ʼE lahi te ʼu lea fakapolofeta ʼe tou maʼu ʼi te Tohi-Tapu. ʼE mole feala ki he tagata ke ina fakaha fakatomuʼa ia te ʼu aluʼaga ʼae ka hoko. Ko te fakahoko ʼo te ʼu lea fakapolofeta ʼe ko te fakamoʼoni ʼaia ko te Tohi-Tapu ʼe ko te Folafola ʼa te ʼAtua.—Lau ia Sosue 23:14; 2 Petelo 1:20, 21.

ʼE ʼi ai te ʼu lea fakapolofeta ʼi te Tohi-Tapu kua ʼosi hoko. Pea ʼe ina fakamalohiʼi ai tatatou tui ʼae ki te ʼAtua. (Hepeleo 11:1) Pea ʼe tou toe falala ai ko te ʼu fakapapau ʼae ʼa te ʼAtua ʼo ʼuhiga mo te ka haʼu, ʼe ina fakahoko moʼoni anai. Ko te ʼu lea fakapolofeta ʼo te Tohi-Tapu ʼe ina foaki mai kia tatou he ʼamanaki moʼoni.—Lau ia Pesalemo 37:29; Loma 15:4.

ʼE ʼi ai ʼihi lea fakapolofeta ʼe ina ʼekenaki ai te ʼu kaugana ʼa te ʼAtua ke natou fai he ʼu tonu. Ohage la, ko te ʼu ʼuluaki Kilisitiano, ʼi tanatou sisio ʼae ki te fakahoko ʼo ʼihi lea fakapolofeta, neʼe natou mavae ai mai Selusalemi. Ki muli age, neʼe maumauʼi te kolo ʼaia koteʼuhi ko te hahaʼi neʼe natou fakafisi kia Sesu. Kaʼe meʼa lelei foki, ko te kau Kilisitiano neʼe kua natou mavae mai ai.—Lau ia Luka 21:20-22.

Ia ʼaho nei, ko te fakahoko ʼo te ʼu lea fakapolofeta ʼo te Tohi-Tapu, ʼe fakamoʼoni ai ko te Puleʼaga ʼo te ʼAtua, kua vave pe tana pulihi te ʼu puleʼaga fakatagata. (Taniela 2:44; Luka 21:31) Ko te tupuʼaga la ʼaia ʼo te maʼuhiga ki te tagata takitokotahi ke faiga ke ina maʼu ia te manavaʼofa ʼo te Hau ʼae neʼe fakanofo e te ʼAtua, ia Sesu Kilisito.—Lau ia Luka 21:34-36.