ROMNHIHÖDÖ 2
E ꞌWa hã Höimanaꞌuꞌö.
1. E marĩ wa, Höimanaꞌuꞌö ãma wa dza wawata dzaꞌra ni.
Höimanaꞌuꞌö hã Ropotoꞌwa ĩꞌuptabi hã. Ĩtsãnaꞌratadzé baba di ĩꞌrãtsutu dzama. (Apocalipse 1:8) Õhõ hawimhã romahörö wẽ norĩ Bíblia na te tihöimana dzaꞌra. (1 Timóteo 1:11) Wapotoꞌwai wa, wa dza õhõ ãma tsi wawata dzaꞌra ni.—Tsõré na Apocalipse 4:11.
2. E niha Höimanaꞌuꞌö.
Niꞌwa aꞌuwẽ niwa te te ꞌmadöꞌö õ di Höimanaꞌuꞌö, Ĩhöiba tsãmriꞌõ wa. Ĩhöimanadzé hã ropodo Tiꞌai ãma ꞌre ĩhöimana dzaꞌra mono nhipai u. (João 1:18; 4:24) Tane nherẽ, wa dza waihuꞌu dzaꞌra ni ĩtsimiropoto na. Ãma ĩtsimiré, robꞌrã duré romnhirãrã aimawi mono hã te watsuꞌu dzahuré ĩtsimidzawidzé duré ĩtsimirowaihu. Höiwa ĩtsaꞌẽne te watsuꞌu Höimanaꞌuꞌö nhiptetedzé.—Tsõré na Romanos 1:20.
Wa dza duré waihuꞌu dzaꞌra ni Höimanaꞌuꞌö höimanadzé Bíblia nhoré na. Ãma ĩtsimiré, ta hã te watsuꞌu te te tsima ĩwẽdzé hã duré te te tsima ĩwẽꞌõ, e niha daꞌãma ĩtsimirotsaꞌrada hã duré e niha te tihöiba da te ꞌre ꞌmanharĩ dzaꞌra mono wamhã ĩwẽ hã duré ĩwatsédé hã.—Tsõré na Tiago 5:11.
3. E niha Höimanaꞌuꞌö nhitsi hã.
Jesus te tinha: ‘Wamama, höiwa ãma ꞌre atsãmra mono hã, atsitsi wẽ na uburé da te ꞌre aiwaihuꞌu dzaꞌra mono da, wa aima ꞌre ĩmreme.’ (Mateus 6:9) Höimanaꞌuꞌöhö te título norĩ ahö nhẽrẽ, taré mitsi ĩtsitsi uptabi ĩré. Damreme poꞌo mono bö, ĩtsitsi na damremedzé tsipuꞌu di. Waradzu mreme na duré aꞌuwẽ mreme na dzama, õhõ uꞌö ãma damremedzé “Jeová”. Niꞌwam norĩ hã duré te nharĩ dzaꞌra “Javé”. Bíblia te tinha: “Da te waihuꞌu dzaꞌra da a hã atsitsi Jeová na, Aiwététsi Atsaꞌẽtẽ uptabi di uburé Tiꞌa nhitsiwi.”—Salmo 83:18.
Höimanaꞌuꞌö nhitsi hã ma tô pari ni Bíblia ꞌre ahö na duré ma ãma tsaprĩ ni título norĩ na Danhipaiꞌwa na niwamhã ꞌRe ĩhöimana uꞌötsi mono na. Tadzahã, Bíblia hã da te ꞌmanharĩ wamhã, ĩtsitsi hã ĩré hã aré tsyry na 7 mil nhipai u. Jesus ma tô dama Jeová waihuꞌu duré ĩtsitsi hã.—Tsõré na João 17:26.
ꞌMadöꞌö ĩropodo E niha Höimanaꞌuꞌö nhitsi hã.
4. Jeová e te waꞌãma rotsaꞌrata dzaꞌra.
à hã damama nhimidzawi petse ne hã, Höimanaꞌuꞌö te romhu wama ꞌre rowẽ uꞌötsi dzaꞌra mono da
Robdzépada hã ĩhöimana hã e te watsuꞌu Jeová te te daꞌãma ĩrotsaꞌrata õ na hã. Te natsi nharĩ dzaꞌra ni õ hã, te te dama ĩrobꞌmanharĩ watsété na te te dapibu da, tane nherẽ, ta hã tô tsenai õ di.—Tsõré na Tiago 1:13.
Jeová ma romhuri ꞌrudzahi õ di atsima wẽ wamhã. Te te ꞌre tsaꞌré wa te watsima ꞌre pitsutu dzaꞌra mono da. E aima wẽ õ di ãne. (Mateus 7:13, 14) Tane nherẽ, ahö na ma tô pitsutu dzaꞌra te te dama ꞌre robꞌmanharĩ watsété dzaꞌra mono da. Taha wa, robdzépada hã tsaꞌẽtẽ di. Jeová ma robdzei õ di da te robdzépata dzaꞌra wamhã.—Tsõré na Gênesis 6:5, 6.
Jeová ma wadzawi dzaꞌra di. Te tsima wẽ rowẽ na ꞌre wahöimana dzaꞌra mono da. Romhutu na, te dza uprotsi robdzépada hã duré ĩꞌmanharĩꞌwa norĩ hã. Taha õ ré, marĩ ĩwẽ dzarina, aꞌö te te ꞌre tsaꞌréi mono robdzépada hã. Romnhihödö 8 na, wa dza waihuꞌu dzaꞌra ni ta hã marĩ ĩwẽ.—Tsõré na 2 Pedro 2:9; 3:7, 13.
5. E niha wa dza aihutu ni Höimanaꞌuꞌö tẽme.
Jeová te dadzô hö ĩtẽme datsihutu da rowaptẽrẽ na. Tãma wahöiba mono bö wadzawi dzaꞌra di. (Atos 17:27; Filipenses 4:6, 7) Te tsima wẽ wawatsédé hã te te wama apari dzaꞌra da, duré te ꞌmadö wanhiptete dzaꞌra hã wa te tãma ꞌre rowẽ dzaꞌra mono da hã, ꞌre wawatsété dzaꞌra mono nherẽ.—Tsõré na Tiago 4:8; 5:15.
Wapotoꞌwai wa, wa te danhipai u ĩtsawi dzaꞌra da tsi. (Marcos 12:30) Höiꞌré na atsimidzawidzé hã Höimanaꞌuꞌö ãma, ãma awaihuꞌu tsina duré ꞌre ꞌmanharĩ mono te te ĩwaptẽrẽdzé hã. Tawamhã, te dza ĩtẽme aiwi.—Tsõré na 1 Timóteo 2:3, 4; 1 João 5:3, 4.
