁰ ʼE tou toe maʼu te lotomālohi ʼaki tatatou maʼumaʼua ʼi te gāue fai fakamafola. (1 Tim. 4:16) ʼE ʼui fēnei e te tuagaʼane ʼi Ositalalia neʼe lahi ʼona fihifihia ʼi tona maʼuli: “Neʼe mole au fia kau ki te fai fakamafola, kae neʼe fakaafe au e te tagata ʼāfea ke mā ʼolo. Pea neʼe au ʼalu. ʼE mahino ia neʼe tokoni mai ia Sehova, koteʼuhi ko te ʼu temi fuli ʼaē ʼe au kau ai ki te fai fakamafola, ʼe au liliu fiafia.” (Taag. 16:20) Tokolahi ʼe natou tokagaʼi ʼe mālohi tanatou tui mokā ʼe natou tokoni ki te hahaʼi ke natou tui kiā Sehova. ʼI te temi ʼaē ʼe natou foaki ai te tokoni ʼaia, ʼe mole kei natou manatu ki ʼonatou fihifihia pea ʼe natou tokaga lelei ki te ʼu meʼa ʼaē ʼe maʼuhiga tāfito.—Filp. 1:10, 11.

21. Koteā ʼaē ʼe tou tui papau kiai mokā tou tau mo he ʼu fihifihia?

²¹ ʼE lahi te ʼu puleʼaki neʼe foaki mai e Sehova ke tokoni mai ke tou lotomālohi ʼi te ʼu temi mamahi. Kapau ʼe tou fakafealagia ke tokoni mai, pea ʼe tou maʼu anai te fiafia ʼi te ʼu temi ʼaē ʼe tou fihifihia ai. ʼE toe feala ke tou lotomālohi mo kapau ʼe tou metitāsio pea mo faʼifaʼitakiʼi ia te ʼu kaugana ʼa te ʼAtua ʼaē neʼe lotomālohi. Logolā ʼe lahi age te ʼu fihifihia ʼe tou tau mo ia ʼuhi ko te ovi mai ʼo te fakaʼosi ʼo te tuʼu ʼaenī, kae ʼe feala ke tou manatu tahi mo te ʼapositolo ko Paulo ʼaē neʼe ina ʼui fēnei: “Li ki te kele, kae mole mate,” pea “e mole ma lotovaivai ai.” (2 Ko. 4:9, 16) ʼAki te tokoni ʼa Sehova, ʼe feala ke tou maʼu ia te lotomālohi ʼaē ʼe ʼaoga moʼo kātakiʼi ʼotatou fihifihia.—Lau ia 2 Kolinito 4:17, 18.

[Nota]

[ʼU fehuʼi ʼo te ako]

[Paki ʼo te pāsina 14]

ʼE tokoni feafeaʼi mai Sehova ke tou tauʼi ia te ʼu mamahi fuli ʼo totatou maʼuli?