1 Corĩtu 6:1-20
6 Niꞌwa hã asiré isazeiꞌwa nherẽ, marĩ hã te te aiwi ꞌre ꞌmaiꞌmanharĩ wasété aba mono wa, sada ꞌre aiꞌmaihâimana zaꞌra waꞌaba mono wamhã, e isazeiꞌõꞌwa norĩ u, te za ꞌre isimroi waꞌaba mo, marĩ te te aiwi ꞌre iꞌmanharĩ wasété aba mono zém na, tãma ꞌre wasuꞌu zaꞌra waꞌaba mono da, daꞌãma rowairébéꞌwa norĩ ma. Mare di. Iꞌuwaibaba õ di. ꞌRe ihâimana uꞌâsi mono nhibꞌaꞌuwẽ u si, te za ꞌre isimroi waꞌaba mo, ta norĩ si te te ꞌre waihuꞌu zaꞌra mono da, marĩ hã te te aiwi ꞌre iꞌmanharĩ wasété zaꞌra waꞌaba mono zém na hã, tãma ꞌre wasuꞌu zaꞌra waꞌaba mono da.
2 Aptoꞌoré si, daꞌãma isipoꞌozéb ãma, wa norĩ hã ꞌRe ihâimana uꞌâsi mono nhibꞌaꞌuwẽ norĩ hã, Cristuhu siré, wa za wapire na dama rowairébé zaꞌra ni, ꞌre idahâimana wasété zaꞌra mono zém na hã. Oro ãne hã aima waihuꞌu pese zaꞌra waꞌaba za. Ãne hã Cristuhu siré, wapire na za wa te dama rowairébé zaꞌra wamhã, e tawamhã tiꞌab ré, marĩre hã asiré isazeiꞌwa norĩ wi ꞌre ꞌmaiꞌmanharĩ wasété aba mono wa, asisada ꞌre aiꞌmaihâimana aba mono wamhã, e aima waihuꞌu pese zaꞌra waꞌaba õ di bété, iꞌuwaibaba tô sena asima ãma ꞌre asiwaihuꞌu zaꞌra waꞌaba mono zéb da hã, marĩ asiwi ꞌre iꞌmaiꞌmanharĩ wasété aba mono zém na hã. Ãne hã tô aima waihuꞌu pese zaꞌra waꞌaba di, ãma ꞌre asiwaihuꞌu zaꞌra waꞌaba mono zéb da hã.
3 Duréihã ꞌRe ihâimana uꞌâsi mono ma, hâiwa ãma romhuriꞌwa norĩ hã tiwi isipizari zaꞌra hã, wa za duré wapire na tãma rowairébé zaꞌra ni isiré, za daꞌãma isipoꞌozéb ãma hã. E ãne hã zahadu aima pibui prã zaꞌra waꞌaba di bété. Tahawa, tiꞌab ré, marĩ wa, wasisada ꞌre wahâimana zaꞌra mono wamhã, wa za wawaimri wa te wasima ꞌre rowaihuꞌu zaꞌra, apâ wa te wasima ãma ꞌre rowẽ zani zaꞌra mono da. Ãne wamhã, wa za tô wa te wasima ãma ꞌre uwaimrami zaꞌra.
4 Tahawa, marĩ hã asiré isazeiꞌwai wi ꞌre ꞌmaiꞌmanharĩ wasété aba mono wa, asisada ꞌre aiꞌmaihâimana zaꞌra waꞌaba mono wamhã, e marĩ wa, te isazeiꞌõꞌwa norĩ u ꞌre asisimroi waꞌaba mo, ta norĩ si aiwasété na te te ꞌre aiwaihuꞌu zaꞌra waꞌaba mono da hã, ta norĩ hã asiré isazeiꞌwa na ꞌre hâimana zaꞌra mono õ nherẽ, dawasété na dawaihuꞌuꞌwa norĩ hã.
5 Ĩnhimiroti ma, aséb zaꞌra waꞌaba da nherẽ, wa ãne na aima rowaihuꞌu zaꞌra waꞌwa. E asiré isazeiꞌwa, ꞌre ꞌmaihâimana mono ã bâ bété, aiwasété zaꞌra waꞌaba na aiwaihuꞌu aba ꞌwa da hã.
6 E ãne hã iꞌuwaibaba bâ, te asiré isazeiꞌwa ꞌre aihâimana zaꞌra waꞌaba mono nherẽ, asisada ꞌre aihâimana zaꞌra waꞌaba mo, isazeiꞌõꞌwa norĩ u si ꞌre asisimroi waꞌaba mono da, ta norĩ si te te ꞌre aiwaihuꞌu zaꞌra waꞌaba mono da, aiwasété aba na. E ãne hã iꞌuwaibaba, aima zaꞌra waꞌaba hã.
7 Ãne zarina, asisada ꞌre aihâimana zaꞌra waꞌaba mono wa, daꞌãma rowairébéꞌwa norĩ u, ꞌre asisimroi waꞌaba mono wamhã, isazeiꞌwai hâimanazém na asima ꞌre uwaimrami zaꞌra waꞌaba mono õ di za. Niꞌwam norĩ hã asiré isazeiꞌwa nherẽ, te te aima ꞌre robꞌmanharĩ wasété zaꞌra waꞌaba mono wamhã, tãma ãma ꞌre waꞌrãmi zaꞌra waꞌaba mono ãna, te za tô õne haré ꞌre aihâimana zaꞌra waꞌaba mo. Niꞌwam norĩ hã asibrom na aiwi ꞌre sipsaihuri zaꞌra waꞌaba mono wamhã, tãma ãma ꞌre waꞌrãmi zaꞌra waꞌaba mono õ di za duré. Tawapsi, te za asina ãma ꞌre iꞌuwaimrami zaꞌra waꞌaba mo, isazeiꞌwai hâimanazém na hã.
8 Tane nherẽ, a norĩ waꞌwa hã asiré isazeiꞌwa nherẽ, dawasété na dawaihuꞌuꞌwai u, ꞌre asisimroi waꞌaba mono wa, te tô asima ꞌre irobꞌmanharĩ wasété zaꞌra waꞌaba mo, ꞌrâwi. Tahawa, te duré asima ꞌre asimizaꞌrepese zaꞌra waꞌaba mo ꞌrâwi, ãne na hã, asiré isazeiꞌwa ꞌre aihâimana zaꞌra waꞌaba mono nherẽ.
9 6:9-10 Tiwasété si te te ꞌre iꞌmanharĩ uꞌâsi zaꞌra mono norĩ hã, ta norĩ hã ꞌRe ihâimana uꞌâsi mono, daꞌãma ꞌre isibꞌaꞌuwẽ mono zé hã te te dame sina ꞌre uwaimrami zaꞌra mono õ di za. E ãne hã, zahadu waihuꞌu zaꞌra waꞌaba õ di bété. Ãne na hã taré ꞌrâwi asima ꞌre asadawa nhipese zaꞌra waꞌaba mono õ di za. Dahâiba na dawasédé te te ꞌre iꞌmanharĩ zaꞌra mono norĩ hã, ta norĩ hã ꞌRe ihâimana uꞌâsi mono, daꞌãma ꞌre isibꞌaꞌuwẽ mono zém na, dame ꞌre hâimana zaꞌra mono õ di za, duré ꞌRe ihâimana uꞌâsi mono upana, romhâiba ꞌmanharĩ ãma ꞌre iwata zaꞌra mono norĩ hã, duré damro na dawi ꞌre isimisaihuri zaꞌra mono norĩ hã, duré aibâ siꞌuiwa na siꞌãma ꞌre iwasété zaꞌra mono norĩ hã, duré danhibrom na dawi ꞌre isipsaihuri zaꞌra mono norĩ hã, duré danhibrom na te te ꞌre idaꞌruiwapari zaꞌra mono norĩ hã, duré âzézeiꞌwa ꞌre ihâimana zaꞌra mono norĩ hã, duré te te daꞌãma ꞌre iwasété zaꞌra mono norĩ hã, duré danhibrob zô dapãrĩꞌwa norĩ hã. Ta norĩ hã dasiré ꞌre hâimana zaꞌra mono õ di za, ꞌRe ihâimana uꞌâsi mono, daꞌãma ꞌre isibꞌaꞌuwẽ mono zéb ãma hã.
10 ꞌMadâꞌâ 6:9
11 Ãne na si, ma tô niꞌwam norĩ a norĩ waꞌwa aré ꞌre aihâimana wasété uꞌâsi zaꞌra waꞌaba mo, ꞌre saze zaꞌra waꞌaba mono õ ré hã. Tane nherẽ, ꞌRe ihâimana uꞌâsi mono hã Zezusihi dâꞌâzém na, ma tô oto te te ꞌre aiꞌupsõ zaꞌra waꞌwa, aiwasété hawi. Ma tô duré te te ꞌre aipisutu zaꞌra waꞌwa, isibꞌaꞌuwẽ si oto ãma ꞌre anomro wẽ waꞌaba mono da. Aiwasédé hã te te oto aiꞌãma ꞌre iꞌaꞌmadâꞌâ aba mono õ zéb zarina, ma tô duré te te ꞌre aiwẽsãmri zaꞌra waꞌwa, Wanhibꞌapito Zezu Cristuhu zadawa para, ꞌRe ihâimana uꞌâsi mono Pẽꞌẽzani nhimipawaptobzém na hã.
Dahâiba na ꞌre idasiwasété zaꞌra mono zé wasuꞌu
12 Niꞌwam norĩ hã te ãne te te sima ꞌre nharĩ zaꞌra: “Marĩ hã wa te ꞌre ꞌmanharĩ zaꞌra mono tõ da, ꞌRe ihâimana uꞌâsi mono te te wawi ꞌre awẽꞌõ mono õ nherẽ, wa norĩ zama, wa te wasiwi ꞌre wẽꞌõ zaꞌra mono õ di za, wa te ꞌre ꞌmanharĩ zaꞌra mono tõ da. Wa za tô wa te ꞌre ꞌmanharĩ zaꞌra, wa te wasima ꞌre iwẽ zaꞌra mono zéb uwaibaba.” Ãne na te niꞌwam norĩ hã te te sima ꞌre nharĩ zaꞌra. Tane tô. Ta hã wẽ di. Tane nherẽ, te duré tô marĩ hã ꞌre hâimana zaꞌra, iwẽ prã hã, ꞌRe ihâimana uꞌâsi mono te te wawi ꞌre iꞌawẽꞌõ mono õ hã. Tane nherẽ, taha si, wa te ꞌre ꞌmanharĩ zaꞌra mono õ di za. Duré wa hã marĩ hã te ꞌre ꞌmanharĩ mono tõ da, ꞌRe ihâimana uꞌâsi mono te te ĩwi ꞌre awẽꞌõ mono õ nherẽ, ãté taha zô si, wa za ĩsima te ꞌre robꞌruiwapari uꞌâsi. Ãne tõ da, taha zarina ꞌre ĩhâimana mono õ di za.
13 Niꞌwam norĩ hã te duré ãne na te te sima ꞌre nharĩ zaꞌra: “Wasa hã wadub ꞌreb da si, te wama ꞌre hâimana zaꞌra. Duré wadu hã wasai ubumrozéb da si, te wama ꞌre hâimana zaꞌra. Tane, te duré wahâiba hã misi wama ꞌre hâimana zaꞌra wahâiba mono bâ, uburé marĩ hã siwaꞌru wa te ãma ꞌre iꞌmanharĩ zaꞌra mono zéb da hã.” Ãne te niꞌwam norĩ hã ꞌrâwi te te siꞌãma ꞌre rosaꞌrata wasété zaꞌra, tihâiba na hã. Tane nherẽ, dasa hã duré dadu hã niwapsi te za ꞌRe ihâimana uꞌâsi mono hã uprosi zahuré siꞌuiwa na. Dasa hã da te ꞌre huri mono wamhã, dawasédé, da te ãma ꞌre ꞌmanharĩ zaꞌra mono õ di. Tane nherẽ aihâiba na asiwi ꞌre asimisaihuri zaꞌra waꞌaba mono zéb da hã, aihâiba aimawi hã aima ꞌre hâimana zaꞌra waꞌaba mono õ di. Wanhibꞌapito ma, wa te ãma ꞌre iromhuri pese zaꞌra mono zéb da si, te wahâiba hã wama ꞌre hâimana zaꞌra. Taha si te wahâiba hã te te wama ꞌre aꞌmadâꞌâ pese, Wanhibꞌapito hã.
14 Wanhibꞌapito hã dâꞌâ uptabi nherẽ, ꞌRe ihâimana uꞌâsi mono te te ihâiwaꞌutu ne, te za tiwaihuꞌu pese na waꞌahâiwaꞌutu. Tahawa, te wahâiba hã pire na wama ꞌre hâimana zaꞌra oto, taré hãi õ wa.
15 A norĩ waꞌwa hã aihâiba mono bâ, te oto Cristuhu nhibꞌaꞌuwẽ si ꞌre anomro aba mo. Taha siré si, te oto duré ꞌre aihâimana zaꞌra waꞌaba mo. E ãne hã asina ꞌre waihuꞌu zaꞌra waꞌaba mono ã bâ bété. E tawamhã, Cristuhu nhibꞌaꞌuwẽ oto ꞌre wanomro mono nherẽ, wa za piꞌõ iwaꞌâbâ zô ꞌre isisõmri mono hâiba me hã, wasina ꞌre wasihâiba tob zaꞌra. Mare di.
16 Duré aibâ hã piꞌõ iwaꞌâbâ zô ꞌre isisõmri mono hâiba hã te te sina hâiba to wamhã, ihâiba hã misi ne oto, maparane ihâiba nherẽ. E ãne hã zahadu aima waihuꞌu zaꞌra waꞌaba õ di bété. ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Aibâ hã piꞌõi me siré saꞌwari wamhã, ihâiba hã misi ne oto, maparane ihâiba nherẽ. Misi tô oto ihâiba zahuré hã.”
17 Tane nherẽ, niꞌwam norĩ hã Wanhibꞌapito te te sina ꞌre hâiba tob zaꞌra mono wamhã, ꞌrâwi te za isiré ꞌre hâimana zaꞌra, ipẽꞌẽ ꞌre.
18 Tahawa, maꞌãpé, dahâiba na dawasédé, da te ꞌre iꞌmanharĩ zaꞌra mono wi, asina ꞌre asiptete uꞌâsi zaꞌra waꞌaba mono. Dawasédé aimawi hã da te ꞌre ꞌmanharĩ zaꞌra mono wamhã, ãma ꞌre dasihâiba wasété zaꞌra mono õ di. Aibâ norĩ hã piꞌõ na tiwasédé te te ꞌre ꞌmanharĩ zaꞌra mono wapsi, te za ãma ꞌre sihâiba wasété zaꞌra. Duré, piꞌõ norĩ hã aibâ na tiwasédé te te ꞌre ꞌmanharĩ zaꞌra mono wapsi, te za duré ta norĩ hã ãma ꞌre sihâiba wasété zaꞌra aiwa.
19 ꞌRe ihâimana uꞌâsi mono Pẽꞌẽzani si, te oto aipẽꞌẽ ꞌre aiꞌãma ꞌre sõrõwa zaꞌra waꞌwa. Aipẽꞌẽ ꞌre, te oto aima ꞌre hâimana uꞌâsi zaꞌra waꞌwa. ꞌRe ihâimana uꞌâsi mono hã ma tô te te aima ꞌre sõmri zaꞌra waꞌwa. Tahawa, aihâiba zaꞌra waꞌwa hã ate zaꞌra waꞌaba õ di oto. ꞌRe ihâimana uꞌâsi mono te si, te oto aihâiba zaꞌra waꞌwa hã ꞌre hâimana zaꞌra. E ãne hã zahadu asina waihuꞌu zaꞌra waꞌaba õ di.
20 E marĩ wa, aihâiba hã ate zaꞌra waꞌaba õ di oto. ꞌRe ihâimana uꞌâsi mono, ma tô aiwaꞌâbâ zaꞌra waꞌwa, Cristuhu dâꞌâzém na. Tahawa, uburé marĩ hã aihâiba na tãma ꞌre iꞌmanharĩ wẽ zaꞌra waꞌaba mono zém na, te za ãma ꞌre aiwata uꞌâsi zaꞌra waꞌaba mo, ꞌRe ihâimana uꞌâsi mono ãma hã.
