Zuã 11:1-57
11 Aibâ hã te ꞌre hâimana, Lazaru na isisi, ꞌri waꞌõno hã Betãnia ꞌre, ꞌre ihâimana mono ãma, Maria norĩ Martaha me ihidiba zahuré, ꞌre isimasisi zahuré mono zéb ãma.
2 (Ihidiba Maria hã wedewaꞌu zadaze na, za te te ipara uꞌré Wanhibꞌapito hã, duré tizéré na za te te ipara uꞌõ.)
3 Tawamhã Maria norĩ Martaha me ma tô Zezusihi ma romreme hã sõmri zahuré, ãne:
— Wanhibꞌapito, ꞌre isawi pese mono hã hâzé di.
4 Tawamhã Zezusi hã rowasuꞌu te te wapari wamhã, ma tô ãne tinha:
— Tane tô. Ihâzé hã idâꞌâzéb u te te ãwisi dai õ di. Tazahã, ꞌRe ihâimana uꞌâsi mono hã tiwaihuꞌu pe te te ãma hâiꞌré da, ma tô ãma tiromhâiba, duré ꞌRe ihâimana uꞌâsi mono ꞌra ãma dawata zaꞌra da, iꞌuꞌâbâ.
5 Zezusi hã Marta ma tô te te ꞌre sawi pese, duré isisãnawã Mariaha zama duré ihitébré zahuré Lazaruhu zama.
6 Tane nherẽ, Lazaru ihâzé na te te wasuꞌu wapari wamhã, ma tô duré maparane bâtâ na aꞌâ tihâiba, tinhamrazéb ãma.
7 Taha pari, ma tô ãne tinha, isiré ꞌre inomro mono norĩ ma:
— Oto apâ wasiꞌabaꞌréi waꞌaba, Zudéa u.
8 Tane nherẽ, ma tô ta norĩ hã ãne tãma nharĩ zaꞌra:
— Rowahutuꞌwa, zahadu ãma ronomro õ di, tame aꞌuwẽ norĩ hã ẽtẽ na te te aré siwi iꞌaiwĩrĩzém na hã. E niha te ãne nherẽ, asima irobꞌmadâ, apâ wasiꞌabaꞌré da hã.
9 Tawamhã Zezusi hã ma sadaꞌâbâ zaꞌra, ãne:
— E misi bâtâ ꞌremhã rowaꞌa ré hã 12 na bâtâ pibuzé hã za siꞌutõrĩ ã bâ. Niꞌwa hã bâtâ na rowaꞌa ré morĩ wamhã, siꞌmarõwĩrĩ õ di za, tiꞌai ãma dama rowaꞌaꞌwa hã te te ꞌmadâꞌâ wa.
10 Tazahã oto, barana morĩ wamhã, te za aiꞌmorõwĩ. E marĩ wa. Rowaꞌaꞌwa hã hâimana õ wa.
11 Ãne Zezusi hã te te nharĩ parimhã, ma tô ãma uzusi, ãne:
— Wasiwaihuꞌu zaꞌra Lazaru hã ma tô nhono. Tane nherẽ, wa za itẽme mo, te utu da.
12 Tawamhã isiré ꞌre inomro mono norĩ hã ma tô tãma nharĩ zaꞌra, ãne:
— Apito, sõtõ wamhã, te za séptârâ.
13 Zezusi hã Lazaru idâꞌâ na te te nharĩ nherẽ, isiré ꞌre inomro mono norĩ hã ma tô ãma rosaꞌrata zaꞌra, tô isõtõ na te te nharĩ newa.
14 Tahawa sõꞌawi ma tô oto tãma wasuꞌu zaꞌra, ãne:
— Lazaru hã ma tô dârâ.
15 Tane nherẽ, ĩma rowẽ di, iꞌrata ĩnhamra õ zém na hã. E marĩ wa. Ãne wamhã, te za isaze zaꞌra waꞌwa. Oto itẽme wasiꞌabaꞌréi waꞌaba.
16 Tawamhã Tome, “Isiꞌubza na” isisi amo hã ma tô tisiré norĩ ma tinha, ãne:
— Oto Rowahutuꞌwa siré wasiꞌabaꞌréi waꞌaba, isu wasiꞌutõrĩ da.
Zezusi hã, apâ dahâiwaꞌutuꞌwa na isiwasuꞌuzé
17 Tawamhã Zezusi hã Betãnia u wisi wamhã, ma tô waihuꞌu, Lazaru hã siꞌutõrĩ wa, da te ãma itiꞌa na hã, maparane siꞌuiwa na bâdâ oto ãma inem na hã.
18 Betãnia u hã Zeruzalẽ hawimhã, niwamhã siꞌubdatõ na tiꞌai pibuzé hã*.
19 Tawamhã Marta norĩ Mariaha me, Zudeu norĩ hã te te siwi pẽꞌẽtété da, ma tô ahâ na itẽme aiꞌabaꞌré.
20 Tawamhã Marta hã, Zezusi itẽme imorĩ na te te waihuꞌu wamhã, ma tô sina uzusi. Tane nherẽ, Maria hã ma tô isaꞌu nhamra, ꞌri ꞌre.
21 Tahawa, Marta hã ma tô Zezusihi ma tinha, ãne:
— Wanhibꞌapito, ãme asãmra ꞌwaꞌâhã, ĩhitébré hã aré dâꞌâ õ di.
22 Tane nherẽ, ĩma waihuꞌu pese di, dâꞌâ nherẽ, a hã ꞌRe ihâimana uꞌâsi mono wi, uburé tiha hã ꞌre awaptẽrẽ mono wamhã, za te te aima ꞌre iꞌanhomri mono na hã.
23 Tawamhã Zezusi hã ma tô ãne tãma tinha:
— Tane tô. Aihitébré hã apâ te za hâiwaꞌudu.
24 Tawamhã Marta hã ma duré sadaꞌâ, ãne:
— Tane tô. Ĩma waihuꞌu pese di, za ihâiwaꞌutu na hã, ꞌRe ihâimana uꞌâsi mono te te idaꞌahâiwaꞌutuzéb ãma hã, robꞌrãsutu ãma.
25 Tawamhã Zezusi hã ma tô tãma siwasuꞌu, ãne:
— Wa hã dahâiwaꞌutuꞌwa, duré dahâimanazém nhomriꞌwa. Niꞌwa hã te te ĩzazei wamhã, dâꞌâ nherẽ, te za apâ ꞌre hâimana uꞌâsi, dâꞌâ ãna.
26 Duré niꞌwa hã ĩꞌãma ꞌre ihâimana mono hã duré ĩzazeiꞌwa hã, dâꞌâ uꞌâsi ꞌre ihâimana mono da hã, mare di. E ãne na ma ĩzaze.
27 Tawamhã Marta hã ma sadaꞌâ, ãne:
— Ĩhe, Wanhibꞌapito. Wa tô asaze, a hã Danhoꞌreptuiꞌwa na, ꞌRe ihâimana uꞌâsi mono ꞌra, tiꞌai u we iꞌaimorĩ da hã.
Zezusi hã isiwaꞌõzé
28 Tawamhã Marta hã ãne na te te tãma nharĩ parimhã, ma tô mo ꞌri u. Mariaha zô ma tô hâ. Hâiba pisutu te ãne tãma rowasuꞌu:
— Rowahutuꞌwa hã ma tô wei wi. Te we asô hâ.
29 Tawamhã Maria hã isisãnawã te te tãma irowasuꞌuzé te te wapari wamhã, siꞌabaꞌré na ma tô wahudu, Zezusi hã te te sina uzusi da.
30 Tane nherẽ, Zezusi hã zahadu sébré õ di, ꞌri waꞌõtõ u hã. Zahadu te tihâimana uꞌâsi, Marta te te isõpẽtẽzéb ãma.
31 Tawamhã Zudeu norĩ hã te te siwi pẽꞌẽtété da iꞌrata isiꞌubumro norĩ hã, Maria siꞌabaꞌré na iwatobro na te te siwi ꞌmadâꞌâ wamhã, ma tô isarina wairé, tihitébré ꞌru u imorĩ na te te ãma rosaꞌrata zaꞌra wa, siwaꞌõ da.
32 Tawamhã Maria hã Zezusi ihâimanazéb u wisi wamhã, te te ꞌmadâꞌâ wi, ma tô hiꞌrãtitõ ipapara aime. Ãne te tãma tinha:
— Wanhibꞌapito, ãme asãmra ꞌwaꞌâhã, ĩhitébré hã aré dâꞌâ õ di.
33 Tawamhã Zezusi hã Maria isiwaꞌõ na te te ꞌmadâꞌâ wamhã, duré Zudeu norĩ isarina isiꞌabaꞌré norĩ zama te te ꞌmadâꞌâ zaꞌra wa, ma tô tiwi tirobzeiꞌõ pese. Ma tô duré tipẽꞌẽzé pese.
34 Tahawa, ma tô ãne sadanharĩ zaꞌra:
— E mame ma tô asiwi isẽrẽ ꞌwa.
Ma siwi sadaꞌâ, ãne:
— Apito, pé wasiré aimorĩ, sabu da.
35 Tahawa Zezusi hã ma tô aiwaꞌõ.
36 Tawamhã te ãne dasima nharĩ zaꞌra ni:
— Maꞌãpé ꞌmadâꞌâ zaꞌra waꞌaba. Te te ꞌre sawi pese uptabi mono wa, te aiwaꞌõ.
37 Tane nherẽ, niꞌwam norĩ hã ma tô ãne nharĩ zaꞌra:
— Aibâ itobꞌa hã ma tô to pese. E niha bâ bété, te te ꞌmanharĩ waihuꞌu õ di, Lazaru hã dâꞌâ tõ da hã.
Zezusi hã, Lazaru te te ihâiwaꞌutuzé
38 Tawamhã Zezusihi wa, ma tô ipẽꞌẽzé uptabi hã apâ iwab ãzé. Tahawa ma tô mo, abꞌre u. Abꞌre siro hã ẽtẽ tõmo wawẽ na isito, dazasizéb ãma hã.
39 Tawamhã Zezusi hã ma tô tiꞌru, abꞌre nhitobzé hã da te dasiwi saꞌré da, ãne:
— Ẽne hã asiwi saꞌréi waꞌaba!
Tahawa, Marta hã ma tô Zezusihi ma tinha, ãne:
— Wanhibꞌapito, ꞌroi uptabi di oto. Maparane siꞌuiwa na ma tô bâdâ hã ãma ne, da te dasiwi isẽrẽzém na hã!
40 Tane nherẽ, Zezusi hã ma tô tãma tinha, ãne:
— Oro te aima nharĩ za, sazei wamhã, ꞌRe ihâimana uꞌâsi mono waihuꞌu pese uptabi na, marĩ te te ꞌre iꞌabꞌmanharĩ mono zé, za iꞌmadâꞌâ na hã.
41 Tawamhã ẽne abꞌre nhitobzé hã ma tô oto dasiwi saꞌré ni. Taha pari, Zezusi hã ma tô hâimo robꞌmadâ. Ãne ma tô mre:
— Ĩmama, wa aiꞌãma ĩwata, ĩwaparizém na hã.
42 Ĩma aiwaihuꞌu pese di, ꞌre ĩwapari uꞌâsi mono na hã. Tane nherẽ, ãne hã wa tô tinha, ãme idahâimana zaꞌra norĩ uꞌâbâ, we ĩzatõrĩ na te te ĩzaze zaꞌra da.
43 Ãne mreme parimhã, Zezusi hã ma tô mreme ꞌrãihâ na hâ, ãne:
— Lazaru, rob u we aiwatobro.
44 Tawamhã idâ hã rob u ma tô watobro. Para ubu ré duré sibꞌrata ubu ré, zazahâ hâiwa ré na ãma iwapre na. Duré iꞌubu zama ãma iꞌubu wapre ré. Tawamhã Zezusi hã ma tô tiꞌru, ãne:
— Iꞌubuzé hã tãma wasihui waꞌaba, morĩ da.
Zezusi hã da te wĩrĩ da, dama ipire norĩ te te sima ãma irowaꞌõtõ zaꞌra zé
45 Tawamhã Zudeu norĩ hã Mariaha u isiꞌabaꞌré hã, Zezusi te te iꞌmanharĩzé hã te te ꞌmadâꞌâ zaꞌra wamhã, ma tô ahâ na saze zaꞌra.
46 Tane nherẽ, niꞌwam norĩ hã ma tô apâ aiꞌabaꞌré, farizeu norĩ ma, te te rowasuꞌu zaꞌra da, Zezusi te te iꞌmanharĩzém na hã.
47 Tahawa farizeu norĩ hã duré sasedoti ipire norĩ me, ma tô siꞌrãꞌõtõ, Zudeu norĩ ma rotiꞌwa norĩ siré. Ãne ma tô sima nharĩ zaꞌra:
— E marĩ, wa za wasiwi ꞌmanharĩ ni. Ã hã aibâ hã, ahâ na te te ꞌre abꞌmanharĩ, marĩ dama iꞌmanharĩ waihuꞌuꞌõ hã.
48 Ãne hã marĩ te te ꞌre abꞌmanharĩ uꞌâsi mono tõ da, marĩ, wa te wasiwi ꞌmanharĩ õ wamhã, uburé te za saze zaꞌra ni. Tawamhã romanu na dawamri norĩ hã te za wei wazô aiꞌabaꞌré, ꞌRe ihâimana uꞌâsi mono nhorõwa ꞌri ꞌrãihâ hã te te wawi prub zaꞌra da, duré wanhiptiꞌa nhoꞌu hã te te siwi wamnarĩ da zama.
49 Tawamhã Caifasi na isisi hã taha wahub ꞌremhã, sasedoti tisiré norĩ nhipai u ipire uptabi na te tihâiba. Ta hã ma tô tãma nharĩ zaꞌra, ãne:
— E niha aima irosaꞌrese zaꞌra waꞌaba õ!
50 E waihuꞌu zaꞌra waꞌaba õ di, iwẽ hã tô aibâ misire idâꞌâ da hã, aꞌuwẽ norĩ nhibrobꞌre, uburé pese da te waꞌuprosi tõ da.
51 Caifas hã ãne te te nharĩ wamhã, sihawim na te te nharĩ õ di. Taha wahub ꞌremhã sasedoti ipire uptabi na ꞌre hâimana mono wa, ma tô romhâ ré waihuꞌu siro, Zezusi hã za idâꞌâ na, uburé Zudeu norĩ zada.
52 Zudeu norĩ zada si õ di. Tazahã, ꞌRe ihâimana uꞌâsi mono ꞌra, uburé ropâ tiꞌai ãma ꞌre ihâimana zaꞌra mono norĩ zada zama, misi haré iwamri na ꞌre hâimana zaꞌra mono da.
53 Tawamhã taha bâtâ hawim haré, ma tô sima rowairébé zaꞌra, Zezusi hã te te siwi wĩrĩ da.
54 Tahawa, sõꞌawi ꞌre morĩ õ di oto, Zudéa ãma hã. Rop si ꞌre irosaꞌwari mono u, ma tô mo, Efraĩ na ꞌri waꞌõtõ nhisi u. Tame ma tô nhamra, isiré ꞌre inomro mono norĩ ré.
55 Tawamhã Zudeu norĩ te, Pascoa na dato nhisi ihâimanazéb da hã oto roꞌrutu wa, daꞌahâ na ma tô aiꞌabaꞌré ni Zeruzalẽ u hã, dato hâimana wana ré, ꞌRe ihâimana uꞌâsi mono ma, dasihâiba pese zaꞌra da hã.
56 Tawamhã Zezusihi zô ma tô tarĩtĩ zaꞌra ni, ꞌRe ihâimana uꞌâsi mono nhorõwa ꞌri ꞌrãihâ ãma hã. Ãne te nasi tasisadanharĩ zaꞌra ni:
— E niha te ãma irosaꞌrata zaꞌra waꞌwa. E te za tô wei wi, datoi u hã.
57 Sasedoti ipire norĩ hã duré farizeu norĩ me, ma tô roti zahi hã siwi tihi, niꞌwa hã Zezusi te te ꞌmadâꞌâ wamhã, te te tãma wasuꞌu zaꞌra da, te te siwi âri da.
Ĩwaꞌõtõ piꞌreba watsuꞌu mono
^ 11:18 Tiꞌai pibuzé hã “quilômetro” te wasuꞌu.
