Tamy tantara nataony Jesosy nisy iro olo aroe io. (Lioka 16:19-31) Misy karazanolo aroe tiany Jesosy koran̈iny amizio: 1) Iro pitondra fivavahan̈a jiosy nan̈ambony ten̈a tamy faha Jesosy ndreky 2) iro olo tsotra nan̈eky hafatra nambarany Jesosy iro.

Amy lahatsoratra ty

•  Ino ma raha nikoran̈iny Jesosy momba lelahy pan̈arivo io ndreky Lazarosy?

•  Ten̈a nisy ankitin̈y ma tantara io?

•  Tantara io ma tihivolan̈a fa motrobe zen̈y misy ankitin̈y?

•  Ino ma dikany tantara io?

 Amy Lioka toko faha-16 ao, Jesosy mikoran̈a momba lelahy aroe. Nivolan̈a izy fa niova mare fiain̈anandro roe io baka tio.

 Izikoa fintin̈iny, karaha ty tantara io: Nisy lelahy araiky pan̈arivo sady niadan̈a mare. Nisy lelahy araiky ndraiky pangataka, Lazarosy an̈arany, napetraka tambaravaran̈any lelahy pan̈arivo io. Izy baka nan̈anten̈a fa hihina zay hanin̈y latsaka baka tan̈abony latabatrany lelahy pan̈arivo io. Tafaranizin̈y, naty Lazarosy, ke nindesiny anjely narikitry Abrahama tan̈y. Naty koa lelahy pan̈arivo io, ke nalevin̈y. Lelahy pan̈arivo io nijaly mare tan̈atiny motro mizelazela, ke nivolan̈a taminy Abrahama izy han̈iraka Lazarosy handatsaka rano manintsinintsy hely amy lelanany. Fa Abrahama tsy nan̈eky. Nivolan̈a izy fa efa niova fiain̈anandro, ke efa nasian̈a lavaka be tsy afaka hitsahan̈a, nampisaraka iro roe.

 Aha. Izio fan̈oharan̈a nataony Jesosy, fotony nisy raha tiany hampianarin̈y. Nata iro manampahizan̈a aby io mba man̈eky zen̈y. Ohatra, misy lohatenihely zay amy Baiboly nadikany Luther, taminy 1912 mivolan̈a fa fan̈oharan̈a izio. Avio lamariky amy pazy ambany amy Baibolin’i Jerosalema koa mivolan̈a fa “izio fan̈oharan̈a karaha tantara in̈y fo, ke tsy ten̈a nisy iro olo koran̈iny ao.”

 Ke Jesosy tio ma tihikoran̈a momba fiain̈ana ankoatra an̈y? Izy ma tihivolan̈a fa olo koa fa maty mandeha amy motrobe, avio iry Abrahama ndreky Lazarosy in̈y efa loso andan̈itry an̈y? Maro porofo ivolan̈ana fa tsy marin̈y zen̈y.

 Iritrireta baka ty:

•   Izikoa lelahy pan̈arivo in̈y tan̈atiny motro mizelazela ankitin̈y, mba navy tan̈atiny lelanany edy pitiky rano hely tamy rantsantan̈anany Lazarosy io?

•   Pitiky rano hely in̈y ma mahavita man̈adoso jaliny lelahy pan̈arivo in̈y an̈atiny motro ao?

•   Jesosy efa nivolan̈a fa mbala tsiary nisy olo loso tandan̈itry tan̈y tamy leranizen̈y, ke mba marin̈y Abrahama tan̈y zen̈y?​—Jaona 3:13.

 Aha. Tantara io nata mivolan̈a raha tsisy, misy olo mivolan̈a fa hita baka amizio zen̈y fa lan̈iany tsara fan̈ahy mandeha andan̈itry, fa lan̈iany olo ratsy fan̈ahy ndraiky mijaly tsisy farany an̈atiny motrobe. a

 Fa raha zen̈y tsy marin̈y.

 Fampianaran̈a momba motrobe zen̈y tsy mifan̈araka amy raha koran̈iny Baiboly momba olo maty. Ohatra, Baiboly tsy mampianatra fa olo tsara fan̈ahy koa maty, ho sambatra andan̈itry an̈y, avio olo ratsy fan̈ahy ndraiky mijaly amy motrobe zen̈y. Koran̈iny Baiboly mazava karaha ty: “Olo koa mbala velon̈o mahay fa izy mbala hofoaty. Fa olo maty fo tsisy raha hainy eky.”​—Mpitoriteny 9:5.

 Hita baka amy tantara io fa misy karazanolo aroe, hiova mare fiain̈anandro.

 Lelahy pan̈arivo io pitondra fivavahan̈a jiosy “tia vola” aby io. (Lioka 16:14) Iro io nitandren̈y Jesosy, fa iro fo tsy nan̈eky hafatra nambarany Jesosy. Avio koa iro nan̈ambany olo tsotra.​—Jaona 7:49.

 Lazarosy ndraiky ivolan̈ana iro olo tsotra nan̈eky hafatra nambarany Jesosy. Pitondra fivavahan̈a aby io nan̈ambany iro olo tsotra aby io.

 Niova mare fiain̈anany karazanolo aroe io.

•   Iro pitondra fivavahan̈a jiosy aby io nieritreritry fa Zan̈ahary nankasitraka iro. Mira maty fo iro io, fotony Zan̈ahary tsy nan̈eky iro ndreky fanompoan̈a nataondro. Tsy nan̈eky hafatra nambarany Jesosy baka iro. Nampijaly iro mare koa hafatra nambarany Jesosy ndreky iro pan̈aradia Jesosy aby io.​—Matio 23:29, 30; Asan’ny Apostoly 5:29-33.

•   Fiain̈anandro olo tsotra tsy nirarahindro pitondra fivavahan̈a aby io, tan̈atiny taon̈o maro, kanefa nivadiky nahaitsara. Maro olo nan̈eky hafatra nambarany Jesosy, ke nahazo hatsaran̈a baka tamy zen̈y. Iro mety hahazo fankasitrahan̈a mandrakizay baka amy Zan̈ahary.​—Jaona 17:3.