2014 წანაშ 5 იანარს, ჟეშხამუ დღას, სერჟ ჟერარდინი ავტობუსით მიშუ იეჰოვაშ მოწმეეფიშ კონგრესშა, ნამუთ პარიზწკუმა (საფრანგეთი) ხოლოს იტარებუდ. შარას მიშუნ თეშ ავარია ქოძირუ. თინა იშინანს: „შარას მიშუნ ფერ მანქანაქ ბეტონს ქარაგუ დო ჰაერშა გელუ. თეშ უკულ ხიდეს ქიმკატირხუ, დაჩხირქ გურჩქინდუ დო გემნირთუ“.

სერჟი 40 წანაშე უმოს რე მეხანძრეთ მუშენსი. თინა მეხანძრეეფიშ ჯგუფიშ უნჩაშ რე დო უჩქუდ მუ ოკო აკეთუკო. სერჟი იჩიებუ: „მართალ რე, ჩქი ავარიაქ მოხვადუ თი შარათ ვემიფშით, მარა შოფერს ქოფთხი გუჩერებუდკო ავტობუსი დო დაჩხირ ონტუდუ ფერ მანქანაშა მიდებრულ“. მანქანაშე მიდგარენ კიჟინუნდ: „ქიმმეხვარით! ქიმმეხვარით!“. თინა აგრძელენს: „კოსტუმ მუკმოქუნდ დო დაჩხირშე ფთხილანდუ ფერ მუთუნ ვამღუდუ. მარა კიჟინიშ ხუმაქ ქუგმოხვამილუ, ნამდა დიო ხოლო შილებედ მანქანას მითოხედუნ თინეფიშ გინოსკილადა“.

სერჟიქ მანქანას მიკულუ დო გვერდო გოთიშილ კოჩი ქოძირუ. მუჟამსით ოშკურანჯ ვა რდუ ფერ ადგილშა მიდეჸუნუნ, თე კოჩიქ უწუ, მანქანას ხოლო ჟირ კოჩი რენია. „თექ ბრელ მანქანეფქ გაჩერდუ, მარა მეულას მითინ ვა ბედუდ, მუშენდა ირდიხას დაჩხირი რდუ დო ირფელი გოფურაფილ რდუ“.

დიდ მანქანეფიშ შოფერეფქ დაჩხირიშ ოშკირიტალ ქიმიღეს. მუჟამსით სერჟიქ თოლით ქაჩინებაფუნ, თინეფქ დაჩხირიშ ოშკირიტალ მანქანას ქიმუჭოფუეს დო დაჩხირ ჭიჭე ხანით დოშკირიტეს. შოფერი თურმე მანქანას ჸოფე ეთოჸუნელ, ათეშგურშენ სერჟიქ დო შხვეფქ გეჭოფეს მანქანა დო გეგთიჸუნეს თე კოჩი.

„ზუსტას თე დროს მანქანას კინ ქუმანტუ“, — იშინანს სერჟი. ხოლო ართ კოჩი, ნამუსით უსაფრთხოებაშ ორტყაფი უკეთუდუნ, მანქანას დუდგიმე კილაბუდ. თე დროს ხოლო ართ მეხანძრექ ქუმორთუ, ნამუთ თიმ დღას ვა მუშენდუ. თის მოტოციკლისტეფცალო ტყებიშ მუკაქუნალი მუკაქუნდუ. „მანქანა მალას ეფეთქებმაქ ვუწი. ათეშგურშენ კილეს ქიმეფთხი ხე დუდგიმე კილაბუდუნ ფერ კოჩის დო გეგთიპჸუნი მანქანაშე“. ართ წუთის ხოლო ვემკურთუმუნ თეშ მანქანაქ ეფეთქუ.

მუჟამისთ მეხანძრეეფქ დო სასწრაფოქ ქუმორთუნ, თინეფქ ქიმეხვარეს დაღამაკებულეფს დო დაჩხირ დოშკირიტეს. სერჟის ხელეფი ბრელ დიხას აფუდ გოჭკირილ დო ჭვილ, ათეშგურშენ თის ხოლო მეხვარეს. მუჟამს სერჟი მუშ ავტობუსშა ეშმიშუნ, თიშა მუსხირენ კოჩიქ ქიმირულ დო მადლობა უწუ.

სერჟის მანგარო ოხიოლ, ნამდა საჭირო დროს საჭირო ადგილს რდუ. თინა იჩიებუ: „იეჰოვაშ, ჩქიმ ღორონთიშ წოხოლე პასუხიშმგებლობა იბგინი, თი კათაშ გინასკილადარო დუდ ვა დამზოგებუდკო. ბედნერ ვორექ, ნამდა თინეფი გეგნვოსკილიდე“.