Provébiu 22:1-29
22 Danhisi wasuꞌu wẽ hã wẽ uptabi di, danhimarĩ pese na ꞌre idahâimana zaꞌra mono zém nhipai u. Ẽtẽ waipo prã prata nhipai u, duré ẽtẽ waipo pré oru nhipai u we uptabi di, da te ꞌre idawazé wẽ zaꞌra mono zé hã.
2 Isimarĩ pe, duré isimarĩꞌõ hã aiwab zahuré. E marĩ wa. Uburé Danhibꞌapito siꞌuiwa na aiwa te te daꞌapoto wa.
3 Isimizaꞌrese wẽ, marĩ isimimnha te te ꞌmadâꞌâ wamhã, te za tãma aiꞌré, romhâ na ré. Tanei õ di, isimizaꞌreseꞌõ hã. Ta hã te za õne haré itẽme mo. Tahawa, te za robzépada hã sisô waze.
4 Niꞌwa, Uburé Danhibꞌapito te te ꞌre wazé mono wamhã, duré wapu na dama ꞌre siꞌmadâꞌâ mono wamhã, te za tinhimarĩ hã te te sima ꞌre azani. Taha zarina te za duré da te dasiwi ꞌre wazé pese. Te za duré ꞌre hâimana hâ, ta hã.
5 Iwasété norĩ nhibâdâdi na te ꞌwabzéré hã sô ꞌre hâimana zaꞌra, duré abazei mramizé hã. Niꞌwa hã ihâimanazé tãma sawi wamhã, te za tãma ꞌre hâiba zaꞌo.
6 Aiꞌuté hâimana prédum na ꞌre ihâimana mono zéb da hã, tãma ꞌre roti pese mono. Tawamhã tãma simirẽme ãna te za ãma ꞌre mo, tihâimanazéb ꞌrãsutu u.
7 Isibro pese norĩ hã isimarĩꞌõ norĩ ma, siptete uptabi di. Duré niꞌwa taré ropisutu na robꞌuiprazé te te dawi iꞌmaiꞌâri hã, te za te te tiwi iꞌâri zapari, wapu na ꞌre hâimana.
8 Niꞌwa hã marĩ iwasété na te te dama irobꞌre zarina, te za ropipazéb si te te sima ꞌre atehâri. Tawamhã marĩ iwasédé hã te za sô aipiꞌra.
9 Niꞌwa sõprum na ꞌre hâimana mono wamhã, te za iwẽ si tãma ipisudu hã ꞌre hâimana. E marĩ wa. Tisa hã isimarĩꞌõ norĩ ma, te te ꞌre aꞌa mono wa.
10 Daꞌãma iwaꞌẽ ze, õne haré satõrĩ wamhã, te za damreme na dasiꞌahâri hã aiꞌutõ, duré dasisada dazahi zarina da te dasiꞌãma ꞌre iwasété zaꞌra mono zé hã.
11 Niꞌwa iꞌuwaibaba na si sena na dahâimanazé te te sima ꞌre sawi pese mono wamhã, duré isimizawi pese zarina ꞌre mreme wẽ uꞌâsi mono wamhã, te za apito siwaihuꞌu na ꞌre hâimana.
12 Uburé Danhibꞌapito tõmobre, te rowaihu iwẽ hã ꞌre hâimana. Tane nherẽ, te senaiꞌõ na ꞌre ihâimana zaꞌra mono norĩ nhimirowaꞌõno hã te te tiwi ꞌre awaꞌrutu.
13 Iwaꞌa hã te za tinha ãne: “ꞌRipara hawi rob u ĩwatobro wamhã, huꞌu zérépa te za ĩꞌâ.”
14 Piꞌõi wasété nhimirobzanhamrizé hã, abꞌre iꞌrehâ uptabi ne hã te ꞌre hâimana. Taha ꞌre, te niꞌwam norĩ da, Uburé Danhibꞌapito, sada ꞌre isitiꞌru zaꞌra mono hã ꞌre rereꞌe.
15 Aiꞌuté norĩ iharé na te tô simizaꞌrese ãna marĩ hã te te ꞌre ꞌmanharĩ zaꞌra. Tane nherẽ, iꞌahâri zarina te za tinhimizaꞌrese wẽ zé hã te te ꞌre waihuꞌu zaꞌra.
16 Niꞌwa, isimarĩꞌõ norĩ te te ꞌre iwati pese zaꞌra mono zarina, ꞌre sisimarĩ pese mono wamhã, niha wamhã, isibro pese norĩ ma, taré ro te te tãma ꞌre sõmri zaꞌra mono wamhã, te za ꞌre sisimarĩ õ pese zaꞌra.
30 na daꞌrã nhimizaꞌre ihâimana wasuꞌu
17 Ĩwapari pese, rowaihu iwẽ norĩ te te inharĩ zaꞌra zém na hã. Maꞌãpé isimirowasuꞌu zaꞌra na ãma ꞌre romnhoré mono.
18 ꞌRe iꞌawaihuꞌu mono na, ãma ꞌre asipoꞌre puꞌu uꞌâsi mono wamhã, aima ꞌre rowẽ uptabi mono di za.
19 Uburé Danhibꞌapito asina ꞌre umnhasi mono da, wa za ãma aima rowasuꞌu, ãhã na hã.
20 30 na ãma ꞌre idahâimana wẽ zaꞌra mono zéb da hã, ãma ꞌre idasipoꞌrepuꞌu zaꞌra mono zém na wa tô aima robꞌuiꞌéré. Ta norĩ hã rowaihu iwẽ hã duré roti iwẽ hã te wasuꞌu zaꞌra,
21 te te ꞌre iꞌaipawaptob zaꞌra mono zéb zarina sena rotizé iꞌuwaibaba na ꞌre awaihuꞌu mono da. Ãne wa, marĩ na da te ꞌre asadanharĩ zaꞌra mono wamhã, te za iꞌuwaibaba na ꞌre idaꞌazadaꞌâbâ mo ãma hã.
22 Isimarĩꞌõ norĩ wi, simapa waihuꞌu õ wẽ te, tiwi ꞌre arĩ mono tõ, isimarĩ hã. Duré daꞌãma rowairébézéb ãma, isipawapto waihuꞌu õ norĩ ma hã tãma ꞌre arobꞌmanharĩ mono tõ.
23 E marĩ wa. Uburé Danhibꞌapito iꞌwawib zaꞌra isimapaꞌwa na ꞌre hâimana mono wa za. Ta hã te za isimarĩꞌõ norĩ ma, te te tãma ꞌre irobꞌmanharĩ zaꞌra mono norĩ ma hã te te ꞌre arobꞌmanharĩ wasété.
24 Ihâimana waꞌro suꞌu siré hã ꞌre aihâimana mono tõ.
25 E marĩ wa. A hã ꞌre ihâimana wasété mono zé isizusi na ãma romhõsi wamhã, tiwi aiwatobro dai õ wa.
26 Marĩ waꞌâbâ na niꞌwa hâiba waptoꞌwa na ꞌre aihâimana mono da hã asima wẽ õ di za.
27 E marĩ wa. Daꞌupana marĩ waꞌâbâ waihuꞌu õ wamhã, te za asimiwaptâ zama dasiwi âri ni, asimarĩ zu hã.
28 Aihiꞌrata norĩ tiꞌa nhizârizém na ẽne te te siwi isaꞌra mono hã apraba tõ, aima robꞌre wairob da hã.
29 E aima waihuꞌu pese di, niꞌwa sipese na te te ꞌre iromhuri wẽ mono na hã. Ta hã tô danhipai u simiromhuri wẽ uptabi di. Tahawa tô ibâre te aré apito norĩ siré si ꞌre hâimana.
