Jeová te te poto wamhã família, õhõ te tinha damama norĩ ĩꞌra norĩ tãma ĩhöimana prédub dzaꞌra da tsi. (Colossenses 3:20) Damama wamhã, niwamhã dana wamhã, ĩrowahutu da tsi aiꞌra norĩ ma hã Jeová te te tsima tsawi dzaꞌra da, duré tsimiwadzé petse na ꞌre höimana dzaꞌra mono da. (2 Timóteo 1:5; 3:15) Ĩwaihuꞌu da tsi e niha aiꞌra norĩ te tihöimana dzaꞌra, duré e niha ĩpẽꞌẽ ꞌremhã ĩtsimirotsaꞌrata dzaꞌra. Tô tsena atsitsanhodzé ĩpire uptabi aiꞌra norĩ ma hã. Höimanaꞌuꞌö mreme na aiꞌra norĩ ma hã tãma waihuꞌu da, ĩmorĩꞌrada aipẽꞌẽ ꞌremhã atsima ĩtété da tsi, aiꞌra norĩ ma hã höiꞌré da. — Salmo 40:8.

BÍBLIA DZARINA: ‘Ariꞌiwi ꞌre ĩdawapari, aiwara tsina aimreme hã ꞌre tsani mono tõ da.’ (Tiago 1:19) Tô tsena te atsima ĩwẽ aiꞌra norĩ hã tinhitséb ãna te te aima robdzanhamri dzaꞌra da. Tawamhã, tãma höiꞌré dzaꞌra na dza ĩwapari dzaꞌra na hã te te robdzanhamri dzaꞌra wamhã. Atsiré rowẽ na ꞌre aihöimana dzaꞌra waꞌaba mono wamhã, wapu di dza aiꞌra norĩ ma hã te te aima watsuꞌu dzaꞌra da tinhimirotsaꞌrata dzaꞌra na. (Tiago 3:18) Tadzahã te te rotsaꞌrata dzaꞌra wamhã, natsi ãma ꞌre ĩwatsété uꞌötsi dzaꞌra mono na hã ĩmreme dzaꞌra uꞌöbö, atãma na te te tsima wẽ dzaꞌra õ di dza oto, tinhimirotsaꞌrada hã te te aima ĩwatsuꞌu dzaꞌra mono da hã. Atsimiparidze na ꞌre aihöimana uꞌötsi mono duré atsimidzawi ꞌre höiꞌré uꞌötsi mono aiꞌra norĩ ma hã. — Mateus 3:17; 1 Coríntios 8:1.

TAHA DA ATSIPTETE:

• Aiꞌra norĩ wapari petse dzaꞌra na te te ĩrobdzanhamri dzaꞌra na hã.

• Natsi robdzanhamri uꞌötsi aiꞌra norĩ ma, roꞌwaꞌrutu watobro õ nherẽ.

BÍBLIA DZARINA: ‘Niꞌwa roti hã te te wapari petse wamhã, te dza rowẽdzé hã tãma ꞌre höimana.’ (Provérbios 16:20) Damama norĩ, aiꞌra norĩ mreme hã ꞌre ĩwapari aba mono da tsi. Tadzahã taha tsi õ di, aiꞌra norĩ nhimirotsaꞌrada hã ĩwaihuꞌu petse aba da tsi ĩpẽꞌẽ ꞌre te te tsima ĩtété hã. Te ꞌre wairébé nimahã na hã ĩhöibaté norĩ te natsi nharĩ dzaꞌra tsiwaꞌru damreme ĩpire na. ‘Niꞌwa te te dawapari ꞌrãiwaꞌõmo õ ré, timreme na õne haré te te ãma dadzadaꞌöbö wamhã, te dza tinhimidzaꞌretseꞌõ na hã tsihöiꞌré.’ (Provérbios 18:13) Tawamhã, ‘ꞌre aiꞌrãi waꞌro tsuꞌu mono õ di’ dza. — Provérbios 19:11.

TAHA DA ATSIPTETE:

• Aiꞌra norĩ damreme tsiwaꞌru te te nharĩ dzaꞌra wamhã, tsapari nhimiꞌẽ na mreme wamhã, ꞌre aihöimana nhimiꞌẽ mono tsina.

• Aipoꞌre puꞌu e niha atsimirotsaꞌrata, duré e marĩ aima ĩpire hã aihöibatéb ré hã.

BÍBLIA DZARINA: ‘Ĩ̠ꞌra, aimama duré ana, marĩ na te te aima ꞌre ĩroti mono dzéb dzahuré te dza ꞌre ĩwapari petse dzahuré mo.’ (Provérbios 1:8) Jeová ma tô pitsutu damama norĩ te te tãma ꞌre roti dzahuré mono dzé hã daꞌra norĩ ma hã. Taha wa, a norĩ waꞌwa hã tãma ĩrowahutu aba da tsi te te aiwadzéb dzaꞌra da, duré te te aiwapari dzaꞌra da. (Efésios 6:1-3) Aiꞌuté norĩ tãma waihuꞌu petse dzaꞌra di timama norĩ nhimirotsaꞌrada ‘tsiwanhidzari ãma ꞌre höimana dzaꞌra mono’ wamhã. (1 Coríntios 1:10) Atsimirotsaꞌrata aba na hã aiwab õ na hã marĩ norĩ ãma hã, aiꞌra norĩ nhoꞌa atsima robdzanhamri aba tõ. Ãne ꞌmanharĩ aba wamhã, atãma na aiꞌra norĩ te dza tsima aiwadzé aba õ.

TAHA DA ATSIPTETE:

• Atsima robdzanhamri aba tsimitsutu atsiré ꞌre rotsaꞌrata aba mono da aiꞌra norĩ ma ꞌre roti aba mono da.

• Atsimirotsaꞌrata aba wamhã aiwab õ na hã, atsiptete ãma rotsaꞌrata da aimro nhimirotsaꞌrata na hã, aiꞌra norĩ ma ꞌre ĩroti aba mono da hã.

BÍBLIA DZARINA: ‘Aiꞌuté höimana prédum na dza ꞌre ĩhöimana mono dzéb da hã, tãma ꞌre roti mono.’ (Provérbios 22:6) Aiꞌra norĩ rotidzé hã taréi õ di. Ĩrowaꞌõtõ da tsi duré nimahã na hã aiꞌra norĩ ĩꞌadzöri da tsi te te aiwapari dzaꞌra da. (Provérbios 22:15; 29:17) Aiꞌra norĩ ãma pẽtẽ dzaꞌra dzéb da hã, taré ĩpréꞌé da hã mare di, ĩrotidzém na hã tãma ĩroti aba da tsi aiꞌra norĩ ma. (Provérbios 28:7) Taha nhipai u tãma rowahutu dzaꞌra na te te tsima tsawi dzaꞌra da Jeová mreme na hã duré te te waihuꞌu dzaꞌra da ĩtsimirowahutu nhimidzaprõni norĩ. (Salmo 1:2) Ãne hã te dza pawaptob dzaꞌra ni da te petse dzaꞌra da ĩtsitsãmri dzaꞌra dzé hã. — Hebreus 5:14.

TAHA DA ATSIPTETE:

• Rowahutu aiꞌra norĩ ma hã Höimanaꞌuꞌö ꞌre ĩhöimana mono na hã ĩꞌuptabi na hã duré õhõ ĩꞌumnhatsi na hã.

• Tãma ꞌre ĩrowahutu aba mono da tsi marĩ ĩpipa wi ꞌre tsipibui wẽ dzaꞌra mono da, internet na, rede social na, duré datsima daꞌwapé danhiptete tsina daꞌãma dahöimana da.