Ko te ʼAtua moʼoni ʼe ko ia te Tupuʼaga ʼo meʼa fuli. Neʼe mole hona kamataʼaga pea ʼe mole ʼi ai anai hona gataʼaga. (Pesalemo 90:2) ʼE ko ia te Matapuna ʼo te ʼu logo lelei ʼaē ʼe tuʼu ʼi te Tohi-Tapu. (1 Timoteo 1:11) ʼE tonu ke tou tauhi ʼāteaina pē kiā te ia koteʼuhi ʼe ko ia ʼaē neʼe ina foaki mai te maʼuli kiā tātou.—Lau ia Apokalipisi 4:11.

ʼE mole heʼeki ʼi ai he tagata kua sio ki te ʼAtua koteʼuhi ʼe ko te Laumālie ia. Ko tona fakaʼuhiga ko ia ʼe ko te faʼahiga maʼuli ʼe māʼoluga age ia ʼi te ʼu meʼa maʼuli fuli pē ʼaē ʼi te kele. (Soane 1:18; 4:24) Kae, ʼe feala ke tou mahino ki te ʼulugaaga ʼo te ʼAtua ʼaki te ʼu meʼa ʼaē neʼe ina fakatupu. Ohagē lā, ʼe hā tona ʼofa pea mo tona poto ʼi te ʼu faʼahiga fuaʼi ʼakau mo te ʼu matalaʼi ʼakau kehekehe ʼaē ʼe tou sisio kiai. Ko te lahi ʼo te ʼatulaulau ʼe fakahā ʼaki ai tona māfimāfi.—Lau ia Loma 1:20.

Kae ʼe toe feala ke lahi age tatatou ʼiloʼi te ʼulugaaga ʼo te ʼAtua ʼaki te lau ʼo te Tohi-Tapu. Heʼe fakahā ʼi te Tohi-Tapu te ʼu meʼa ʼaē ʼe leleiʼia e te ʼAtua mo te ʼu meʼa ʼaē ʼe fehiʼa kiai, mo tana aga ki te hahaʼi, pea mo te meʼa ʼaē ʼe ina fai ʼi te ʼu ʼaluʼaga kehekehe.—Lau ia Pesalemo 103:7-10.

Neʼe ʼui fēnei e Sesu: “Tamatou Tamai ae e nofo i te atu lagi! Ke tapuha tou huafa.” (Mateo 6:9) Ko te huafa pē e tahi ʼo te ʼAtua logopē te lahi ʼo ʼona higoa fakatuʼulaga. ʼE kehekehe ia te faʼahiga puʼaki ʼo tona huafa ʼi te ʼu lea kehekehe. ʼI te lea Fakaʼuvea ko “Sehova.” Kae ko ʼihi hahaʼi ʼe natou toʼo ko “Iave.” ʼE ʼui fēnei ʼi te Tohi-Tapu: “Ke natou ʼiloʼi ko koe, ʼaē ko tou huafa ko Sehova, ko koe tokotahi pē, te Māʼoluga ʼAupitō ʼi te kele kātoa.” —Pesalemo 83:18, MN.

ʼE lahi te ʼu Tohi-Tapu neʼe fetogi ai te huafa ʼo te ʼAtua ʼaki te ʼu higoa fakatuʼulaga ʼaenī ko te ʼAliki, ko te Eteleno peʼe ko te ʼAtua. Kae ʼi te temi ʼaē neʼe ʼuluaki tohi ai te Tohi-Tapu neʼe teitei tuʼa 7 000 te tohi ai ʼo te huafa ʼo te ʼAtua.  Neʼe akoʼi e Sesu te hahaʼi ke natou ʼiloʼi te huafa ʼo te ʼAtua.—Lau ia Soane 17:26.

ʼE feala koa ke tou ʼui ʼe mole tokaga ia Sehova kiā tātou ʼuhi ko te lahi ʼo te mamahi? Ko ʼihi ʼe natou ʼui ʼe ʼahiʼahiʼi tātou e te ʼAtua ʼaki te mamahi peʼe tou nofo agatonu, kae ʼe hala te manatu ʼaia.—Lau ia Sakopo 1:13.

Neʼe fakamaʼuhigaʼi te tagata e te ʼAtua ʼaki tana foaki ki ai ia te loto faʼitaliha. ʼE mole koa lā tou fiafia ai ʼi te fealagia ʼaē ke tou filifili ia te tauhi ʼaē ki te ʼAtua ʼaki totatou loto faʼitaliha? (Sosue 24:15) Kae tokolahi te hahaʼi ʼe natou filifili ke natou fai te ʼu meʼa ʼaē ʼe kovi ki ʼihi, ʼo mamahi ai te tokolahi. Pea ʼe mamahi ai te loto ʼo Sehova ʼi te ʼu taʼi aga heʼe faitotonu ʼaia.—Lau ia Senesi 6:5, 6.

Ko Sehova ʼe ko te ʼAtua ʼe tokaga kiā tātou. ʼE ina loto ke tou maʼuli fiafia. Kua vave pē ia tana pulihi te mamahi pea mo nātou ʼaē ʼe natou fakatupu te mamahi. Kae ia muʼa ʼo tana fakahoko te faʼahi ʼaia, ʼe ʼi ai te tupuʼaga ʼo tana fakagafua ʼaē ke hoko atu pē te mamahi ʼi he kiʼi temi nounou. ʼI te Ako 8, ʼe tou vakaʼi ai anai pe koteā tona tupuʼaga.—Lau ia 2 Petelo 2:9; 3:7, 13.

ʼE fakaafe tātou e Sehova ke tou fakaovi kiā te ia ʼi te faikole. ʼE tokaga kiā tātou takitokotahi. (Pesalemo 65:3; 145:18) ʼE fakamolemole gafua ki ʼatatou agahala. ʼE ina tokagaʼi ʼatatou faiga ʼaē ke ina leleiʼia ia tātou, tatau aipē peʼe tou tōtō ʼi ʼihi temi. Kae logopē totatou ʼuhiga heʼe haohaoa ʼe feala ke tou felōgoi lelei mo te ʼAtua.—Lau ia Pesalemo 103:12-14; Sakopo 4:8.

ʼI te foaki mai ʼaē e Sehova kiā tātou te maʼuli, ʼe tonu ke lahi age totatou ʼofa kiā te ia ʼi he tahi age. (Maleko 12:30) ʼI tau ako ke lahi tau ʼiloʼi ia ia pea mo fai te meʼa ʼaē ʼe ina kole atu, ʼe ke fakahā ai tou ʼofa ki te ʼAtua pea ʼe ke toe fakaovi lahi ai kiā te ia.—Lau ia 1 Timoteo 2:4; 1 Soane 5:3.