Zenezi 50:1-26
50 Tawamhã Zuzé, ma tô timama nhisiwimhã waptãrã, tinhoꞌutu te te âri da. Tahawa, ma tô ãma siwaꞌõ sina tobꞌrata hârâ na sawi.
2 Tawamhã dawedeꞌwa norĩ te te tãma ꞌre iromhuri zaꞌra mono ma, ma tô tãma waihuꞌu zaꞌra, imama hã te te siwi hâiba uꞌré da, ꞌro tõ da. Ãne te te tãma waihuꞌu zaꞌra wa, ma tô imreme zarina ta norĩ hã siwi ꞌmanha.
3 Te te siwi hâiba uꞌréi ré hã, ma tô bâdâ 40 na ãma timorĩ zaꞌra, tô da te ꞌre idahâiba uꞌré zaꞌra mono zé bâtâ wabre. Tawamhã ezipsiu norĩ hã ma tô 70 bâtâ na tipẽ te te ãma isépata zaꞌra zarina sô ꞌre siwaꞌõ zaꞌra.
4 Tawamhã oto imama ãma dapẽꞌẽzé da te isépata zaꞌra zé siꞌutõrĩ wamhã, ma tô Zuzé, Ezitu ãma apito nhimiromhurizé ꞌri ꞌrãihâ ꞌre dama ipire norĩ ma hã tãma nharĩ zaꞌra ãne:
— Ĩzawi na hã maꞌãpé apito ma, ãne romreme asiwi âri aba:
5 “Ĩmama hã tidâꞌâzéb u ma tô ĩwi waptẽ, te tãma ropisutu da, tiꞌai waꞌõtõ nhoꞌu Canaꞌã ãma tiꞌa te te sima iꞌmaipisutu ãma, te sẽrẽ da. Tahawa, aꞌâ ĩma rowairébé, ĩmama ãma te tiꞌa da ĩmorĩ da. Taha parip si wa za we apâ ĩsina siri.”
6 Tawamhã apito Faraꞌo, ma te ãne Zuzé hã ãma sadaꞌâ asa:
— Mo oto pé aimorĩ, aimama ãma aꞌâ tiꞌa da, tãma iropisutuzéb zarina.
7 Tawamhã Zuzé, ma tô oto mo, timama te te sẽrẽ da. Tahawa, te isiré aiꞌabaꞌré, apito siré dama ipire na te te ꞌre iromhuri zaꞌra mono norĩ hã, apito nhimiromhurizé ꞌri ꞌrãihâ ꞌre danhibꞌihâꞌa norĩ hã, duré uburé Ezitu ãma dama iꞌrãnhoꞌõmo norĩ hã.
8 Tawamhã duré Zuzéhé hawi aꞌuwẽ norĩ zama, isisãnawã norĩ zama, duré uburé Zacoho nhorõwa ãma ꞌre ihâimana zaꞌra mono norĩ zama, ma tô isiré hã aiꞌabaꞌré. Ãhã wa, Gosẽ ãma ma tô sisaꞌu zaꞌra rẽme zaꞌra aiꞌuté norĩ hã, poneꞌẽrebâ norĩ hã, poneꞌẽrebâ zéré uzé norĩ hã, duré powawẽ norĩ hã.
9 Tawamhã niꞌwam norĩ aibâ zama ma tô awaru na, duré wedewara zapore na hã dasiré aiꞌabaꞌré. Tahawa, dawaꞌõno hã saꞌẽtẽ uptabi di.
10 Tawamhã Atade na romnhisi u oto sihutu wamhã, Zodã â bâtâ pusizém niwĩ ꞌre isaꞌwari mono u hã, ma tô amnho trigu da te ꞌre ipréꞌé zaꞌra mono zéb ãma ihâiba na siwaꞌõ ꞌrãihâ na hã sô robꞌrã ze zaꞌra, 7 bâtâ ꞌremhã.
11 Tawamhã Canaꞌã ãma ꞌre idahâimana zaꞌra mono, daꞌahâ na idasiwaꞌõ zaꞌra na te te daꞌmadâꞌâ zaꞌra wamhã, te ãne sima nharĩ zaꞌra: “E niha ma tô ezipsiu norĩ hã siwaꞌõ pire na hã sô tiꞌruꞌru.” Tahawa ma tô ta ro hã siwi sisi, Abéu-Misraĩ* na.
12 Ãne ma tô Zacoho ꞌra norĩ siwi ꞌmanha, imama zaꞌra uburé te te tãma ipisutu zaꞌra zéb zarina.
13 Canaꞌã u ma tô ihâiba hâ hã siwi tiꞌâ. Tahawa, ma tô aꞌubuni wi ẽtẽ na abꞌre siromo wa siwi tisẽ, Maquipela ãma Mare bâtâ pusizém niwĩ, tiꞌa Abraꞌã, hitita norĩ siré Efrõhõ wi te te iꞌuiprazéb ãma, tisiré aꞌuwẽ norĩ ꞌru da hã.
14 Tawamhã da te ãma dasiwi tiꞌai pari, ma tô Zuzé hã tisisãnawã norĩ siré, duré uburé isiré isiꞌabaꞌré norĩ siré apâ hã Ezitu u mo.
Zuzéhé wasuꞌu ꞌrãsutu zé wasuꞌu
15 Tawamhã imama tiwi siꞌré zaꞌra parimhã, ma tô Zuzéhé sisãnawã norĩ ãne sima ãma romnomri zaꞌra, tinoi hâiba na:
— Ãté Zuzé te za oto wazada tinhitiꞌru zaꞌra. Ãté te za duré siꞌruiwaꞌâ, iwasédé wa te tãma iꞌmanharĩ zaꞌra waꞌrãmimhã.
16 Tahawa Zuzéhé ma, ma tô romreme hã ãne tãma me zaꞌra:
— Aimama dâꞌâ wana ré,
17 ma tô wawi waptẽrẽ zaꞌra, ãne wa te aima nharĩ zaꞌra da hã: “Asisãnawã norĩ iwasédé te te aima iꞌmanharĩ zaꞌra zém na hã, asina paꞌruiwapari zaꞌra õ di za.” Tahawa, wa ãhã na hã aiwi waptẽrẽ zaꞌra ni, wawasédé, wa te aima iꞌmanharĩ zaꞌra zé, waꞌãma ꞌmadâꞌâ zaꞌra tõ da, asina ꞌre iwapazaꞌrata zaꞌra mono õ zarina, wa norĩ hã aimama te, ꞌRe ihâimana uꞌâsi mono nhibꞌaꞌuwẽ na ꞌre wahâimana zaꞌra mono dâꞌâsina.
Tawamhã ãne na Zuzé isadawa wasuꞌu zaꞌra, te te wapari wamhã, ma tô aiwaꞌõ.
18 Taha pari, isisãnawã norĩ siꞌuihâ na oto itẽme siꞌabaꞌréi wa, isõꞌre tãma siwẽꞌẽ zaꞌra wamhã, ma tô ãne tãma nharĩ zaꞌra:
— Ãhãta wa wa norĩ asibꞌaꞌuwẽ, awaꞌawi na ãme wahâimana zaꞌra ni.
19 Tane nherẽ, ma te Zuzé ãne ãma tãma waꞌrãmi zaꞌra:
— Aipahi zaꞌra waꞌaba õ di za. E wa hã, ꞌRe ihâimana uꞌâsi mono upana ĩsisẽrẽ da bâ, te aima irobꞌmanharĩ zaꞌra waꞌaba da hã.
20 Sena na ma tô aré tô iwasété na ĩꞌãma asima irowaꞌõtõ zaꞌra waꞌwa. Tane nherẽ, ꞌRe ihâimana uꞌâsi mono, ĩzada aihâimana wasété zaꞌra waꞌaba hawimhã, ma tô iwẽ u ĩma ãma aiwi saprĩ zaꞌra waꞌwa, ãhã na daꞌahâ uptabi na te ꞌre idaꞌanhoꞌreptui mono zé ma ropibu ma.
21 Tahawa aipahi ãna ꞌre aihâimana zaꞌra waꞌaba mono. E marĩ wa. Wa hã wa za aiꞌra norĩ me hã oto te ꞌre aiꞌmadâꞌâ zaꞌra waꞌwa.
Ãne ma tô timreme wazidi wẽ na, pẽꞌẽhiri zaꞌra.
22 Tawamhã Zuzé, timama nhibꞌaꞌuwẽ norĩ me, ma tô Ezitu ãma ꞌre hâimana zaꞌra. Tawamhã Zuzéhé ãma ma tô tiwahu, 110 na.
23 Ma tô duré Efraĩhĩ nhihudu norĩ hã hâiba ré te te ꞌre aꞌmadâꞌâ. Tawamhã ma tô duré isihudu Maquihi ꞌra norĩ hã tipa te te ꞌre azazari, Manaséhé ꞌra sipodo hã.
24 Tawamhã nimahã bâtâ na te Zuzé, tisisãnawã norĩ ma sina tãma nharĩ zaꞌra ãne:
— Nimahã na romhutu na wa za tô oto dârâ. Tane nherẽ, ĩꞌuirĩ na te za tô sena na ꞌRe ihâimana uꞌâsi mono si te te ꞌre aipawaptob zaꞌra waꞌwa. Duré taha si te za ã hã tiꞌai waꞌõtõ nhoꞌõmo hawimhã apâ te te asimroi waꞌwa, Abraꞌãhã ma, Izaquihi ma, duré Zacoho ma, te te ãma iropisutu siromo u.
25 Tawamhã Zuzé, tisisãnawã norĩ wi, te te tãma iropisutu zaꞌra zéb da hã, ma tô tiwi waptẽrẽ zaꞌra ãne:
— ꞌRe ihâimana uꞌâsi mono si te za tô te te ꞌre aipawaptob zaꞌra waꞌwa. Ãne hã niwa romhâimana wamhã, te za ĩhi norĩ hã asiré asiwi iduri ꞌwa za.
26 Tawamhã Zuzé, 110 na ãma iwahub ãma ma tô oto dârâ. Tahawa, te te siwi hâiba uꞌréi parimhã, ma tô Ezitu ãma wedehâꞌre ꞌre oto siwi tisẽ.
Ĩwaꞌõtõ piꞌreba watsuꞌu mono
^ 50:11 Abéu-Misraĩ hã Ebreu norĩ mreme na “ezipsiu norĩ siwaꞌõzé” aiwa prã na ne iwapari na hã.
