2012 წანაშ დეკემბერიშ დაჭყაფუს ტაილანდის იეჰოვაშ მოწმეეფქ სპეციალურ კამპანია წიმიჭყეს სკოლაშ ბაღანეფიშ მიოხვარებელო. ეჩი იეჰოვაშ მოწმექ ქალაქ ბანგკოკის შხვადოშხვა სკოლაშა მერთუ. თინეფქ თითოულ სკოლაშ დირექციაშ წარმომადგენელეფს შეხვადეს დო მასწავლებელეფს დო სკოლაშ ბაღანეფს 2012 წანაშ გიმათუთაშ ჟურნალი „გამოიღვიძეთ!“ მეჩეს, სოდეთ მოჩამილ რე სტატიეფიშ სერია „მუჭო იბგურუათ სკოლას უჯგუშო?“.

თე კამპანია მანგარ ჯგირო მიშუ, ათეშგურშენ მოწმეეფქ უმოს დიდ მაშტაბით ქიმწიჭყეს თე საქმე. სოდგარენ წანმოწანა დო გვერდიშ დინახალე 830 სკოლაშა მერთეს; მასწავლებელეფი დო მოსწავლეეფი ხიოლით ეჭოფუნდეს ჟურნალს „გამოიღვიძეთ!“. თე ჟურნალქ არძას ქაშუკონ თიშენ, სუმშა იჸუ ობეშტალქ. გვალო დუდშე 2012 წანაშ გიმათუთაშ „გამოიღვიძეთ!“ 30 000 ცალი ბეშტუეს. მარა თის მანგარ მოწონა უღუდუნ თიშენ, 650 000-შე უმოსიქ გევრცელუ!

სკოლეფიშ ადმინისტრაციაშ წარმომადგენელეფქ დო მასწავლებელეფქ ქიმეხვადეს, ნამდა ჟურნალს „გამოიღვიძეთ!“ მანგარ სიანტერესო მუდგარენ ჭარუდ. ართ მასწავლებელქ თქუ: „თე ჟურნალი სკოლაშ ბაღანეფს მეხვარებუ უმოს ხოლოს რდან მუნეფიშ ოჯახწკუმა დო ჯგირ მიზნეფი უღდან“. ნამთინე სკოლას ოგურაფალ პროგრამას ქუკათუეს ჟურნალს მოჩამილ თემეფი, შხვა სკოლეფს თე ჟურნალს გიმირინუანდეს ბაღანეფქ კითხირ უჯგუშო ქიდიგურესკონ თიშენ. ართ სკოლას ბაღანეფს თხუეს თე ჟურნალშე თემეფი დუჭარდესკონ. არძაშ უჯგუში თემაშ მაჭარალს დასაჩუქრენდეს.

ართ ძღაბი მარდიელ რდუ ჟურნალს მოჩამილ სტატიაშენ „სიშხუა —ახალგაზრდეფიშ პრობლემა“. თიქ თქუ, ნამდა სიშხუა ბრელშო პრობლემა რე დო მუშ მახანეფს ოონჯღორნა თეშ გურშენ შხვეფწკუმა რაგადი. თინა იჩიებუ: „მადლობა თე ჟურნალს მოჩამილ ზუკოლუაშ გურშენ, თიშ გიმორინაფა შუროთ ვარე ძნელი“.

ჟურნალს მოჩამილ ინფორმაციაშ გურშენ მშობლეფი ხოლო მანგარ მარდულეფ რდეს. ართ ოსურკოჩიქ თე ჟურნალშენ მარდი გინუგუ მუში ჸუჩა მეულირ იეჰოვაშ მოწმეეფს: „თაქ მოჩამილ ზუკოლუაშ ჭყოლოფუათ ჩქიმ ძღაბიქ სკოლას უჯგუშო გურაფა ქიდიჭყუ“.

იეჰოვაშ მოწმეეფიშ წარმომადგენელ ტაილანდის, პიჩაი პეტრატიოტინ იჩიებუ: «ჟურნალს „გამოიღვიძეთ!“ მოჩამილ რე ბიბლიაშა გერსხილ ზუკოლუა, ნამუქით ბრელ დროს გურზუ დო ნამუთ ამდღა ხოლო ვადინუანს ფასის. იეჰოვაშ მოწმეეფს ჯგირო მიჩქუნა, მუსხის ნიშნენს რჩქინაშ მეღება, ათეშგურშენ ბედნერეფ ვორეთ, ნამდა შემლებნა თე ჟურნალი ირ კოჩიშ ქიმეფჩათ უფარეთ».