1 Corĩtu 16:1-24
16 Isazeiꞌwa norĩ ma, robꞌuiprazé hã asiwi iꞌrãꞌõtõ aba zéb da na, wa za oto aima ãma roti zaꞌra waꞌwa. Galasia na danhiptiꞌa nhoꞌõmo nhisi ãma isazeiꞌwa norĩ, dazaꞌrui mono bâ siré ꞌre isiꞌrãꞌõtõ mono norĩ ma, te tãma iroti zaꞌra zém na, wa za aima ãma roti zaꞌra waꞌwa, duré a norĩ waꞌaba zama ãne hã ꞌmanharĩ zaꞌra waꞌaba da.
2 Dumigu sidâpâsi ꞌre sãmra aba mono da, te za robꞌuiprazé hã ꞌre ipoꞌo uꞌâsi zaꞌra waꞌaba mo, aihâiba mono bâ waꞌaba. Aipawaꞌâ hã suru na ꞌre waibui waꞌaba mono wamhã, suru na te za ꞌre ipoꞌo zaꞌra waꞌaba mo. Duré saꞌẽtẽ na ꞌre waibui waꞌaba mono wamhã, saꞌẽtẽ na te za duré ꞌre ipoꞌo zaꞌra waꞌaba mo. Atẽme ĩwisi aba wapsi, asiwi ꞌrãꞌõtõ aba da, asima rosaꞌrata zaꞌra waꞌaba õ di za. Ĩwana ré, te za asiwi ꞌre iꞌrãꞌõtõ uꞌâsi aba mo dumigu sidâpâsi, ĩzô nomro siromo da.
3 Tawamhã atẽme zaꞌra waꞌaba ãma ĩwisi wapsi, asiwi ipisutu zaꞌra waꞌaba norĩ hã wa za iré satõrĩ zaꞌra Zeruzalẽ u, asõprubzéb zaꞌra waꞌaba ré hã, te te siwi âri da. Robꞌuiꞌéré ré zama, wa za duré satõrĩ zaꞌra, wa te iwẽsãmri zaꞌra norĩ wasuꞌu na robꞌuiꞌéré hã.
4 Tawamhã ãté ĩzama wa za ĩsima rowẽ, Zeruzalẽ u ĩmorĩ da hã. Taha wapsi, wa za isiré ĩmorĩ zaꞌra, asiwi ipisutu zaꞌra waꞌaba norĩ siré hã.
Paulu hã za datẽme imorĩzém na dama isiwasuꞌuzé wasuꞌu
5 Wa tô ĩsima rowairébé, Masédonia u, aꞌâ ĩmorĩ da, tame isazeiꞌwa norĩ siré aꞌâ ĩnhamra hutu da. Tawamhã Masédonia hawip si, wa za oto ãma atẽme ĩmorĩ ꞌwa, tamomomhã.
6 Tawamhã atẽme ãma ĩwisi aba wamhã, ãté wa za aꞌâ aiꞌratab zaꞌra waꞌaba ĩhâimana hâ. Ãté rowaꞌuꞌu wahâ ꞌre saꞌwari mono ré, wa za aꞌâ aiꞌratab zaꞌra waꞌaba ĩnhamra hâ pese za. Tamep si, te za asiwi ĩpawaptob zaꞌra waꞌwa, nimomo ĩmorĩzéb da hã, rowẽ na ĩmorĩ da, aihawi zaꞌra waꞌaba.
7 Ãma atẽme ĩwisi zaꞌra waꞌaba wamhã, aiꞌrata ĩnhamra hutu zaꞌra waꞌaba da, te ĩsina roti õ di. Aiꞌrata ĩnhamra hâ zaꞌra waꞌaba da si, wa tô ĩsima wẽ. Ãne na dâꞌâsina, awaꞌawi ãma atẽme ĩwisi aba õ di za. Nimahã na si, wa za ãma atẽme ĩmorĩ zaꞌra waꞌwa. Tawapsi, wa za aiꞌrata ĩnhamra hâ zaꞌra waꞌwa, Wanhibꞌapito hã te te ĩma pisutu pese wamhã.
8 Tahawa, wa za aꞌâ ãme nhamra Éfézu ãma, Pẽtecosti na bâtâ nhisi hã za iwa iwaptãꞌãzéb u, datoi ꞌmanharĩzéb u hã.
9 Ĩnhimiromhuri wẽꞌõꞌwa norĩ hã ahâ uptabi nherẽ, ma tô ꞌRe ihâimana uꞌâsi mono hã ĩnhowa ropese ĩma, ãme te tãma ꞌre iromhuri mono zéb da hã. Tahawa, ãmemhã ĩma romhuri ahâ uptabi di za, Zezusihi wasuꞌuwẽ na te dama ꞌre iromhuri mono zéb da hã.
10 Duré, Timotiu hã atẽme ãma wisi zaꞌra waꞌaba wamhã, maꞌãpé asiwi sawi wẽ zaꞌra waꞌaba za, sina hâtâꞌâ ãna aiꞌrata sãmra aba da. Wa hã Wanhibꞌapito ma, te ꞌre iromhuri mono ne, te duré taha zama te te tãma ꞌre romhuri. Tahawa, te za asiwi isawi pese zaꞌra waꞌwa.
11 Mreme wapu na ꞌre hâimana mono newa, duré taré ꞌre ihâimana mono newa, asiwi wẽꞌõ zaꞌra waꞌaba õ di za, ãma atẽme wisi zaꞌra waꞌaba wamhã. Te za ãma ana waꞌwa, rowẽ na aihawi waꞌaba hã wei morĩ da apâ, we ĩtẽme wisi suꞌu da. Tahawa, wa zahadu aꞌâ sô mapari zaꞌra, isiré romhuriꞌwa norĩ zô zama.
12 Wasisãnawã Apolu hã wa za duré aima ãma wasuꞌu zaꞌra waꞌwa. Wa tô aré nasi tãma roti uꞌâsi, wasiré isazeiꞌwa norĩ siré ãma atẽme morĩ zaꞌra waꞌaba da, te te asabu zaꞌra waꞌaba da. Tane nherẽ, te te sima rowẽ õ di, ta norĩ siré ãma atẽme imorĩ zaꞌra waꞌaba da hã. Marĩ hã tãma hâimana õ wapsi, te za, u, ãma atẽme timorĩ zaꞌra waꞌwa, te te asabu zaꞌra waꞌaba da.
Paulu hã roti na za te te oto dama iꞌrãsutuzém na rowasuꞌu
13 Asimizaꞌrese te za asimirosaꞌrata na ꞌre aihâimana zaꞌra waꞌaba mo. Cristuhu nhimiroti zarina si ꞌre anomro uꞌâsi aba mono da, te za duré sada ꞌre asiptete zaꞌra waꞌaba mo. Aihâimana prédup sina te za ꞌre aihâimana zaꞌra waꞌaba mo, asina ꞌre aihâtâꞌâ zaꞌra waꞌaba mono ãna. Asiptete sina te za duré ãma ꞌre anomro aba mo, tiwi ꞌre aipizari zaꞌra waꞌaba mono ãna.
14 ꞌRe asimizawi pese zaꞌra waꞌaba mono zéb zarina, te za uburé marĩ hã dama ꞌre iꞌmanharĩ wẽ uꞌâsi zaꞌra waꞌaba mo.
15 16:15-16 Estéfanasihi ãma, wa za oto aipoꞌre puꞌu zaꞌra waꞌwa, isõrõwa ãma isiré ꞌre ihâimana zaꞌra mono norĩ ãma zama. Ta norĩ hã ma tô sazei ꞌrata zaꞌra, Acaia na danhiptiꞌa nhoꞌõmo nhisi ãma, ꞌre isiꞌubumroi mono norĩ hã. Ta norĩ hã, ꞌRe ihâimana uꞌâsi mono nhibꞌaꞌuwẽ ꞌre ihâimana zaꞌra mono norĩ hã simiꞌẽ na te te ꞌre pawaptob uꞌâsi zaꞌra mono da si, ma tô ꞌre siꞌmadâꞌâ zaꞌra. Ãne hã aima waihuꞌu pese zaꞌra waꞌaba di. Tahawa, ĩsisãnawã norĩ, ta norĩ nhimiroti hã te za ꞌre iꞌmadâꞌâ pese zaꞌra waꞌaba mo, isiré norĩ hã simiꞌẽ na te te ꞌre iromhuri pese zaꞌra mono norĩ nhimiroti zama.
16 ꞌMadâꞌâ 16:15
17 16:17-18 Estéfanasi norĩ hã, Furtunatu norĩ me, Acaicuhu norĩ me, we ĩtẽme sihutu wamhã, ma tô ĩma rowẽ watobro. Wa hã aiꞌrata ꞌre ĩnhamra aba mono õ wa, wa aiꞌãma ꞌre ĩpẽꞌẽzé uꞌâsi zaꞌra waꞌwa. Tane nherẽ, ta norĩ hã aiꞌupana waꞌaba we ĩtẽme sihutu wa, ma tô sina ĩma rowẽ wazere zaꞌra, te te sina aima ꞌre irowẽ zani uꞌâsi zaꞌra waꞌaba mono ne. Ta norĩ hã te za asima ꞌre iwasuꞌu wẽ uꞌâsi zaꞌra waꞌaba mo.
18 ꞌMadâꞌâ 16:17
19 Azia na danhiptiꞌa nhoꞌõmo nhisi ãma isazeiꞌwa norĩ, siré ꞌre isiꞌrãꞌõtõ mono norĩ hã te ãma asawi zaꞌra waꞌwa. Aquila hã te duré ãma asawi zaꞌra waꞌwa, Prisilaha me. Uburé isõrõwa ãma rowahutu u siré ꞌre isiꞌrãꞌõtõ uꞌâsi mono norĩ zama, te duré ãma asawi zaꞌra waꞌwa. Simisutu, Wanhibꞌapito ãma oto ꞌre anomro aba mono wa, te ãma asawi zaꞌra waꞌwa.
20 Ãme wasisãnawã norĩ ꞌre isiꞌubumroi mono norĩ hã te duré uburé ãma asawi zaꞌra waꞌwa.
Duré ꞌre asiꞌrãꞌõtõ aba mono wamhã, te za uburé asiré isazeiꞌwa na ꞌre aihâimana zaꞌra waꞌaba mono wa, asõꞌutu na asisawi sina ꞌre asitobꞌrata hârâ zaꞌra waꞌaba mo.
21 Wa hã Paulu, ĩsiꞌuihâ na wa za oto aima robꞌuiꞌéré na ꞌrãsutu zaꞌra waꞌwa, ĩnhibꞌrata na te ãma asawi zaꞌra waꞌaba zéb da hã.
22 Wanhibꞌapito zawiꞌõꞌwa norĩ ma, ꞌRe ihâimana uꞌâsi mono hã, rowẽꞌõ te te tãma ꞌre apisutu mono za.
Wanhibꞌapito, apâ we aimorĩ suꞌu za.
23 Wanhibꞌapito Zezusihi ma, wa aiꞌãma tãma ꞌre ĩmreme uꞌâsi zaꞌra waꞌwa, te te ꞌre asawi pese zaꞌra waꞌaba mono wa, te te ꞌre aipawaptob uꞌâsi zaꞌra waꞌaba mono da.
24 Cristu Zezusihi ãma simisutu oto ꞌre wanomro mono wa, wa asawi na ãma ꞌrãsutu zaꞌra waꞌwa, ĩma asawi uptabi zaꞌra waꞌaba wa.
