Ko te agakovi neʼe kamata ʼaki te ʼuluaki loi ʼa Satana. ʼI te kamata, ko Satana neʼe ko he ʼāselo haohaoa ia, kae neʼe “mole nofo ia ia i te mooni.” (Soane 8:44) Neʼe mānumānu ki te tauhi ʼaē neʼe tonu ke fai ʼāteaina pē ki te ʼAtua. Neʼe ina loiʼi ia Eva, te ʼuluaki fafine, pea mo ina fakalotoʼi ia ia ke fakalogo age kiā ia kae tuku te ʼAtua. Neʼe muliʼi e Atama ia Eva ʼo nā talagataʼa tokolua ai ki te ʼAtua. Pea ko te fua ʼo te tonu ʼaia neʼe fai e Atama ko te mamahi pea mo te mate.—Lau ia Senesi 3:1-6, 19.

ʼI tana uga ʼaē ia Eva ke talagataʼa ki te ʼAtua, neʼe lagaʼi ai e Satana te fakafeagai ki te pule faʼitaliha ʼa te ʼAtua peʼe ko tona ʼuhiga Māʼoluga ʼAupitō. Tokolahi te hahaʼi ʼo te mālamanei ʼe natou fakafisi ki te Pule ʼa te ʼAtua ʼo natou muliʼi ai ia Satana, ʼo liliu ai ia Satana ko “te pule o te malamanei.”—Lau ia Soane 14:30; 1 Soane 5:19.

Ko te ʼu gāue fuli ʼa te ʼAtua ʼe lelei ʼaupitō. Ko te tagata mo te kau ʼāselo neʼe fakatupu haohaoa ia nātou e te ʼAtua ʼaki te fealagia ʼaē ke natou fakalogo lelei kiā te ia. (Tetelonome 32:4, 5) Neʼe fakatupu tātou e te ʼAtua ʼaki te loto faʼitaliha ke tou filifili ai peʼe tou fai te meʼa ʼaē ʼe lelei peʼe ko te meʼa ʼaē ʼe kovi. ʼAki te fealagia ʼaia ʼe feala ai ke tou fakahā totatou ʼofa ʼaē ki te ʼAtua.—Lau ia Sakopo 1:13-15; 1 Soane 5:3.

Neʼe fakagafua fakatemi e Sehova te fakafeagai ki tana pule faʼitaliha. Koteā tona tupuʼaga? Ke hā lelei ai, ko te takitaki ʼa te tagata ʼe mole hona fua lelei ki te hahaʼi. (Ekelesiasi 7:29; 8:9) Pea ʼe fakamoʼoni kiai te hisitolia ʼo te tagata lolotoga te ʼu taʼu e 6 000 ʼaenī kua hili atu.  Ko te takitaki ʼa te tagata neʼe mole ina lavaʼi te pulihi ʼo te ʼu tau, te ʼu fakapō, te heʼe faitotonu, peʼe ko te mahaki.—Lau ia Selemia 10:23; Loma 9:17.

ʼO kehekehe ia mo te pule ʼa te tagata, ko te takitaki ʼa te ʼAtua ʼe fua lelei kiā nātou ʼaē ʼe natou tali te takitaki ʼaia. (Esaia 48:17, 18) Kua vave pē te pulihi e Sehova ia te ʼu puleʼaga fakatagata fuli. Pea ʼe gata pē anai ki te hahaʼi ʼaē ʼe natou filifili te takitaki ʼa te ʼAtua ʼe natou māʼuʼuli anai ʼi te kele.—Esaia 11:9.—Lau ia Taniela 2:44.

Neʼe tala e Satana ko te hahaʼi ʼe natou tauhi pē kiā Sehova ʼuhi ko te ʼu lelei ʼaē ʼe ina foaki kiā nātou. ʼE ke loto koa ke ke fakahā te hala ʼo te manatu ʼaia? ʼE feala ke ke fai ia te faʼahi ʼaia! ʼE fakafealagia e te kātaki fualoa ʼa te ʼAtua kiā tātou fuli ke tou fakahā peʼe tou leleiʼia ia te takitaki ʼa te ʼAtua peʼe ko te takitaki ʼa te tagata. ʼE tou fakahā ʼaki totatou faʼahiga maʼuli te faʼahi ʼaē ʼe tou filifili.—Lau ia Sopo 1:8-12; Taaga Lea 27:11.

ʼE feala ke tou filifili te ʼAtua ko totatou Pule ʼaki tatatou kumi te tauhi moʼoni ʼaē ʼe fakatafito ki te Folafola ʼa te ʼAtua, te Tohi-Tapu, pea mo tou kau kiai. (Soane 4:23) ʼE feala ke tou fakafisi ki te pule ʼa Satana ʼaki hatatou mole kau ki te politike pea mo te ʼu tau, ohagē pē ko Sesu.—Lau ia Soane 17:14.

ʼE fakaʼaoga e Satana tana pule ke mafola te ʼu aga heʼeʼaoga pea mo te ʼu aga ʼaē ʼe kovi. Kā tou liʼaki te ʼu taʼi aga ʼaia pea ʼe feala ke fakagalivaleʼi tātou peʼe fakafeagai kiā tātou niʼihi ʼo ʼotatou kaumeʼa peʼe ko ʼotatou kāiga. (1 Petelo 4:3, 4) Koia ʼe maʼua ai ke tou fai he tonu. ʼE tou fakatahi anai koa mo te hahaʼi ʼaē ʼe ʼoʼofa ki te ʼAtua? ʼE tou fakalogo anai koa ki ʼana lao ʼofa pea mo fakapotopoto? Kapau ʼe tou fai te faʼahi ʼaia, pea ʼe tou fakahā ai ʼe loi te ʼui ʼaē ʼa Satana ʼe mole he tagata ʼe fakalogo anai ki te ʼAtua mo kapau ʼe felāveʼi mo he ʼu faigataʼaʼia.—Lau ia 1 Kolinito 6:9, 10; 15:33.

ʼE fakamoʼoni e te ʼofa ʼo te ʼAtua ki te tagata ko te kovi pea mo te mamahi ʼe pulihi anai. Ko nātou ʼaē ʼe natou fakahā ʼe natou tui ki te manatu ʼaia ʼe natou māʼuʼuli fiafia anai ʼi te kele ʼo talu ai.—Lau ia Soane 3:16.