“Rowaptẽrẽ wapariꞌwa, dapoto mono bö te dza atẽme datsihutu.” — Salmo 65:2 TNM.

Niꞌwam norĩ ma hã niꞌwa rowaptẽrẽ te te wapari õ di. Tane nherẽ, te rowaptẽrẽ dzaꞌra rowaptẽrẽ hã te te tãma rowẽ wadzere dzaꞌra wa. Tadzahã rowaptẽrẽ taré dapẽꞌẽ ma rowẽdzéb dai õ di ropire wamhã. Ropotoꞌwai mreme te tinha Jeová a ĩwẽ norĩ tãma ꞌre ĩmreme dzutsi mono dzé hã te te ꞌre ĩꞌawapari mono na hã. — Provérbios 15:29.

Tawamhã wa dza tsadze dzaꞌra ni Jeová Ropotoꞌwa te te ĩwapari na hã tãma ĩromhuriꞌwa norĩ nhimirowaptẽrẽ. Tsimidzawi na Ropotoꞌwa te ropitsutu: ‘Uburé Danhibꞌapito hã te ĩꞌuwaibaba na ꞌre ĩhöimana dzaꞌra mono norĩ hã te te ꞌre abꞌmadöꞌö petse. Duré ĩtsimirowaptẽrẽ dzaꞌra hã te te ꞌre awapari mono da hã, te tsô ꞌre [tsimipari] uꞌötsi.’ — 1 Pedro 3:12.

‘ꞌRe ĩhöimana uꞌötsi mono ma, te dza ꞌre aimreme dzutsi uꞌötsi aba mo.’ — Romanos 12:12.

Ropotoꞌwai mreme te wama roti dzaꞌra Ropotoꞌwai ma ‘ꞌre wamreme dzutsi uꞌötsi dzaꞌra mono da’ duré ‘tsipuꞌu petse na marĩ waꞌãma ꞌre ĩhöimana dzaꞌra mono na hã.’ Tahã te höiꞌré Ropotoꞌwa Jeová te te tsima ĩwẽ na hã da te tiwi rowaptẽrẽ dzaꞌra da. — 1 Tessalonicenses 5:17; Filipenses 4:6.

E marĩ wa Ropotoꞌwa te tsima wẽ tãma wamreme dzaꞌra da. Ãma rotsaꞌrata: aiꞌuté timama tẽme te mo duré te tiwi waptẽ “Mamare ĩ̱pawapto na”. Damama ma waihuꞌu petse di oto tiꞌra wi tsô ĩrowaptöꞌödzé. Tane nherẽ tãma robdzei uptabi di tiꞌra hã tsiꞌuihö na tãma mreme wa. Damama ma waihuꞌu petse di tiꞌra ma ĩtsawi petse uptabi na hã duré te te ĩꞌumnhatsi na hã dza te te ĩpawaptom na, taha wa ĩtsimipawaptobdzéb dzô te waptẽ. Ãne duré Jeová ma robdze ti wa te tiwi rowaptẽrẽ dzaꞌra wamhã. Te te ꞌmadöꞌö waihuꞌu petse di wama ĩtsawi petse uptabi na hã, duré wa te ĩꞌumnhatsi dzaꞌra na hã dza te te ĩwapawaptob dzaꞌra na. Taha wa ĩtsimipawaptobdzéb dzô wa tiwi waptẽrẽ dzaꞌra ni. — Provérbios 15:8; Tiago 4:8.

‘Uburé marĩ na ꞌre ĩꞌaihötöꞌö dzaꞌra waꞌaba mono dzé hã, ꞌRe ĩhöimana uꞌötsi mono ma, ꞌre tsõmri dzaꞌra waꞌaba mono, ta hã te te ꞌre aiꞌaꞌmadöꞌö uꞌötsi aba mono wa.’ — 1 Pedro 5:7.

Ropotoꞌwai ma wadzawi dzaꞌra di duré te waꞌmadöꞌö wẽ dzaꞌra. Tãma waihuꞌu petse di marĩ waꞌãma ĩhöimana dzaꞌra hã duré te tsima wẽ te te wapawaptob dzaꞌra da. Taha wa, te tsima wẽ ꞌröwi wapẽꞌẽ na tãma watsiwatsuꞌu dzaꞌra da rowaptẽrẽ na.

Duréihã, rotiꞌwa Davi Ropotoꞌwai ma romhuriꞌwa, te natsi tiwi rowaptẽ ĩtsimipawaptobdzéb dzô. Te duré tsiwatsuꞌu Ropotoꞌwai ma tinhimirotsaꞌrata na duré tipẽꞌẽ ꞌrem na. (Salmo 23:1-6) Ropotoꞌwai ma tsawi di Davi duré te natsi wapa ĩtsimirowaptẽrẽ norĩ. (Atos 13:22) Ãne duré Ropotoꞌwa te waꞌãma ꞌre hötöꞌö dzaꞌra duré te tsima wẽ petse wanhimirowaptẽrẽ te te awapari da.

Ãne Ropotoꞌwai ma romhuriꞌwa duréihã te tinha. Timreme na te höiꞌré te te ĩꞌumnhatsi petse na hã Ropotoꞌwa ĩtsimirowaptẽrẽ te te ĩwapari na hã duré tahã ma pawapto petse. Te te ꞌmadöꞌö waihuꞌu petse di Ropotoꞌwa ĩꞌrata ĩhöimana na hã duré ĩtsiptede te te tãma ĩtsõmri na hã ropire duré robdzeiꞌõ hã te te ꞌwapé da. — Salmo 116:1-9 TNM.

Wa te tsadze dzaꞌra wamhã Ropotoꞌwa wanhimirowaptẽrẽ te te ĩwapari na hã wa dza natsi tiwi rowaptẽrẽ dzaꞌra ni. ꞌMadöꞌö Pedro watsuꞌu Espanha ãma ꞌre ĩhöimana mono hã. Ĩꞌra hã 19 wahu wamhã, ma tô tiwi aiꞌutõ robduri na. Pedro ma tô tiwi tirobdzeiꞌõ petse. Ma tô natsi rowaptẽ Ropotoꞌwai wi ĩtsimipawaptobdzéb dzô duré rowẽ dzô. Õ hã te tsiwatsuꞌu: “Ropotoꞌwa Jeová, watsitsãnawã norĩ hawi danhimidzadze na ma tô ĩ̱ꞌupari ĩ̱mro me ãhã ropire ré.”

Rowaptẽrẽ ĩꞌra hã apö te te tãma ãwitsi õ nherẽ, tô tsena ma tô pawapto petse Pedro duré ĩte família. Ĩmro, María Carmen, te watsuꞌu: “Rowaptẽrẽ ma tô ĩ̱pawapto te ĩrobdzépatadzé te ꞌwapé da. Ĩ̱ma waihuꞌu petse di Ropotoꞌwa Jeová te te ĩ̱dzadaihuꞌu na hã. Te tiwi rowaptẽrẽ wamhã, wa ꞌmadö te te ĩ̱ma ĩtsõmri na hã rowẽ duré romharé.”

Ropotoꞌwai mreme watsuꞌu me, ta norĩ watsuꞌu te höiꞌré Ropotoꞌwa tô tsena wanhimirowaptẽrẽ te te ĩwapari na hã. Tadzahã tô tsena Ropotoꞌwa te te tsadaꞌöbö õ di uburé rowaptẽrẽ norĩ hã. E niha bö.