Salmu 89:1-52
89 Uburé Danhibꞌapito, ꞌre iꞌasimizawi pese mono zém na wa za õne uꞌâ ꞌre ĩwata uꞌâsi.Wa za duré uburé danhihudu sidâpâsi ma, aiꞌumnhasi na ꞌre iꞌaihâimana mono zém na te ãma dama ꞌre rowasuꞌu.
2 Wa hã ĩma waihuꞌu pese di, asimizawizé õne uꞌâ ꞌre ihâimana mono na hã.Duré aiꞌumnhasizé, hâiwa ne õne uꞌâ ꞌre isaꞌwari mono zém na hã.
3 A hã te inha ãne:“Wa hã, ĩnhibꞌaꞌuwẽ Davi te ipisutu ma, wa tô ĩnhimiropisutu zahi hã ꞌmanha.Ãne wa tô taha ma hã ropisutu:
4 ‘Aihawimhã asihudu sidâpâsi te za õne uꞌâ dama ꞌre siꞌiꞌrãnhoꞌõmo zaꞌra za.Wa hã wa za aiꞌuirĩ na asimiꞌmadâꞌâzé hã õ norĩ ma, te ꞌre apisutu zahi, we ꞌre wairébé mono sidâpâsi.’ ”
5 Uburé Danhibꞌapito, a hã marĩ iwaihuꞌuꞌõ ꞌre iꞌabꞌmanharĩ mono zém na hã te hâiwa norĩ aiꞌãma ꞌre sadawaꞌaꞌa.Duré hâiwa ãma romhuriꞌwa norĩ hã aiꞌumnhasi na ꞌre iꞌaihâimana mono zém na te aiꞌãma si ꞌre sadawaꞌaꞌa.
6 Uburé Danhibꞌapito, asine niꞌwa hâiwa ãma hã ꞌre iꞌmaihâimana mono õ!Duré niꞌwa hã hâiwa ãma ihâiba ré norĩ ꞌremhã asine hã ꞌre iꞌmaihâimana mono õ!
7 A hã aiwazé pese na, te ta norĩ ꞌre isiꞌrãꞌõtõ mono zéb ãma tãma ꞌre aihâimana zaꞌra mo.Tame te te siwi ꞌre iꞌaiꞌuirĩ zaꞌra mono norĩ hã te duré uburé te te siwi ꞌre aiwazé pese.
8 Uburé Danhibꞌapito, ꞌRe ihâimana uꞌâsi mono Iwaihuꞌu pe, niꞌwa asine isiptete uptabi hã hâimana õ di!Uburé te marĩ ma aiꞌumnhasi zaꞌẽtẽ na ꞌre aihâimana mo!
9 A hã, âporé â nhiptete ma, te aipire na tãma ꞌre aihâimana mo.Tô a hã te âporé â sisasisi nhiptete ma hã ꞌre inharĩ uꞌâsi mo, â sisasi hã ꞌre simizahâri mono da hã.
10 A hã, â ꞌrowi ropoto siwamnarĩ hâpâ pese wa, ma tô duré iwĩ.Asiptete uptabi na ma tô duré asitobꞌru norĩ ãma ꞌre iꞌaiꞌuté zaꞌra mo.
11 Hâiwa ate hã, duré tiꞌa zama ate hã.Tiꞌa hã ma tô iꞌmanha. Duré uburé marĩ iwa ꞌre ihâimana zaꞌra mono da hã, ma tô iꞌapo.
12 A hã ma tô hâiwa nhimire niwĩmhã, duré hâiwa nhimiꞌe niwĩmhã ro hã iꞌabꞌmanharĩ mo.Tabo na ẽtẽ nhisi norĩ ãma Hermo na isisi me te pẽꞌẽ to sina aiꞌãma hã ꞌre sõꞌre zahuré.
13 E niha iꞌaipaihi nhiptete uptabi!Duré e niha iꞌasibꞌrata nhiptete uptabi!
14 Sena na iꞌuwaibaba na si ꞌre iꞌaihâimana mono zé hã, duré sena na dama ꞌre iꞌarowairébé mono zé hã, te ꞌri nhanaꞌrata ne hã asimiꞌmadâꞌâzéb ãmamhã ꞌre hâimana zahuré.A hã te aiꞌumnhasi zarina duré asimizawi pese uptabi zarinauburé marĩ hã ꞌre iꞌabꞌmanharĩ mo.
15 Tinhoꞌre na aiꞌãma ꞌre iwata zaꞌra mono norĩ hã te za robze sina toi uꞌâsi ꞌre nomro, ate rowaꞌa na si ꞌre ihâimana zaꞌra mono norĩ hã!
16 Aihâiba uꞌâbâ hã, te ta norĩ hã bâtâ bâre te te sima ꞌre rowẽ zaꞌra.Te za duré tinhoꞌre na hã aiꞌãma ꞌre wata zaꞌra, iharé na si dama ꞌre aihâimana mono wa, a hã.
ꞌRe ihâimana uꞌâsi mono, Davihi ma, te te iropisutuzé wasuꞌu
17 ꞌRe ihâimana uꞌâsi mono, a hã, aiwaihuꞌu pe duré aiwasété ãna ꞌre iꞌaihâimana wẽ uptabi mono, te wama zaꞌra ꞌre aihâimana mo.Duré ꞌre iꞌasimiꞌmanharĩ wẽ mono zéb zarina, wa wa te daꞌãma ꞌre aiꞌuté zaꞌra.
18 A hã ma tô ipisu, waꞌwawi ꞌre isimapa mono ꞌwa da hã.Uburé Danhibꞌapito, Izaraéu te ꞌRe ihâimana uꞌâsi mono, marĩ iwasédé, aiꞌãma ꞌre ihâimana mono õ, a hã ma tô wate apito hã wama isõ.
19 Duréi uptabi hã, asibꞌaꞌuwẽ sena na aiꞌãma ꞌre inomro mono ma sõtõ ꞌrowim ne sõꞌawi tãma asihâiꞌré zaꞌra wamhã, ma tô ãne tãma inharĩ zaꞌra:“Wa hã dasiꞌwapéi ꞌmanharĩꞌwai ma, wa tô isiptetezé hã tãma tisõ.Duré pire na dama ꞌre sa mono da hã, wa tô aibâ te ipisutu ma hã tãma tisõ, aꞌuwẽ waꞌwamhã.
20 Ĩnhibꞌaꞌuwẽ Davi, siꞌapito da hã, wa hã wa tô pisutu. Wa tô robꞌrãi waꞌu to iwazéb zahi na hã ꞌrãtiꞌi.
21 Ĩnhibꞌrata nhiptede hã te za õne uꞌâ te te ꞌre upari.Duré te za ĩnhiptede hã te te ꞌre siptete uꞌâsi.
22 Niwamhã isitobꞌru norĩ te te ãma ꞌre iꞌaiꞌuté zaꞌra mono da hã mare di za.Iwasété norĩ hã te te duré ãma ꞌre iꞌaiꞌuté zaꞌra mono da mare di za.
23 Wa hã wa za isitobꞌru norĩ hã te ꞌre azu pese.Duré sada ꞌre isitiꞌru zaꞌra mono norĩ hã, wa za duré uburé te ꞌre aꞌuprosi.
24 Ĩꞌumnhasizé hã, ĩnhimizawizé me, te za isiré hã ꞌre hâimana uꞌâsi zahuré.Ĩnhisi na te za isiptetezé hã õne uꞌâ te te sina tãma ꞌre hâimo.
25 Wa za dama iꞌrãnhoꞌõmo na ꞌre ihâimana mono zé, â poré Mediterãniu na isisi hawimhã, panhoꞌu Eufrati na isisi u hã tãma ꞌwani.
26 Tahawa, Davi te za ãne ĩma tinha:‘A hã, Ĩmama, duré ĩte ꞌRe ihâimana uꞌâsi mono.A hã, ẽtẽ tõmo wawẽ ne, na ꞌre ĩnhoꞌreptui mono ꞌwa.’
27 Wa za duré ĩꞌra ĩma ipotoꞌrata ne hã pisutu, ta hã.Duré uburé apito norĩ nhipai u dama saꞌẽtẽ na ꞌre hâimana mono da hã wa za tãma pisutu.
28 Õne uꞌâ wa za wa hã te ꞌre sawi pese.Duré õhõ ma ĩnhimiropisutu zahi, te za siptete na hã tãma ꞌre hâimana uꞌâsi.
29 Taha uirĩ na hã te za isihudu sidâpâsi õne uꞌâ dama ꞌre siꞌiꞌrãnhoꞌõmo zaꞌra.Duré hâiwa ꞌre saꞌwari mono ré, te za ꞌre isimiꞌmadâꞌâ zaꞌra mono zé hã ꞌre hâimana uꞌâsi.
30 “Tane nherẽ, isihudu norĩ ĩnhimiroti te te ꞌre wapari zaꞌra mono õ wamhã, duré marĩ na te tãma ãma ꞌre irowasuꞌu zaꞌra mono zarina, ãma ꞌre hâimana zaꞌra mono õ wamhã,
31 marĩ te iꞌruzé te te siwi ꞌre wẽꞌõ zaꞌra mono wamhã,ĩmreme te te duré sima ꞌre tété zaꞌra mono õ wamhã,
32 wa za wa hã iwasété zaꞌra uꞌâbâmhã te tãma ꞌre robꞌmanharĩ zaꞌra za.Wa za duré te tãma ꞌre arobꞌmanharĩ, marĩ na te te ꞌre iꞌupa zaꞌra mono zarina.
33 Tane nherẽ, Davihi ãma ĩnhimizawizé te irẽme da hã mare di za.Ropisudu te tãma iꞌmanharĩzé hã wa za tô ãma tãma uwaimra.
34 Ropisudu õhõ ma, te iꞌmanharĩzé te ãma tãma iꞌupa da hã mare di za.Duré te tãma iropisutuzém na, te ãma tiwi saprĩ waihuꞌu õ di za.
35 “Misi haré wa tô ĩnhisi iwazéb zahi na tãma ropisutu,niwamhã Davihi ma, ĩzadawa nhipese õ di za.
36 Õne uꞌâ te za õhõ ma isihudu hã tãma ꞌre hâimana zaꞌra.Duré bâdâ te te ꞌre robꞌuiwẽ mono ré, wa za dama iꞌrãnhoꞌõmo na ꞌre ihâimana mono zé hã te ꞌre ꞌmadâꞌâ pese.
37 Ã hã te te ꞌre idaꞌaꞌmadâꞌâ mono zé te za aꞌamo hâiwa na ꞌre isab uꞌâsi mono ne hã ꞌre hâimana uꞌâsi.”
Apito ãma aiꞌutézé wasuꞌu
38 Tane nherẽ, a hã ma tô apito ipisutu da hã asitiꞌru.Ma tô tãma asaꞌohâ. Ma tô duré iwẽꞌõ pe.
39 Asibꞌaꞌuwẽ ma, asimiropisudu iꞌmanharĩzé ma, ma tô asimirẽ.Ma tô duré isõprezé tiꞌai u hã ime.
40 Isibꞌri nhoꞌõmo ꞌwawi waꞌra ꞌrãihâ hã ma tô tiwi iꞌapru mo.Ma tô duré ꞌri isiptede hã tiwi iꞌapru pese mo.
41 Iwaꞌwaibaba te te ꞌre iroꞌrahâri zaꞌra mono hã te uburé isimarĩ na te te ãma tiwi ꞌre robaba zaꞌra.Duré iwaptoma ꞌre idahâimana zaꞌra mono norĩ hã te õhõ ãma ꞌre waꞌẽ zaꞌra.
42 Isitobꞌru norĩ si ma tô isiptete na hã iꞌaꞌupari wẽ mo.Ma tô duré õ norĩ ma si ipẽꞌẽ to hã tãma isõmri zaꞌra, te te ãma sima irowẽ zaꞌra zéb da hã.
43 A hã, apito te, isiꞌwa pa ma tô niha hã tiwi iꞌmanha.Duré dasiꞌwapéi wamhã, upari da hã isiré aihâimana õ di.
44 Apito na pire na te te ꞌre idaꞌaꞌmadâꞌâ mono zé hã ma tô tiwi iwaze.Ma tô duré ite apito simasisizé hã tiꞌai u tiwi ime.
45 A hã, isiꞌihizé bâtâ wana ré waptu na siꞌihi suꞌu da hã, ma tô tãma ipisu.Ma tô duré rowazé hã tãma ihi.
Dama rowairébézé waptẽrẽ wasuꞌu
46 Uburé Danhibꞌapito, e momo te za aimaꞌurizé hã tiꞌrãsutu.E õne uꞌâ te za we ꞌre aimaꞌuri mo.Duré e momo te za asitiꞌruzé unhama ne hã ꞌre roꞌo ꞌrãsutu.
47 Maꞌãpé ĩhâimanazé iꞌruture na hã ãma rosaꞌrata.Duré uburé aꞌuwẽ asimipoto norĩ nimahãna za ꞌre idâꞌâ zaꞌra mono zém na hã ãma rosaꞌrata zaꞌra na.
48 E ꞌwa hâiba ré uꞌâsi ꞌre hâimana mono da bâ.E ꞌwa te za dadâꞌâ nhiptetezé wi hã aimani, da te ãma tiꞌa tõ da hã.
49 Uburé Danhibꞌapito, e mahãta duréihã asimizawizé aima ꞌre ihâimana mono.Duré e mahã Davihi ma, asimiropisudu iꞌmanharĩzé hã.
50 Uburé Danhibꞌapito, maꞌãpé ĩꞌãma aipoꞌre puꞌu, wa hã asibꞌaꞌuwẽ da te ĩꞌãma ꞌre iwasété zaꞌra mono zém na te ꞌre irobzépata mono na hã.
51 Uburé Danhibꞌapito, asitobꞌru norĩ, te apito ipisutu ma hã te te tãma ꞌre nharĩ wasété ahâ zaꞌra!Ta hã ꞌre ne mono sidâpâsi, te õ norĩ hã ãma ꞌre waꞌẽi uꞌâsi zaꞌra.
52 Õne uꞌâ, Uburé Danhibꞌapito ãma si ꞌre wawata zaꞌra waꞌaba mono!Tane tô! Tane tô!
