Zenezi 3:1-24
3 Wahi hã, uburé tisiré abaze norĩ nhipai u, hâimana nhimizaꞌrese na te ꞌre hâimana, Uburé Danhibꞌapito ꞌRe ihâimana uꞌâsi mono nhimipoto ꞌremhã. Tahawa te wahi hã piꞌõ sadanha ãne:
— E tô sena ma tô ꞌRe ihâimana uꞌâsi mono hã aima waihuꞌu ꞌwa, robꞌre ãma uburé rowede ꞌre isimasa mono ꞌrã hã, ꞌmairẽne aba tõ da.
2 Tawamhã piꞌõ, ma te ãma sadaꞌâ ãne:
— Uburé siwaꞌru rowede ꞌrã te te wama iꞌruzé hã wa za tô wa te ꞌre ꞌmasi.
3 Tane nherẽ, robꞌre norĩ wede waꞌwa rowede ꞌre isa mono ꞌrã si, wa te ꞌre iꞌmairẽne mono da hã maze di, taha si te te wawi sawi wa. Duré wa te ꞌre upi tõ mono da, ma tô wawi sawi. Ãne hã wa te ꞌmanharĩ wamhã, wa za, u, wadâꞌâ ni.
4 Tawamhã wahi, te piꞌõi ma asa tinha ãne:
— Mare di. ꞌRẽne aba nherẽ, atâꞌâ aba õ di za.
5 ꞌRe ihâimana uꞌâsi mono ma, waihuꞌu pese wa, te ãne na hã aima waihuꞌu ꞌwa, nimahã bâtâ na ã rowede ꞌrã ꞌrẽne aba wamhã, ato hã za aima isiꞌridawa aba zém na hã, duré za isine ꞌre aihâimana aba mono na hã, iwẽ hã duré iwasédé hã za ꞌre iꞌawaihuꞌu aba mono na hã oto.
6 Tawamhã piꞌõ te rowede iwẽ na hã ꞌmadâ. Duré iꞌrã da te ꞌre ihuri mono da hã te ꞌmadâꞌâ ze na hã sima ꞌmadâ. Tahawa, ma tô ꞌrâwi duré sina rosaꞌrata, te te ꞌrẽne wamhã, za simizaꞌrese na rowaihuꞌu wẽ na ꞌre ihâimana mono na hã. Tahawa, ma tô ꞌmata. Ma tô tiꞌrẽ. Taha pari, ma tô timro ma tisõ. Tawamhã taha zama ma tô duré oto tiꞌrẽ.
7 Tawamhã awaꞌawi ma tô ito hã tãma siꞌridawa zahuré. Tahawa, ma tô oto aiꞌuréiwi ꞌre inem na hã ꞌrâwi siwaihuꞌu zahuré. Tahawa, ma tô robꞌrã figu wede su hã ãma isiꞌubu zahuré zéb da hã sisada ababarĩ zahuré.
8 Tawamhã taha bâtâ na hâiwahâ pesere rowaꞌu atãma na te te rowapõrĩ ré, aibâ norĩ timro me, ma tô Uburé Danhibꞌapito ꞌRe ihâimana uꞌâsi mono, robꞌre waꞌwaibaba ꞌre imorĩ parahâꞌra hã wapari zahuré. Tahawa rowede norĩ wede waꞌwa ma tô tiwi aimaꞌuri zahuré.
9 Tane nherẽ, Uburé Danhibꞌapito ꞌRe ihâimana uꞌâsi mono, aibâ te te ꞌmahârâ wamhã, te ãne sadanha:
— E mame te asã.
10 Tawamhã aibâ, ma tô sadaꞌâ ãne:
— Rowede waꞌwaibaba we iꞌaimorĩzé aipara ꞌra te wapari wa, wa tô aima ĩpahi, aiꞌuréiwi ĩhâimana zép te. Tahawa wa tô aiwi aimaꞌu.
11 Tawamhã ꞌRe ihâimana uꞌâsi mono te sadanha ãne:
— E ꞌwa ma tô aiꞌuréiwi aihâimana na hã aima waihuꞌu. E ma tô rowede ꞌrã te aiwi isawi hã iꞌmaiꞌrẽ.
12 Tawamhã aibâ, ma duré ãma tãma waꞌrã ãne:
— Piꞌõ, wasiré ꞌre wasimasisi mono da, ĩma isõmri hã, ma tô robꞌrã ĩma tisõ. Ta hã wa tô tiꞌrẽ.
13 Tawamhã Uburé Danhibꞌapito ꞌRe ihâimana uꞌâsi mono te piꞌõi ma tinha ãne:
— E marĩ da, ma tô ãne hã iꞌmanha.
Tawamhã piꞌõ, ma te ãne asa ãma tãma waꞌrã:
— Wahi, ĩma isadawa nhipese zarina wa tô tiꞌrẽ, robꞌrã hã.
Wahi ma, ꞌRe ihâimana uꞌâsi mono te te tãma irobꞌmanharĩzé wasuꞌu
14 Tawamhã Uburé Danhibꞌapito ꞌRe ihâimana uꞌâsi mono, te wahi ma tinha ãne:
— Ãne na a hã, iꞌmanharĩ zarina, wa za aima robꞌmanha. Tahawa uburé ĩnhimipoto norĩ ꞌremhã aima si wa za iwẽꞌõ hã pisutu. Tahawa ã hawim haré te za adiꞌi na hã ꞌre aimo. Duré te za tiꞌa zaprum na si ꞌre asai mo.
15 Wa za duré aima pisutu ꞌwa, asiꞌrui waꞌaba na asisada ꞌre aihâimana aba mono da hã. Tawamhã ãne zarina te za asihudu norĩ waꞌaba zama siꞌru na hã sisada ꞌre hâimana zaꞌra. Ãhã piꞌõ nhihudu norĩ hã te za zahadu wapsi siwi aiꞌrãihâpâ. Tawamhã a hã te za duré piꞌõ nhihudu norĩ hã ipara naꞌrata wi hã ꞌre iꞌahâzu mo.
16 Tawamhã piꞌõi ma, te duré oto tãma tinha ãne:
— ꞌRe aiwasã mono sidâpâsi saꞌẽtẽ na ꞌre robzépata mono da hã wa za aima pisutu. Tahawa aiꞌra aima ꞌre poto zaꞌra mono wamhã, te za sé uptabi na isé hã ꞌre iꞌazépata mo. Ãhã nherẽ, te za aimro siré ꞌre aihâimana mono da hã asima ꞌre iwẽ uꞌâsi mo. Ta hã te za duré asibꞌapito na hã aima ꞌre hâimana oto.
17 Taha pari, te duré Adãhã ma, ꞌRe ihâimana uꞌâsi mono hã tãma tinha ãne:
— Aimro mreme wapari wa, ma robꞌrã hã iꞌrẽ, te aiwi isawi waꞌwa hã. Ãhã uꞌâbâmhã, wa za tiꞌai ma hã pisutu, wasété uꞌâsi ꞌre saꞌwari mono da. Tahawa, te za tiꞌai hawi robꞌre asazéb da, ibâ na aima ꞌre hâimana mono da hã ꞌre iromhuri zaꞌẽtẽ mo, tiꞌa ꞌre aihâimana mono ré.
18 Te za duré tiꞌai hawi warõno hã siwazari ꞌwabzéré me hã ꞌre poto uꞌâsi zaꞌra. Tawamhã te za duré rom na da te ꞌre izuri zaꞌra mono õ hã ꞌre iꞌaꞌmasi uꞌâsi mo.
19 Tawamhã duré asuꞌu zaꞌẽtẽ ꞌrowi te za romhuri pire na hã ꞌre iromhuri uꞌâsi mo, asazéb da, tiꞌai ãma ꞌre aihâimana mono ré, apâ asitiꞌazéb u. E marĩ wa. Tiꞌa ꞌmanharĩ na dâꞌâsina, a hã. Duré a hã tiꞌai ꞌmanharĩ wa, te za apâ asitiꞌa.
20 Tawamhã aibâ, ma tô timro hã sisi Eva na, uburé dana naꞌrata na za ꞌre hâimana mono dâꞌâsina.
21 Tawamhã ꞌRe ihâimana uꞌâsi mono, abaze hâ ꞌmanharĩ ma tô Adã norĩ zada, imro me hã sada ꞌmanharĩ zahuré, ãma isiꞌuza zahuré zéb da hã.
ꞌRe ihâimana uꞌâsi mono, Adã norĩ ma, robꞌre hawi te te tãma irobꞌru zahuré zé wasuꞌu, pusi da
22 Tawamhã Uburé Danhibꞌapito ꞌRe ihâimana uꞌâsi mono te ãne sima tinha:
— Aibâ hã te oto wasine ꞌre hâimana. E marĩ wa. Iwẽ hã duré iwasédé hã te te ꞌre waihuꞌu mono wa oto. Tahawa, rowede ꞌre idahâimana uꞌâsi zaꞌra mono nhomriꞌwai ꞌrã hã te te ꞌre iꞌmairẽne mono da hã mare di, õne uꞌâ dâꞌâ ãna ãma ꞌre hâimana mono tõ da.
23 Tahawa, Uburé Danhibꞌapito ꞌRe ihâimana uꞌâsi mono, ma tô Édẽ na robꞌre nhisi hawimhã tãma robꞌru, tiꞌa na te te ihâiba ꞌmanharĩzém na si te te sima ꞌre robꞌre mono da oto.
24 Tawamhã duré oto robꞌre ꞌre ihâimana mono hawi aibâ te te satõrĩ wamhã, ma tô robꞌre bâtâ pusizém niwĩ ihâimana ãma sõré, hâiwa ãma romhuriꞌwa isiptete norĩ si hã. Sibꞌézé ꞌwapa ꞌwa roꞌo ré hã ma tô duré tisã, te te nasi irowaimrami mono da hã. Ãne ꞌRe ihâimana uꞌâsi mono, ma tô ꞌmanha, niꞌwa hã ãhã rowede ꞌrã da te ꞌre huri mono wa, dadâꞌâ ãna ꞌre idanomro uꞌâsi mono zé rowede tẽme ꞌrâwi wisi tõ da hã.
