ʼE ʼi ai koa he tahi ʼi ʼou kaumeʼa lelei ʼe mole ke iloʼi tona higoa? ʼE lagi mole ʼi ai he tahi. Neʼe ui fenei e Irina, ko te fafine mai Bulgarie: “ ʼE mole feala ke tou nonofo ovi ki te ʼAtua mo kapau ʼe mole tou iloʼi tona huafa.” Kaʼe meʼa lelei foki, he neʼe tou lau ʼi te ʼuluaki alatike, ʼe loto e te ʼAtua ke tou fakaovi age kia te ia. Koia ʼaki te Tohi-Tapu, ʼe ina fia fakaha mai kia tatou pe ʼe ko ai ia ia, ʼi tana ui fenei: “Ko au [Sehova], ko toku higoa aia.”—Esaia 42:8.

ʼE maʼuhiga koa kia Sehova ke tou iloʼi tona huafa? Ohage la, ʼi te Fakahepeleo, neʼe tohi ia te huafa ʼo te ʼAtua ʼaki te ʼu mataʼi tohi ʼe fa, ʼae ko te Tetalakalame. Pea neʼe tohi teitei tuʼa 7 000 ʼi te ʼu ʼuluaki Koga Tohi-Tapu Fakahepeleo. Neʼe mole he tahi age higoa neʼe lahi tona tohi ʼi te Tohi-Tapu ʼi te higoa ʼaia. ʼE mahino ia neʼe loto e Sehova ke tou iloʼi pea mo fakaʼaogaʼi ia tona huafa. *

Ki te manatu ʼa ʼihi, ʼe mole feala ke tou fakaʼaogaʼi ia tona huafa, koteʼuhi ʼe maʼoniʼoni ia te ʼAtua pea mo mafimafi. ʼE moʼoni ʼe mole tonu ke tou fakaʼaogaʼi kovi ia te huafa ʼo te ʼAtua, ohage pe ko tatatou mole fia fakaʼaogaʼi kovi ia te higoa ʼo hotatou kaumeʼa. Kaʼe, ʼe ko te finegalo ʼo Sehova ke fakamaʼuhigaʼi pea mo fakaha ia tona huafa, e natou ʼae ʼe ʼoʼofa kia te ia. (Pesalemo 69:31, 32; 96:2, 8) Kotou manatuʼi ia te faikole ʼae neʼe akoʼi age e Sesu ki ʼana tisipulo: “Tamatou Tamai ae e nofo i te atu lagi! Ke tapuha tou huafa.” ʼE feala ke tou fakatapuha ʼo te huafa ʼo te ʼAtua ʼaki tatatou fakaha ia tona huafa ki te hahaʼi. ʼI tatatou fai ia te faʼahi ʼaia,ʼe tou fakaovi ai kia te ia.—Mateo 6:9.

ʼE fakaha ʼi te Tohi-Tapu ʼe tokaga moʼoni ia te ʼAtua kia natou ʼae “e fakaapaapa ki tona huafa.” (Malakia 3:16) Neʼe fai e Sehova ia te fakapapau ʼaeni: “E au puipui anai ia ia, koteuhi e ina iloi toku huafa. E kalaga anai ia kia au, pea e au tali anai kia ia, e au nofo anai mo ia i te mamahi.” (Pesalemo 91:14, 15) Kapau ʼe tou loto ke tou maʼu he ʼu felogoʼi mo Sehova, ʼe tonu ke tou iloʼi pea mo fakaʼaogaʼi ia tona huafa.