Salmu 95:1-11
95 We aiꞌabaꞌréi waꞌaba, Uburé Danhibꞌapito ãma wanhoꞌre na wawata zaꞌra da!Duré wato sina, ẽtẽ tõmo wawẽ ne te te ꞌre iwaꞌanhoꞌreptui mono ꞌwai ãma wawata zaꞌra waꞌaba.
2 Oto wasiꞌabaꞌréi waꞌaba, isõꞌre u ãma wawata zaꞌra da, wanhoꞌre na.Duré wato sina wanhoꞌre na ãma wazadawaꞌaꞌa waꞌaba.
3 E marĩ wa. ꞌRe ihâimana uꞌâsi mono hã saꞌẽtẽ uptabi di. Duré Apito isaꞌẽtẽ uptabi uburé ihâibaꞌõ norĩ nhisiwi ꞌre isãmra mono.
4 Ẽtẽ na abꞌre ꞌrehâ uptabi hawi, ẽtẽ nhisi uptabi u hã te uburé marĩ hã tãma ꞌre hâimana zaꞌra.
5 Âporé mono zama te tãma ꞌre hâimana zaꞌra, te te ꞌre apoto mono wa.Tiꞌai ꞌré zama ma te duré poto.
6 Oto we aiꞌabaꞌréi waꞌaba, Wanhibꞌapito ma wahiꞌrãtitõ wasiꞌubumro da, ãma wawata zaꞌra da.Oto tãma wasiꞌubumroi waꞌaba, waꞌapoto mono ꞌwai ma, wahiꞌrãtitõ.
7 Õ hã, wate ꞌRe ihâimana uꞌâsi mono. Wa norĩ hã aꞌuwẽ te te ꞌre iwaꞌanhimroi mono.Duré wa norĩ hã poneꞌẽrebâ ne, te te õ hã ꞌre iwaꞌaꞌmadâꞌâ pese mono.Tahawa, ã bâtâ na ãne te te inharĩzé hã te za iwapari zaꞌra waꞌwa:
8 “Aipẽꞌẽ tete na ꞌre aihâimana zaꞌra waꞌaba mono õ di za, aihiꞌrata norĩ Meriba na romnhisi, Masa na isisi amoi ãma ihâimana zaꞌra sine hã, rop si ꞌre iropsisaꞌwari mono wa.
9 Tame ma tô ta norĩ hã siwi ĩpibu. Ĩzada ma tô duré tihâimana zaꞌra, uburé marĩ te tãma ꞌre iꞌmanharĩ zaꞌra mono zé hã te te siwi ꞌre ꞌmadâꞌâ mono nherẽ.
10 Aꞌuwẽ norĩ 40 wahub ꞌremhã ma tô sina ĩnhitiꞌrui wazere pese zaꞌra.Tahawa, wa tô tinha ãne: ‘Aꞌuwẽ norĩ ipẽꞌẽ ꞌremhã wasété uptabi zaꞌra di!Ĩnhimiroti te te ꞌre iwapari zaꞌra mono da hã te te sima wẽ zaꞌra õ di!’
11 Tahawa, ĩnhitiꞌru na ĩhâimana wa, wa tô duré ãne ropisudu hã ꞌmanha:‘Ta norĩ hã niwamhã tiꞌa na ropisudu ihâimana u isisisi da hã mare di za, ꞌre idawaꞌutu zaꞌra mono zéb da, tiꞌa za te isõmri u hã.’ ”
