Romanu 1:1-32
1 Wa hã Paulu, Cristu Zezusihi ma romhuriꞌwa, wa ãma aima robꞌuiꞌéré zaꞌra waꞌwa, Roma ãma ꞌre aihâimana zaꞌra waꞌaba mono norĩ ma. ꞌRe ihâimana uꞌâsi mono hã ma tô ĩpisutu, isadawa wasuꞌu na te tãma ꞌre romhuri mono da, Zezusihi wasuꞌuwẽ hã te te wama ꞌre iꞌawaihuꞌu mono hã te dama ꞌre wasuꞌu uꞌâsi mono da, isadawa para.
2 ꞌRe ihâimana uꞌâsi mono hã ma tô duréihã dama ropisutu siro, iwasuꞌuwẽ na hã. Duréihã isadawa ꞌmahârâꞌwa norĩ hã ma tô ãne na ãma robꞌuiꞌéré siromo zaꞌra, Imreme na Ibaihâ iwazé pese na robꞌuiꞌéré na hã.
3 E ꞌwai wasuꞌuwẽ, ã hã. ꞌRe ihâimana uꞌâsi mono ꞌra, Wanhibꞌapito Zezu Cristuhu wasuꞌuwẽ. Ta hã Zezusi hã tiꞌai ãma dahâiba na dasine ꞌre ihâimana mono na, wama waihuꞌu pese zaꞌra di, apito Davihi nhihudu ꞌre morĩ wa.
4 Duré ꞌRe ihâimana uꞌâsi mono ꞌra na, wama waihuꞌu pese zaꞌra di, dâꞌâ uptabi nherẽ, Imama hã tiwaihuꞌu pese na te te hâiwaꞌutu wa. Duré Timama hawi we imorĩ na hã wama waihuꞌu pese zaꞌra di. Duré ꞌre imorĩ wẽ na zama, wama waihuꞌu pese zaꞌra di.
5 ꞌRe ihâimana uꞌâsi mono hã tinhoprubzéb zarina ma tô Cristuhu ma ĩpisutu siro, ĩpire na te dama ꞌre sadawa wasuꞌu mono da. Cristuhu ma, te ꞌre romhuri wẽ mono da, ma tô ĩpisutu, ĩnhimiromhurizéb zarina dapoto mono bâ, da te ꞌre sazei pese zaꞌra mono da, duré da te ꞌre sazei pese zaꞌra mono wa, isimiroti si, da te ꞌre ꞌmadâꞌâ pese zaꞌra mono da.
6 A norĩ waꞌaba ma zama, te ꞌre sadawa wasuꞌu mono da, ma tô ĩpisutu ꞌRe ihâimana uꞌâsi mono hã, wasiré Zezu Cristuhu nhibꞌaꞌuwẽ oto ꞌre anomro aba mono da, te te ꞌre iꞌaipisutu zaꞌra waꞌaba mono norĩ ma hã.
7 ꞌRe ihâimana uꞌâsi mono ma, asawi pese zaꞌra waꞌaba di. Taha si ma tô aipisutu zaꞌra waꞌwa, isibꞌaꞌuwẽ si oto ꞌre anomro aba mono da, tãma. Tahawa, wa ãhã na aima ãma robꞌuiꞌéré zaꞌra waꞌwa, Roma ãma ꞌre aihâimana zaꞌra waꞌaba mono norĩ ma.
Wamama ꞌRe ihâimana uꞌâsi mono nhimizawi pese zé hã duré ihawi rowẽ uꞌâsi zé, Wanhibꞌapito Zezu Cristuhu ma zama ꞌre ihâimana mono, aiꞌãma ꞌre ihâimana uꞌâsi zaꞌra waꞌaba mono da si.
Roma u, Paulu hã datẽme isisatõrĩzé wasuꞌu
8 Ãhã na, wa za Ĩnhibꞌapito ãma uimrehẽne ĩwata, ĩmreme na, ꞌRe ihâimana uꞌâsi mono ãma, Zezu Cristuhu nhimipawaptobzéb zarina ꞌre sazei pese zaꞌra waꞌaba mono wa, aiwasuꞌu zaꞌra waꞌwa hã daro mono bâ da te ꞌre wapari zaꞌra mono wa.
9 1:9-10 Wa hã ꞌre ĩsihâiba zawi mono ãna, wa ꞌRe ihâimana uꞌâsi mono ma, te ꞌre romhuri uꞌâsi, iꞌra wasuꞌuwẽ hã te dama ꞌre iwasuꞌu mono zém na hã. Wa aiꞌãma ꞌre ĩsipoꞌre puꞌu uꞌâsi zaꞌra waꞌwa. Wa duré aiꞌãma ꞌre ĩmreme uꞌâsi zaꞌra waꞌwa, ꞌRe ihâimana uꞌâsi mono ma. Tô sena, wa ãne na aima rowasuꞌu zaꞌra waꞌwa, ꞌRe ihâimana uꞌâsi mono ma, ãne hã tãma waihuꞌu pese uptabi wa. Taha wi si, wa nasi ĩsima rowaptẽrẽ uꞌâsi ãhã na hã, te te sima iwẽzéb uwaibaba te te ĩma ãma uwaimrami da, ãma atẽme ĩmorĩ zaꞌra waꞌaba da hã.
10 ꞌMadâꞌâ 1:9
11 Te asabu suꞌu zaꞌra waꞌaba da si, wa tô ĩsima rowẽ siꞌabaꞌré, ꞌRe ihâimana uꞌâsi mono, Tipẽꞌẽzani na rowẽ te te dama ꞌre iꞌapisutu mono zém na, te ãma aipawaptob zaꞌra waꞌaba da, asiptete sina ãma ꞌre anomro aba mono da.
12 Atẽme ãma ĩwisi zaꞌra waꞌaba wamhã, wa za aihĩni wasipawaptob zaꞌra ni, Zezusi wa te ꞌre isazei pese zaꞌra mono zém na, wanhiptete na ãma ꞌre wanomro mono da.
13 Ĩsisãnawã norĩ, ãne na aima ĩsiwasuꞌu zaꞌra waꞌaba da, wa tô ĩsima wẽ, waihuꞌu zaꞌra waꞌaba da. Wa tô te ĩsima ꞌre rosaꞌrata uꞌâsi, te asabu zaꞌra waꞌaba da. Tane nherẽ, atẽme ãma ĩmorĩ suꞌu aba da nherẽ, te marĩ hã ĩma ꞌre hâimana uꞌâsi, õne uꞌâsi. Zudeuꞌõ norĩ hã daro mono bâ ꞌre isiꞌubumroi mono hã, iwasuꞌuwẽ hã te tãma ꞌre iwasuꞌu zaꞌra mono zém na, te te ꞌre saze zaꞌra mono wa, wa tô te ꞌre awaibu, ꞌRe ihâimana uꞌâsi mono ma. Tane da, wa tô duré te ĩsima ꞌre rowẽ, airo waꞌaba ãma asiré zudeuꞌõ norĩ hã te duré tãma ꞌre awaibui mono da, tame.
14 E marĩ wa, wa tô ĩsima wẽ, ãne na te aipawaptob zaꞌra waꞌaba da. Wa hã uburé te ꞌre daꞌapawapto mono da, ꞌRe ihâimana uꞌâsi mono te te ĩpisudu. Tahawa, wa za tô te ꞌre daꞌapawaptob uꞌâsi, ꞌri nhoꞌõmo mono bâ ꞌre idahâimana zaꞌra mono norĩ hã, duré marã ꞌrowi ꞌre idahâimana zaꞌra mono norĩ hã, duré rowaihuꞌu pese ꞌwa norĩ hã, duré rowaihuꞌuꞌõꞌwa norĩ hã. Ta norĩ hã wa za uburé te ꞌre apawaptob uꞌâsi, dawaptẽrẽ mono bâ.
15 Tahawa, wa ĩsima wẽ zahi, Roma ãma ꞌre iꞌaihâimana zaꞌra waꞌaba mono norĩ ma, iwasuꞌuwẽ na tame te duré aima rowasuꞌu zaꞌra waꞌaba da.
Zezusihi wasuꞌuwẽ nhiptede
16 ꞌRe ĩnhisé mono õ di, Zezusihi wasuꞌuwẽ hã te dama ꞌre wasuꞌu tõ mono da. E marĩ wa. ꞌRe ihâimana uꞌâsi mono hã siptete uptabi wa, iwasuꞌuwẽ na te te ãma ꞌre daꞌanhoꞌreptui mono da, Zezusi te te sina ꞌre iꞌumnhasi zaꞌra mono norĩ hã. Zudeu norĩ si ma tô isãnaꞌrata hawimhã te te ꞌre sõꞌreptu zaꞌra aré. Tane nherẽ, te oto ãhã na hã zudeuꞌõ norĩ zama te te ꞌre anhoꞌreptu.
17 Zezusihi wasuꞌuwẽ na hã e marĩ, wa za wa te ãma ꞌre waihuꞌu zaꞌra. ꞌRe ihâimana uꞌâsi mono, da te ꞌre saze zaꞌra mono wapsi, dawasédé hã te te oto daꞌãma ꞌre iꞌaꞌmadâꞌâ mono õ zarina, te te ꞌre idaꞌawẽsãmri mono zé, taha wasuꞌu. Duréihã ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Niꞌwam norĩ hã, ꞌRe ihâimana uꞌâsi mono te te ꞌre saze zaꞌra mono wamhã, ta norĩ si te za te te ꞌre awẽsãmri, ꞌRe ihâimana uꞌâsi mono hã, iwasédé hã te te oto ãma ꞌre iꞌaꞌmadâꞌâ mono õ zarina, poꞌreꞌõ nherẽ, te te ꞌre hâ zaꞌra mono tõ da. Ta norĩ si te za duré rowẽ uꞌâsi, ãma ꞌre hâimana zaꞌra.”
Dapoꞌre ãna ꞌre idanomro mono na rowasuꞌu
18 ꞌRe ihâimana uꞌâsi mono hã ma tô ãne hã wama waihuꞌu siromo zaꞌra, dapoꞌreꞌõ na ꞌre idanomro mono norĩ hã za te te ꞌre idaꞌahâ zaꞌra mono zém na. Ta norĩ hã te tipẽꞌẽ na te te sima ꞌre rosaꞌrata wasété uꞌâsi zaꞌra. Hâimana wasété uptabi na, te duré dama ꞌre hâimana uꞌâsi zaꞌra. Ta norĩ hã tiwasété si te te ꞌre ꞌmanharĩ zaꞌra mono wa, te ꞌRe ihâimana uꞌâsi mono nhimiroti tô sena uptabi hã te te dawi ꞌre ꞌwaꞌrutu zaꞌra, ãne na roti iwẽ hã da te ꞌre waihuꞌu zaꞌra mono tõ da.
19 ꞌRe ihâimana uꞌâsi mono ꞌre ihâimana mono zé hã, da te ꞌre iwaihuꞌu zaꞌra mono zéb da hã, dama waihuꞌu pese di. E marĩ wa. ꞌRe ihâimana uꞌâsi mono hã dawi ꞌre siꞌudâ mono õ wa. Uburé marĩ hã te te iꞌapoto mono hã sõꞌawi da te ꞌre iꞌmadâꞌâ zaꞌra mono zéb zarina, te da te ꞌre waihuꞌu zaꞌra, ꞌre ihâimana mono zé hã. Tahawa, da te ꞌre iwaihuꞌu zaꞌra mono zéb da hã dama waihuꞌu pese nherẽ, dapoꞌre ãna ꞌre danomro mono wa, te ꞌRe ihâimana uꞌâsi mono hã te te ꞌre daꞌahâ zaꞌra.
20 Duréihã isãnaꞌrata hawimhã, ꞌRe ihâimana uꞌâsi mono, ma tô te te roꞌapoto, tiwaihuꞌu pese na. Tiwaihuꞌu pese na te te roꞌapoto mono wa, ta hawim haré te isimiwaihuꞌu pese zém na, duré tô sena ꞌre ihâimana mono na, da te ãma ꞌre waihuꞌu pese zaꞌra, ihâiba hã da te ꞌre ꞌmadâꞌâ waihuꞌu zaꞌra mono õ nherẽ. E marĩ zarina tawamhã, ꞌRe ihâimana uꞌâsi mono, ꞌre ihâimana mono na te za tô sena na da te ãma ꞌre waihuꞌu pese zaꞌra. ꞌRe ihâimana uꞌâsi mono hã uburé marĩ hã te te iꞌapoto mono hã da te ꞌre iꞌmadâꞌâ zaꞌra mono zéb zarina, te oto da te ãma ꞌre waihuꞌu zaꞌra, iwaihuꞌu pese na, duré tô sena õne uꞌâsi ꞌre ihâimana mono na. Tahawa, tô sena ꞌre hâimana mono nherẽ, da te dasiwi ꞌre udâ waihuꞌu zaꞌra mono õ di za, ꞌRe ihâimana uꞌâsi mono hã.
21 Ta hã tô sena ꞌre ihâimana mono na, da te dasiwi ꞌre waihuꞌu zaꞌra mono nherẽ, tô sena da te dasiwi ꞌre ihâimana wazé mono na, da te tãma ãma ꞌre uwaimrami zaꞌra mono õ di, ꞌRe ihâimana uꞌâsi mono ma hã. Duré sõprub uptabi nherẽ, ãma ꞌre dawata zaꞌra mono õ di. Taha upana, te marĩ na si siwaꞌru da te ꞌre rosaꞌrata wasété zaꞌra. Dapẽꞌẽ ꞌre, robra uꞌâsi ꞌre dahâimana zaꞌra mono wa, te danhimirosaꞌrata na da te ꞌre upa zaꞌra.
22 Dapoꞌreꞌõ na ꞌre idanomro mono norĩ hã uburé marĩ hã te te ꞌre waihuꞌu pese zaꞌra mono newa, te taré sina ꞌre wata zaꞌra, dama. Tane nherẽ, te ta norĩ hã simizaꞌrese ãna ꞌre nomro.
23 ꞌRe ihâimana uꞌâsi mono upana, te ta norĩ hã robꞌmanharĩ ãma si ꞌre wata zaꞌra, aꞌuwẽ na dahâiba ꞌmanharĩ ãma, duré si hâiba ne ꞌmanharĩ ãma, duré abaze hâiba ne ꞌmanharĩ ãma, duré diꞌi na ꞌre inomro mono norĩ hâiba ne ꞌmanharĩ ãma.
24 Ta norĩ hã simizaꞌreseꞌõ uptabi na ꞌre hâimana uꞌâsi zaꞌra mono wa, ma tô ꞌRe ihâimana uꞌâsi mono hã te te sima ãma ꞌre aroti, ãne: “Ta norĩ hã poꞌre zaꞌra õ wa, wa za oto rẽme zaꞌra. Te tãma ꞌre roti zaꞌra mono õ di za oto. Siꞌuihâ na te za oto ꞌre hâimana zaꞌra.” Ãne ma tô ꞌRe ihâimana uꞌâsi mono hã te te sima ãma ꞌre aroti, ta norĩ ãma hã. Tahawa, te oto marĩ iwasété si te te sima ꞌre iwẽ uꞌâsi zaꞌra mono zéb zarina, te te ꞌre ꞌmanharĩ uꞌâsi zaꞌra, ta norĩ hã. Tihâiba na zama te duré ꞌre siwasété uptabi zaꞌra oto, siꞌuihâ na.
25 ꞌRe ihâimana uꞌâsi mono nhimiroti hã tô sena nherẽ, te imreme upana aimawi si te te ꞌre wapari zaꞌra, tô senaiꞌõ hã. Ropotoꞌwai upana, te isimipoto ãma si ꞌre wata zaꞌra, ta norĩ hã.
ꞌRe ihâimana uꞌâsi mono ãma si, ꞌre dawata uꞌâsi zaꞌra mono za, õhõ si, tô sena wa.
26 Tawamhã dapoꞌreꞌõ na ꞌre idanomro mono norĩ hã, Ropotoꞌwa nhimipoto ãma si ꞌre dawata zaꞌra mono wa, ma tô oto ꞌRe ihâimana uꞌâsi mono hã te te ꞌre daꞌarẽme, dawasété si da te dasima ꞌre iwẽ zaꞌra mono zéb zarina si, dahâiba na ꞌre dasiwasété zaꞌra mono da, dasiꞌuihâ na. Ãne da hã, ꞌRe ihâimana uꞌâsi mono hã te te dama ꞌre apisutu mono õ nherẽ, te dasiꞌuihâ na piꞌõ siꞌuiwa na dasina ꞌre dawasété zaꞌra.
27 Tane aibâ norĩ hã piꞌõ na dasina ꞌre idamro zaꞌra mono zéb upana, te aibâ siꞌuiwa na si te te sina ꞌre rosaꞌrata wasété uptabi zaꞌra, piꞌõi upana, aibâ siꞌuiwa ꞌre isiꞌruiwapari zaꞌra mono na. Dasiꞌuihâ na te aibâ siꞌuiwa na dasina ꞌre dawasété zaꞌra. Tahawa, te za ꞌRe ihâimana uꞌâsi mono hã te te ꞌre daꞌahâ zaꞌra, dapoꞌreꞌõ si, da te dasiꞌãma ꞌre iꞌmanharĩ zaꞌra mono zéb uwaibaba, ꞌre danomro mono wa.
28 Dapoꞌreꞌõ na ꞌre idanomro mono norĩ hã, ꞌRe ihâimana uꞌâsi mono nhimiroti tô sena hã te te siwi ꞌre wẽꞌõ pese zaꞌra mono wa, te za ꞌRe ihâimana uꞌâsi mono hã te te ꞌre arẽme, siꞌuihâ na te te sima ꞌre irosaꞌrata wasété zaꞌra mono zéb uwaibaba si, tiwasédé hã te te ꞌre ꞌmanharĩ uꞌâsi zaꞌra mono da.
29 Ta norĩ hã wasété uptabi na te ꞌre hâimana zaꞌra. Marĩ zô si te te sima ꞌre robꞌruiwapari zaꞌra. Te duré te te dama ꞌre robꞌmanharĩ wasété zaꞌra. Marĩ na te te duré ꞌre daꞌruiwapari uꞌâsi zaꞌra. Te duré te te ꞌre danhimro. Sitiꞌru sina, te ta norĩ hã dazô ꞌre nomro, te te dama ꞌre nharĩ zaꞌra mono da. Sadawa nhipese uptabi na, te ꞌre hâimana zaꞌra. Niha te te dama ꞌre robꞌmanharĩ zaꞌra mono da, te daꞌãma te te sima ꞌre rosaꞌrata wasété uꞌâsi zaꞌra. Taré te te duré sima ꞌre dabâsi wasété uꞌâsi zaꞌra.
30 Dazaꞌreꞌra nherẽ, te duré ta norĩ hã te te sima ꞌre dabâsi wasété zaꞌra. ꞌRe ihâimana uꞌâsi mono hã te te duré siwi ꞌre ꞌruiwapari. Te duré te te dama ꞌre nharĩ wasété uꞌâsi zaꞌra. Danhipai u dama pire na dama ꞌre hâimana zaꞌra mono newa, te ꞌrâwi tipẽꞌẽ na sina ꞌre wata zaꞌra. Tahawa, te sõꞌawi timreme na dama ꞌre siwasuꞌu zaꞌra, marĩ tãma iwaihuꞌu pese zaꞌra na. Marĩ te te ꞌre iwaihuꞌu zaꞌra mono zéb zarina si te te ꞌre ꞌmanharĩ zaꞌra, marĩ iwasétére hã. Timama norĩ nhimiroti hã te te ꞌre wapari zaꞌra mono õ di duré.
31 Marĩ iwasété zô si, te ta norĩ hã sima ꞌre sõpré. Simiroti na saprĩ ahâ na te ꞌre hâimana zaꞌra. Daꞌãma ꞌre pẽꞌẽzé zaꞌra mono õ di. Duré daꞌãma ꞌre siwamri zaꞌra mono õ di.
32 ꞌRe ihâimana uꞌâsi mono hã ma tô ãne na daꞌãma sima roti siro, dapoꞌreꞌõ na ꞌre danomro mono wa, isiré iꞌrata za ꞌre idahâimana uꞌâsi zaꞌra mono õ na hã. Dapoꞌreꞌõ norĩ ma hã, ãne hã tãma waihuꞌu pese zaꞌra di. Tane nherẽ, te tihâimana wasété si te te sima ꞌre ꞌruiwapari uꞌâsi zaꞌra, te te ꞌre rẽme zaꞌra mono ãna. Tane nherẽ, uburé tiwasédé hã te te ꞌre iꞌmanharĩ zaꞌra mono zém nhipai u, te duré marĩ iwasédé hã te te ꞌre ꞌmanharĩ zaꞌra. Niꞌwam norĩ hã isine ꞌre hâimana wasété zaꞌra mono wa, te ta norĩ si te te ꞌre wẽsãmri zaꞌra.
