Atus 18:1-28
18 Taha parimhã Paulu ma tô mo Atena hawi, Corĩtu na ꞌri nhoꞌõmo nhisi u.
2 Tamemhã ma tô sõpẽtẽ Zudeu, Aquila na isisi hã Põtu na tiꞌa nhisi ãma ipotozé hã. Ãma ronomro pese õ ré, Italia hawi isimasisizém na hã, timro Prisilaha me. Roma ꞌre danhibꞌapito Claudiu hã, uburé Zudeu norĩ hã Roma hawi wairébé da, te te robꞌrui wa, ma tô ta hawi tipusi zahuré. Ta norĩ te te sabu zahuré da, ma tô Paulu hã itẽme timorĩ zahuré.
3 Tawamhã tame ma tô iꞌrata tinhamra zahuré, isimiromhuri zaꞌra hã aiwa wa, Pauluhu nhimiromhuri hã romhâ ꞌmanharĩ na ꞌriꞌwai wa, tane duré isimiromhuri zahuré wa.
4 Tawamhã sabadu sidâpâ, ma tô nasi dama rowahutu, Zudeu norĩ te rowahutuzéb ãma, te te dapizari zaꞌra da, Zezusi hã da te saze zaꞌra da, Zudeu norĩ hã duré gregu norĩ hã.
5 Tawamhã Silas norĩ Timotiuhu me Masédonia hawi simasisi zahuré parimhã, Paulu hã ma tô Zezusihi wasuꞌu na si oto romhu. Zudeu norĩ ma, te oto nasi rowasuꞌu, Zezusi hã Danhoꞌreptuiꞌwa na hã.
6 Tane nherẽ, niꞌwam norĩ Zudeu norĩ hã ma tô Pauluhu zada aimasa. Ma tô duré siwi ãma wasété. Tawamhã Pauluhu ma, te te irowẽ õ zarina, ma tô tiꞌuza zapru hã tataꞌa. Tahawa ma tô ãne tinha:
— Asisimini zaꞌra waꞌaba wamhã, ate zaꞌra waꞌwa za iꞌupa. Wa hãi õ di za, te iꞌupa hã. Ã hawim haré zudeuꞌõ norĩ ma si, wa za oto te ꞌre rowasuꞌu.
7 Tawamhã Paulu hã rowahutuzém hawi, ma tô watobro. Aibâ Tisiu Zustu na isisi nhorõwa u ma tô mo. Ta hã zudeuꞌõ. Tane nherẽ, te ꞌRe ihâimana uꞌâsi mono ãma ꞌre wata. Rowahutuzéb zababa, te isõrõwa hã ꞌre sa.
8 Tawamhã Crispu rowahutuzéb ãma ꞌre idaꞌanhimiꞌrui mono ꞌwa hã ma tô saze, Wanhibꞌapito hã. Duré uburé isõrõwa ãma isiré ꞌre isiꞌubumroi mono norĩ zama ma tô saze zaꞌra. Corĩtu hawi ꞌre idasiꞌubumroi mono norĩ zama ma tô daꞌahâ na rowasuꞌu hã wapari zaꞌra ni. Ma tô duré saze zaꞌra ni. Tahawa, ma tô â dawabzuri hã ꞌmanharĩ zaꞌra ni.
9 Tawamhã nimahã mara na hã Wanhibꞌapito ma tô Pauluhu ma tinha, sõtõ ꞌrowim ne, ãne:
— Aipahi tõ. Ãma uzusi mono, dama rowasuꞌu na hã. Duré sazâri tõ.
10 E marĩ wa. Wa hã wa asiré ĩhâiba. Niꞌwa hã marĩ te te aiꞌãma ꞌmanharĩ wasété õ di za. Duré te te aiꞌuꞌa waihuꞌu õ di za. E marĩ wa. Ã hã ꞌri waꞌõtõ ꞌremhã, ĩnhibꞌaꞌuwẽ hã ahâ wa.
11 Tahawa, Paulu hã ma tô tame aꞌâ nhamra, misi wahub ꞌre duré wahu aiwa ãma isipoꞌo u. ꞌRe ihâimana uꞌâsi mono zadawa wasuꞌu na ma tô nasi dama rowahutu.
12 Tawamhã Galiu hã Acaia na danhiptiꞌa nhoꞌõmo nhisi ãma siꞌapito wamhã, Zudeu norĩ hã ma tô simisutu Pauluhu da tihâimana zaꞌra. Ma tô siwi tiꞌâ. Ma tô duré siwi saprõ, daꞌãma rowairébézéb u.
13 Ãne ma tô siwi wasuꞌu, Galiuhu ma:
— Ã hã aibâ hã te sima wẽ, te te daꞌapizari da, ꞌRe ihâimana uꞌâsi mono ãma si ꞌre dawata zaꞌra mono da, wate roti zahi upana.
14 Tawamhã Paulu hã te te aré oto timreme iwazerezéb ãma hã, Galiu ma tô Zudeu norĩ ma tinha:
— Zudeu norĩ, marĩ ipire te te iꞌmanharĩ wasété zém na asiwi wasuꞌu aba ꞌwaꞌâhã, ibâre wa aré ĩnhimiꞌẽ na aiwapari zaꞌra waꞌwa.
15 Tazahã, imreme na si duré danhisi na si duré ate zaꞌra waꞌwa roti zahi na si wamhã, ꞌrâwi asiwi wairébé aba. Wa hã ĩhâimana õ di za rowairébéꞌwa na, ã hã romreme da hã.
16 Taha pari ma tô te te sate, daꞌãma rowairébézém hawi.
17 Tawamhã ma tô siwi tiꞌâ Sosteni hã rowahutuzéb ãma ꞌre idaꞌanhimiꞌrui mono ꞌwa hã. Ma tô te te siwi ꞌre préꞌé, daꞌãma rowairébézém nhoꞌre. Tane nherẽ, Galiu hã te te ãma rosaꞌrata õ di.
Paulu hã Ãtioquia u apâ imorĩzé
18 Tawamhã Paulu hã ma tô aꞌâ nhamra niha bâtâ na, Corĩtu ãma hã. Taha pari isazeiꞌwa norĩ hã ma tô sisaꞌu sawi zaꞌra. Taha pari ubaꞌre hã ma tô tiꞌâ, Siria na danhiptiꞌa nhoꞌõmo nhisi u. Prisila norĩ Aquilaha me, ma tô isiré tineb zahuré. Morĩ wana ré, ma tô siꞌrãpa Sẽcréia ãma, ꞌRe ihâimana uꞌâsi mono ma ropisudu te te iꞌmanharĩzéb zarina.
19 Tawamhã Éfézu na ꞌri nhoꞌõmo nhisi u ma tô aihutu. Tame Prisila norĩ Aquilaha me ma tô aimasisi. Tawamhã Paulu ma tô ãzé Zudeu norĩ te rowahutuzéb u. Tame Zudeu norĩ ma, ma tô rowahutu.
20 Tawamhã ma tô ãma siwi ropti, aꞌâ iꞌrata sãmra zaꞌra da, bâtâ ahâ na hã. Tane nherẽ, Paulu hã te te sima wẽ õ di.
21 Tawamhã morĩ wamhã oto, te ãne tãma nharĩ zaꞌra:
— Apâ wa za wei mo za, ꞌRe ihâimana uꞌâsi mono te te sima wẽ wamhã.
Tawamhã rowaꞌuꞌu na ubaꞌrenem na ma tô oto mo, Éfézu hawimhã.
22 Cézaréia u wisi parimhã, Zeruzalẽ u ma tô oto mo. Tame ma tô isazeiꞌwa norĩ hã sabu zaꞌra. Taha pari ma tô oto mo Ãtioquia u, Siria ꞌremhã.
23 Tawamhã niha bâtâ na Ãtioquia ãma sãmra parimhã, Paulu hã ma tô mo, uburé Galasia na tiꞌa nhisi waꞌwaibaba duré uburé Frizia na tiꞌa nhisi waꞌwaibaba. Isazeiꞌwa norĩ hã ma tô te te anhiptete.
Apolu hã Éfézu ãma te te iromhurizé
24 Taha ré, Zudeu Apolu na isisi hã ma tô wi Éfézu u, Alesãdria na ꞌri nhoꞌõmo nhisi ãma ipodo hã. Ta hã mreme wapari ze ti. Duré ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã tãma waihuꞌu pese di.
25 Wanhibꞌapito ꞌre imorĩ wẽ zém na ma tô da te tãma ꞌre romnhoré zaꞌra. Tahawa, mreme nhiptete na ma tô iꞌuwaibaba na si te te dama ꞌre rowahutu, Zezusihi wasuꞌu na hã. Tane nherẽ, Zuwã, â dawabzuri te te dama ꞌre iꞌaꞌmanharĩ mono zé wasuꞌu si tãma waihuꞌu pese di.
26 Tawamhã pahi ãna ma tô rowahutu na dama sãnaꞌrata, rowahutuzéb ãma hã. Tahawa Prisila norĩ Aquilaha me isimirowasuꞌu te te wapari zahuré wamhã, tinhorõwa u ma tô saprõni zahuré. Tame ma tô ãma tãma rowasuꞌu pese zahuré, ꞌRe ihâimana uꞌâsi mono te bâdâdi na hã.
27 Apolu hã Acaia u morĩ da, te te sima rowairébé wamhã, Éfézu ꞌre isazeiꞌwa norĩ hã ma tô siwi pawapto, siptete sina tô morĩ da. Tahawa ma tô siwi robꞌuiꞌéré Acaia ãma isazeiꞌwa norĩ ma, te te siwi âri wẽ da. Wisi wamhã, ma tô ãma aime zaꞌẽtẽ zaꞌra, ꞌRe ihâimana uꞌâsi mono nhimipawaptobzé iwaꞌâbâꞌõ zarina te te ꞌre isaze zaꞌra norĩ ãma hã.
28 Tawamhã Apolu hã timreme nhiptete na, ma tô Zudeu norĩ ãma nasi aiꞌuté zaꞌra, danhoꞌa te te nasi azadaꞌâbâ wamhã. ꞌRe ihâimana uꞌâsi mono mreme na Ibaihâ iwazé pese na robꞌuiꞌéré zarina, ma tô nasi tinhimirowasuꞌu na tãma hâiꞌré zaꞌra, Zezusi hã sena na Danhoꞌreptuiꞌwa na hã.
