Vaovao Tsara Nisoratin’i Jaona 20:1-31
20 Tamin’ny andra voanalohany tamin’ny herin̈iandra,* bônera Maria Magdalena nandeha tam-pasan̈a; andra tamin’io mbala nahiziky. Hitany fa vato tamy fasan̈a io efa nafaka.
2 Ke izy nandeha nilomoay tamy Simona Petera ndreky mpianatra araiky hafa, araiky tian’i Jesosy in̈y, aviô ho izy tamindrô: “Tômpo nadosondrô tan̈atin’ny fasan̈a tao. Tsy hainay foeky aia tany nan̈apitrahandrô izy.”
3 Ke Petera ndreky mpianatra hafa io nandeha tam-pasan̈a tan̈y.
4 Irô roe lahy samby nilomoay, fa mpianatra araiky hafa io nilomoay nareren’i Petera, ke izy navy tam-pasan̈a tan̈y voanalohany.
5 Izy koa fa niôndriky in̈y, izy nahita lamba lin nipetraka tiô, fa izy fo tsy niditry.
6 Navy koa Simona Petera nan̈araka izy, aviô izy niditry tam-pasan̈a tao. Izy nahita lamba lin in̈y nipetraka tiô.
7 Lamba namon̈aosan̈a lohan’i Jesosy in̈y tsy niaraka tamy lamba sasany aby io, fa niolonkolon̈o nitaokan̈a.
8 Aviô niditry koa mpianatra araiky navy tam-pasan̈a tiô voanalohany in̈y, ke izy nahita baka iô nino raha nambara irô.
9 Mbala tsy nazava tamindrô baka raha nivolan̈in’ny Soratra Masin̈y fa izy tsy maintsy hatsangana amy maty.
10 Ke irô mpianatra aby io samby nody tan-tran̈ondrô.
11 Maria ndraiky mbala nitsangan̈a tambelan̈an’ny fasan̈a tao fo, sady nitomoan̈y. Tamin’izy mbala nitomoan̈y in̈y, izy niôndriky nizaha tan̈atin’ny fasan̈a io.
12 Izy baka tiô nahita anjely aroe nisikiny lamba fotsy, nipetraka tamy tany nan̈apitrahan̈a fatin’i Jesosy: Araiky tamy tany nisy loha, aviô araiky tamy tany nisy vity.
13 Ho irô taminany: “A man̈angy, ino ma raha mampitomoan̈y anao?” Ho izy tamindrô: “Nalaindrô Tômponaka, ke tsy haiko tany nan̈apitrahandrô izy.”
14 Izy koa fa baka nivolan̈a zen̈y, izy nitodiky ke Jesosy hitany nitsangana tiô, fa izy fo tsy tontohitry foeky fa Jesosy izio.
15 Ho Jesosy taminany: “A man̈angy, ino ma raha mampitomoan̈y anao? Azôvy ma tadiavinao?” Izy baka nieritreritry fa lelahy io mpikarakara zaridain, ke ho izy taminany: “A tômpoko anao, izikoa anao nangala izy, volàn̈a aminaka tany nan̈apitrahanao izy misy hangalako izy.”
16 Ho Jesosy taminany: “Maria!” Izy koa fa nitodiky, ho izy tamy Jesosy tamy teny hebreo: “Rabòny!” (“Mpampianatra!” dikan’izio.)
17 Ho Jesosy taminany: “Aza tanàn̈a eky zaho, fa zaho mbala tsy nanonga tamy Baba. Fa mindao mandeha amindrô rahalahiko aby io, aviô volàn̈a amindrô: ‘Zaho hanonga amy Babako salakady Babanarô, ndreky amy Zan̈ahariko salakady Zan̈aharinarô.’”
18 Ke lôso Maria Magdalena nan̈ambara vaovao aby io tamy mpianatra aby io, ke ho izy: “Zaho nahita Tômpo!” Baka iô nivolan̈iny tamindrô raha nivolan̈in’i Jesosy taminany.
19 Izikoa fa hariva andra, tamin’ny andra voanalohany tamin’ny herin̈iandra io, Jesosy navy ke nitsangana tan̈ivondrô mpianatra aby io tiô. Irô tamin’io nifody tan̈atin’ny tran̈o, fôtony irô navozo irô Jiosy aby io. Ke ho Jesosy tamindrô: “Irarian̈a anarô hahazo fiadanan̈a.”
20 Izy koa fa baka nivolan̈a zen̈y, naboakany irô tan̈anany ndreky tritrinany. Ke irô mpianatra aby io ravoravo nahita Tômpo.
21 Ho Jesosy tamindrô ndraiky koa: “Irarian̈a anarô hahazo fiadanan̈a. Karaha nataon’ny Baba nan̈iraka zaho, zaho koa man̈iraka anarô.”
22 Izy koa fa baka nivolan̈a zen̈y, nitsofiny irô aviô ho izy: “Mazahoa fan̈ahy masin̈y.
23 Zay fahotan̈a ambelanarô, ho voavela; fa zay fahotan̈a tsy ambelanarô ndraiky, tsy ho voavela.”
24 Fa Tomasy, araiky tamindrô 12 Lahy, tsy azôvy zen̈y fa araiky kahian̈a i Amba in̈y, tsy tiô tamy Jesosy navy tiô.
25 Ke ho irô mpianatra hafa aby io taminany: “Zahay nahita Tômpo!” Fa ho izy tamindrô: “Zaho koa tsy mahita dian’ny kolò amy tan̈ananany, baka iô tôndronaka ataoko amy dian’ny kolò io iô, aviô tan̈ananaka ataoko amy tritrinany, zaho tsy mety hino zen̈y.”
26 Valo andra tafaran’izen̈y, tan-tran̈o tao ndraiky koa irô mpianatranany aby io. Tomasy tamin’io niaraka tamindrô tiô. Ndray varavaran̈a nigadra, Jesosy navy aviô nitsangana tan̈ivondrô tiô. Ho izy: “Irarian̈a anarô hahazo fiadanan̈a.”
27 Hoy izy baka tiô tamy Tomasy: “Ataova eto tôndronao, aviô zahava tan̈ananaka. Ataova amy tritrinaka eto tan̈ananao, ke voleza misalasala* fa minoa.”
28 Ho Tomasy: “Tômponaka ndreky Zan̈aharinaka!”
29 Ho Jesosy taminany: “Baka amin’ny anao nahita zaho ma mahavy anao mino? Sambatra lan̈iany olo tsy nahita kanefa mino.”
30 Mazava ho azy fa, Jesosy nan̈ano famantaran̈a* maro hafa koa nan̈oloan̈a irô mpianatra aby io, fa raha aby zen̈y tsy voasoratra an̈atin’ny horonam-boky ty.
31 Fa irô io nisoratin̈y amy zen̈y anarô hino fa Jesosy io Kristy, Zanakan’ny Zan̈ahary, ke baka amy finoan̈anarô zen̈y hahavy anarô hahazo fiainan̈a baka amin’ny an̈aran̈anany.
Lamariky amy Pazy Ambany
^ Dimansy izio. Tamindrô Jiosy aby io, io andra voanalohany amin’ny herin̈iandra.
^ Abt: “tsy mino.”
^ Na: “fahagagan̈a.”
