Kwakude kudala, abantu bebecinga ngendlela ebekuya kuba mnandi ngayo ukuhlala bebatsha, yaye besempilweni ngonaphakade. Inyaniso ebuhlungu yile: Siyafa. La mazwi kaYobhi angasentla athethwa kwiminyaka engaphezu kwamawaka amathathu eyadlulayo yaye aseyinyaniso nanamhlanje.

Abantu emhlabeni wonke banqwenela ukuphila ngonaphakade. IBhayibhile isixelela ukuba uThixo watyala ezintliziyweni zethu umnqweno wokuphila ngonaphakade nokuba siyazi loo nto. (INtshumayeli 3:11) Xa kunjalo ke, ngaba ingenzeka into yokuba uThixo onothando abeke umnqweno ongenakuze uphumelele ezintliziyweni zethu? Ukuba impendulo yakho nguhayi, uchan’ ucwethe. ILizwi likaThixo lithi ukufa kulutshaba yaye lithembisa ukuba kuza ‘kutshitshiswa.’—1 Korinte 15:26.

Yinyaniso engenakuphikiswa into yokuba ukufa kulutshaba. Akakho umntu osezingqondweni onokukwamkela. Xa kuvela ingozi, siyaphepha, sizimele okanye sibaleke. Ukanti xa sigula, siye sifune uncedo ukuze siphile. Senza konke okusemandleni ukuze siphephe izinto ezinokusibulala.

Ngaba sinaso isizathu sokukholelwa ukuba olu lutshaba lungaze lutshitshiswe? Ewe sinaso. UMdali, uYehova uThixo, akazange adale abantu ngenjongo yokuba baphile nje ithutyana baze bafe. Ukufa kwabantu kwakungeyonjongo kaThixo ngoxa wayebadala. Wayefuna baphile ngonaphakade emhlabeni, ibe uhlala eyiphumeza injongo yakhe.—Isaya 55:11.

Kuza kupheliswa njani ke ukufa? Ukutyhubela imbali, abantu baye bazama ukulungisa ingxaki yokufa, kodwa boyisakala. Basaqhubeka bezama nakule mihla yethu. Oososayensi baye benza amayeza aye aphelisa izifo. Baye bafunda nendlela umzimba osebenza ngayo. Kwiindawo ezininzi, abantu abaninzi baphila ixesha elide kunokuba kwakunjalo kwikhulu leminyaka eyadlulayo. Sekunjalo, abantu abanakuze bakwazi ukuphelisa ukufa. Kunjengokuba iBhayibhile isithi: “zonke zibuyela eluthulini.”—INtshumayeli 3:20.

Iindaba ezimnandi zezokuba akunyanzelekanga ukuba sixhomekeke kubuchule babantu ukuze silungise le ntsinda badala yengxaki. UYehova uThixo sele elungiselele ukuba sisindiswe ekufeni, ibe oyena mntu uphambili kweli lungiselelo nguYesu Kristu.