MANATU TAFITŌ: ʼE AGAKOVI KOA TE ʼATUA?

He Ko ʼe ʼe Ui e Te Hahaʼi ʼe Agakovi Te ʼAtua?

ʼE KOTOU punamaʼuli koa ʼo ʼuhiga mo te fehuʼi ʼi te ʼuluaki pasina ʼo te nusipepa ʼaeni? Ko ʼihi ʼe natou punamaʼuli heʼe ʼi tanatou manatu ʼe mole feala ki te ʼAtua ke agakovi. Kotea tona tupuʼaga?

Ko ʼihi ia natou ʼae neʼe hao mai te ʼu tuʼutamaki fakanatula, ʼe natou fai ia te ʼu fehuʼi ʼaeni: “He ko ʼe ʼe fakagafua e te ʼAtua ke hoko ia te faʼahi ʼaia? Ko tona fakaʼuhiga koa ʼe mole ina logoʼi he meʼa? ʼE agakovi koa?”

Ko ʼihi ʼe hoha ʼanatou fakakaukau moka natou lau ia te Tohi-Tapu. Neʼe natou lau ia te ʼu fakamatala ohage ko ʼae ʼo Noe pea mo te Tulivio, pea natou feʼuiʼaki fenei: “He ko ʼe neʼe matehi e te ʼAtua ʼofa ia te toe kauga malie ʼaia? Ko tona fakaʼuhiga koa ʼe agakovi?”

ʼE kotou fai koa ia te ʼu fehuʼi ʼaia? ʼE faigataʼa koa kia koutou hakotou foaki he tali kia natou ʼae ʼe feʼekeʼaki pe ʼe agakovi koa te ʼAtua? Tou vakaʼi he tahi age fehuʼi ʼe feala ke tokoni mai ke tou mahino ki te faʼahi ʼaia.

HE KO ʼE ʼE TOU FEHIʼA ʼI TE AGAKOVI?

ʼE tou fehiʼa ʼi te agakovi heʼe tou iloʼi ia te meʼa ʼae ʼe lelei pea mo ʼae ʼe kovi. ʼE tou kehekehe mo te ʼu manu. Neʼe fakatupu tatou e totatou Tupuʼaga “o fakatatau kia te ia.” (Senesi 1:27) Kotea tona fakaʼuhiga? Neʼe ina foaki mai ia te fealagia ʼae ke tou fakaha ʼona kalitate pea mo ʼana lekula ʼo ʼuhiga mo te aga ʼae ʼe tonu ke tou fai, tana faʼahiga manatu ʼo ʼuhiga mo te meʼa ʼae ʼe lelei pea mo ʼae ʼe kovi. Ohage la, kapau neʼe foaki mai e te ʼAtua ia te fealagia ʼae ke tou fakakehekeheʼi ia te meʼa ʼae ʼe lelei pea mo ʼae ʼe kovi, pea kapau ʼe tou fehiʼa ʼi te agakovi, ʼe mole koa la fakaʼuhiga ʼe toe fehiʼa ia te ʼAtua ki te faʼahi ʼaia?

ʼE fakamoʼoni ʼi te Tohi-Tapu ki te manatu ʼaia, moka ui fenei mai e te ʼAtua: “E toe maoluga ake foki oku ala i okotou ala, pea mo aku manatu i akotou manatu.” (Esaia 55:9) Kapau ʼe tou manatu ʼe agakovi ia te ʼAtua, pea ʼe tou fakafeagai ki te manatu ʼae ʼe tuʼu ʼi te Tohi-Tapu, ʼe hage pe ʼe tou ui tatou ʼe maʼoluga age ʼotatou ʼala ʼi ʼae ʼo te ʼAtua. ʼE fakapotopoto hatatou fai he ʼu fekumi ʼi muʼa ʼo tatatou fakamaui te ʼAtua. ʼE lagi mole tou feʼuiʼaki anai pe ʼe agakovi ia te ʼAtua kaʼe ʼe lagi tou feʼuiʼaki pe ʼe ko ʼe ʼe hage ʼe ha ʼi ʼana gaue ʼe agakovi. Ke feala hatatou mahino lelei, tou vakaʼi ia te fakaʼuhiga moʼoni ʼo te kupu “agakovi.”

Ka tou fakahigoaʼi he tahi ʼe agakovi, ʼe tou fakamauʼi te ʼu tupuʼaga ʼo tana fai he meʼa. Ko te tagata agakovi ʼe ko he tahi ʼe fiafia ʼi tana sio ki he tahi ʼe mamahi pea ʼe mole ina logoʼi he meʼa moka mamahi he tahi. Ko he tamai ʼe ina fakatonutonuʼi hona foha ʼuhi ʼe fiafia ʼi tana mamahi, ʼe ko he tamai agakovi. Kaʼe ko he tamai ʼe ina fakatonutonuʼi tona foha moʼo akoʼi pea moʼo puipui ʼo ia, ʼe ko he tamai agalelei. Koteʼuhi ʼae ʼe mole faigafua hatatou mahino pe ʼe ko ʼe ʼe aga feia ʼihi, ʼe faigafua hatatou faihala moka tou fakamauʼi natou.

Tou vakaʼi ia tupuʼaga ʼe lua ʼe ui ai e te hahaʼi ʼe agakovi ia te ʼAtua, te ʼu tuʼutamaki fakanatula ʼe tou sisio ki ai ʼi te temi nei pea mo te ʼu fakamau ʼa te ʼAtua ʼae ʼe tou lau ʼi te Tohi-Tapu. ʼE fakaha koa ʼi te ʼu aluʼaga ʼaeni, ʼe agakovi te ʼAtua?

[Paki ʼo te pasina 3]

ʼI te agamahani ʼe tou fakaha ia te loto manavaʼofa pea ʼe tou fehiʼa ʼi te agakovi