Vaovao Tsara Nisoratin’i Matio 7:1-29
7 “Aza mitsara eky baka anarô tsy hitsarain̈a;
2 fôtony arakaraka fomba hitsaranarô olo hitsaran̈a anarô, aviô arakaraka raha ataonarô amin’olo raha ataondrô aminarô.
3 Ke nan̈ino anao mizaha tapaka kakazo amy mason’ny rahalahinao, kanefa bolongan’ny kakazo amy masonao tsy hitanao aby?
4 Aviô akôry hasakianao mivolan̈a amy rahalahinao: ‘Ambesa hadosoko tapaka kakazo amy masonao’, kanefa amy masonao misy bolongan’ny kakazo?
5 Mpihatsaravelatsihy! Adosoa antsendriky bolongan’ny kakazo amy masonao, amy zen̈y ho hitanao tsarabe fomba han̈adosoan̈a tapaka kakazo amy mason’ny rahalahinao.
6 “Aza amezan̈a amboa raha efa voataokan̈a nin’ny Zan̈ahary,* aviô perlanarô aza atsipy amy kômankory, tsao raha aby io hidiadiavindrô baka iô anarô hifoterandrô ke hiratravindrô mare.
7 “Mangataha fo, fa anarô hamian̈a edy. Mitadiava fo, fa anarô hahita edy. Konkòn̈a fo, fa anarô hibiafin̈y edy.
8 Fôtony lan̈iany olo mangataka, hahazo; lan̈iany olo mitady, hahita; aviô lan̈iany olo mikonkòn̈o, hibiafin̈y.
9 Izikoa zanakanarô mangataka môfo aminarô, sakinarô han̈amia izy vato?
10 Na izikoa izy mangataka laoko, sakinarô han̈amia izy bibilava?
11 Ndray anarô olombelon̈o mpanota* fo mahay man̈amia raha tsara zanakanarô, ke intsaka eky Babanarô an-dan̈itry an̈y! Matokisa fa izy han̈amia raha tsara lan̈iany olo mangataka aminany.
12 “Ke zay raha tianarô hataon’olo aminarô, ataova amindrô koa. Ny marin̈y aminany, zen̈y raha ampianarin’ny Lalàn̈a ndreky Mpaminan̈y.
13 “Midira amy barô maletry, fôtony maventy barô mandeha amy fandripahan̈a aviô malalaka lalan̈a mandeha amy fahafatesan̈a,* ke maro olo man̈an̈y.
14 Kanefa, maletry barô mandeha amy fiainan̈a, aviô maletry lalan̈a man̈an̈y, ke vitsy fo olo mahita izio.
15 “Mitandrema amy mpaminan̈y sandoko. Irô man̈aton̈o anarô man̈ano sary ôndrikôndriky, kanefa ny marin̈y aminany, irô io amboadỳ masiaka efa vôn̈ono han̈ekitry.
16 Baka amy voany* hahaizanarô irô. Asa anarô mba efa nahita olo nitsôngo rezain na aviavy amy raha maniry feno fatsiky? Tsisy olo man̈ano zen̈y!
17 Karaha zen̈y koa fa, zay kakazo tsara jiaby man̈amia voany tsara, fa zay kakazo ratsy jiaby ndraiky man̈amia voany ratsy.
18 Kakazo tsara tsy mety han̈amia voany ratsy, baka iô kakazo ratsy tsy mety han̈amia voany tsara.
19 Lan̈iany kakazo tsy man̈amia voany tsara hitiven̈y, baka iô hatsipy an̈atin’ny môtro.
20 Ke baka amy raha ataondrô* mpaminan̈y sandoko aby io hahaizanarô irô.
21 “Tsy kila olo mivolan̈a aminaka: ‘Tômpo, a Tômpo’, hiditry amy Fanjakan̈an’ny lan̈itry, fa zay olo man̈ano sitrapôn’ny Babako an-dan̈itry an̈y fo hiditry an̈y.
22 Ho avy andra, maro olo hivolan̈a aminaka karaha ty: ‘Tômpo, a Tômpo, zahay ma tsy efa nampiasa an̈aran̈anao izikoa fa naminan̈y, ndreky nampiasa an̈aran̈anao izikoa fa nan̈aboaka demony, aviô nampiasa an̈aran̈anao izikoa fa nan̈ano fahagagan̈a maro?’
23 Fa ho zaho amindrô: ‘Anarô tsy haiko foeky! Mialà aminaka eto anarô mpandika lalàn̈a!’
24 “Zay olo maharen̈y volan̈anaka aby zen̈y ke man̈araka irô io, miran̈a lelahy araiky misain̈y niasa tran̈onany tan̈abon’ny lampimbato.
25 Ke ndray latsaka mare mahalen̈y, baka iô nisy tondra-drano, aviô nisy tsiko mare nandalo, tran̈o io tsy rongana foeky fôtony izio naôrin̈y tan̈abon’ny lampimbato.
26 Fa zay olo maharen̈y volan̈anaka aby zen̈y ndraiky kanefa tsy man̈araka irô io, miran̈a lelahy araiky tsy misain̈y niasa tran̈onany tan̈abon’ny jia.
27 Mahalen̈y koa fa latsaka mare, baka iô nisy tondra-drano, aviô nisy tsiko mare nandalo, rongana tran̈o io, ke tsisy raha nety nisambôrin̈y foeky!”
28 Jesosy koa fa baka nivolan̈a raha aby zen̈y, lany fan̈ahy olo aby io naharen̈y fomba fampianarany,
29 fôtony naboakany tsarabe fa baka amy Zan̈ahary raha nampianariny,* fa tsy karaha zen̈y ndraiky nataondrô mpanoratra lalàn̈a aby io.
Lamariky amy Pazy Ambany
^ Abt: “raha masin̈y.”
^ Na: “ratsy fan̈ahy.”
^ Abt: “fandripahan̈a.”
^ Na: “raha ataondrô.”
^ Abt: “amy voandrô.”
^ Abt: “fôtony karaha olo manan̈a fahifan̈a izy koa fa nampianatra.”
