ტაძარიშ მინალით წმინდაშა მინირთედ. „წმინდა წერილეფიშ ახალ ქვეყნიერებაშ თარგმანიშ“ 2023 წანაშახიან გიშაშქუმალეფს ჭარუდ, ნამდა მინალიშ „გან 20 წყრთა რდჷ ჸუდეშ განცალო დო სიმაღლეთ — 120 წყრთა“ (2 მატ. 3:4). შხვა თარგმანეფს ხოლო ჭარჷ, ნამდა მინალიშ სიმაღლე 120 წყრთა რდჷ, მუთ სოდგარენ 53 მეტრა რე.

მარა „წმინდა წერილეფიშ ახალ ქვეყნიერებაშ თარგმანიშ“ 2023 წანაშ გიშაშქუმალას სოლომონიშ ტაძარიშ მინალიშ გურშენ ჭარჷ, ნამდა თიშ სიმაღლე 20 წყრთა რდჷ, მუთ, სოდგარენ 9 მეტრა რე. a გუვარჩუათ მუსხირენ მიზეზ, მუშენ ითირ ბიბლიას 120 წყრთაქ 20-ით.

მინალიშ სიმაღლე ვა ჭარჷ 1 მეფეეფიშ 6:3-ს. თე მუხლის იერემია მიშინუანს, მუზმა რდჷ მინალიშ სიგინძა დო გან, მარა მუთუნს ვეჩიებ თიშ სიმაღლეშენ. უკულიან დუდის თინა მიშინუანს ტაძარიშ შხვა მნიშვნელოვან დეტალეფს. მაგალთო, მუნერით რე დიდ კვარკვალია აუზ, 10 საზიდარ დო ჟირ სპილენძიშ სვეტ, ნამუთ მინალიშ გალე რდჷ (1 მეფ. 7:15—37). მინალ 50 მეტრაშე უმაღალაშ დო ტაძარშე ბრელით უმოს მაღალ ხოლო ქორდჷ-და, მუშენ ვემიშინუ იერემიაქ თიშ სიმაღლე? ებრაელ ისტორიკოსეფ საუკუნეეფიშ უკულ ხოლო იჩიებუდეს, ნამდა მინალიშ სიმაღლე სოლომონიშ ტაძარშე უმოს ვა რდჷ.

მარკვიებელეფ ფიქრენა, ნამდა ტაძარიშ კიდალეფს ვა დაკინებედ 120 წყრთაშმამაღალა მინალ. ჯვეშ დროს დიდ ქუალეფით დო ანგურეფით შენებულ კიდალეფ, მაგალთო, მუნერით რდჷ ეგვიპტეშ კარმინოლ, ქვინჯის ფსქელ რდჷ დო ეშე-ეშე იჭიფარებუდ. მარა სოლომონიშ ტაძარ თაშ ვა რდჷ შენებულ. მარკვიებელეფ იჩიებუნა, ნამდა თიშ კიდალეფიშ სიფსქა 6 წყრთაშ (2, 7 მეტრა) უმოს ვა რდჷ. არქიტექტურაშ ისტორიკოს, თეოდორ ბუსინკ, იჩიებ: „ათეცალ სიფსქაშ კიდალეფ უღუდუნ ფერ ტაძარს 120 წყრთაშმამაღალა მინალ მუთუნით ვაღვენუდ“.

შილებე 2 მატიანეშ 3:4-ის მოჩამილ სიტყვეფ არასწორო რდასჷ გინოჭარილ. მართალ რე, ნამთინე ჯვეშ ხეშნაჭარას თე მუხლის პკითხულენთ, ნამდა მინალიშ სიმაღლე 120 წყრთა რდჷ, მარა შხვა უმოს სანდო ხეშნაჭარეფს, მუნერით რე ალექსანდრიაშ დო ამბროზიანაშ კოდექსეფ, ჭარჷ, ნამდა მინალიშ სიმაღლე 20 წყრთა რდჷ. მუ შილებე რდასჷ თიშ მიზეზ, ნამდა თე მუხლის 120 წყრთა არასწორო ჭარჷ? ებრაულ ნინას სიტყვეფ „ოშ“ დო „წყრთა“ მანგარო მოგენს ართიანს, ათეშენ, შილებე გინმაჭარალეფს თე ჟირ სიტყვაქ ართიანშა ეშაჩირთეს დო „წყრთაშ“ მანგიორო, „ოშ“ დოჭარეს.

მართალ რე, მოკონა, ქიგებგათ თე დეტალეფ დო უჯგუშო წერმიბდგინათ, მუნერ რდჷ სოლომონიშ ტაძარ, მარა ჩქინო ბრელით უმოს მნიშვნელოვან თინა რე, ნამდა თე ტაძარ განასახიერენდჷ დიდებულ სულიერ ტაძარს. მარდულ ვაფუთ იეჰოვას, ნამდა თიშ მსახურეფს მუჩეს პატი, თე ტაძარს ფცათჷ თის თაყვან (ებრ. 9:11—14; გამოცხ. 3:12; 7:9—17).