Vaovao Tsara Nisoratin’i Matio 11:1-30
11 Jesosy koa fa baka nivolan̈a tamy mpianatranany 12 aby io raha tôkony hataondrô, lôso izy nandeha nitory ndreky nampianatra tamy tanàna man̈odidin̈y.
2 Jaony tamy zen̈y nigadra. Fa izikoa efa ren̈iny raha nataon’i Kristy, izy nan̈iraka mpianatranany
3 han̈ontany Jesosy karaha ty: “Anao ma Araiky ho avy, sa zahay mbala tôkony hiambin̈y olo hafa?”
4 Ho Jesosy tamindrô: “Mindao tantarà amy Jaony raha ren̈inarô ndreky hitanarô aby ty:
5 Olo gila manjary mahita, ny malemy vity mahavita mandeha, olo boka manjary madio, ny maren̈iny lôso maharen̈y raha, olo efa maty mimpody velon̈o ndraiky, baka iô olo masikiny itorian̈a vaovao tsara.
6 Sambatra lan̈iany olo tsy misalasala fa zaho Araiky nampan̈antin̈ain’ny Zan̈ahary.”*
7 Irô mpianatran’i Jaony aby io koa fa lôso, karaha ty ho Jesosy tamy vahoaka aby io momba Jaony: “Ino ma dianarô tamy tany paiky tan̈y? Nandeha nizaha bararata afikofikon’ny tsiko?
8 Va ino dianarô tan̈y? Nandeha nizaha olo misikiny lamba tsara mare?* Efa amy tran̈on’ny mpanjaka edy ahitan̈a olo misikiny lamba karaha zen̈y.
9 Ke ino marin̈y ma raha ten̈a tianarô ho hita? Mpaminan̈y? Zaho man̈ambara anarô fa izy mbala beben’ny mpaminan̈y.
10 Karaha ty raha efa voasoratra momba izy: ‘Mpitondra hafatranaka hirahiko handeha alohanao,* ke izy han̈amboatra lalan̈a himboanao.’
11 Ambarako anarô mazava tsarabe fa, izikoa mbala olo naterakan’ny man̈angy fo, mbala tsisy be mandilatra Jaony Mpan̈ano Batisa. Kanefa zay olo farany hely amy Fanjakan̈an’ny lan̈itry mbala be mandilatra izy.
12 Rango tamin’ny andran’i Jaony Mpan̈ano Batisa firaka iziô, mifen̈y angôvo jiaby olo baka irô ho tafiditry amy Fanjakan̈an’ny lan̈itry; ary zay olo mifen̈y mare karaha zen̈y fo tafiditry an̈y.
13 Fôtony na Mpaminan̈y na Lalàn̈a samby efa naminan̈y,* firaka tamy fotoan̈a navian’i Jaony.
14 Ke na ikenarô na tsy ikenarô, izy ‘Elia nambara fa ho avy.’
15 Lan̈iany manan̈a sofin̈y, mitandrin̈esa tsarabe.
16 “Hampiran̈iko amin-jôvy taranaka ty? Izity miran̈a tsaiky misaoma a bazary sady mandronton̈o tsaiky saoma araiky amindrô karaha ty:
17 ‘Zahay efa nitsoko sodin̈y, kanefa anarô tsy nitsinjaka. Zahay efa niafatrafatra nitomoan̈y, kanefa anarô tsy nalahelo foeky.’*
18 Karaha zen̈y koa, Jaony koa fa navy, izy tsy nihinan̈a sady tsy nigiaka,* kanefa olo nivolan̈a: ‘Izy misy demony.’
19 Zanak’olo ndraiky navy, nihinan̈a ndreky nigiaka, kanefa olo mbala nivolan̈a fo: ‘Zahava! Angoain̈y ay! Sady migiaka* koa! Izy amy zen̈y kamaradindrô mpamory hetra ndreky mpanota aby io.’ Kanefa, hita baka amy raha ataon’olo araiky, na izy misy jery na izy tsisy jery.”
20 Ke izy nan̈amia tsin̈y olo nipetraka tamindrô tanàna aby nan̈anaovany ankamaraozan’ny fahagagan̈a, fôtony irô tsy nibebaka.
21 Ho izy: “Ho azon-draha anao, Korazina! Ho azon-draha koa anao, Betsaïda! Izikoa fahagagan̈a natao taminarô tao edy natao ta Tyro ndreky ta Sidona, ôtrizay efa ela irô nibebaka ke nisikiny lamba gony ndreky nihôsotro jôfo.
22 Ambarako anarô fa mbala ho kirikiry raha havoa Tyro ndreky Sidona amin’ny Andra Fitsaran̈a, tozay raha havoa anarô.
23 Baka iô anao, Kapernaomy, anao ma mihevitry fa anao hampanongain̈a ziska amy lan̈itry an̈y? Hijotso amy Fasan̈a* an̈y anao! Izikoa ta Sodoma edy nan̈anaovan̈a fahagagan̈a aby natao taminao tao, ôtrizay mbala tiô tanàna io firaka iziô.
24 Ambarako anao fa mbala ho kirikiry raha havoa Sodoma amin’ny Andra Fitsaran̈a, tozay raha havoa anao.”
25 Tafaran’izen̈y, Jesosy nivolan̈a: “Baba, Tômpon’ny lan̈itry ndreky tany, midera anao man̈oloan̈a olo jiaby eto zaho, fôtony raha aby zen̈y nasitrikinao tamin’olo misy jery ndreky mahay raha, fa nataonao hain’ny tsaiky hely.*
26 Sady zen̈y lastiô sitrapônao, Baba!
27 Efa nankin̈in’ny Babako taminaka aby raha jiaby. Tsisy olo ten̈a mahay zaho,* izikoa tsy Babako; aviô tsisy olo ten̈a mahay Babako, izikoa tsy zaho* ndreky zay olo tiako hahay raha momba izy.
28 Mavia aminaka atỳ lan̈iany lonja* mare ndreky mitondra entan̈a mavesatra, fa zaho hamelombelon̈o anarô.
29 Indesa lazioganaka, baka iô ambilà zaho hampianatra anarô; ho velombelon̈o anarô, fôtony zaho tsara fan̈ahy ndreky manetry ten̈a.*
30 Fôtony lazioganaka mora indesin̈y, aviô entan̈anaka mahivan̈a.”
Lamariky amy Pazy Ambany
^ Abt: “lan̈iany olo tsy avoatsikon̈o baka aminaka.”
^ Abt: “lamba malemilemy.”
^ Abt: “man̈oloan̈a saoranao.”
^ Na: “efa nan̈ambara raha mbala ho avy.”
^ Abt: “tsy namango tratra baka amin’ny alahelo.”
^ Na: “tsy nigiaka divain.”
^ Abt: “migiaka divain.”
^ Na: “hain’olo manetry ten̈a ndreky mora ampianarin̈y.”
^ Abt: “Zanaka.”
^ Abt: “Zanaka.”
^ Na: “miasa.”
^ Abt: “manetry ten̈a am-pô.”
