ROMNHIHÖDÖ 13
E Marĩ Te Dza Watobro Danhimidzadze Norĩ Dzô.
1. E aihĩni danhimidzadze ĩwẽ.
Te ꞌre höimana dzaꞌra ĩtsiri wẽ norĩ aihĩni danhimidzadze ꞌremhã. Höimanaꞌuꞌö ma waihuꞌu petse dzaꞌra di duré te ãma rotsaꞌrata dzaꞌra. Ta hã romahörö ĩwẽ uptabi. Tane nherẽ, te da te ꞌre ꞌmanharĩ dzaꞌra ĩwatsédé hã danhimidzadze norĩ dzadawa para. (2 Coríntios 4:3, 4; 11:13-15) Wa te ĩꞌmadöꞌö dzaꞌra dzéb dzarina ĩroꞌopoto na, nimahã danhimidzadze norĩ te dame tihöimana dzaꞌra datsiꞌwapéi ꞌre, te te ꞌre danhimroi mono duré te te aiꞌuté ma ꞌre robꞌmanharĩ watsété dzaꞌra. Taha wa, robdzei õ di ĩtsiri wẽ norĩ ma!—Tsõré na Mateus 24:3-5, 11, 12.
Danhimidzadze ĩꞌuptabi te te Höimanaꞌuꞌö ma ꞌre rowẽ mono ré, danhimidzadze ĩꞌuptabiꞌõ te te tiwi ꞌre robdzeiꞌõ petse mono. Danhimidzadze ĩꞌuptabiꞌõ norĩ hã te te dama ꞌre waihuꞌu dzaꞌra mono marĩ norĩ Bíblia ꞌremhã ꞌre ĩhöimana dzaꞌra mono õ hã, ãma ĩtsimiré, dadzadawa nhipe Höimanaꞌuꞌö na duré adöꞌö norĩ na. Tadzahã, Jeová te tsima wẽ da te waihuꞌu dzaꞌra da tô tsena õhõ ãma.—Tsõré na Mateus 10:28; 1 Timóteo 2:3-5.
2. E marĩ te dza watobro danhimidzadze norĩ dzô.
Höimanaꞌuꞌö te te ꞌre wẽꞌõ mono danhimidzadze norĩ ĩtsiwatsuꞌu dzaꞌra te te ĩtsawi dzaꞌra na, tane nherẽ te te tsima ꞌre ĩwẽ dzaꞌra Satanás höimanadzé. (Tiago 4:4) Bíblia hã te ꞌre tsitsi aihĩni danhimidzadze ĩꞌuptabiꞌõ norĩ ‘Babilônia na, Ĩtsaꞌẽnẽ hã’. Babilônia hã ꞌriꞌahö ĩꞌrada danhimidzadze ĩꞌuptabiꞌõ te te ãma ĩtsãnaꞌratadzé, Tã pĩniwawẽ parimhã, Noé ꞌre höimana mono ré. Romhutu na, Höimanaꞌuꞌö te dza uprotsi danhimidzadze norĩ dama ꞌre ĩtsadawa nhipetse dzaꞌra mono duré te te ꞌre ĩdawati dzahi dzaꞌra mono.—Tsõré na Apocalipse 17:1, 2, 5, 16, 17; 18:8.
Dzahadu romahörö ĩwẽ te tihöiba. Jeová ãma poꞌretsiꞌöri õ di ĩtsiri wẽ norĩ na danhimidzadze ĩꞌuptabiꞌõ ꞌremhã daro mono bö. Te te tãma ꞌre rowahutu dzaꞌra mono tô tsena hã, te te pawaptob dzaꞌra da danhimidzadze ĩꞌuptabiꞌõ hawi wairébé da. —Tsõré na João 6:45.
3. E marĩ ĩtsiri wẽ norĩ hã te te ꞌre ĩꞌmanharĩ dzaꞌra mono da tsi.
Danhimidzadze ĩꞌuptabi hã te dapawapto datsiré rowẽ na ꞌre dahöimana dzaꞌra mono da
Jeová te rotsaꞌrata da te datsima ĩwẽ dzaꞌra ãma tô tsena hã da te waihuꞌu dzaꞌra da duré ĩwẽ da te ꞌmanharĩ dzaꞌra da. Jeová te tãma watsuꞌu dzaꞌra danhimidzadze ĩꞌuptabiꞌõ te te rẽme dzaꞌra da. Höimanaꞌuꞌö te te ĩtsawi dzaꞌra norĩ hã te dza danhimidzadze ĩꞌuptabiꞌõ rẽme dzaꞌra tãma rowẽ da.—Tsõré na Apocalipse 18:4.
Jesus döꞌö parimhã, ĩwẽ norĩ te te wapari dzaꞌra wamhã romahörö wẽ hã Höimanaꞌuꞌö na, apóstolo norĩ te te tãma ĩwatsuꞌu dzaꞌra hã, ma tô tsima wẽ dzaꞌra to dzaꞌra tsina. Jeová ma tãma waihuꞌu dzaꞌra dahöimanadzé ĩté, danhipai u ĩwẽ na, duré tsô ꞌre ĩtsimipari dzaꞌra mono dzéb da. Ĩtsine dzaꞌra, wa te watsima ĩwẽ dzaꞌra da tsi Höimanaꞌuꞌö watsuꞌu marĩ danhipai u ĩpire na wahöimanadzéb ꞌre.—Tsõré na 1 Tessalonicenses 1:8, 9; 2:13.
Jeová te dza tsima wẽ tinhibꞌaꞌuwẽ na ãma wata dzaꞌra da, danhimidzadze ĩꞌuptabiꞌõ te te ĩrẽme dzaꞌra norĩ hã. Ãne ꞌmanharĩ wamhã, a hã dza ĩtsiwaihu, ãma ĩdawata dzaꞌra norĩ tsitsãnawã hã dza duré te dza aima titsõ dahöimana uꞌötsi dzé.—Tsõré na Marcos 10:29, 30; 2 Coríntios 6:17, 18.
4. E marĩ wa danhimidzadze ĩꞌuptabiꞌõ ꞌrãtsudu romahörö ĩwẽ.
Jeová danhimidzadze ĩꞌuptabiꞌõ norĩ te te uprotsi parimhã, te te ꞌre dawati dzahi dzaꞌra mono õ di dza oto. Niwa dama ꞌre tsadawa nhipetse dzaꞌra mono õ di dza oto duré daꞌãma ꞌre tsipoꞌo dzaꞌra mono õ di dza oto. Aihĩni te dza tsimitsutu ꞌre dawata uꞌötsi dzaꞌra mono mitsi haré Höimanaꞌuꞌö ĩꞌuptabi ãma. —Tsõré na Apocalipse 18:20, 21; 21:3, 4.
