Fakakaukauʼi te aluʼaga ʼaeni: ʼE faisioʼata ia Julia pea ʼe manatu ia ʼe sino. Pea ʼe ina ui fenei: “ ʼE tonu ke au fakasino kovi.” Kaʼe ʼe ui age e ʼana matuʼā mo ʼona kaumeʼa ʼe “sino paki” pe ia.

Neʼe ina fai leva he puleʼaki ke puli pe ʼona “kilo ʼe lua.” Pea ko te faʼahi pe ʼae ka ina fai, ke mole toe kai lolotoga ni kiʼi ʼaho . . .

Kapau ʼe ke maʼu te manatu ʼa Julia, kotea ʼae ka ke fai anai?

ʼE mole kovi hau tuʼania ki tou agaaga ʼo tuʼa. Pea tahi, ʼe vikiʼi ʼi te Tohi-Tapu ia te agaaga ʼo tuʼa ʼo te ʼu fafine mo te ʼu tagata, ohage la ko Sala, mo Lasele, mo Apikaile, mo Sosefo pea mo Tavite. ʼE toe ui ʼi te Tohi-Tapu ko te fafine ʼae ko Apisake neʼe “finemui osi.”—1 Hau 1:4.

Kaʼe tokolahi te kau tupulaga ʼe natou hoha fau ki tonatou agaaga ʼo tuʼa. Pea ʼe feala ai ke natou tuʼutamakiʼia. Tou vakaʼi te ʼu aluʼaga ʼaeni:

• ʼE fakaha ʼi te sivi neʼe fai, ko te toko 58 ki te teau kau taʼahine, ʼe natou ui ʼe natou sisino fau, kaʼe ʼi tona fakahagatonu ʼe ko te toko 17 pe ki te teau ʼae ʼe sisino.

• Pea ʼe fakaha ʼi te tahi sivi, ko te toko 45 ki te teau hahaʼi fafine ʼae ʼe natou sisino kovi fau, ʼe natou manatu ʼe natou sisino fau.

• ʼI te faiga ʼa ʼihi tupulaga ke natou sino kovi, ʼe natou to ai ki te mahaki ʼae ko te anorexie. Ko tona fakaʼuhiga, ʼe natou pakoko he ʼe mole natou kakai.

 Kapau ʼe ke felaveʼi mo te ʼu aluʼaga ʼaia, foimo kole ki he tahi ke tokoni atu. Palalau ki ʼau matuʼā, peʼe ki he tahi ʼe ke falala ki ai. ʼE ui fenei ʼi te Tohi-Tapu: “E ofa te kaumea i te temi fuli, pea i te malaia e hage ia ia ko he tehina.” —Taaga Lea 17:17.

Ko totatou ʼuhiga ʼo loto ʼae ʼe tupu ai totatou ʼofainaʼi peʼe kailoa. Tou talanoa muʼa ki te foha ʼo te Hau ko Tavite, ia Apesalone. ʼE ui fenei ʼi te Tohi-Tapu:

“Nee mole mau he tahi ke tupulaga o hage ko Apesalone; . . . nee mole pe mau he kii mele e tahi [ia ia].”—2 Samuele 14:25.

Kaʼe neʼe agatuʼu mo agakakā te tupulaga ʼaia. Koia ʼae neʼe ui ai ʼi te Tohi-Tapu, neʼe mole ko he tagata agatonu, neʼe fonu ʼi te fehiʼa pea neʼe fia faifakapo.

Koia ʼae ʼe tou maʼu ai te ʼu tokoni ʼaeni ʼi te Tohi-Tapu:

“Kotou kofu te tagata foou ae e fakafoou.”—Kolose 3:10.

“Kotou mau, mole te u teu i tua . . . , kae ke kotou mau te u teu ugia o te loto.” —1 Petelo 3:3, 4.

ʼE mole kovi hakita fia talavou mo finemui, kaʼe ʼe maʼuhiga tou ʼuhiga ʼo loto ʼo laka age ʼi tou agaaga ʼo tuʼa. Koia, ʼe ko ʼou kalitate fakalaumalie ʼae ʼe ke talavou peʼe ke finemui ai anai, kaʼe mole ko te matalelei ʼo te agaaga ʼo tou sino peʼe ko ʼou fofoga. ʼE ui fenei e te taʼahine ʼe higoa ko Phylicia: “Ka matalelei he tahi, pea ʼe lahi tona sioʼi. Kaʼe ko tou ʼuhiga ʼo loto mo ʼou kalitate ʼae ʼe manatuʼi tafitō anai e ʼihi.”

ʼE ke ui tuʼumaʼu koa ʼe mole lelei tou agaaga ʼo tuʼa?

Neʼe kua ke manatu koa ke tafa koe moʼo fetogi te agaaga ʼo tou sino, peʼe ke mole ke toe kai?

Ka na pau la ko he faʼahi ʼe feala, kotea ʼae ʼe ke fetogi anai? (Fakailoga tau tali.)

• TOU LAHI

• TOU KILO

• TOU LAUʼULU

• TE AGAAGA ʼO TOU SINO

• ʼOU FOFOGA

• TE AGAAGA ʼO TOU KILI

Kapau neʼe ke ʼio ki te fehuʼi ʼuluaki mo te lua, pea mo ke fakailoga hau ʼu tali ʼe tolu peʼe laka atu, manatuʼi ʼe mole manatu tahi tou famili mo ʼou kaumeʼa pea mo koe. Koteʼuhi kapau ʼe lahi fau tau hoha ki tou agaaga ʼo tuʼa, ʼe feala pe ke fua kovi kia koe. —1 Samuele 16:7.