Marcus 10:1-52
10 Tawamhã Zezusi hã ta hawi te oto mo, Zudéa na tiꞌa nhisi u, Zodã pa zara u. Tame ma tô duré daꞌahâ uptabi na itẽme tasiꞌrãꞌõtõ ni, imana wawi. Te te ꞌre iꞌmanharĩ uꞌâsi mono zéb zarina, ma tô duré dama rowahutu.
2 Tawamhã nima norĩ farizeu norĩ hã ma tô itẽme sina rotété zaꞌra, te te siwi pibu da. Ãne te siwi sadanha:
— E iꞌru zahi, aibâ hã timro te te irẽme da hã.
3 Tawamhã Zezusi hã te asa sadanharĩ zaꞌra, ãne:
— E niha ma tô Mozési hã aima ꞌru zaꞌra waꞌwa.
4 Tawamhã ãne ma ãma sadaꞌâbâ zaꞌra:
— Mozési hã ma tô tiꞌru, aibâ timro te te rẽme da wamhã, robꞌuiꞌéré te te ꞌmanharĩ da aꞌâ, timro za te te irẽmezém na hã, taha parip si te te tãma robꞌru da.
5 Tawamhã Zezusi hã te tãma nharĩ zaꞌra, ãne:
— Mozési hã, tane hã ma tô aima roti zaꞌra waꞌwa, aipẽꞌẽ tete zaꞌra waꞌaba wa.
6 Tane nherẽ, ꞌRe ihâimana uꞌâsi mono te te iꞌaropoto naꞌrata zéb ãma, ma tô poto, aibâ duré piꞌõ hã.
7 Tahawa, aibâ, timama duré tina hã te za rẽme zahuré, timro me, siꞌãma hâiba sitob zahuré da.
8 Tawamhã maparane ihâiba nherẽ, te za misi ihâiba na oto ꞌre hâimana zahuré. Ãne wamhã, maparane ihâiba na oto ꞌre hâimana zahuré mono õ di za. Misi oto ihâiba zahuré hã za.
9 Tahawa, iwẽ hã niꞌwa ãma isiwanhizari zahuré õ da si, ꞌRe ihâimana uꞌâsi mono, ãma isitobzé hã.
10 Tawamhã ꞌri u apâ sihutu wamhã, Zezusi hã, isiré ꞌre inomro mono norĩ hã ma tô siwi sadanha, te te irowasuꞌuzém na hã.
11 Tawamhã Zezusi hã ma tô tãma waihuꞌu zaꞌra, ãne:
— Aibâ hã timro te te rẽme wamhã, piꞌõ aimawi na mro wamhã, timro zada te za tô tiwasédé hã ꞌmanha.
12 Duré tane piꞌõ hã timro te te rẽme wamhã, aibâ aimawi na mro wamhã, tiwasédé te za ꞌmanha.
Zezusi hã, aiꞌuté norĩ te te iꞌazawizé
13 Taha pari, Zezusihi u ma tô niꞌwam norĩ hã tiꞌra hã ãwisi zaꞌra, ãma mreme zaꞌra da, ꞌRe ihâimana uꞌâsi mono iwẽ hã te te tãma apisutu da. Tane nherẽ, isiré ꞌre inomro mono norĩ hã ma tô timreme hã tãma pẽtẽ zaꞌra.
14 Tawamhã Zezusi hã te te ꞌmadâꞌâ zaꞌra wamhã, te te tãma rowẽ õ di. Tahawa, te ãne tãma nharĩ zaꞌra:
— Aꞌâ we ĩtẽme siꞌabaꞌré, aiꞌuté norĩ hã. Tiwi rosawi zaꞌra waꞌaba tõ, ãne hã te te ꞌmanharĩ zaꞌra tõ da hã. E marĩ wa. ꞌRe ihâimana uꞌâsi mono hâiwa ãma daꞌãma ꞌre isibꞌaꞌuwẽ mono zé hã, niꞌwam norĩ hã aiꞌuté ne ꞌre ihâimana zaꞌra mono norĩ te si.
15 Tô sena, wa za aima waihuꞌu zaꞌra waꞌwa, ãne: Niꞌwa hã ꞌRe ihâimana uꞌâsi mono, daꞌãma ꞌre isibꞌaꞌuwẽ mono zéb zô, aiꞌuté ne sô tobꞌuzui õ wamhã, niwa iwa isébré da hã mare di.
16 Tawamhã Zezusi hã, aiꞌuté ma tô tipa azaza. Tinhibꞌrada ma tô ãma azaꞌra. ꞌRe ihâimana uꞌâsi mono ma, te duré ãma timreme zaꞌra, iwẽ hã te te tãma apisutu da.
Aibâ ihâiba té isibro pe
17 Tawamhã Zezusi hã morĩ da, oto watobro wamhã, aibâ hã ma tô itẽme wara. Hiꞌrãtitõ ipapara ma aime. Ãne te sadanha:
— Rowahutuꞌwa iꞌaiwẽ a hã. E marĩ wa za ꞌmanha, dahâimanazé isiꞌutõrĩꞌõ te ĩsina uwaimrami da wamhã.
18 Tawamhã Zezusi hã ma ãma sadaꞌâ, ãne:
— E marĩ da, te ĩwẽ na ĩꞌmahâ. ꞌRe ihâimana uꞌâsi mono si iwẽ uptabi hã. Niꞌwa isine hã hâimana õ di.
19 Aima waihuꞌu pese di, ꞌRe ihâimana uꞌâsi mono nhimiroti zahi hã, ãne: “Daꞌmaiwĩrĩ tõ. Damro na dawi asipsaihuri tõ. Marĩ simiꞌuri tõ. Tô senai õ nherẽ, niha na dawasuꞌu tõ. Dama robꞌrãmi tõ. Aimama ꞌre wazé pese mono, ana zama.”
20 — Rowahutuꞌwa, ĩzapore hawim haré, wa tô uburé te ꞌre aꞌmadâꞌâ pese, isimiroti zahi hã. — Ãne te Zezusihi ma siwasuꞌu.
21 Tawamhã Zezusi hã ma tô ꞌmadâ, ãma siwamri sina, aibâ ihâiba téb ãma hã. Tahawa te ãne tãma tinha:
— Marĩ zô te misi aiwi rowaptâ, iꞌmanharĩ da hã. Maꞌãpé asimarĩ hã uburé wede zaꞌra na, iwaꞌâ robꞌuiprazé isimarĩꞌõ norĩ ma, sõmri mono da. Ãne hã ꞌmanharĩ wamhã, marĩ iwẽ uptabi hã hâiwa ãma hã te za asô ꞌre hâimana. Taha parip si, we aimorĩ, ĩsiré ꞌre aimorĩ da.
22 Tawamhã ãne hã aibâ te te wapari wamhã, ma tô tiwi tirobzeiꞌõ pese. Sibro pese uptabi wa, ma tô oto mo, robzei ãna.
23 Tawamhã Zezusi hã simana wawi ma tô robꞌmadâ. Tahawa isiré ꞌre inomro mono norĩ ma, te ãne tinha:
— E niha ipire uptabi, isibro pese norĩ hã ꞌRe ihâimana uꞌâsi mono, daꞌãma ꞌre isibꞌaꞌuwẽ mono zéb u ꞌre isisisi mono da hã.
24 Tawamhã isiré ꞌre inomro mono norĩ, ãne hã te te wapari zaꞌra wamhã, ma tô tãma aꞌrãmi zaꞌra. Tane nherẽ, ma tô Zezusi hã ãma uzusi ãne:
— Ĩꞌra norĩ, e niha ipire uptabi, ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb u ꞌre idanhisisi mono zéb da hã.
25 Awaru baꞌõmore hã isiꞌuwazi zazahâ hâibabarĩzé paraꞌõtõ zapuꞌu ꞌre, isébré waihuꞌu õ nhipai u, isibro pe hã sébré waihuꞌu õ di, ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb u hã.
26 Tawamhã ãne hã imreme te te wapari zaꞌra wamhã, ma tô tãma aꞌrãmi pese zaꞌra. Tahawa te sisadanharĩ zaꞌra, ãne:
— Õne wamhã bété, e ꞌwa hã tinhoꞌreptuzé te te sina uwaimrami da bâ.
27 Tawamhã Zezusi hã te ꞌmadâꞌâ zaꞌra. Tahawa ma tô tãma waihuꞌu zaꞌra, ãne:
— Tiꞌai ãma aꞌuwẽ norĩ ma hã pire uptabi di, ã hã. Tanei õ di, ꞌRe ihâimana uꞌâsi mono ma hã wapu di. Marĩ hã ꞌRe ihâimana uꞌâsi mono ma, iꞌmanharĩ waihuꞌu õ hã ꞌmaihâimana õ di.
28 Tawamhã Pedru hã te tãma tinha, ãne:
— Wa norĩ hã uburé marĩ, wa tô rẽme zaꞌra ni, asiré ꞌre wanomro mono da.
29 Tawamhã Zezusi hã ma tãma waihuꞌu zaꞌra, ãne:
— Tô sena wa za ãne hã aima waihuꞌu zaꞌra waꞌwa. Niꞌwam norĩ hã ĩꞌuꞌâbâ duré Rowasuꞌu wẽ itéb uꞌâbâ, tinhorõwa, tisisãnawã norĩ, tihidiba norĩ, tina, timama, tiꞌra norĩ duré niwamhã tinhiptiꞌa norĩ te te ꞌre rẽme zaꞌra mono wamhã,
30 te za te te ꞌre waibu marĩ iwẽ ahâ uptabi na, ãme tiꞌai ãma ꞌre hâimana zaꞌra mono ré hã. Te za te te ꞌre waibu 100 na ãma isisiwi na tinhorõwa hã, tisisãnawã norĩ, tihidiba norĩ, tina, tiꞌra norĩ, tinhiptiꞌa norĩ zama. Duré isu hã te za te te ꞌre sépata zaꞌra, marĩ da te tãma ꞌre iꞌmanharĩ wasété zaꞌra mono zé hã. Tawamhã romhutuꞌõmhã, ta norĩ hã te za sina uwaimrami zaꞌra, dahâimanazé isiꞌutõrĩꞌõ hã.
31 Tahawa daꞌahâ na ãhã na imorĩꞌrata na idahâimana zaꞌra hã, daꞌrãsutuꞌu te za oto tahâimana zaꞌra ni za. Duré ãhã na daꞌrãsutuꞌu idahâimana zaꞌra hã, imorĩꞌrata na te za oto tahâimana zaꞌra ni za.
Zezusi hã duré isiwasuꞌuzé, tidâꞌâzém na duré za apâ tihâiwaꞌutuzém na zama
32 Tawamhã Zeruzalẽ u te bâdâdi na oto saiꞌuri zaꞌra. Zezusi hã te isõwa timorĩ zaꞌra. Isiré ꞌre inomro mono norĩ hã ma tô tãma aꞌrãmi pese zaꞌra. Duré isiré idasiꞌabaꞌré norĩ hã dapahi zaꞌra di. Tawamhã Zezusi hã isiré ꞌre inomro mono norĩ zô te hâ, isababa siꞌabaꞌré da. Tahawa ma tô duré tãma siwasuꞌu zaꞌra, za tãma iromhâimanazém na hã.
33 — Maꞌãpé ĩwapari pese zaꞌra waꞌaba. Ãhã na hã Zeruzalẽ u, wa aiꞌabaꞌré ni. Tame te za Tiꞌai ãma Dasiré Ipodo hã hâiba nhomri ni, sasedoti nhibꞌihâꞌa norĩ ma, duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ ma zama. Tawamhã ta norĩ hã te za iwasédé hã ãma siwi tihi. Taha zarina, te za dama ꞌru zaꞌra, da te wĩrĩ da. Taha pari te za siwi hâiba nho, zudeuꞌõ norĩ ma.
34 Ta norĩ hã te za ãma tiwaꞌẽ zaꞌra. Tizadaipro na te za nasi siwi upto. Te za duré te te siwi ꞌre préꞌé. Taha pari te za siwi tiwĩ. Tane nherẽ, siꞌubdatõ bâtâ ãma, te za apâ hâiwaꞌudu.
Tiagu norĩ hã Zuwãhã me, Zezusihi wi te te irowaptẽrẽ zahuré zé
35 Taha pari, Zebedeu ꞌra norĩ hã Tiagu norĩ Zuwãhã me, Zezusihi u ma tô sina rotété zahuré, ãne te te tiwi rowaptẽrẽ zahuré da:
— Rowahutuꞌwa, wa wasima wẽ ni, wa te aiwi iwaptẽrẽzé hã, ãma wama uwaimrami da za.
36 Tawamhã Zezusi hã ma ãma sadaꞌâbâ zahuré, ãne:
— E marĩ te asima iwẽ waꞌwa, te ãma aima iꞌuwaimrami aba da hã.
37 Tawamhã ma ãma sadaꞌâbâ zahuré, ãne:
— Niwa dama aipire uptabi na danhibꞌapito simasisizém na asãmra wamhã, maꞌãpé wama pisutu, niꞌwa asimire niwĩ asababa sãmra da, duré asimiꞌe niwĩ.
38 Tawamhã Zezusi hã ma tãma waihuꞌu zahuré, ãne:
— Aima waihuꞌu aba õ di, ĩwi iwaptẽrẽ aba zé hã, marĩ te te iwasuꞌu hã. E sada asiptete waꞌaba di, uva ꞌrãi waꞌu isé ihâsi waꞌaba da hã, za te ihâꞌrẽne ne hã. Duré e te za irobzépata ꞌwa, za te iꞌmanharĩ ne hã.
39 Tawamhã ma ãma sadaꞌâbâ zahuré, ãne:
— Ĩhe. Wa te hâsi waihuꞌu pese di.
Tawamhã Zezusi hã te tãma nharĩ zahuré, ãne:
— Te za tô ĩsine ihâsi waꞌwa, uva ꞌrãi waꞌu isé hã, za te ihâꞌrẽne ne hã. Te za duré robzépada hã iꞌmanharĩ ꞌwa za, te iꞌmanharĩ ne hã.
40 Tane nherẽ, ĩsiꞌuihâ na te aipisutu waihuꞌu aba õ di, dama aipire waꞌaba na ꞌre aimasisi aba mono da hã ĩnhimire niwĩ, duré ĩnhimiꞌe niwĩ. ꞌRe ihâimana uꞌâsi mono si ma tô pisutu siro, niꞌwam norĩ hã za isimasisi da hã. Taha si te za tisõ, niꞌwam norĩ ma, te te sima iwẽzéb zarina.
41 Tawamhã Zezusihi siré ꞌre inomro mono norĩ 10 na ihâiba zaꞌra, ãne hã te te wapari zaꞌra wamhã, ma tô Tiagu norĩ da Zuwãhã me, tinhitiꞌru zaꞌra.
42 Tahawa, Zezusi hã ma tô ꞌrâwi sitẽme sô tihârâ zaꞌra. Ãne ma tô tãma waihuꞌu zaꞌra:
— Aima waihuꞌu pese zaꞌra waꞌaba di. Tiꞌai ãma rotiꞌwa norĩ hã isimiroti ꞌre, te za ꞌre hâimana zaꞌra isibꞌaꞌuwẽ norĩ hã.
43 Tane nherẽ, aiꞌreb zaꞌra waꞌaba hã, ãne hã ꞌre romhâimana mono tõ. Iwaꞌrãmi te za ꞌre iꞌmanharĩ zaꞌra waꞌaba mo. Niꞌwa hã dama pire da wamhã, dama romhuriꞌwa na te za ꞌre hâimana.
44 Duré niꞌwa hã imorĩꞌrata na hâimana da wamhã, wadaꞌuri zarina titedeꞌwai ma romhuriꞌwa ne, te za dama ꞌre hâimana.
45 Tane, Tiꞌai ãma Dasiré Ipodo hã da te tãma ꞌre romhuri zaꞌra mono da, wei morĩ õ di. Te te dama ꞌre romhuri mono da, ma tô wei mo, duré tihâiba te te dazada sõmri da, daꞌahâ uptabi na te te daꞌanhoꞌreptu da.
Zezusi hã Bartimeu te te ito pesezé
46 Tawamhã Zezusi hã duré tisiré ꞌre inomro norĩ me, ma tô aihutu, Zerico na ꞌri nhoꞌõmo nhisi u. Tawamhã daꞌahâ uptabi na isiré idasiꞌabaꞌré norĩ me, Zerico hawi wairébé wamhã, ma tô Zezusi hã sõpẽtẽ, aibâ itobꞌa Bartimeu na isisi, Timeu ꞌra hã. Aibâ itobꞌa hã bâdâdi zababa te nhamra. Te nasi daꞌawa.
47 Tawamhã te te wapari wamhã, Zezusi Nazaré ãma iprédu te te iroꞌrazâri na hã, ma tô iꞌmahârâ na sãnaꞌrata, ãne:
— Zezusi, Davihi nhihudu, ĩꞌãma aipẽꞌẽzé na.
48 Tawamhã daꞌahâ na ma tô damreme hã nasi tãma ꞌmarõpãrĩ zaꞌra ni, ariꞌiwi sãmra da. Tane nherẽ, te nasi saꞌẽtẽ ꞌmahâ:
— Davihi nhihudu, maꞌãpé ĩꞌãma aipẽꞌẽzé na.
49 Tawamhã Zezusi hã ma tô mazazâ. Ãne te dama tinha:
— Sô aiꞌmaihârâ aba.
Tahawa, ma tô sô taꞌmaihârâ ni:
— Asibꞌru na. Maꞌãpé, aiwahutu. Te we asô hâ.
50 Tawamhã Batimeu hã tiꞌuza ihâpa ma tô time. Siꞌabaꞌré na ma wahudu. Zezusihi u ma tô mo.
51 Tawamhã Zezusi hã te sadanha, ãne:
— E marĩ te aima ꞌmanharĩ da, te asima iwẽ.
— Rowahutuꞌwa, apâ te ꞌre robꞌmadâꞌâ mono da, wa ĩsima wẽ. — Ãne ma sadaꞌâ.
52 Tawamhã Zezusi hã te tãma tinha, ãne:
— Aimorĩ oto. Asina ĩꞌumnhasizé hã ma aipese.
Tawamhã awaꞌawi pesere ma tô apâ robꞌmadâꞌâ wẽ. Tahawa te Zezusihi zarina mo, bâdâdi na.
