Azovy ma Mandeha Andan̈itry?
Valiny baka amy Baiboly
Efa niferiny Zan̈ahary olo kristianin̈y tsy nivadiky taminany hivilomin̈y andan̈itry an̈y, iro koa fa maty. (1 Petera 1:3, 4) Iro io nata efa nifidiny Zan̈ahary, iro mbala mila tsy mivadiky isaka iro maty, baka iro ho loso andan̈itry an̈y ankitin̈y.—Efesianina 5:5; Filipianina 3:12-14.
Ino ma diandro olo aby io andan̈itry an̈y?
Iro hatao panjaka ndreky pisoron̈o miaraka amy Jesosy, an̈atiny 1000 taon̈o. (Apokalypsy 5:9, 10; 20:6) Iro hitondra amy fanjakan̈a andan̈itry an̈y, na “lan̈itry vaovao.” Izio hanjaka aminy olombelon̈o ambony tany eto, na “tany vaovao.” Iro hiaraka hanjaka amy Jesosy andan̈itry an̈y io hitatahy amy fan̈ampodianan̈a fiain̈ana tsara karaha araiky nataony Zan̈ahary tamy voanalohany tan̈y in̈y.—Isaia 65:17; 2 Petera 3:13.
Firy ma olo hivilomin̈y handeha andan̈itry an̈y?
Ambarany Baiboly ao fa olo 144 000 hivilomin̈y handeha andan̈itry an̈y. (Apokalypsy 7:4) Amy fahitan̈a koran̈iny aminy Apokalypsy 14:1-3, apostoly Jaona nahita “Zanaka Ondrikondriky mitsangana amy Bongo Ziona, miaraka amindro 144 000.” Amy fahitan̈a io, “Zanaka Ondrikondriky” io Jesosy. (Jaona 1:29; 1 Petera 1:19) Fa “Bongo Ziona” io ndraiky man̈ambara toeran̈a an̈abo tanany Jesosy ndreky iro 144 000 hiaraka hanjaka aminany andan̈itry an̈y.—Salamo 2:6; Hebreo 12:22.
“Ondrikondriky vitsy” ivolan̈ana lan̈iany navoakaiky ndreky navoafidy” hiaraka hanjaka amy Kristy amy Fanajakan̈a io. (Apokalypsy 17:14; Lioka 12:32) Hitantsika baka amy zen̈y fa vitsy iro io izikoa ampiran̈iny aminy isany ondrikondrikiny Jesosy jiaby.—Jaona 10:16.
Hevitry diso momba iro olo handeha andan̈itry an̈y
Hevitry diso: Olo jiaby hengo andan̈itry.
Ny marin̈y: Zan̈ahary mampan̈anten̈a ankamarozanolo, fiain̈ana ambony tany eto.—Salamo 37:11, 29, 34.
Jesosy nivolan̈a: “Tsisy olo nanonga tandan̈itry tan̈y.” (Jaona 3:13) Hita baka amy zen̈y fa lan̈iany olo naty talohany naviany Jesosy teto tsy loso andan̈itry an̈y. Karaha ataony Abrahama, Mosesy, Joba, ndreky Davida in̈y tsy loso andan̈itry an̈y. (Asan’ny Apostoly 2:29, 34) Iro in̈y man̈anten̈a hivilomin̈y amy fiain̈ana ambony tany eto.—Joba 14:13-15.
“Fitsanganan̈a voanalohany” ivolan̈ana familoman̈a olo handeha andan̈itry an̈y io. (Apokalypsy 20:6) Dikanizen̈y, mbala hisy familoman̈a olo hafa koa. Hisy olo maty hivilomin̈y amy fiain̈ana ambony tany eto.
Ampianariny Baiboly fa izikoa fa mitondra Fanjakan̈any Zan̈ahary, “fahafatesan̈a tsy ho hisy eky.” (Apokalypsy 21:3, 4) Ambony tany eto raha tiany koran̈iny amy zen̈y, fotony tsiary nisy fahafatesan̈a tandan̈itry tan̈y.
Hevitry diso: Olo tsiaraikiaraiky mifidy hengo andan̈itry an̈y sa hidoko ambony tany eto.
Ny marin̈y: Zan̈ahary mifidy azovy panomponany tsy mivadiky aminany hamiany loka ke hahazo kaiky io, han̈anten̈a hiain̈y andan̈itry an̈y. (Filipianina 3:14) Nata olo araiky man̈iry handeha andan̈itry, tsy ho loso an̈y izy, izikoa tsy an̈isany nifidiny Zan̈ahary.—Matio 20:20-23.
Hevitry diso: Olo tsy man̈eva hahazo lan̈itry fo hiain̈y tsisy farany ambony tany eto.
Ny marin̈y: Zan̈ahary mikaiky olo sasany hahazo fiain̈ana tsisy farany ambony tany eto “olonaka” ndreky “olo nifidiko”, avio “Jehovah hitahy iro.” (Isaia 65:21-23) Iro hahazo hatsaran̈a be, fotony iro han̈atanteraka fikasan̈any Zan̈ahary tamy voanalohany tan̈y. Hanjary paradisa tany jiaby amy zen̈y, avio olo jiaby ho lavorary.—Genesisy 1:28; Salamo 115:16; Isaia 45:18.
Hevitry diso: Tsy arabakiteny 144 000 koran̈iny bokiny Apokalypsy io.
Ny marin̈y: Marin̈y ndraiky fa misy konty koran̈iny Apokalypsy ao tsy arabakiteny, sasany amizio ndraiky arabakiteny. Ohatra, izio mivolan̈a fa misy “an̈aran̈a 12 nindro apostoly 12 niny Zanaka Ondrikondriky io.” (Apokalypsy 21:14) Diniha baka porofo ahafahantsika mivolan̈a fa 144 000 io ten̈a tokony raisin̈y arabakiteny.
Apokalypsy 7:4 ao mivolan̈a “isanolo navoaisy tombokase [na olo aby efa azo antoko fa handeha andan̈itry an̈y], 144 000 iro io.” Iro “vahoaka be” koa hahazo famonjian̈a baka amy Zan̈ahary. (Apokalypsy 7:9, 10) Izikoa tsy arabakiteny 144 000 io, manjary tsisy fiavahany iro andianolo aroe io. a
[FANAMARIHANA AMBANY PEJY]
a Koran̈inizio ao koa fa iro 144 000 aby io “nivangain̈y baka taminolombelon̈o, hatao voanalohany vokatra.” (Apokalypsy 14:4) Dikany “voanalohany vokatra” zen̈y, vitsy fo olo nifidin̈a. Mety tsarabe izio ivolan̈ana iro hiaraka manjaka amy Kristy, fotony iro io vitsy izikoa ampiran̈iny amindro vahoaka tsy voakonty ambony tany eto.—Apokalypsy 5:10.
Mety ho Tianao Koa
FAMPIANARAN̈A FOTOTRO AMY BAIBOLY
Karakory ma Fanjakan̈any Zan̈ahary Zen̈y?
Tamy Jesosy tambony tany teto, raha momba Fanjakan̈any Zan̈ahary io raha ten̈a nampianariny. Rango efa ela, pianatranany mivavaka haviany Fanjakan̈a io.
RAHA AMPIANARINY BAIBOLY
Man̈ohara Mianatra Baiboly Aminay
Mangalà fianaran̈a Baiboly miaraka amy fan̈azavan̈a araikiaraiky momba fan̈anaovan̈a izio.