იეჰოვაშ მოწმეეფს ბჯერა, ნამდა ბიბლიურ პრინციპეფს დო მითითებეფს შეულებ, მიმეხვარან თიცალ გადაწყვეტილებეფიშ მეღებას, ნამუთ ღორონთის მოწონს დო ჩქინდა ხოლო ჯგირობუა მოუღ (ესაია 48:17, 18). თე პრინციპეფ დო მითითებეფ, ნამდგათ ფცხოვრენთ, ჩქინ მოგონილ ვა რე. გუვარჩუათ, პაემანწკუმა დაკავშირებულ ნამთინე ბიბლიურ პრინციპ. a

•   ქორწინება მუდმივ კავშირ რე (მათე 19:6). იეჰოვაშ მოწმეეფ სერიოზულო უჯინენა პაემანს, მუშენდა თენა რე ეტაპ, ნამდგას ქორწინება მაჸუნუ.

•   თის, მით პაემანშა იჭყანს გილულას, საჭირო ასაკ ოკო უღდას ქორწინებაშო. თეცალეფს „ახალგაზრდულ ვნებეფ“, მიკულირ აფნა. შხვა სიტყვეფით ქოფთქუათინ, უკვე ვა უღნა მოზღვავებულ სექსუალურ სურვილეფ (1 კორინთელები 7:36).

•   მით პაემანშა გილურს, ქორწინებაშ უფლება ოკო უღდას. ნამთინეს, მით მეუღლეს კანონიერო რე ჩათხიებულ, ღორონთიშ თოლს იშენით ვა უღჷ კინ ქორწინებაშ უფლება, მუშენდა ღორონთიშ მითითებათ ჩათხინაფაშ მიზეზ ხვალე სექსუალურ უზნეობა რე (მათე 19:9).

•   ბიბლიურ მითითებათ ქრისტიანეფქ ხვალე თანამორწმუნეშა ოკო დექორწინან (1 კორინთელები 7:39). იეჰოვაშ მოწმეეფშო თე მითითება თის ვა ნიშნენს, ნამდა თიცალ პიროვნებაშა დექორწინან, მით უბრალოთ პატის ცენს ჩქინ რწმენას. თე მითითება გულისხმენს, ნამდა ნათილ იეჰოვაშ მოწმეშა დექორწინან, მით თიშ რწმენაშ რე დო საქმეეფით ხოლო თეს ოძირანს (2 კორინთელები 6:14). ღორონთ ირიათო ურაგადუდ მუშ მსახურეფს, კინ მუნეფიშ რწმენაშ პიროვნებაშა დექორწინესკო (დაბადება 24:3; მალაქია 2:11). თე მითითება ამდღა ხოლო პრაქტიკულ რე დო თე აზრის, თანამედროვე მარკვიებელეფ ხოლო ოთანხმნა. b

•   სქუალეფ ოკო უჯერდან მშობლეფს (იგავები 1:8; კოლოსელები 3:20). თე მითითება თის ხოლო გულისხმენს, ნამდა სქუალეფ, მით მშობლეფწკუმა ცხოვრენა, ოკო ომორჩილდან დიდა დო მუმაშ წესეფს პაემანწკუმა დაკავშირებით. თეშა მიშურს, მუ ასაკშე შეულებ სქუას პაემანშა გილულა დო მუჭო ოკო მიქცუას თე სიტუაციას.

•   იეჰოვაშ მოწმე, ბიბლიურ პრინციპეფიშ თანახმათ, მუშით გინოჭყვიდუნს, დიჭყას დო ვარ პაემანშა გილულა დო მის შეხვადას. თენა ოთანხმ ბიბლიურ პრინციპის: „თითოულს მუშ ოღალ გილუღ“ (გალატელები 6:5). მარა, სოიშახ პაემანშა გილულას გინოჭყვიდუნდას, რჩევას ოკითხ მოწიფულ ქრისტიანეფს, მიდგას თინეფშო ჯგირ ოკონა (იგავები 1:5).

•   პაემანიშ დროს ბრელქ სერიოზულ ცოდვაშა ქიმერთჷ. მაგალთო, ბიბლია მარზენა მითითებას, ნამდა დუდ ევუჩილითუათ სექსუალურ უზნეობას. თენა ხვალე თის ვა ნიშნენს, ნამდა დუდ ევუჩილითუათ სექსუალურ ურთიერთობას. თე მითითებაშა მიშურს, ნამდა დაქორწინებულ ვა რენან თინეფქ დუდ ოკო აურიდუან უწმინდურ საქციელს, მუნერით რე შხვა პიროვნებაშ სასქესო ორგანოეფიშ შეხება დო ორალურ ვარდა ანალურ სექსი (1 კორინთელები 6:9—11). ღორონთ ვეწონუანს ქორწინებაშახ თიცალ საქციელს, ნამუთ ვნებეფს აღძრენს დო სექსუალურ უზნეობაშა მეჸუნს პიროვნება. თენა „უწმინდურება“ რე დო ღორონთ ვეწონუანს თეცალ საქციელს (გალატელები 5:19—21). თეს გეძინელ, ღორონთშო მიუღებელ რე უზნეო, „უწესო სიტყვეფით“ ჩიება (კოლოსელები 3:8).

•   კოჩიშ გურ, შხვანერო ქოფთქუათინ, შინაგან პიროვნება, უდუნდებელ რე (იერემია 17:9). თის შეულებ პიროვნებას გაკეთებაფუას თინა, მუთ უჩქჷ, ნამდა გლახა რე. თექ ვა მოხვადასინ, წყვილქ დუდ ოკო აურიდას თიცალ ადგილეფშა ხვალე ულას, სოდეთ ადვილო შილებე ცოდვა ჩედინას. თინეფს შეულებნა, სიფრთხილე გეგმირჩქინან დო მეგობრეფწკუმა ვარდა სულიერო მოწიფულ პიროვნებაწკუმა ართო ქეშეხვადან ართიანს (იგავები 28:26). დაუქორწინებელ ქრისტიანს, მით გორუნს მომავალ მეუღლეს, ოკო არჩქილედას თი საფრთხეეფ, მუდგაქ შილებე ინტერნეტით გაჩინებაფას მაჸუნას, განსაკუთრებულო თიმწკუმა, მუჟამსით ბრელ მუთუნ ვა უჩქჷ თე პიროვნებაშ გურშენ (ფსალმუნი 26:4).