’I TAKOTOU Tohi-Tapu, ’e fakaliliu feafea’i ia te Pesalemo 83:18? Ko te Tohi-Tapu Les Saintes Écritures—Traduction du monde nouveau, ’e ina fakaliliu fēnei ia te vaega ’aia: “Ke nātou ’ilo’i ko koe, ’aē ko tou huafa ko Sehova, ko koe tokotahi pe, te Mā’oluga ’Aupito ’i te kele kātoa.” ’E lahi te ’u Tohi-Tapu ’e nātou fakaliliu feiā te vaega ’aia. Kae ’e lahi te ’u Tohi-Tapu ’e mole nātou faka’aoga’i te huafa ’aē ko Sehova, he’e nātou fetogi ’aki te ’u higoa faka tu’ulaga ohage ko te “’Aliki” pe’e ko te “Eteleno.” Koteā ’aē ’e tonu ke faka’aoga’i ’i te vaega ’aia? Ko he higoa faka tu’ulaga pe’e ko te huafa ’aē ko Sehova?

Te ’u mata’i tohi faka Hepeleo ’o te huafa ’o te ’Atua

Ko te vaega ’aia ’e talanoa ’o ’uhiga mo he huafa. ’E tu’u te huafa ’aē ko Sehova ’i te lea faka Hepeleo ’aē ne’e faka’aoga’i tāfito mo’o tohi ia te Tohi-Tapu. ’E tohi ’aki te ’u mata’i tohi faka Hepeleo ’aenī יהוה (YHWH). ’I te Faka’uvea, ko te fakalilu ’o te huafa ’aia ’e ko “Sehova.” Ko te vaega faka Tohi-Tapu pe koa ’aia ’e tu’u ai te huafa ’aia? Kailoa. ’E teitei faka’aoga’i tu’a 7 000 te huafa ’aia ’i te ’u Tohi Faka Hepeleo!

He ko’e ’e ma’uhiga ia te huafa ’o te ’Atua? Tou vaka’i te faikole ’aē ne’e tuku mai e Sesu Kilisito ke tou fa’ifa’itaki kiai. ’E kamata fēnei te faikole ’aia: “Ko tamatou Tamai e i Selo, Ke tapuha tou Huafa.” (Mateo 6:9) Ki muli age, ne’e faikole fēnei ia Sesu ki te ’Atua: “Tamai fakakololia’i tou huafa.” Pea mo’o tali ki tana faikole ’aia, ne’e ’ui fēnei e te ’Atua mai te lagi: “Ku’au fakakololia ia pea e au toe fakakololia’i anai ia.” (Soane 12:28) ’E hā mai, ’e ma’uhiga ’aupito ia te huafa ’o te ’Atua. He ko’e leva ko ’ihi Tohi-Tapu ’e mole nātou faka’aoga’i te huafa ’aia kae nātou fetogi ’aki he ’u higoa faka tu’ulaga?

’E ’i ai tona ’u tupu’aga tāfito e lua. ’Uluaki, tokolahi ’e nātou ’ui ’e mole tonu ke faka’aoga’i he’e mole ilo’i te pu’aki totonu ’o te huafa ’aia ’i te temi nei. Ne’e mole tohi te ’u vuaiele ’i te faitohi faka Hepeleo ’āfea. Koia, ’e mole he tahi ia ’aho nei ’e ina ’ilo’i papau pe’e ne’e puaki feafea’i e te haha’i ’o te temi mu’a ia te ’u mata’i tohi YHWH. Kae ’e ko he taku’aki koa ke mole faka’aoga’i te huafa ’o te ’Atua? ’I te temi mu’a, ko te higoa ’o Sesu ne’e lagi pu’aki ko Esua pe’e ko Esosua—he’e mole ’ilo’i papau tona pu’aki totonu. Kae ko te haha’i ’o te temi nei ’e nātou pu’aki te higoa ’aē ko Sesu, ’o mulimuli pe ki tanatou lea. ’E nātou faka’aoga’i anai te higoa ’aia tatau aipe pe’e mole nātou ’ilo’i pe ne’e feafea’i tona pu’aki ’i te ’uluaki sēkulō. Ohage la, kapau ’e koutou folau ki he tahi fenua, ko te haha’i ’o te fenua ’aia ’e lagi mole nātou pu’aki fakalelei anai tokotou higoa he’e mole nātou lea tahi mo koutou. Koia, ’e mole ko he taku’aki lelei ke mole kita pu’aki te huafa ’o te ’Atua ’uhi pe he’e mole kita ’ilo’i pe’e ne’e feafea’i tona pu’aki ’i te temi mu’a.

Ko te tahi tupu’aga ’aē ’e tautau molehi ai ia te huafa ’o te ’Atua ’i te Tohi-Tapu, he’e ko te ’u talitasio ’a te kau Sutea. Tokolahi ia nātou ’e nātou ’ui ’e mole tonu ke pu’aki ia te huafa ’o te ’Atua. Ko te akonaki ’aia ’e fakatafito ki te mahino hala ’o ’uhiga mo te lao ’aenī ’i te Tohi-Tapu: “’Aua na’a ke to’o te huafa ’o Sehova, tou ’Atua, ’o takua noa’i, kote’uhi ’e tautea’i anai e Sehova ia ia ’aē ’e ina takua noa’i anai tona huafa.”—Ekesote 20:7.

Ko te lao ’aia ’e ina tapu’i te faka’aoga’i kovi ’o te huafa ’o te ’Atua. Kae ’e ina tapu’i koa te faka’aoga’i faka’apa’apa ’o tona huafa? Kailoa. Ko te ’u tagata faitohi ’o te ’u Tohi Faka Hepeleo (te “Tauhi ’Āfea”) ne’e ko te ’u tagata agatonu fuli, pea ne’e nātou fakalogo ki te Lao ’aē ne’e foaki age e te ’Atua ki te kau Iselaele ’o te temi mu’a, kae ’i te temi fuli ne’e nātou faka’aoga’i te huafa ’o te ’Atua. Ohage la, ’i te ’u Pesalemo ne’e lahi te ’u hiva ne’e faka’aoga’i ai te huafa ’aia e nātou. Ne’e toe fakamahino foki e Sehova ’Atua ki tana kau atolasio, ke nātou fetapā ki tona huafa, pea ne’e fakalogo kiai tana kau atolasio agatonu. (Soele 2:32; Gaue 2:21) Koia ohage ko Sesu, ko te kau Kilisitiano ’o te temi nei ’e nātou faka’aoga’i te huafa ’o te ’Atua ’aki he aga faka’apa’apa.—Soane 17:26.

’E ko he agahala mamafa ’a te kau fakaliliu Tohi-Tapu, tanatou fetogi te huafa ’o te ’Atua ’aki te ’u higoa faka tu’ulaga. ’I tanatou molehi te huafa ’o te ’Atua ’i te Tohi-Tapu, ne’e nātou fakamama’o te ’Atua ’i te haha’i, kae ’e ’ui ’i te Tohi-Tapu ’e tonu ki te haha’i ke nātou “kaume’a mo Sehova.” (Pesalemo 25:14) Koutou fakakaukau’i age mu’a ki hokotou kaume’a lelei. E feafea’i hakotou felogoi mo ia mo kapau la ’e mole koutou ’ilo’i tona higoa? ’O feiā pe, kapau ’e mole ’ilo’i e te haha’i ko te ’Atua ’e higoa ko Sehova, pea ’e feafea’i anai hanatou fakaōvi kiā te ia? Tahi ’aē, kapau ’e mole faka’aoga’i e te haha’i ia te huafa ’o te ’Atua, ’e mole nātou mahino anai ki te faka ’uhiga taulekaleka ’o tona huafa. Koteā te faka ’uhiga ’o te huafa taputapu ’aia?

Ne’e fakahā e te ’Atua totonu te ’uhiga mo’oni ’o tona huafa ki tana tagata kaugana agatonu ko Moisese. ’I te temi ’aē ne’e fia ’ilo’i ai e Moisese te ’uhiga ’o te huafa ’o te ’Atua, ne’e ’ui age e Sehova: “’E au fakahā anai pe ko ai au.” (Ekesote 3:14) Ko te Tohi-Tapu ’a Rotherham ’e ina fakaliliu fēnei ia te ’u palalau ’aia: “’E au Iiliu anai ko me’a fuli ’e au lelei’ia.” Koia ko Sehova ’e feala ke liliu ko me’a fuli mo’o fakahoko ia tana ’u fakatu’utu’u.

Kapau la ’e koutou lava fai he ’u gāue kehekehe, koteā anai te me’a ka koutou fai ma’a tokotou ’u kaume’a? Kapau la ko he tahi ia nātou ’e mahaki kovi, ’e koutou liliu anai ko he tōketā faiva ’e ina fai hona faito’o. Kapau ko he tahi ’e mole kei ’i ai hana gāue, ’e feala ke koutou tokoni ki ai ’i te ’alu’aga faka pa’aga, mo’o hu’i tona ’u ma’ua. Kae ’i tona fakahagatonu, ’e tou tahi nofo fuli mo tona ’u tu’akoi. Kapau ’e koutou ako ia te Tohi-Tapu, ’e koutou punama’uli anai ’i takotou mahino ko Sehova ’e feala ke liliu ko me’a fuli mo’o fakahoko tana ’u fakapapau. Pea ’e ina fia faka’aoga’i tona mālohi mo’o tokoni kiā nātou ’aē ’e ’o’ofa kiā te ia. (2 Fakamatala 16:9) Ko te ’u kalitātē taulekaleka ’aia ’o te ’ulugaaga ’a Sehova, ’e mole feala ke mahino kiai te haha’i ’aē ’e mole nātou ’ilo’i tona huafa.

’E hā mai ko te huafa ’aē ko Sehova ’e tonu ke tohi ki te Tohi-Tapu. Ko te ’ilo’i ’o te ’uhiga ’o te huafa ’aia pea mo tona faka’aoga’i fa’ifa’italiha ’i tatatou tauhi, ’e ko he ’u tokoni mālohi ke tou fakaōvi ki tatatou Tāmai ’aē ’e ’i selo, ko Sehova.*

*  Kapau ’e koutou fia ma’u he tahi ’u fakamahino ’o ’uhiga mo te huafa ’o te ’Atua, pea mo tona faka ’uhiga, pea mo te ’u tupu’aga ’aē ’e tonu ke faka’aoga’i ai ’i te tauhi, koutou vaka’i te kaupepa lahi Le nom divin qui demeure à jamais, ’aē ne’e tā e te kau Fakamo’oni ’a Sehova.

← Vaka’i te pasina ’o te kāpite